MATHI 12
12
Nounyet shangabü Pheyobü
(Mk 2.23-28; Lk 6.1-5)
1Kho jihsiphaia Jisu Nounyet youshou laak danko haukei. Hobaje hao eikshuong mühei haikei, hoba haoenei youman yetan nyaila khangkei. 2Ladang Farisibüei kho hapbei, haoenei hao to laukei, “Chühashi! Ka eikshuongei Nounyet Ngühkhüm lulimda.” 3Haoei haoen to laukei, “Dawid hoba haoyou jambü shuong mühei haijinei haoei ai kümbei kanei awe lo? 4Hao Mühghaü chem to atkei hoba Mühghaü thedanga phobü Wentek, laobou ungshedbou to liman lubüei shaujan aying, kho haoei sungkei hoba shaukei hoba haoyou jambü shuong la kukei. 5Ayingsi Nounyet lembüchema kibü ungshedbü shuongei Nounyet lai shatida hoba haoen to shedbü aki, kho kanei Ngühkhüma wean achüh lo? 6#Mal 3.1 Ngei kan to lenda, khei lembüchem to yaangbou che han kia. 7#Hos 6.6 Kanei ‘Ngei lembü ayingko üeisanou mangsühda’ dogo laubü ngühtet ngea tegüje, kanei ashedbü müt la shedbü tekukhoulabü. 8Aishanga Müteibü Shou kho Nounyeteibü Bunyubou ki.”
Iksibü Müt Che
(Mk 3.1-6; Lk 6.6-11)
9Haoei kho apyokei hoba sinagog to haukei. 10Hobaje ik phei haibü müt che khünei kiteikei, hoba haoenei hao attila shanga Jisu to pheko laukei, “Nounyet maitijan sai?” 11Jisuei haoen to laukei, “Tetlabüei kan müt cheeibü san Nounyet püngkhün to atetakei. Khülongaje haoei kho hatan asenenlep lo? 12Yinga longa san che to müt lai khaibou! Hibü Nounyet maibü kümjan.” 13Kheijinei haoei müt khüto laukei, “Ka ik shingashi.” Haoei shingkei hoba kho maikei hoba ji aedang tegü yeikei. 14Lausikei Farisi shuong khong to angkei, hoba haoenei hao lai mautila hao khulimbo huon takkei.
Mühghaüeibü Pienbü Sambü
15Hobaje Jisuei kho ngekei hoba khüka kukkei. Müt juongei hao phai sembei hoba haoen pendou maitikukei. 16Hao shangabü angetila shanga haoei haoen kaangkosekko shingekkei. 17Kho Isaia thuseibüei laubü ngüh loushedla yingan kiteikei,
18“Ngei pienbü kü
khangenbou,
ngei sanoubü Che, ao to ngo maanghaida.
Ngei hao thüka kü soushou phokulabü,
hoba küksithang to haoei matjembü lenlabü.
19 #
Isa 42.1-2 Haoei aoyolabü ayingsi
angeklabü;
ayingsi khongnyua aoeikei hao ngüh aditlabü.
20 #
Isa 42.3-4 Haoei matjembü kho
thükenbü to asungba
shongko,
haoei naknyinan kibü thakdu che ongkei angoktilabü.
21Hobaje hao nyena
Küksithang shuongei
maanglemlabü.”
Jisu hoba Beelzebul
(Mk 3.20-30; Lk 11.14-23)
22Kheijinei hao jungto shabü souei lapbü, nyekthubü ngoubü müt che leibakei; hoba haoei maitikusije, ngoubou khoei ngüh laukei hoba nyekei hapbei. 23Hobaje noknyüh pendou mokde apyokei hoba laukei, “Ho müt Dawid shou yinglep si?” 24Lausikei ladang Farisibü shuongei kho ditkei, haoenei laukei, “Ho mütei lubü ayingko shabü sou shuong Choba Beelzebul jungeiko shabü sou shuong shian sattida.” 25Hobaje haoeneibü dambü ngean Jisuei haoen to laukei, “Jembü khulimbo janyinbü sangle pendou lusakan apda, hoba laobou sangnyu ayingsi chemdang jembü khulimbo janyinlaje loan akilabü. 26Satanei Satan shian sattia longa, haoei jembü khulimbo janyinda; khülongaje kho sangle lai lola? 27Hobaje ngei shabü sou shuong shian sattila Beelzebul jungeia longa, kan mütshuongei ao jungeiko khübü shian sattida? Hibü haoen kaneibü matjembou yinglabü. 28Lausikei ngei Mühghaü Soushouei shabü sou shuong shian sattisije, maimaitham Mühghaü Sangle kan jungto louakei. 29Ayingsi müt cheei shaangla hau kibou müt khühan apho longa, haoei lai küman hau kibou chem khüto atan haoeibü peisilei sola? Kheijinei ong haoei haoen ka koklang solanglabü. 30Müt che kho kü yoa akilonga hao kü khu limbo ki, hoba müt cheei ngeibü sanshuong yoshaila athui longa haoei khübü lintida. 31Kho aoa ngei kan to lenda, shabü hoba nyikubü pendou mütshuong la amai apbulabü; lausikei Soushou khulimbo nyikubü üpbulabü. 32Hobaje aoei Müteibü Shou khulimbo ngüh laulaje, kho hao la apbulabü; lausikei aoyouei Soushou Saopobü khulimbo laulaje, ho kaodaka yingasikei, loulabü kaodaka yingasikei kho hao la üpbulabü.
