Yawˇbaˆ li‸ 1
1
Saˍtanˍ Yawˇbaˆ hta‸ lawˇ nyi ve
1Uˇzaˆ mvuhˇmiˬ hkʼaw Gʼuiˬsha hta‸ oˉ kʼoˍ pui leh ka ti‸ yeˬ jaˇ ve Yawˇbaˆ teh‸ kʼoˆ ve chaw teˇ gʼaˇ cawˬ ve yoˬ. Yawˇ lehˬ chaw da‸ teˇ gʼaˇ hpeh‸ leh, haiˬ ve kanˉ hta‸ maˇ gʼa te tuˬ shaˍ ti‸ taˍ puiˉ ve chaw hpeh‸ ve yoˬ. 2Yawˇ lehˬ, yaˇ paˍ suhˍ gʼaˇ leh yaˇmiˇ shehˆ gʼaˇ cawˬ ve yoˬ. 3Yawˇ lehˬ yawˬ ehˉ suhˍ hinˉ, kaˍlaˍoˆ shehˆ hinˉ, nuˇ teˇ hinˉ, leh piˉ laˬ ngaˇ ha cawˬ ve yoˬ. Yawˇ geh awˬ ceˬ maˇ maˇ cawˬ leh, mvuhˇ nyi tawˆ hpawˇ ve mvuhˇmiˬ hkʼaw, shu a‸ kehˉ paw sha ve chaw hpeh‸ ve yoˬ.
4Yawˇbaˆ ve yaˇ paˍ teˇ hpaˍ lehˬ, teˇ gʼaˇ teˇ pawˆ hti caˇ hti dawˬ ve pawehˇ te leh, yawˇ hui ve awˬ viˉ awˬ nyi hkʼa peu-eˬ leh, yawˇ hui ve awˬ nyi ma 3 gʼaˇ hta‸ htawˇ kuˬ piˇ chehˇ ve yoˬ. 5Pawehˇ te peuˬ leh shawˉ pawˍ mvuhˇ htiˇ la ve teˇ yanˇ, Yawˇbaˆ teˇ na‸ tu leh, yawˇ ve yaˇ teˇ hpaˍ hta‸ da‸ piˇ kehˬ piˇ tuˬ, yawˇ ve yaˇ teˇ gʼaˇ peuˬ teˇ gʼaˇ awˬ pon Gʼuiˬsha hta‸ tuˉ tanˇ piˇ ve yoˬ. Yawˇ chi hkʼe te ve lehˬ, yawˇ ve yaˇ teˇ gʼaˇ gʼaˇ maˇ shiˍ maˇ nawˇ ve hkʼaw, Gʼuiˬsha hta‸ gʼa te ya‸ la ve hta‸ dawˇ haˍ ve pa taw yoˬ.
6Mvuhˇ naw yaˇ teˇ hpaˍ Gʼuiˬsha geh hpawnˬ la ve awˬ nyi gaˬ la ve teˇ yanˇ, Saˍtanˍ htawˇ yawˇ hui geh chehˇ taˍ ve yoˬ. 7Oˇ htaˇ Gʼuiˬsha lehˬ, Saˍtanˍ-oˬ, nawˬ aˬ hto‸ ma tiˉ te chehˇ ve le, teh‸ kʼoˆ piˇ ve yoˬ. Ngaˬ lehˬ miˬguiˬ hkʼoˆ lo caw toˇ chehˇ ve yoˬ, teh‸ Saˍtanˍ Gʼuiˬsha hta‸ kʼaw‸ yaw hkʼaw‸ piˇ ve yoˬ.
