Yoˇhanˬ li‸ 9
9
Paw la htaˇ ka‸ mehˆ cuˉ ve chaw teˇ gʼaˇ hta‸ Yeˍsuˆ gu na-e piˇ ve
1Yeˍsuˆ ya‸ kʼaw kʼai chehˇ ve teˇ yanˇ, paw la htaˇ ka‸ mehˆ cuˉ taˍ ve chaw teˇ gʼaˇ hta‸ yawˇ gʼa mawˬ ve yoˬ. 2Oˇ htaˇ, yawˇ ve awˬ la‸ gʼawˇ teˇ hpaˍ kʼoˆ ve, Raˍbiˆ-oˬ. chaw chi teˇ gʼaˇ paw la htaˇ ka‸ mehˆ cuˉ taˍ ve lehˬ, a shu ve venˇbaˆ hta‸ pa taw le. Yawˇ ve venˇbaˆ hta‸ pa taw laˇ. Awˬ pa awˬ e ve venˇbaˆ hta‸ pa taw laˇ teh‸, yawˇ hta‸ na nyi ve yoˬ.
3Yeˍsuˆ kʼaw‸ kʼoˆ ve, Yawˇ ve venˇbaˆ hta‸ pa taw maˇ heˆ. Awˬ pa awˬ e ve venˇbaˆ hta‸ pa taw ka‸ maˇ heˆ. Yawˇ awˬ hkʼaw lo Gʼuiˬsha ve kanˉ teˇ hpaˍ hkʼa tawˍ lehˆ tawˆ la tuˬ awˬ pon yawˇ chi hkʼe hpeh‸ ve yoˬ. 4Ngaˬ hta‸ peu laˇ shehˍ hpaˇ ve kanˉ hta‸ mvuhˇ law‸ kʼaw htaˇ ngaˬ hui gʼa te ve yoˬ. Chaw teˇ gʼaˇ ka‸ kanˉ te maˇ hpeh‸ ve mvuhˇ hpeu‸ awˬ yanˇ gaˬ la tuˬ yoˬ. 5Ngaˬ lehˬ miˬguiˬ hkʼoˆ chehˇ sheˍ ve awˬ yanˇ awˬ hkʼaw lo, miˬguiˬ ve awˬ gʼeuˆ hpeh‸ ve yoˬ teh‸ kʼoˆ ve yoˬ.
6Chi hkʼe kʼoˆ peuˬ hkʼaw‸ nawˉ, miˬ chaˇ hkʼoˆ lo yawˇ ciˉ gʼuiˇ hpe‸ pfuhˍ leh je‸ nehˆ te sheˬ leh, chaw oˇ ve teˇ gʼaˇ ve mehˆ shiˍ hta‸ shehˍ piˇ ve yoˬ. 7Siˉlonˍ gʼuiˬ po lo kʼai leh tsuhˇ baˬ-o‸ teh‸, Yeˍsuˆ yawˇ hta‸ kʼoˆ piˇ ve yoˬ. (Siˉlonˍ kʼoˆ ve tcuhˉ kuiˬ lehˬ, Kʼai tcuh peuˬ teh‸ kʼoˆ gaˇ ve yoˬ.) Hkʼe te leh yawˇ kʼai leh ca tsuhˇ baˬ ve yoˬ. Oˇ htaˇ, yawˇ mehˆ mawˬ la leh kʼaw‸ la ve yoˬ.
8Hkʼe te leh, yawˇ ve yehˬ awˬ paˇ awˬ kui lo chehˇ ve chaw hui leh yawˇ lawˬ leh‸ chehˇ ve hta‸ gʼa mawˬ ve chaw hui kʼoˆ ve, Chaw chi hpaˇ lehˬ, ponˬ laˬ htaˇ mui taˍ leh lawˬ leh‸ chehˇ ve chaw teˇ gʼaˇ maˇ heˆ laˇ teh‸ kʼoˆ da‸ ve yoˬ.
