Awˇbaˍdiˆ li‸ 1
1
1Chi ve lehˬ, Awˇbaˍdiˆ kʼoˆ taˍ ve tawˇ teˇ hpaˍ hpeh‸ ve yoˬ.
Gʼuiˬsha Eˇdonˍ mvuhˇmiˬ hta‸ ciˍ yanˍ tuˬ
Gʼuiˬsha lehˬ, Eˇdonˍ mvuhˇmiˬ hta‸ caˉ da‸ leh chi hkʼe kʼoˆ taˍ ve yoˬ.
Gʼuiˬsha lehˬ, chaw yaˇ teˇ hpaˍ geh yawˇ ve tcuh kaˍ paˍ teˇ gʼaˇ hta‸ peu laˇ leh, yawˇ ve tawˇ hta‸ ngaˬ hui gʼa kaˇ ve yoˬ.
Laˬ-o‸. Ngaˬ hui Eˇdonˍ mvuhˇmiˬ hta‸ ca bawˆ yuˬ-a veuˬ, teh‸ kʼoˆ ve yoˬ.
2Gʼuiˬsha Eˇdonˍ mvuhˇmiˬ hta‸ kʼoˆ piˇ ve,
Ngaˬ nawˬ hta‸ awˬ gʼaˇ nuˇ kʼai piˇ leh,
chaw teˇ gʼaˇ le le nawˬ hta‸ chiˇ baˬ laˇ tuˬ yoˬ.
3Nawˬ ve caˆ muiˬ puiˉ ve nyi ma lehˬ,
nawˬ hta‸ kʼaw‸ heˍ laˇ chehˇ ve yoˬ.
Nawˬ lehˬ haˉ pui yuˬ te taˍ ve ta‸ yehˬ hkʼaw chehˇ taˍ leh,
nawˬ ve yehˬ lehˬ mvuh jaˇ ve hkʼaw hkʼoˆ lo cawˬ ve yoˬ.
A shu ngaˬ hta‸ gʼawˬ ce gʼa tuˬ le, teh‸ nawˬ hkʼaˇ nawˬ kʼoˆ chehˇ ve yoˬ.
4Nawˬ ve yehˬ hta‸ aˉ ceˬ hpui hkʼa shuˍ
mvuh jaˇ ve chehˇ kuiˬ lo te taˍ leh,
meu‸ keu shiˍ teˇ hpaˍ awˬ kaˍ lo cawˬ ve hkʼe hpeh‸ ve htawˇ,
ngaˬ nawˬ hta‸ gʼawˬ ce tuˬ yoˬ.
5Chaw hkʼawˇ lehˬ mvuhˇ hpeu‸ htaˇ ca hkʼawˇ toˇ chehˇ ve htawˇ,
yawˇ heuˆ gaˇ ve awˬ ceuˬ hta‸ ceh tiˉ yuˬ kʼai ve yoˬ.
Chaw yaˇ teˇ hpaˍ a pehˉ meuˇ shiˍ shaˉ ve htawˇ,
teˇ hpaˍ hpaˍ hta‸ teh taˉ ve yoˬ.
Ya‸ hkʼaˇ, nawˬ ve canˇ paˍ teˇ hpaˍ lehˬ nawˬ hta‸ te luˬ te sheˆ laˇ taˍ peuˬ ve yoˬ.
6Iˉsawˇ ve awˬ ceuˬ awˬ hkʼaˇ-oˬ, nawˬ ve hpu shi mawˇ jeˬ teˇ hpaˍ hta‸ shu yuˬ kʼai peuˬ.
7Nawˬ ve awˬ chawˇ teˇ hpaˍ htawˇ, nawˬ hta‸ baˬ taˉ laˇ peuˬ.
Yawˇ hui nawˬ hta‸ nawˬ ve mvuhˇmiˬ hkʼaw gʼa‸ kʼoˬ laˇ taˍ peuˬ.
Nawˬ hta‸ awˬ chawˇ te da‸ chehˇ ve chaw teˇ hpaˍ lehˬ, chi beu‸ nawˬ hta‸ kʼaw‸ uˉ peunˍ chehˇ taˍ peuˬ.
Nawˬ geh teˇ geh mui caˇ chehˇ ve nawˬ ve awˬ chawˇ teˇ hpaˍ htawˇ, nawˬ hta‸ va caw htaw chehˇ taˍ peuˬ.
