MATHI 16
16
Seikümseilei Mangsühbü
(Mk 8.11-13; Lk 12.54-56)
1Farisi hoba Saduki shuong loukei, hoba hao takteiko khuthük ka haoen la amaaphilabü che lenbü dogo phekei. 2Haoei haoen to jongaikei, “Ladang chasem sühdaje kanei lauda, ‘Chalou mailabü, aieilausi müh sakteiakei.’ 3Hobaje ngeyang, ‘Tat yeinak loulabü, aieilausi müh saklangle sangmei shangakei.’ Kanei mühnyu tetenda; khülonga kanei jihsiphaieibü amaaphilabü alenenda si? 4Amaibü hoba asangalanbü metenei amaaphelabü lamda, hoba Jona amaphelabü to liman lubü ai amaaphelabü akulabü.” Hobaje Jisuei haoen apyoan satkei.
Farisi hoba Saduki shuong Tokai
(Mk 8.14-21)
5Eikshuong thi yungko sühkei hoba haoenei wentek künla makei. 6Jisuei haoen to laukei, “Maangsangashi! Farisi si Saduki shuong tokai to maangsangashi.” 7Haoen si haoen kanglanga joyoko laukei, “Senei wentek asungba.” 8Jisuei kho ngekei hoba laukei, “Kaneibü mailem latetche hankei! Kanei aila tükdebü wentek akünbü shanga lauyoda? 9Kanei tou sühko ashuokda lo? Hobaje kanei wentek ngao müt hajar ngao la shombuan tokei kanei kam ladüng heshaikei kho kanei adamenda lo? 10Hobaje wentek nyet müt hajar lei la shombuan kanei kam ladüng heshaikei? 11Ngei kan la wentek shangabü alen dogo kanei lai aditenda? Lausikei Farisi si Saduki shuong tokai to maangsangashi.” 12Kheijinei haoenei haoei haoen to wentek shanga jungeibou tokai aying, lausikei Farisi si Saduki shuong lenbü to maangsangla shanga laukei dogo shuokkei.
Peterei Jisu shangabü Tang Khitbü
(Mk 8.27-30; Lk 9.18-21)
13Ladang Jisu Kaisariaa Filipi kaophei to loukei haoei hao eikshuong to phekei, “Mütshuongei Müteibü Shou to ao dogo lauda?” 14Haoenei laukei, “Atei, ‘Johan Baptibou’; atei, ‘Elija’; hoba atei, ‘Jeremia’ ayingsi ‘thuseibü yoa che’ dogo lauda.” 15Haoei haoen to laukei, “Lausikei kanei ngo ao dogo lauda?” 16Simon Peterei jongaikei, “No langkei Mühghaü Shou, Khrista.” 17Jisuei hao to jongaikei, “Jona shou Simon, no haübou; aishanga khuthüka kibü Kübou to liman kaodakbü aoeikei ho ka to tang akhitti.
18“Tokei ngei ka to lenda, ‘No Peter’, (tetlabü Laangdak) hoba ho laang thüka ngei kü lashong huonglabü, hoba haibüei kho athüklanglabü. 19Ngei ka la Khuthük Sangle koukhin kulabü, hoba nyi ai ong kaodaka khühlaje kho khuthüka khühlabü, hoba nyi kaodaka ai ong sengkulaje kho khuthüka sengkulabü.” 20Kheijinei hao Khrista yingkei dogo aolakei alenla shanga haoei hao eikshuong to kaangkosekko lenkei.
Jisuei Hao Khonkulabü si Hailabü shangabü Lenbü
(Mk 8.31—9.1; Lk 9.22-27)
21Kho jih ka jaüan hao Jerusalem to haujan, hoba jaishou shuong, hoba ungshedbou shuong hoba Ngühkhüm lenbou shuong ka khonku juong hapjan, hoba haitijan, hoba sembounyet langngaijan, dogo Jisuei jembü eikshuong la lenla khangkei. 22Peterei hao leilangkei hoba hakeiko laukei, “Bunyubou, Mühghaüei kho lothetshi! Kho ka to aloushadlabü!” 23Hao sepeikei hoba Peter to laukei, “kü phaito kukashi, Satan! No kü shanga phaiyetshang ki, aishanga nyi Mühghaü aedang ka ayingko müt aedang ka damda.”
24Kheijinei Jisuei hao eikshuong to laukei, “Atei kü phai loumang sühsije haoei jembü lolo hanjan, hoba jembü peisei pean, kü phai semashi. 25Aishanga müt cheei hao langkei püetmang sü- halonga haoei kho maulabü, lausikei aoei kü nyen laüa jembü langkei maulaje kho hapmeilabü! 26Aishanga mütei kaodak khümbo pailetan jembü langkei maualonga haoei ai pailetla? Ayingsi mütei jembü langkei jeila ai kula? 27Aishanga Müteibü Shou jembü Bou soneikangbüa khuthük hangangbü yoa loulabü, hoba kheijinei haoei müt weko la jembü kümsilei thüng pailetbü kulabü. 28Ngühmaia ngei kan to lenda, hanei loan kibü shuong yoa atei Müteibü Shou haoeibü Sanglea aloushongko haibü jepan achühlabü.”
Currently Selected:
MATHI 16: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.