9Teˇ hpaˍ hpaˍ kʼoˆ ve, Yawˇ yoˬ. Teˇ hpaˍ hpaˍ kʼoˆ ve, Yawˇ maˇ heˆ. Yawˇ hta‸ shuˍ ve chaw teˇ gʼaˇ yoˬ teh‸ kʼoˆ da‸ ve yoˬ.
Yawˇ awˬ to kʼoˆ ve, Nawˬ hui kʼoˆ da‸ chehˇ ve chaw lehˬ ngaˬ yoˬ teh‸ kʼoˆ ve yoˬ.
10Oˇ htaˇ yawˇ hui kʼoˆ ve, Hkʼe te kʼo, nawˬ ve mehˆ shiˍ hkʼaˬ hkʼe te mawˬ la ve le teh‸ yawˇ hta‸ na nyi ve yoˬ. 11Yawˇ kʼaw‸ kʼoˆ ve, Yeˍsuˆ meh ve chaw teˇ gʼaˇ je‸ nehˆ te leh, ngaˬ ve mehˆ shiˍ hta‸ shehˍ laˇ peuˬ hkʼaw‸ nawˉ, Siˉlonˍ gʼuiˬ po lo kʼai leh tsuhˇ baˬ-o‸ teh‸ ngaˬ hta‸ kʼoˆ laˇ ve hkʼe, ngaˬ ca tsuhˇ hkʼa ve teˇ yanˇ mehˆ mawˬ la ve yoˬ teh‸ kʼoˆ piˇ ve yoˬ.
12Yawˇ hui kʼaw‸ kʼoˆ ve, Yawˇ hkʼaˬ lo kʼai le teh‸ chaw oˇ ve teˇ gʼaˇ hta‸ na nyi ve teˇ yanˇ,
Ngaˬ maˇ shiˍ teh‸ yawˇ kʼaw‸ kʼoˆ piˇ ve yoˬ.
Mehˆ hkʼaˬ hkʼe te mawˬ la ve awˬ lawn Hpaˍriˍsehˇ hui na nyi ve
13Chaw oˇ ve teˇ hpaˍ lehˬ, mehˆ cuˉ jaw ve chaw oˇ ve teˇ gʼaˇ hta‸ Hpaˍriˍsehˇ teˇ hpaˍ geh shiˍ kʼai ve yoˬ. 14Yeˍsuˆ je‸ nehˆ te leh yawˇ ve mehˆ shiˍ hta‸ mawˬ la piˇ lawˬ ve teˇ nyi lehˬ, shinˉ nyi hpeh‸ ve yoˬ. 15Yawˇ ve mehˆ shiˍ hkʼaˬ hkʼe te mawˬ la ve awˬ lawn Hpaˍriˍsehˇ teˇ hpaˍ yawˇ hta‸ teˇ pawˆ kʼaw‸ na nyi ve teˇ yanˇ, yawˇ kʼaw‸ kʼoˆ ve, Ngaˬ ve mehˆ shiˍ hta‸ yawˇ je‸ nehˆ shehˍ laˇ leh, ngaˬ ca tsuhˇ baˬ ve teˇ yanˇ mehˆ mawˬ la ve yoˬ teh‸, yawˇ hui hta‸ kʼoˆ piˇ ve yoˬ.
16Hkʼe te leh, Hpaˍriˍsehˇ teˇ hpaˍ hpaˍ kʼoˆ ve, Chaw oˇ ve hpaˇ lehˬ Gʼuiˬsha lo laˬ ve maˇ heˆ. Awˬ lawn kʼo, shinˉ nyi htaˇ yawˇ maˇ ce maˇ kan teh‸ kʼoˆ ve yoˬ.
Teˇ hpaˍ hpaˍ kʼoˆ ve, Venˇbaˆ yaˇ teˇ gʼaˇ lehˬ, chi hkʼe ve awˬ heˆ teˇ hpaˍ hta‸ hkʼaˬ hkʼe te leh te gʼa tuˬ le teh‸ kʼoˆ da‸ ve yoˬ. Hkʼe te leh, yawˇ hui teˇ gʼaˇ leh teˇ gʼaˇ dawˇ hkʼaˇ maˇ hawˍ da‸ ve yoˬ.