Yawˇ hui lehˬ nawˬ ve awˬ lawn hta‸ kʼoˆ da‸ leh, Yawˇ ve shiˍ puiˉ ve cuˇ yiˍ hkʼaˬ lo kʼai peuˬ le, teh‸ kʼoˆ chehˇ ve yoˬ.
8Ngaˬ Eˇdonˍ hta‸ ciˍ yanˍ piˇ ve awˬ nyi gaˬ kʼo,
cuˇ yiˍ cawˬ ve yawˇ ve chaw teˇ hpaˍ hta‸ htawˇ
ngaˬ te luˬ te sheˆ piˇ tuˬ yoˬ.
9Teˍmanˍ venˇ hkʼaw chehˇ ve ma‸ yaˇ teˇ hpaˍ kawˆ jaˇ leh,
Eˇdonˍ mvuhˇmiˬ hkʼaw chehˇ taˍ ve ma‸ yaˇ hkʼa peu-eˬ tiˇ pehˍ ve hta‸ gʼa hkanˍ tuˬ yoˬ.
Eˇdonˍ ve venˇbaˆ teˇ hpaˍ
10Nawˬ lehˬ nawˬ ve awˬ viˉ awˬ nyi Yaˍkoˆ ve awˬ ceuˬ awˬ hkʼaˇ teˇ hpaˍ hta‸ hiˉ yuˬ lu yuˬ leh,
yawˇ hui hta‸ tiˇ pehˍ piˇ ve pa taw, nawˬ lehˬ te luˬ te sheˆ ve hta‸ gʼa hkanˍ leh,
co co awˬ me‸ awˬ hponˇ luˬ kʼai tuˬ yoˬ.
11Canˇ paˍ teˇ hpaˍ yawˇ hui hta‸ ca bawˆ la ve teˇ nyi htaˇ,
nawˬ lehˬ hkʼe leˇ huˉ nyi chehˇ ve yoˬ.
Nawˬ lehˬ Yeˍruˆsaˍlehnˍ venˇ hkʼaw cawˬ ve
hpu shi mawˇ jeˬ teˇ hpaˍ hta‸ yuˬ kʼai leh
pehˬ yuˬ ve canˇ paˍ oˇ ve teˇ hpaˍ hkʼa shuˍ haiˬ jaˇ ve yoˬ.
12Nawˬ lehˬ Yuˇda‸ mvuhˇmiˬ hkʼaw chehˇ taˍ ve
nawˬ viˉ nawˬ nyi teˇ hpaˍ,
gʼa tu‸ gʼa hkanˍ chehˇ ve hta‸ nyi taˍ leh
ha lehˬ chehˇ maˇ cawˇ.
13Yawˇ hui tu‸ hkanˍ leh dawˇ haˍ chehˇ ve teˇ yanˇ,
nawˬ lehˬ yawˇ hui ve venˇ hkʼaw lo‸-e leh
yawˇ hui ve hpu shi mawˇ jeˬ teˇ hpaˍ hta‸ maˇ ca hiˉ yuˬ cawˇ.
14Yawˇ hui gʼuiˇ hpaw-e chehˇ ve teˇ yanˇ, nawˬ lehˬ ya‸ kʼaw ceh da‸ kuiˬ lo huˉ taˍ leh,
yawˇ hui hta‸ maˇ hpeh yuˬ cawˇ.
Yawˇ hui dawˇ tui‸ gaˇ tui‸ chehˇ ve teˇ yanˇ,
nawˬ lehˬ yawˇ hui hta‸ canˇ paˍ teˇ hpaˍ ve la‸ sheh hkʼaw lo maˇ chiˇ a‸ piˇ cawˇ.
Mvuhˇmiˬ teˇ hpaˍ hta‸ suhˉ jehˬ tuˬ
15Ngaˬ Gʼuiˬsha lehˬ, chaw ceuˬ hkʼa peu-eˬ ve hta‸
suhˉ jehˬ piˇ tuˬ awˬ yanˇ gaˬ la chehˇ ve yoˬ.
Eˇdonˍ-oˬ, nawˬ shu hta‸ te piˇ taˍ ve hkʼe,
nawˬ hta‸ htawˇ oˇ hkʼe kʼaw‸ te hkʼaw‸ laˇ tuˬ yoˬ.
Nawˬ piˇ taˍ ve hkʼe, nawˬ kʼaw‸ gʼa tuˬ yoˬ.
16Ngaˬ ve chaw teˇ hpaˍ lehˬ,
ngaˬ ve da‸ kehˬ ve hkʼaw hkʼoˆ lo hkʼaˇ jaˇ ve kawˆ hta‸ gʼa dawˬ taˍ peuˬ.