8Oˇ htaˇ Gʼuiˬsha lehˬ, Nawˬ ngaˬ ve awˬ ceˬ Yawˇbaˆ hta‸ mawˬ chehˇ-aw laˇ. Miˬguiˬ hkʼoˆ yawˇ hkʼe ka ti‸ yeˬ leh da‸ ve chaw teˇ gʼaˇ ka‸ maˇ cawˬ. Yawˇ ngaˬ hta‸ oˉ kʼoˍ pui leh, haiˬve kanˉ hta‸ maˇ gʼa te tuˬ shaˍ ti‸ hkʼa deh‸ taˍ chehˇ ve chaw hpeh‸ ve yoˬ, teh‸ Saˍtanˍ hta‸ kʼoˆ piˇ ve yoˬ.
9Saˍtanˍ kʼaw‸ yaw hkʼaw‸ leh kʼoˆ ve, Yawˇbaˆ nawˬ geh teˇ ceuˬ ceuˬ maˇ gʼa ve hkʼe kʼo, yawˇ nawˬ hta‸ oˉ kʼoˍ pui tuˬ hehˉ laˇ. 10Nawˬ lehˬ, yawˇ leh yawˇ ve yehˬ yaˇ kʼa yaˇ teˇ hpaˍ hta‸ maˇ kʼoˆ, yawˇ ve mawˇ teˇ hpaˍ hta‸ maˇ kʼoˆ, hkʼaˬ htaˆ ka‸ ha‸ shaˉ piˇ chehˇ ve yoˬ. Yawˇ hkʼa te ve kanˉ hkʼa peu-eˬ hta‸ nawˬ awˬ bon na‸ piˇ chehˇ leh, mvuhˇmiˬ hkʼaw yawˇ ve ceˇ caˬ teˇ hpaˍ biˇ la piˇ taˍ ve yoˬ. 11Ya‸ hkʼaˇ, nawˬ chi beu‸ yawˇ hkʼa cawˬ ve mawˇ hkʼa peu-eˬ ve hta‸ yuˬ baˬ piˇ ve hkʼe kʼo, yawˇ nawˬ hta‸ hkeu laˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.
12Oˇ htaˇ Gʼuiˬsha lehˬ, Hkʼe kʼo yawˇ hkʼa cawˬ ve mawˇ hkʼa peu-eˬ nawˬ ve la‸ sheh hkʼaw chiˇ a‸ laˇ ve yoˬ. Ya‸ hkʼaˇ, Yawˇbaˆ awˬ to hta‸ nawˬ naˬ tuˬ maˇ gʼa te, teh‸ Saˍtanˍ hta‸ kʼoˆ piˇ ve yoˬ. Hkʼe te leh Saˍtanˍ tawˆ kʼai ve yoˬ.
Yawˇbaˆ ve yaˇ leh ceˇ teˇ hpaˍ luˬ kʼai ve
13Teˇ nyi htaˇ, Yawˇbaˆ ve yaˇ teˇ hpaˍ lehˬ, yawˇ hui ve awˬ viˉ paˍ lonˉ ve yehˬ hkʼaw hti caˇ hti dawˬ chehˇ ve teˇ yanˇ, 14chaw teˇ gʼaˇ Yawˇbaˆ geh gʼuiˇ laˬ leh, Ngaˬ hui ti mi mehˇ chehˇ leh, piˉ laˬ teˇ hpaˍ maˇ vuiˇ maˇ neˇ kuiˬ lo kʼaˆ caˇ chehˇ ve yoˬ. 15Oˇ htaˇ, Sheˍbaˆ chaw teˇ hpaˍ teˇ cawˬ haˉ gaˬ la leh, ceˇ hkʼa peu-eˬ ve hta‸ gʼa‸ kʼai sheˬ ve yoˬ. Yawˇ hui lehˬ, nawˬ ve awˬ ceˬ hkʼa peu-eˬ ve hta‸ htawˇ tiˇ pehˍ taˉ ve yoˬ. Ngaˬ teˇ gʼaˇ ceh tiˉ gʼa ponˬ leh, nawˬ hta‸ ca kʼaw‸ guiˇ hto la ve yoˬ, teh‸ Yawˇbaˆ hta‸ kʼoˆ piˇ ve yoˬ.
