MATHI 28
28
Langngaibü
(Mk 16.1-10; Lk 24.1-12; Jn 20.1-10)
1Nounyet phaia, balea shaangbounyet lange saojinei, Mari Magdalin si lubü Mari heekhün to chühla loukei.
2Tou selo kaang nyikei; aishanga Bunyubou khuthük hangangbü khuthük ka louyenan laangdak kho khokan apbei hoba kho thüka setkei. 3Hao chühla langpon tegü, hoba haoeibü neisimei ninthu tegü thupaian kikei. 4Lombou shuong hao to hatbü ka lühkei hoba haibü tegü yeikei. 5Kheijinei khuthük hangangbüei yaksa shuong to laukei, “Kan ai tehüt, Jisu ao peiseia thüngkei kanei hao lamda dogo ngei ngeakei. 6Hao hanei aki; aishanga haoei laubü tegü hao langngaia. Kaiya, hao yepshang chühashi; 7hoba tongde hauan hao eikshuong la lenashi, ‘Hao haibü ka langngaia; hoba hao kan to shaang Galil to hauda; kanei hao khünei haplabü. Chühashi, ngei kan la lena.’ ” 8Haoen hatbü hoba olinbü ka hee ka tongde satkei, hoba haoeibü eikshuong la lenla laangjung haukei. 9Mangde Jisu haoen thedanga lokei hoba laukei, “Maisho kishi!” Haoen louan haoeibü youa hatan hao lembei. 10Kheijinei Jisuei haoen to laukei, “Tehüt. Hauan ngeibü jaisinasi shuong to Galil to hauashi dogo lenshi, hoba khünei haoenei ngo haplabü.”
Lombü shuongeibü Ngühlang
11Yaksa shuong lama hauko kitoua, lombü shuong atei sangnyu to louan ungshedbou shuong to ai ong haüthükkei pendou lenkei. 12Haoen jaishou shuong yoan kamshaian lauyoan phaia, haoenei sepai shuong la nam juong kuko 13laukei, “ ‘Kün yepan kijinei, hao eikshuong nangnak louan hao sunglangkei’ dogo kanei lauashi. 14Hobaje ho governorei dida longa künei hao suletlabü hoba kan maangmau ka püetlabü.” 15Haoenei nam kho sungkei hoba haoen la lenbü tegü kümbei. Ho ngüh Jihudabü yoa tat sühko nyakko phinthonda.
Jisu Hao Eikshuong la Longan Lenbü
(Mk 16.14-18; Lk 24.36-49; Jn 20.19-23; Ykj 1.6-8)
16Eik Anthükche kho Galila kibü, Jisuei haoen la lenbü shongh to haukei. 17Haoenei hao hapjinei hao lembei; lausikei atei toknokkei. 18Jisu louan haoen to joyoko laukei, “Khuthüka hoba kaodaka sei pendou kü la kua. 19Hibü, hauashi hoba phang pendou eik la yeitiashi. Bou, Shou hoba Soushou Saopobü nyena haoen baptikushi; 20ngei kan la ai ong sakkukei kho pendou jungeila haoen la lenashi; hoba chühashi, kaodak athon shongko ngo kan yoa ponpen yoakei.”
Currently Selected:
MATHI 28: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.