Awˬ paˇ awˬ kui lo chehˇ taˍ ve chaw ceuˬ teˇ hpaˍ lehˬ,
oˇ ve a‸ kehˉ hkʼaˇ jaˇ ve kawˆ hta‸ gʼa kʼaw‸ dawˬ tuˬ yoˬ.
Yawˇ hui dawˬ bvuhˆ taˉ leh mehˉ kʼai tuˬ yoˬ.
Iˉsaˍreˍlaˆ chaw gʼaˇ shehˍ hpaˇ hpeh‸ la ve
17Ya‸ hkʼaˇ, Ziˉonˍ hkʼaw hkʼoˆ lo chaw teˇ hpaˍ hpaˍ gʼa ponˬ tuˬ yoˬ.
Chehˇ kuiˬ oˇ ve lehˬ da‸ kehˬ ve chehˇ kuiˬ hpeh‸ la tuˬ yoˬ.
Yaˍkoˆ ve chaw teˇ hpaˍ lehˬ,
yawˇ hui ve mvuhˇmiˬ hta‸ kʼaw‸ gʼa hkʼaw‸ tuˬ yoˬ.
18Yaˍkoˆ leh Yoˇseh‸ ve chaw teˇ hpaˍ lehˬ, aˬ miˍ hkʼa shuˍ hpeh‸ tuˬ yoˬ.
Aˬ miˍ lehˬ goˇ lehˍ ve mvuh‸ hta‸ to‸ baˬ ve hkʼe,
yawˇ hui lehˬ Iˉsawˇ ve awˬ ceuˬ awˬ hkʼaˇ teˇ hpaˍ hta‸ te luˬ te sheˆ piˇ tuˬ yoˬ.
Iˉsawˇ ve awˬ ceuˬ awˬ hkʼaˇ teˇ gʼaˇ ka‸ gʼa te‸ chehˇ taˉ tuˬ ve maˇ heˆ.
Ngaˬ, Gʼuiˬsha chi hkʼe kʼoˆ taˍ ve yoˬ.
19Yuˇda‸ mvuhˇmiˬ awˬ hawˉ teˇ tawn lo chehˇ ve chaw teˇ hpaˍ lehˬ, Eˇdonˍ mvuhˇmiˬ hta‸ gʼa tuˬ yoˬ.
Mvuhˇ nyi kʼehˬ hpawˇ hkʼaw hkuiˉ puiˍ lo chehˇ ve chaw teˇ hpaˍ lehˬ, Hpiˇliˇtiˆ chaw hui ve mvuhˇmiˬ hta‸ gʼa tuˬ yoˬ.
Iˉsaˍreˍlaˆ chaw teˇ hpaˍ lehˬ, Eˇhpaˍrenˍ leh Saˍmaˍriˆ mvuhˇmiˬ hta‸ gʼa tuˬ yoˬ.
Beˍyaˍmenˍ chaw teˇ hpaˍ lehˬ, Giˇlaˆ mvuhˇmiˬ hta‸ gʼa tuˬ yoˬ.
20Iˉsaˍreˍlaˆ mvuhˇmiˬ awˬ na hpawˇ teˇ tawn lo shu ceˬ te chehˇ ve chaw teˇ hpaˍ kʼaw‸ la leh,
Hkaˍnanˍ mvuhˇmiˬ hta‸ gʼa tuˬ yoˬ.
Yawˇ hui ve mvuhˇmiˬ lehˬ, Zaˍreˍhpaˍtaˆ venˇ lo hkʼa gaˬ hpeh‸ tuˬ yoˬ.
Saˍdiˆ mvuhˇmiˬ hkʼaw shu ceˬ te chehˇ ve Yeˍruˆsaˍlehnˍ venˇ yaˇ teˇ hpaˍ lehˬ,
Yuˇda‸ mvuhˇmiˬ awˬ hawˉ teˇ tawn hta‸ gʼa tuˬ yoˬ.
21Gʼaˇ shehˍ hpaˇ hpeh‸ ve Yeˍruˆsaˍlehnˍ chaw teˇ hpaˍ lehˬ,
Eˇdonˍ mvuhˇmiˬ hta‸ bawˆ yuˬ leh uˉ peunˍ tuˬ yoˬ.
Gʼuiˬsha lehˬ Jawˇmawˇ hpeh‸ tuˬ yoˬ.
Currently Selected:
Awˇbaˍdiˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.