17Mehˆ cuˉ jaw ve chaw hta‸ yawˇ hui teˇ pawˆ kʼaw‸ kʼoˆ ve, Nawˬ ve mehˆ shiˍ hta‸ mawˬ la piˇ lawˬ ve chaw oˇ ve teˇ gʼaˇ awˬ lawn nawˬ hkʼaˬ hkʼe kʼoˆ tuˬ le teh‸ na nyi htaˇ,
Yawˇ lehˬ Gʼuiˬsha ve tcuh kaˍ paˍ hpeh‸ ve yoˬ teh‸ yawˇ kʼaw‸ kʼoˆ piˇ ve yoˬ.
18Yuˇda‸ chaw teˇ hpaˍ lehˬ, mehˆ mawˬ la ve chaw teˇ gʼaˇ ve awˬ pa awˬ e hta‸ maˇ kuˬ na sheˍ htaˇ yawˇ lehˬ awˉ lawˉ htaˇ mehˆ cuˉ leh awˬ hkʼaw‸ nawˉ mehˆ mawˬ la ve hta‸ yawˇ hui maˇ yonˍ. 19Yawˇ hui lehˬ, awˬ pa awˬ e hta‸ kʼoˆ piˇ ve, Chi hpaˇ lehˬ nawˬ huiˉ maˬ ve yaˇ paˍ yoˬ laˇ. Paw la htaˇ ka‸ mehˆ cuˉ ve teh‸ nawˬ huiˉ maˬ kʼoˆ ve lehˬ, chi teˇ gʼaˇ yoˬ laˇ. Hkʼe te kʼo, chi beu‸ hkʼaˬ hkʼe te leh yawˇ mehˆ mawˬ la ve le teh‸ na nyi ve yoˬ.
20Yawˇ ve awˬ pa awˬ e kʼaw‸ kʼoˆ ve, Chi hpaˇ lehˬ, ngaˬ huiˉ maˬ ve yaˇ paˍ hpeh‸ leh, paw la htaˇ ka‸ mehˆ cuˉ paˍ hpeh‸ ve hta‸ ngaˬ huiˉ maˬ shiˍ taˍ ve yoˬ. 21Ya‸ hkʼaˇ, chi beu‸ hkʼaˬ hkʼe te leh yawˇ mehˆ mawˬ la ve hta‸ ngaˬ huiˉ maˬ maˇ shiˍ. Yawˇ ve mehˆ shiˍ hta‸ a shu mawˬ la piˇ ve hta‸ htawˇ ngaˬ huiˉ maˬ maˇ shiˍ. Yawˇ hta‸ na nyi-o. Yawˇ uiˍ la peuˬ. Yawˇ ve awˬ to awˬ lawn yawˇ kʼoˆ laˇ tuˬ yoˬ teh‸ kʼoˆ piˇ ve yoˬ. 22Yawˇ ve awˬ pa awˬ e chi hkʼe kʼoˆ ve lehˬ, Yuˇda‸ chaw teˇ hpaˍ hta‸ kawˆ ve pa taw kʼoˆ ve yoˬ. Awˬ lawn kʼo, Yeˍsuˆ lehˬ Hkri‸ hpeh‸ ve yoˬ teh‸ kʼoˆ leh hkanˍ yuˬ ve chaw hkʼaˬ ve teˇ gʼaˇ hta‸ maˇ kʼoˆ, yawˇ hui ve awˬ moˍ awˬ hkʼaw lo gʼa‸ tawˆ tuˬ yoˬ teh‸, Yuˇda‸ chaw teˇ hpaˍ jehˬ cheˆ taˍ peuˬ. 23Chi hta‸ pa taw, awˬ pa awˬ e kʼoˆ ve, Yawˇ uiˍ la peuˬ. Yawˇ hta‸ na nyi-o teh‸ kʼoˆ piˇ ve yoˬ.