16Yawˇ tawˇ yaw maˇ peuˬ sheˍ ka‸, awˬ nu ve awˬ ceˬ paˍ teˇ gʼaˇ gʼuiˇ laˬ leh, Nawˬ ve yawˬ teˇ hpaˍ leh yawˬ hawˉ paˍ hkʼa peu-eˬ ve hta‸ mvuhˇ htehˆ pehˍ peuˬ. Ngaˬ teˇ gʼaˇ tiˉ gʼa ponˬ leh naw hta‸ ca kʼaw‸ gʼuiˇ hto la ve yoˬ, teh‸ kʼoˆ ve yoˬ.
17Yawˇ tawˇ yaw maˇ peuˬ sheˍ ka‸, awˬ nu ve awˬ ceˬ paˍ teˇ gʼaˇ gʼuiˇ laˬ leh, Hkaˍlaˍdehˇ chaw shehˆ moˍ ngaˬ hui hta‸ ca bawˆ la leh, kaˍlaˍoˆ hkʼa peu-eˬ ve hta‸ gʼa‸ kʼai peuˬ. Nawˬ ve awˬ ceˬ hkʼa peu-eˬ hta‸ htawˇ tiˇ pehˍ taˉ ve yoˬ. Ngaˬ teˇ gʼaˇ tiˉ gʼa ponˬ leh, nawˬ hta‸ ca kʼaw‸ gʼuiˇ hto la ve yoˬ, teh‸ kʼoˆ ve yoˬ.
18Yawˇ tawˇ yaw maˇ peuˬ sheˍ ka‸, awˬ nu ve awˬ ceˬ paˍ teˇ gʼaˇ gʼuiˇ laˬ leh, Nawˬ ve yaˇ teˇ hpaˍ lehˬ, nawˬ ve yaˇ paˍ uiˍ yehˬ hkʼaw hti caˇ hti dawˬ chehˇ ve yoˬ. 19Teˇ cawˬ haˉ, shehˇ de hpawˇ lo mvuhˇ haw lonˉ meuˆ laˬ leh, yehˬ hta‸ htinˍ ve pa taw, yehˬ paiˍ leh yawˇ hui hkʼa peu-eˬ suh-e ve yoˬ. Ngaˬ teˇ gʼaˇ ceh tiˉ gʼa ponˬ leh, nawˬ hta‸ ca kʼaw‸ gʼuiˇ hto la ve yoˬ, teh‸ kʼoˆ ve yoˬ.
20Oˇ htaˇ, Yawˇbaˆ tu la leh dawˇ haˍ jaˇ ve hkʼaw, yawˇ ve veu‸ kʼaˇ hta‸ tzuh‸ suhˍ ve yoˬ. Yawˇ ve uˉ hkeh mvuh hta‸ chiˇ baˬ leh, miˬ chaˇ hkʼoˆ lo boˆ taˍ ve yoˬ. 21Yawˇ kʼoˆ ve, Ngaˬ paw la htaˇ te‸ chiˉ maˇ cawˬ. Ngaˬ suh-e htaˇ htawˇ te‸ chiˉ cawˬ tuˬ ve maˇ heˆ. Gʼuiˬsha ngaˬ hta‸ piˇ laˇ taˍ ve yoˬ. Chi beu‸ Yawˇ hkʼa peu-eˬ ve hta‸ kʼaw‸ yuˬ hkʼaw‸ kʼai peuˬ. Yawˇ ve awˬ meh hta‸ chiˇ uiˍ chiˇ mvuh piˇ-oˆ, teh‸ kʼoˆ ve yoˬ.
22Chi hkʼe hpeh‸ la ve htawˇ, Yawˇbaˆ lehˬ Gʼuiˬsha hta‸venˇbaˆ maˇ taˍ.
Currently Selected:
Yawˇbaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.