YouVersion Logo
Search Icon

MATHI 21

21
Jerusalem to Thükhapbo Atbü
(Mk 11.1-11; Lk 19.28-40; Jn 12.12-19)
1Haoen Jerusalem nyangko sühlangkei hoba Oliv shongha kibü Bethfage to loukei. Jisuei eik nyi, 2haosi to hai lauko hautikei, “Kasi thedang kabü sang to atashi, hoba khonei gadu che phenan shoushou yoa haplabü. Khünyi sengan kü jungto leiba, 3hoba atei kasi to aiche laua longa, ‘Bunyubouei khamda’ dogo lenshi; kheijinei haoei ham hautilabü.” 4#Zec 9.9 Ho thuseibü danko,
5“Zion nouyangshou to lenashi,
Chühashi, ka Choba eaaoa gadu thüka,
khei gadu shoushou thüka setan ka jungto louada” dogo laubü kho loushedla shanga haüthükkei.
6Eik nyi haukei hoba Jisuei haosi la sakkubü tegü kümbei. 7Haosiei gadu si shoushou kho leibakei, hoba haoeneibü neisimei khünyi thüka seikukei, hoba hao khonei setkei. 8Mütshang yaangbüei haoeneibü neisimei lamnyua imbukei, hoba lubü shuongei bunyu ka buham wetan lamnyua imbukei. 9Hao thedang to haubü hoba hao phainei yangbü noknyüh shuongei ngekko laukei, “Dawid Shou, Khümenashi! Bunyubou nyena loubü haülabü yingshi. Thükkaboua nyensang yaang yingshi!” 10Ladang hao Jerusalem to atkei, sangnyu khümbo panglangyokei. “Kho ao?” dogo haoenei laukei.
11Noknyühei laukei, “Ho Galil kaodaka Nazaret kabü thuseibü Jisu.”
Jisu Lembüchem to Haubü
(Mk 11.15-19; Lk 19.45-48; Jn 2.13-22)
12Jisu lembü chem to atkei, hoba yakbü hoba jekbü dan pendou shian sattikei; haoei namjeibü daneibü khümsuok si dukutuk yakbü daneibü setshang khokan koutikei; 13#Isa 56.7 hoba haoei haoen to laukei, “Laishibaei lauda, ‘Küchem to welaubü chem dogo nyenlabü’; lausikei kanei ho kokbü shuongeibü laangbob la yeitida.”
14Nyekthubü si sokebü shuong lembü chem to hao jungto loukei, hoba haoei haoen maitikei. 15Ladang ungshedbou shuong si Ngühkhüm lenbou shuongei haoei maangpanglabü kümsilei kümbü, hoba “Dawid Shou, Khümenashi!” dogo nashousi shuongei lembü chema ngekyobü hapbei haoen khauangkei, 16#NC 8.2 hoba haoenei hao to laukei, “Haoenei laubü kho nyi ditdalao?” Jisuei haoen to laukei, “Aika; ‘Nyi nasak hoba senshepbü sembung ka nyensangbü soutia’ dogo kanei ladangkei awe lo?” 17Haoei haoen apyokei, hoba sangnyu ka longan Bethani to atkei, hoba khünei thüngkei.
Jisuei Bhuklong to Khükbüokbü
(Mk 11.12-14,20-24)
18Hao ngeyang ete longeijinei hao mühei haikei. 19Haoei lam- phanga bhuklong che hapan khüto lousi yik to liman ai ühüp. Haoei khüto laukei, “Tou ka jaüan ladangkei ka to mai tehek!” Hobaje bhuklong khoyam yuikei. 20Eikshuongei kho hapan maang- pangkei hoba laukei, “Ailaibü bhuklong khoyam yuian apbei?” 21Jisuei haoen to jongaikei, “Ngühmaia ngei kan to lenda, kanei atoknokko mailemsije, bhuklong to ai kümbei, kanei khüjo ong kümla aying, lausikei kanei ho shongh to mangkei, ‘No haka tonlangan simaangto thapjung atashi’, dogo laulabü, hoba kho haüthüklabü; 22mailembo welaubüei kanei ai ong hilaje pendou kanei haplabü.”
Jisueibü Hau shangabü Phebü
(Mk 11.27-33; Lk 20.1-8)