Bunyu hoba khoeibü Hek
(Lk 6.43-45)
33“Bunyu maia longa khoeibü hek kho maibü yinglabü; hoba bunyu amaibü yinga longaje khoeibü hek kho amaibü yinglabü. Aishanga bunyu che kho jembü hekei shenda. 34Kan pinyu shousi shuong, kan amainyu lai maibü lauenla? Aishanga aiei maangpon shenko ki kho sembungei lauda. 35Müt maibüei jembüei kibü maibü ka peisilei maibü sungenda. 36Hobaje ngei kan to lenda, mütei ai jim akibü ngüh ong anglaje, haoei kho ngüh shangabü matjemnyet jongailabü. 37Aishanga ka ngühei no tanglabü, hoba ka ngühei no shedlabü.”
Seikümseilei Hibü
(Mk 8.11-12; Lk 11.29-32)
38Kheijinei Ngühkhüm lenbou hoba Farisi shuong atei hao to laukei, “Lenbou, künei ka ka amaaphelabü che hapmang sühda.” 39Lausikei haoei haoen to jongaikei, “Amaibü hoba maang alemenbü metenei amaaphelabü lamda, hoba Jona thuseibou to liman ho meten la amaaphilabü aikei akulabü. 40#Jon 1.17 Aishanga Jona chalou sem hoba langyang sem ngau yaangbü shimunga kibü tegü, Müteibü Shoukei chalou sem hoba langyang sem kaomanga kilabü. 41Ninevibü ho meten yoa matjemshanga lolabü, hoba ho meten yuktilabü, aieilausi songlensi haoen maangpon sepeikei; lausikei Jona to yaangbou che hanei kia. 42Yungthang Chobasaoei ho meten shuong yoa matjemshanga lolabü, hoba ho meten attilabü, aieilausi saoei thonbü kaodak ka Solomon songsihon to ditla loukei; lausikei Solomon to yaangbou che hanei kia.
Shabü Sou Longeibü
(Lk 11.24-26)
43“Ladang müt che ka shabü sou che longan apda, haksoshang lambo ulangbü danko satda hoba kho ühüpda. 44Kheijinei khoei lauda, ‘Kü chem lao ka ngo longkei, khüto ngo sepeijung ngailabü.’ 45Kheijinei hao ngaida hoba hao to amaibü lubü soushou nyet leian atda, hoba haoen khonei kida; hoba kho müt thonbü thu kho shaangbou thu to amaibou yeida. Hibü ho amaibü meten shangakei khei kilabü.”
Jisueibü Nyu hoba Nasishuong
(Mk 3.31-35; Lk 8.19-21)
46Hao tokei noknyüh to joyoko kitoua, haonyu si haonasi shuong hao to joyomang sühko tanga loan kikei. 47Hao to, “Kanyu si kanasi shuong tanga loakei, hoba haoenei ka to joyomang sühda” dogo laukei. 48Lausikei hao to lenbou müt to haoei jongaikei, “Künyu ao, hoba künasi shuong aoyou?” 49Hobaje Jisuei hao eikshuong aeto haoeibü ik shean litiko laukei, “Künyu si künasi shuong hanei kia. 50Aishanga aoyouei khuthüka kibou Kübouei maangangbü kümda, hao kho küna bousubou, küna yaksanyu hoba künyu ki.”
Currently Selected:
MATHI 12: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.