24Hkʼe te leh yawˇ hui lehˬ, mehˆ cuˉ jaw ve chaw hta‸ teˇ pawˆ kʼaw‸ kuˬ veu laˇ leh kʼoˆ ve, Gʼuiˬ sha hta‸ ceh tiˉ chiˇ uiˍ chiˇ mvuh piˇ-oˆ. Chaw oˇ ve lehˬ, venˇbaˆ yaˇ hpeh‸ ve hta‸ ngaˬ hui shiˍ ve yoˬ teh‸, yawˇ hta‸ kʼoˆ piˇ ve yoˬ.
25Oˇ htaˇ yawˇ kʼaw‸ kʼoˆ ve, Yawˇ venˇbaˆ yaˇ leh naˍ, maˇ heˆ leh naˍ, ngaˬ maˇ shiˍ. Teˇ ceuˬ hta‸ ngaˬ shiˍ ve yoˬ. Awˉ lawˉ htaˇ ngaˬ mehˆ cuˉ ve ka‸, chi beu‸ ngaˬ mehˆ mawˬ la peuˬ teh‸, yawˇ hui hta‸ kʼoˆ piˇ ve yoˬ.
26Yawˇ hui kʼaw‸ kʼoˆ ve, Yawˇ nawˬ hta‸ hkʼaˬ hkʼe te laˇ ve le. Nawˬ ve mehˆ shiˍ hta‸ yawˇ hkʼaˬ hkʼe te mawˬ la piˇ lawˬ ve le teh‸, yawˇ hta‸ na nyi ve yoˬ.
27Yawˇ kʼaw‸ kʼoˆ ve, Ya‸ sheh htaˇ ngaˬ nawˬ hui hta‸ kʼoˆ laˇ peuˬ ve ka‸ nawˬ hui maˇ na. Aˬ hto‸ ma pa taw nawˬ hui teˇ pawˆ kʼaw‸ kaˇ gaˇ sheˍ le. Nawˬ hui htawˇ, yawˇ ve awˬ la‸ gʼawˇ hpeh‸ la gaˇ leh laˇ teh‸, yawˇ hui hta‸ kʼoˆ piˇ ve yoˬ.
28Yawˇ hui yawˇ hta‸ hkʼa mvuhˇ hkʼa na kʼoˆ leh, Nawˬ lehˬ yawˇ ve awˬ la‸ gʼawˇ hpeh‸ ve yoˬ. Ngaˬ hui lehˬ, Moˉseˍ ve awˬ la‸ gʼawˇ hpeh‸ ve yoˬ. 29Gʼuiˬsha lehˬ Moˉseˍ hta‸ tawˇ yaw piˇ taˍ ve hta‸ ngaˬ hui shiˍ ve yoˬ. Ya‸ hkʼaˇ, chaw chi hpaˇ hkʼaˬ lo laˬ ve hta‸ ngaˬ hui maˇ shiˍ teh‸ kʼoˆ ve yoˬ.
30Yawˇ kʼaw‸ kʼoˆ ve, Yawˇ ngaˬ ve mehˆ shiˍ hta‸ mawˬ la piˇ lawˬ ve htawˇ, yawˇ hkʼaˬ lo laˬ ve hta‸ nawˬ hui maˇ shiˍ ve lehˬ, anˇ tuˬ cawˬ ve yoˬ. 31Gʼuiˬsha lehˬ, venˇbaˆ yaˇ hui ve tawˇ hkawˇ hta‸ maˇ na yuˬ ve hta‸ ngaˬ hui shiˍ ve yoˬ. Ya‸ hkʼaˇ, chaw teˇ gʼaˇ gʼaˇ Gʼuiˬsha hta‸ yawˆ yan leh yawˇ ve a loˍ hta‸ te ve kʼo, chaw oˇ ve teˇ gʼaˇ ve tawˇ hkawˇ hta‸ Gʼuiˬshaˬ na yuˬ ve yoˬ. 32Mvuhˇ kawˍ miˬ ya‸ htaˇ ka‸ tanˬ leh ya‸ nyi hkʼa gaˬ, paw la htaˇ ka‸ mehˆ cuˉ taˍ ve chaw hta‸ shu mehˆ kʼaw‸ mawˬ la piˇ lawˬ ve, chaw teˇ gʼaˇ ka‸ maˇ kaˇ jaw. 33Chaw oˇ ve lehˬ, Gʼuiˬsha lo laˬ ve maˇ heˆ kʼo, yawˇ te‸ chiˉ ka‸ te maˇ hpeh‸ teh‸ yawˇ hui hta‸ kʼoˆ piˇ ve yoˬ.
34Yawˇ hui kʼaw‸ kʼoˆ ve, Nawˬ lehˬ venˇbaˆ hkʼa biˇ cawˬ ve awˬ hkʼaw lo paw la ve ka‸, nawˬ ngaˬ hui hta‸ maˍ laˇ ve laˇ teh‸ kʼoˆ piˇ leh, yawˇ hta‸ gʼa‸ tawˆ ve yoˬ.
Co ha hpawˇ mehˆ cuˉ ve awˬ lawn
35Chaw oˇ ve hta‸ shu gʼa‸ tawˆ ve awˬ lawn Yeˍsuˆ gʼa kaˇ leh, yawˇ hta‸ ca mawˬ htaˇ, Chaw yaˇ ve Yaˇ hpu hta‸ nawˬ yonˍ ve laˇ teh‸ na nyi ve yoˬ.
36Jawˇmawˇ-oˬ, yawˇ hta‸ ngaˬ gʼa yonˍ tuˬ, chaw yaˇ ve Yaˇ hpu a shu le teh‸ na nyi ve yoˬ.
37Yeˍsuˆ kʼoˆ ve, Nawˬ yawˇ hta‸ gʼa mawˬ peuˬ ve awˬ hkʼoˆ, chi beu‸ nawˬ hta‸ tawˇ yaw chehˇ ve lehˬ yawˇ yoˬ teh‸, yawˇ hta‸ kʼoˆ piˇ ve yoˬ.
38Jawˇmawˇ-oˬ, ngaˬ yonˍ ve yoˬ teh‸ yawˇ kʼoˆ leh, Yeˍsuˆ hta‸ oˉ kʼoˍ pui ve yoˬ.
39Oˇ htaˇ Yeˍsuˆ kʼoˆ ve, Mehˆ maˇ mawˬ ve chaw hui lehˬ, mehˆ mawˬ la tuˬ maˇ kʼoˆ, mehˆ mawˬ ve chaw hui lehˬ, mehˆ cuˉ kʼai tuˬ maˇ kʼoˆ, suhˉ jehˬ tuˬ awˬ pon miˬguiˬ hkʼoˆ lo ngaˬ laˬ ve yoˬ teh‸ kʼoˆ ve yoˬ.
40Yawˇ awˬ paˇ lo chehˇ taˍ ve Hpaˍriˍsehˇ teˇ hpaˍ tawˇ oˇ ve hta‸ gʼa kaˇ htaˇ, Ngaˬ hui htawˇ mehˆ cuˉ paˍ hpeh‸ ve laˇ teh‸, yawˇ hta‸ na nyi ve yoˬ.
41Yeˍsuˆ kʼaw‸ kʼoˆ ve, Nawˬ hui mehˆ cuˉ paˍ hpeh‸ tehˬ ve hkʼe kʼo, venˇbaˆ maˇ cawˬ. Ya‸ hkʼaˇ, Ngaˬ hui mehˆ mawˬ chehˇ ve yoˬ teh‸, chi beu‸ nawˬ hui kʼoˆ ve pa taw, nawˬ hui venˇbaˆ cawˬ chehˇ ve yoˬ.
Currently Selected:
Yoˇhanˬ li‸ 9: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.