YouVersion Logo
Search Icon

MATHI 22

22
Chemkanlem Ngühphatbü
(Lk 14.15-24)
1Jisuei nyibou haoen to ngühphatbüei lenko laukei: 2“Khuthük Sangle Choba cheei haoshou shanga chemkanlem oknyinbü phatkei. 3Haoei hao sambü shuong lem to chibü shuong ngala hautikei, lausikei haoenei loumang asüh.
4“Nyibou haoei lubü sambü shuong hautiko laukei, ‘Chian kibü shuong to lenashi, Chühashi, kü shausiyung lamleakei, ngeibü masu pongsu hoba amenbü samkeisamuk haitiakei, hoba ajanjan khümbo lamleakei. Chemkanlem to kaiya.’ 5Lausikei haoenei maang akuko lulu haang to, che haoeibü sek to, hoba lubü che namyakshang to, dogo linkei. 6Joubü shuongei hao sambü shuong lapan himou bauko jungeikei hoba haoen haitikei. 7Choba khau angkei; hoba haoei hao sepai shuong hautian khübü müt haitibü shuong shemtikei, hoba haoeneibü sangnyu thekei. 8Kheijinei haoei hao sambü shuong to laukei, ‘Chemkanlem lamleakei, lausikei chibü shuong amu. 9Hibü kan khongyaang lambhek to hauashi, hoba kanei ladüng haplaje pendou chemkanlem to ngashi.’ 10Sambü shuong lambhek to aakei, hoba haoenei hapbü maibü amaibü pendou leishaikei; hoba chemkan chem yenei shenkei.
11“Lausikei Chobaei yenbou shuong to chühla lotjinei haoenei khünei chemkan nei aneibü che hapbei. 12Haoei hao to laukei, ‘Jena, no hato chemkan nei aneiko lai lotkei?’ Lausikei haoei ngüh üang. 13Kheijinei Choba sambü shuong to laukei, ‘Hao youa ika khühashi, hoba hao tangaenei nakthühbüa tekan apashi. Khünei haapbo hauh uyolabü;’ 14aishanga juongnyu ngada lausikei shijo ong pienda.”
Khüm Atbü shangabü Phebü
(Mk 12.13-17; Lk 20.20-26)
15Kheijinei Farisi shuongei hauan hao ngüh sunga lai mintila huon kümbei. 16Haoenei haoeneibü eikshuong Herodeibü eikshuong yoa liko hao jungto hautikei hoba haoenei laukei, “Lenbou, no ngühmaang lanbü, hoba nyi ngühmaia Mühghaü lam lenda, hoba ao to ühütda dogo künei ngekei; aishanga nyi müt the to achühda. 17Hibü, kün to lenbü; nyi ai damda? Kaisar la khümnam kujan si akujan?” 18Lausikei Jisuei haoen amaibü chühenkei hoba laukei, “Hibüyoubü dan, kanei aila ngo huonda? 19Khümnam kho kü la lenbü.” Haoenei sempak che hao la sungbakei, 20hoba haoei haoen to laukei, “Ho aoeibü noksa hoba nyendobü?” 21Haoenei laukei, “Kaisareibü.” Kheijinei Jisuei haoen to laukei, “Yingalonga ai Kaisareibü kho Kaisar la kuashi hoba ai Mühghaüeibü kho Mühghaü la kuashi.” 22Ladang haoenei kho ditkei haoen maangpangkei, hoba haoenei hao apyoan satkei.
Haibü ka Langngaibü shangabü Pheyobü
(Mk 12.18-27; Lk 20.27-40)
23Khünyet haibü shuong alangngaida dogo laubü Saduki shuong hao jungto loukei hoba hao to pheko 24laukei, “Lenbou, Mosaei laukei, ‘Müt che shousi akiko haialonga, haoenei latnyu kho leiyetlabü hoba haojai shanga youyik longtilabü.’ 25Kün yoa jaisinasi nyet kikei. Shaangbou kho chem kanan haikei; hoba youyik akiko haoyak haona la phoyokukei. 26Kho tegü ong nyiboubü, hoba semboubü, hoba nyetboubüa sühko haüthükkei. 27Pendou to thonla yaksa kho haikei. 28Hibü langngaijinei nyet yo khünei sao ao yak yingla? Aishanga pendouei sao yakla lekei.” 29Jisuei haoen to jongaikei, “Kan satan apashi, aieilausi kanei Laishiba ayingsi Mühghaü sei angekei. 30Aishanga langngaijinei haoenei chem akanda, ayingsi laolamla ohautida, lausikei haoen khuthüka khuthük hangangbü shuong tegü ki. 31Lausikei haibü ka langngaibü shangabü Müghaüei kan to, 32‘Ngo Abraham Müghaü, Isak Mühghaü hoba Jakob Müghaü’ dogo laubü wean achüh lo? Hao haibü shuong Mühghaü aying lausikei langkeibü Mühghaü ki.” 33Ho ditjinei noknyüh haoei lenbüa maangpangkei.
Ngühkhüm Yaangbou
(Mk 12.28-34; Lk 10.25-28)
34Ladang haoei Sadukibü shuong ngüh alongko jangtibü ditkei, Farisi shuong che la takshatkei. 35Haoen yo kabü Ngühkhüm lenbou cheei hao huonko phekei, 36“Lenbou, Ngühkhüma sakkubü pendou to laobou yaangkei?” 37Haoei hao to laukei, “Ka maangpon pendouei, ka soushou pendouei, hoba kaibü sensimaang pendouei nyi Bunyubou ka Mühghaü sanouashi.” 38Ho kongnyubou hoba shaangbou ngühkhüm ki. 39Ho phatko thenkabou ho ki: “Nyi ka lepbou to jembü tegü sanoujan.” 40Habü sakkubü nyi honei Ngühkhüm hoba Thuseibü shuong ngüh khümbo nongakei.
Khrista shangabü Phebü
(Mk 12.35-37; Lk 20.41-44)
41Farisibü pendou yoshaian kijinei Jisuei haoen to phekei, 42“Kanei Khrista shangabü ai damda? Hao aoshou?” Haoenei hao to laukei, “Dawid shou.” 43Haoei haoen to laukei, “Kholonga ailai küman, Dawid Soushouei jungeiko hao to,
44‘Bunyubouei ngeibü Bunyubou to lenkei,
Ngei kaibü dangbou shuong ka you phanga
aphoku shongko kü maenei
setshi,’ dogo lauko, ‘Bunyubou’ dogo ngada?
45Dawidei hao to ‘Bunyubou’ dogo ngaa longaje ailai küman hao hao shou yingla?”
46Aoeikei hao to ngühpem che ongkei ajongaien, hoba khünyet ka jaüan touje aoeikei hao to phebü phela maang ayaangen.

Currently Selected:

MATHI 22: CHANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy