Yoˇhanˬ li‸ 16
16
1Nawˬ hui nyi ma maˇ gʼa luˬ kʼai tuˬ, awˬ lawn chi teˇ hpaˍ ngaˬ nawˬ hui hta‸ kʼoˆ taˉ laˇ ve yoˬ. 2Shu nawˬ hui hta‸ Yuˇda‸ awˬ moˍ awˬ hkʼaw lo gʼa‸ kʼoˬ tuˬ yoˬ. Nawˬ hui hta‸ tiˇ pehˍ ve chaw lehˬ, Gʼuiˬsha ve kanˉ hta‸ te peuˬ teh‸ yawˇ dawˇ tuˬ yoˬ. Chi hkʼe ve awˬ yanˇ gaˬ la tuˬ yoˬ. 3Yawˇ hui lehˬ, Awˬ pa hta‸ maˇ kʼoˆ, ngaˬ hta‸ htawˇ maˇ kʼoˆ, maˇ shiˍ ve pa taw oˇ hkʼe te tuˬ yoˬ. 4Awˬ yanˇ oˇ ve gaˬ la ve teˇ yanˇ, awˬ lawn chi teˇ hpaˍ ngaˬ nawˬ hui hta‸ kʼoˆ taˉ laˇ ve hta‸ nawˬ hui dawˇ nawˇ tuˬ, tawˇ chi teˇ hpaˍ ngaˬ nawˬ hui hta‸ kʼoˆ laˇ ve yoˬ.
Awˬ ha hpu kanˉ hkʼaˬ hkʼe te tuˬ ve awˬ lawn maˍ piˇ ve
Ngaˬ nawˬ hui geh teˇ geh chehˇ taˍ sheˍ ve pa taw, awˉ lawˉ htaˇ awˬ lawn chi teˇ hpaˍ ngaˬ nawˬ hui hta‸ maˇ kʼoˆ laˇ sheˍ. 5Ngaˬ hta‸ peu laˇ shehˍ hpaˇ geh chi beu‸ ngaˬ kʼo‸-e ve yoˬ. Nawˬ hkʼaˬ lo kʼai tuˬ le teh‸, nawˬ hui teˇ gʼaˇ ka‸ ngaˬ hta‸ maˇ na nyi. 6Ya‸ hkʼaˇ, awˬ lawn chi teˇ hpaˍ ngaˬ nawˬ hui hta‸ kʼoˇ laˇ ve pa taw, nawˬ hui ve nyi ma awˬ hkʼaw lo dawˇ haˍ tuˬ hkʼa biˇ cawˬ la ve yoˬ. 7Ngaˬ nawˬ hui hta‸ hteˇ lehˍ kʼoˆ laˇ ve, ngaˬ kʼo‸-e ve lehˬ nawˬ hui awˬ pon awˬ bon cawˬ ve yoˬ. Awˬ lawn kʼo, ngaˬ maˇ kʼo‸-e ve kʼo, Ga piˇ shehˍ hpaˇ nawˬ hui geh maˇ laˬ. Ya‸ hkʼaˇ ngaˬ kʼo‸-e ve kʼo, ngaˬ yawˇ hta‸ nawˬ hui geh peu laˇ tuˬ yoˬ. 8Yawˇ gaˬ la htaˇ, venˇbaˆ awˬ lawn maˇ kʼoˆ, hteˇ ve cawˇ ve awˬ lawn maˇ kʼoˆ, suhˉ jehˬ suhˉ taˆ ve awˬ lawn htawˇ maˇ kʼoˆ, miˬguiˬ yaˇ hui hta‸ yawˇ hkʼa tawˍ lehˆ hpeu‸ maˍ piˇ tuˬ yoˬ. 9Yawˇ hui ngaˬ hta‸ maˇ yonˍ ve hta‸ pa taw, venˇbaˆ awˬ lawn hpeu‸ maˍ piˇ tuˬ yoˬ. 10Ngaˬ lehˬ Awˬ pa geh kʼo‸-e leh, nawˬ hui ngaˬ hta‸ maˇ gʼa kʼaw‸ mawˬ ve hta‸ pa taw, hteˇ ve cawˇ ve awˬ lawn hpeu‸ maˍ piˇ tuˬ yoˬ. 11Miˬguiˬ chi hta‸ uˉ peunˍ ve jawˇmawˇ teˇ gʼaˇ hta‸ suhˉ taˆ piˇ peuˬ ve hta‸ pa taw suhˉ jehˬ suhˉ taˆ ve awˬ lawn ka‸ hpeu‸ maˍ piˇ tuˬ yoˬ.
12Ngaˬ nawˬ hui hta‸ kʼoˆ laˇ tuˬ ve awˬ ceuˬ maˇ maˇ cawˬ sheˍ ve htawˇ, chi beu‸ nawˬ hui hkanˍ yuˬ maˇ hpeh‸ sheˍ. 13Ya‸ hkʼaˇ, hteˇ ve cawˇ ve Awˬ ha hpu gaˬ la htaˇ, hteˇ ve cawˇ ve hkʼa peu-eˬ awˬ hkʼaˇ suh nawˬ hui kʼai tuˬ, yawˇ nawˬ hui hta‸ shiˍ maˍ laˇ tuˬ yoˬ. Awˬ lawn kʼo, yawˇ hkʼa gʼa kaˇ ve teˇ hpaˍ ceh tiˉ kʼoˆ maˍ laˇ tuˬ yoˬ. Yawˇ hkʼaˇ yawˇ dawˇ tawˆ leh yaw ve maˇ heˆ. Awˬ hkʼaw‸ nawˉ hpeh‸ la tuˬ ve awˬ lawn teˇ hpaˍ htawˇ, yawˇ nawˬ hui hta‸ kʼoˆ maˍ laˇ tuˬ yoˬ. 14Yawˇ lehˬ, ngaˬ ve awˬ me‸ awˬ hponˇ hta‸ tawˆ la piˇ tuˬ yoˬ. Awˬ lawn kʼo, ngaˬ hta‸ caˉ da‸ ve awˬ ceuˬ yawˇ yuˬ leh nawˬ hui hta‸ kʼoˆ maˍ laˇ tuˬ yoˬ. 15Awˬ pa hkʼa cawˬ taˍ ve awˬ ceuˬ hkʼa peu-eˬ ngaˬ ve htawˇ hpeh‸ ve yoˬ. Hkʼe te leh, ngaˬ hta‸ caˉ da‸ ve awˬ ceuˬ yawˇ yuˬ leh, nawˬ hui hta‸ kʼoˆ maˍ laˇ tuˬ yoˬ teh‸ ngaˬ kʼoˆ laˇ peuˬ.
Dawˇ haˍ tuˬ lehˬ ha lehˬ tuˬ hpeh‸ la tuˬ ve
16Teˇ hkui gaˬ kʼo, nawˬ hui ngaˬ hta‸ maˇ gʼa mawˬ. Teˇ hkui kʼaw‸ gaˬ kʼo, gʼa kʼaw‸ mawˬ tuˬ yoˬ teh‸ kʼoˆ piˇ ve yoˬ.
17Oˇ htaˇ yawˇ ve awˬ la‸ gʼawˇ teˇ hpaˍ hpaˍ kʼoˆ ve, Teˇ hkui gaˬ kʼo, nawˬ hui ngaˬ hta‸ maˇ gʼa mawˬ. Teˇ hkui kʼaw‸ gaˬ kʼo, gʼa kʼaw‸ mawˬ tuˬ yoˬ teh‸ kʼoˆ laˇ ve maˇ kʼoˆ, Ngaˬ Awˬ pa geh kʼo‸-e ve pa taw teh‸ kʼoˆ laˇ ve maˇ kʼoˆ, yawˇ ngaˬ hui hta‸ hkʼaˬ hkʼe kʼoˆ laˇ gaˇ ve leh naˍ teh‸, teˇ gʼaˇ leh teˇ gʼaˇ kʼoˆ da‸ ve yoˬ. 18Peuˬ leh yawˇ hui kʼaw‸ kʼoˆ ve, Teˇ hkui gaˬ kʼo teh‸ yawˇ kʼoˆ ve tawˇ teˇ hkawˇ aˬ hto‸ ma kʼoˆ gaˇ ve le, Yawˇ kʼoˆ ve tawˇ hkawˇ hta‸ ngaˬ hui maˇ shiˍ teh‸, yawˇ hui kʼoˆ da‸ ve yoˬ.
19Yawˇ hui yawˇ hta‸ na nyi gaˇ ve hta‸ Yeˍsuˆ shiˍ ve pa taw yawˇ kʼoˆ ve, Teˇ hkui gaˬ kʼo, nawˬ hui ngaˬ hta‸ maˇ gʼa mawˬ. Teˇ hkui kʼaw‸ gaˬ kʼo, gʼa kʼaw‸ mawˬ tuˬ yoˬ teh‸ ngaˬ kʼoˆ laˇ ve tawˇ hkawˇ hta‸ nawˬ hui teˇ gʼaˇ leh teˇ gʼaˇ na nyi da‸ chehˇ ve laˇ. 20Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui gʼa kuˬ hawˬ paˆ hawˬ tuˬ yoˬ. Ya‸ hkʼaˇ, miˬguiˬ yaˇ hui lehˬ, gʼa ha lehˬ tuˬ yoˬ. Nawˬ hui gʼa dawˇ haˍ tuˬ ve htawˇ, nawˬ hui dawˇ haˍ ve oˇ ve lehˬ, ha lehˬ tuˬ kʼaw‸ hpeh‸ la tuˬ yoˬ. 21Yaˇ miˇ teˇ gʼaˇ yaˇ paw ve teˇ yanˇ, yaˇ paw tuˬ ve awˬ yanˇ gaˬ la ve pa taw, yawˇ dawˇ haˍ ve yoˬ. Ya‸ hkʼaˇ, yaˇ paw peuˬ hkʼaw‸ nawˉ, chi miˬ guiˬ hkʼoˆ lo chaw teˇ gʼaˇ paw la peuˬ ve pa taw yawˇ ha lehˬ jaˇ leh, awˉ lawˉ htaˇ yawˇ gʼa hkanˍ ve teˇ hpaˍ hta‸ maˇ kʼaw‸ dawˇ nawˇ ve yoˬ. 22Oˇ ve hkʼa shuˍ shuˍ, chi beu‸ nawˬ hui gʼa dawˇ haˍ ve htawˇ, ngaˬ nawˬ hui hta‸ teˇ pawˆ kʼaw‸ hpuˇ da‸ tuˬ ve pa taw, nawˬ hui ve nyi ma gʼa ha lehˬ tuˬ yoˬ. Nawˬ hui ve ha lehˬ tuˬ oˇ ve hta‸ chaw teˇ gʼaˇ ka‸ nawˬ hui geh hiˉ yuˬ maˇ gʼa.
23Oˇ ve teˇ nyi gaˬ kʼo, nawˬ hui ngaˬ hta‸ te‸ chiˉ ka‸ maˇ kʼaw‸ na nyi. Ngaˬ nawˬ hui hta‸ awˬ tehˬ awˬ na kʼoˆ laˇ ve, Awˬ pa geh nawˬ hui teˇ ceuˬ ceuˬ lawˬ ve kʼo, ngaˬ ve awˬ meh awˬ hkʼaw lo yawˇ nawˬ hui hta‸ pe‸ laˇ tuˬ yoˬ. 24Chi beu‸ hkʼa gaˬ ngaˬ ve awˬ meh hta‸ cuˇ leh nawˬ hui teˇ ceuˬ ka‸ maˇ lawˬ jaw sheˍ. Nawˬ hui ha lehˬ tuˬ ve biˇ la tuˬ lawˬ loˬ. Lawˬ ve kʼo, gʼa tuˬ yoˬ.
Ngaˬ lehˬ chi miˬguiˬ hta‸ gʼaˇ peuˬ
25Ngaˬ tawˇ pa haˉ yehˇ leh, nawˬ hui hta‸ awˬ lawn chi teˇ hpaˍ kʼoˆ maˍ laˇ peuˬ. Tawˇ pa haˉ maˇ kʼaw‸ yehˇ leh, Awˬ pa awˬ lawn ngaˬ nawˬ hui hta‸ hkʼa tawˍ lehˆ kʼoˆ maˍ laˇ tuˬ ve awˬ yanˇ gaˬ la tuˬ yoˬ. 26Awˬ yanˇ oˇ ve awˬ hkʼaw lo nawˬ hui ngaˬ ve awˬ meh hta‸ cuˇ leh lawˬ tuˬ yoˬ. Nawˬ hui awˬ pon Awˬ pa geh ngaˬ lawˬ tuˬ yoˬ teh‸, nawˬ hui hta‸ ngaˬ maˇ kʼoˆ. 27Awˬ lawn kʼo, nawˬ hui ngaˬ hta‸ ha‸ leh, Awˬ pa geh lo ngaˬ laˬ ve yoˬ teh‸ nawˬ hui yonˍ ve pa taw, Awˬ pa yawˇ awˬ to nawˬ hui hta‸ ha‸ ve yoˬ. 28Ngaˬ lehˬ Awˬ pa geh lo tawˆ la leh, miˬguiˬ hkʼoˆ lo gaˬ la peuˬ. Teˇ pawˆ miˬguiˬ chi awˬ hkʼaw lo ngaˬ tawˆ kʼai leh Awˬ pa geh kʼaw‸ kʼo‸-e tuˬ yoˬ teh‸ kʼoˆ piˇ ve yoˬ.
29Yawˇ ve awˬ la‸ gʼawˇ teˇ hpaˍ kʼoˆ ve, Chi beu‸ nawˬ tawˇ pa haˉ maˇ yehˇ leh hkʼa tawˍ lehˆ kʼoˆ laˇ ve yoˬ. 30Nawˬ hkʼa peu-eˬ hta‸ shiˍ taˍ ve hta‸ maˇ kʼoˆ, chaw teˇ gʼaˇ ka‸ nawˬ hta‸ na nyi laˇ tuˬ nawˬ maˇ loˍ ve hta‸ maˇ kʼoˆ, chi beu‸ ngaˬ hui shiˍ ve yoˬ. Chi hta‸ pa taw, nawˬ Gʼuiˬsha geh lo laˬ ve hta‸ ngaˬ hui yonˍ ve yoˬ teh‸ kʼoˇ ve yoˬ.
31Yeˍsuˆ kʼaw‸ kʼoˆ ve, Chi beu‸ nawˬ hui yonˍ peuˬ laˇ. 32Nawˬ hui hpaˆ da‸ leh, nawˬ hui teˇ gʼaˇ le le a shu yawˇ ve chehˇ kuiˬ lo kʼo‸-e leh ngaˬ hta‸ tiˉ baˬ taˉ laˇ tuˬ ve awˬ yanˇ gaˬ la chehˇ leh chi beu‸ ka‸ gaˬ la peuˬ. Ya‸ hkʼaˇ, ngaˬ lehˬ ngaˬ teˇ gʼaˇ tiˉ gʼa chehˇ tuˬ ve maˇ heˆ. Awˬ pa ngaˬ geh chehˇ taˍ ve yoˬ. 33Nawˬ hui lehˬ ngaˬ awˬ hkʼaw lo dawˇ sha gaˇ sha ve teˇ ceuˬ hta‸ gʼa tuˬ, tawˇ chi teˇ hpaˍ ngaˬ nawˬ hui hta‸ kʼoˆ laˇ peuˬ. Chi miˬguiˬ hkʼoˆ lo nawˬ hui gʼa tu‸ gʼa hkanˍ ve yoˬ. Ya‸ hkʼaˇ nyi ma taˇ luˬ, ha lehˬ chehˇ-oˆ. Ngaˬ lehˬ chi miˬguiˬ hta‸ gʼaˇ peuˬ teh‸, yawˇ hui hta‸ kʼoˆ piˇ ve yoˬ.
Currently Selected:
Yoˇhanˬ li‸ 16: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.