MATHI 15
15
Pisibou shuong Lenbü
(Mk 7.1-13)
1Kheijinei Farisi hoba Ngühkhüm lenbou shuong Jerusalem ka Jisu jungto louan laukei, 2“Aila ka eikshuongei jaishou shuongeibü tetbütabü ngühli lulimda? Aishanga shauji yungjinei haoenei ik asakda.” 3Jisuei haoen to jongaikei, “Kaneikei aila kaneibü tetbütabü laüa Mühghaü ngühkhüm lulimda? 4Aishanga Mühghaüei lauakei, ‘Kabou si kanyu soumo hatashi,’ hoba, ‘Aoei bou ayingsi nyu amaibü laueilaje hao haiphangphang.’ 5Lausikei kanei lauda, ‘Müt cheei haobou ayingsi nyu to: Ngei kasi shanga jungeila tetbü nam pendou Mühghaü la kula saüenan apa’, dogo laua longa, 6haoei touje haobou la soumo akuda. Hibü kaneibü tetbütabü laüa Mühghaü ngüh amlangbü la yeida. 7Hibüyoubü shuong, Isaiaei kan shangabü hainyu tükde tetenkei,
8 #
Isa 29.13 ‘Habü mütshuongei
haoeneibü sembungei
kü to soumo hatda,
lausikei haoeneibü maangpon kü ka lounyu heakei.
9Haoeneibü lenbü tegü
haoenei müt ngüh lensije,
haoenei amlangbüa ngo lemda!’ ”
Müt che Shatibü Peisilei
(Mk 7.14-23)
10Jisuei noknyüh hao jungto ngaan laukei, “Ditashi hoba ditenashi. 11Sembung to ai atda khoei müt shatida ji; lausikei ai sembung ka longda khoei hao shatida.” 12Eikshuong louan hao to laukei, “Nyi laubü ngüh ditjinei Farisi shuong maangto shatda dogo nyi ngekeilao?” 13Haoei jongaikei, “Ai kesiong ong khuthük kabü Kübouei ake kho pheian aplabü. 14Haoen khei apyoashi. Haoen nyekthubü lamleibü dan. Nyekthubü cheei lubü che leia longa ham kuokkhünto atetlabü.” 15Peterei hao to jongaikei, “Kün la kho ngüh- phatbü wanenkukai.” 16Haoei laukei, “Kaneikei tou sühko aditenda lo? 17Ai ong sembung to atdaje kho shiang to atan apshang to danda dogo kanei aditenda lo? 18Lausikei ai sembung ka angda kho maangpon ka longda, hoba khoei müt shatida. 19Aishanga maangpon ka amaibü dambü, müt haitibü, asangalan, pejapela, kokbü, amlangbü aukabü hoba mü nyikubü longda. 20Khübüei müt shatida, lausikei ik asakko shaubüei müt ashatida.”
Yaksa cheeibü Mailem
(Mk 7.24-30)
21Jisuei kho kaoen apyokei hoba Tair si Sidon kaopheia sühlangkei. 22Kho kaonyek ka loubü Kanan sao cheei ngekko laukei, “Dawid shou, Yaangbou, kü to onoukai. Kü shou nouyangshou shabü souei aeibou khonkutiko kia.” 23Lausikei haoei sao to ajongai. Hao eikshuong louan hao to, “Saoei sen phainei ngekdang ledabü sao ngaitishi” dogo pheko laukei. 24Haoei jongaikei, “Israel phang maubü sanshuong jungto ong ngo hautikei.” 25Lausikei sao louan hao thedanga lembo laukei, “Yaangbou, kü to thuikai.” 26Haoei jongaikei, “Shousieibü shausiyung sungbaan kei thedanga apjan aying.” 27Saoei laukei, “Tükde, Yaangbou; lausikei kei shuongeikei jembü bunyu khümsok ka atbü netshouje shauda.” 28Kheijinei Jisuei yaksanyu to laukei, “Ka mailem latetche yaangkei! Nyi mangsühbü tegü ka to kümlabü.” Hobaje saoeibü nouyangshou kho kho jih ka thama maian apbei.
Jisuei Müt Juongnyu Maitikubü
29Jisuei kho kaoen apyokei hoba Galil yungnyu ae haukei; hoba hao shongh che to angkei hoba khonei setkei. 30Hobaje sokebü, nyekthubü, ngoubü, yousi- iksibü, hoba lubü juongnyu yoa shuong yaang hao jungto loukei, hoba haoen haoeibü you junga phoyokukei, hoba haoei haoen maitikukei. 31Ladang haoenei ngoubüei joyoko, yousi-iksibü maian, sokebü paiko, hoba nyekthubüei hapbo hapbei noknyüh maangpangkei. Hobaje haoenei Israel Mühghaü la soneikangbü kukei.
Jisuei Müt Hajar Lei Oknyinbü
(Mk 8.1-10)
32Jisuei hao eikshuong hao jungto ngaan laukei, “Ngei noknyüh shanga aeibou sanouko dambuda, aishanga haoen touje kü yoa chalou sem yinga hoba shaula ai aki. Ngei haoen müh ngaitimang asühda. Haoen lama nyengan shemla thükkei.” 33Eikshuongei hao to laukei, “Sen sangliphang kaoena yingkei. Künei laka mütshang hatetche phottilabü wentek hapla?” 34Jisuei haoen to laukei, “Kanei wentek ladüng ki?” Haoenei laukei, “Pem nyet, hoba ngau shijo.” 35Haoei noknyüh kaoa setla sakkukei. 36Haoei wentek nyet hoba ngau jungkei. Kho phaia haoei Mühghaü la nyensang kuko shaknyinkei hoba khübü kho eikshuong la kukei, hoba eikshuongei noknyüh la kukei. 37Haoenei photko shaukei; hoba haoenei netshou joubü kam nyet shenko heshaikei. 38Yaksa shuong si nashousi shuong aweko kho shaubü shuong kho bousu hajar lei kiteikei. 39Haoei noknyüh lintian long che to atkei hoba Magadan kaophei to haukei.
Currently Selected:
MATHI 15: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.