23Hao lembü chem to atan songlenko kijinei, ungshedbou shuong si jaishou shuong louan hao to laukei, “Ai hauei nyi habü kümda? Aoei ka la ho hau kukei?” 24Jisuei haoen to jongaikei, “Ngeikei kan ka che phelabü. Kanei kü la kho lenalonga ngeikei ai hauei habü kümsilei kümda, kho kan la lenlabü. 25Johan Baptikubü laka loukei, khuthük ka si müt ka?” Haoen si haoen wetyoko laukei, “ ‘Khuthük ka’, dogo senei laualonga, ‘Khülonga aila kanei hao to maialem?’ dogo haoei sen to laulabü. 26Senei ‘Müt ka’, dogo laualonga senei noknyüh to hatda; aishanga pendouei Johan kho thuseibü che dogo sungletda.” 27Haoenei Jisu to jongaikei, “Künei angekei.” Haoei haoen to laukei, “Ngei ai hauei habü kümsilei kümda kho ngei kan to telenkho.”
Shousi Müt Nyieibü Ngühphatbü
28“Kanei ai damda? Müt cheei shousi müt nyi kikei, haoei shaangbou jungto hauan laukei, ‘Kü shou, hauashi hoba tat semlühlaaka kümaleiashi.’ 29Haoei jongaikei, ‘Ngo akoulabü.’ Kho phaia haoei haoeibü maang kümetkei hoba koukei. 30Haoei nyiboubü jungto hauan jeteibü ngüh kho ong laukei. Haoei jongaikei, ‘Koukho, yaangbou’; lausikei hao akou. 31Khünyi yo ka bouei maangangbü laobouei kümbei?” Haoenei laukei, “Shaangbouei.” Jisuei haoen to laukei, “Ngühmaia ngei kan to lenda, khüm hebü shuong si suonlamnyu shuong kan to shaang Khuthük Sangle to atda. 32Aishanga Johan kan jungto louan saopobü lamnyu lenkei hoba kanei hao to maialem; lausikei khüm hebü shuong si suonlamnyu shuongei hao to mailembei. Kanei kho hapbei, lausikei phaito ongkei maangpon sepeian hao to maialem.”
Semlühlaaka Khüpbü shuongeibü Ngühphatbü
(Mk 12.1-12; Lk 20.9-19)
33“Lubü ngühphatbü che ditashi: Sekbubou che kikei, haoei semlühlaak lekei, hoba kho kaiko ba lekei, hoba khonei nitshang thukei, hoba lapheishon che shekei. Haoei kho moubü shuong la apyoan kaonyek saabü che to satkei. 34Ladang mai kheilabü jih lousühkei haoei jembü mai hapla shanga sekmoubü shuong jungto jembü sambü shuong koutikei. 35Sekmoubü shuongei hao sambü shuong lapbei, che to ngümbei, lubü che haoenei haitikei, hoba lubü che haoenei laangei tetetkei. 36Nyiboukei haoei shaangbou to juongbou lubü sambü shuong koutikei, hoba haoenei kho tegü ong haoen to jungeikei. 37Phaila haoei haoen jungto haoshou koutiko laukei, ‘Haoenei küshou to soumo hatlabü.’ 38Lausikei ladang sekmoubü shuongei shou kho hapbei haoen yoa joyoko laukei, ‘Phetphanlabou kho ho yingkei. Kaiya, senei hao haitikho, hoba haoeibü peisilei sungkho.’ 39Haoenei hao lapbei, hoba semlühlaak ka hao shian sattikei, hoba hao haitikei. 40Hibü ladang sekbubou loulaje haoei khübü sekmoubü shuong to ai kümla?” 41Haoenei hao to laukei, “Haoei khübü amaibü shuong kho aonouko mautilabü, hoba jih sühbüa sekmoubü aoyouei hao la mai kula, kheibü sekmoubü la haoei semlühlaak kho thounoutilabü.” 42Jisuei haoen to laukei, “Kanei Laishibaa:
‘Chemdangbü shuongei laobou laang ale,
kho chemnyek laang la yeikei;
ho Bunyubouei kümbei hoba sen thea maangpanglabü ki’,
dogo laubü kho ladangkei wean achühkei lo? 43Hibü ngei kan la lenda, kan ka Mühghaü Sangle langlabü, hoba mai hekbü phang che la kulabü.
44(Aoyou kho laang thüka atetlaje hao netla yeilabü,
hoba ho ao thükto lotlaje hao thamngu la yeiko ngünnyinlabü.)”
45Ungshedbü shuong hoba Farisi shuongei haoeibü ngüh- phatbü ditjinei, haoei haoen shangabü lauda dogo haoenei shuokkei, 46hoba haoenei hao lapla komeiko kiasikei haoenei noknyüh to hatkei, aieilausi noknyühei hao thuseibü dogo dambei.

Currently Selected:

MATHI 21: CHANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy