YouVersion Logo
Search Icon

Yoˇhanˬ li‸ 1

1
Gʼuiˬsha ve Tawˇ hkawˇ awˬ suhˍ awˬ shaˍ pfuhˇ la ve
1Awˬ hkuiˉ puiˍ htaˇ ka‸ Tawˇ hkawˇ cawˬ taˍ ve yoˬ. Tawˇ hkawˇ oˇ ve G’uiˬsha geh chehˇ leh Tawˇ hkawˇ oˇ ve lehˬ, G’uiˬsha hpeh‸ ve yoˬ. 2Tawˇ hkawˇ oˇ ve lehˬ, awˬ hkuiˉ puiˍ htaˇ ka‸ Gʼuiˬsha geh teˇ geh chehˇ taˍ ve yoˬ. 3Hkʼa peu-eˬ ve hta‸ yawˇ te taˍ ve yoˬ. Hkʼa cawˬ taˍ ve hkʼa peu-eˬ awˬ hkʼaw lo yawˇ maˇ te ve teˇ ceuˬ ka‸ maˇ cawˬ. 4Yawˇ awˬ hkʼaw lo co ha te‸ ve awˬ ceuˬ cawˬ ve yoˬ. Co ha te‸ ve oˇ ve lehˬ, chaw yaˇ ve Awˬ gʼeuˆ 5Awˬ gʼeuˆ oˇ ve lehˬ, naˆ ho‸ ve awˬ hk’aw lo ba la leh, naˆ ho‸ ve lehˬ Awˬ g’euˆ hta‸ maˇ g’aˇ.
6Gʼuiˬsha peu laˇ ve Yoˇhanˬ meh ve chaw teˇ g’aˇ cawˬ ve yoˬ. Yawˇ lehˬ shaˉ hkiˆ hkanˍ tuˬ awˬ pon laˬ ve yoˬ. 7Yawˇ hta‸ pa taw chaw hkʼa peu-eˬ yonˍ la tuˬ, Awˬ gʼeuˆ oˇ ve awˬ lawn yawˇ shaˉ hkiˆ hkanˍ la ve yoˬ. 8Yawˇ lehˬ Awˬ gʼeuˆ hpeh‸ ve maˇ heˆ. Ya‸ hkʼaˇ, Awˬ gʼeuˆ awˬ lawn shaˉ hkiˆ hkanˍ tuˬ yawˇ laˬ ve yoˬ. 9Awˬ gʼeuˆ awˬ tehˬ ma lehˬ miˬguiˬ hkʼoˆ lo laˬ leh chaw hkʼa peu-eˬ hta‸ awˬ gʼeuˆ ba piˇ ve yoˬ.
10Yawˇ lehˬ miˬguiˬ hta‸ te hpanˍ taˍ leh, miˬguiˬ hkʼoˆ lo chehˇ taˍ htawˇ, miˬguiˬ yaˇ yawˇ hta‸ maˇ shiˍ. 11Yawˇ ve chehˇ kuiˬ lo yawˇ laˬ htawˇ, yawˇ ve chaw yawˇ hta‸ maˇ ha‸ yuˬ. 12Ya‸ hkʼaˇ, yawˇ hta‸ hkʼa ha‸ yuˬ leh yawˇ ve awˬ meh hta‸ hkʼa yonˍ ve chaw hkʼa peu-eˬ hta‸ Gʼuiˬsha ve awˬ yaˇ hpeh‸ la tuˬ yawˇ a hkaw-anˬ piˇ ve yoˬ. 13Yawˇ hui Gʼuiˬsha ve awˬ yaˇ hpeh‸ la ve lehˬ, awˬ ceuˬ awˬ hkʼaˇ hta‸ pa taw maˇ heˆ. Awˬ suhˍ awˬ shaˍ a loˍ hta‸ pa taw maˇ heˆ. Chaw yaˇ ve a loˍ hta‸ pa taw htawˇ maˇ heˆ. Gʼuiˬsha hta‸ pa taw yoˬ.
14Tawˇ hkawˇ oˇ ve lehˬ, awˬ suhˍ awˬ shaˍ pfuhˇ leh ngaˬ hui geh chehˇ la ve yoˬ. Yawˇ ve awˬ me‸ awˬ hponˇ hta‸ ngaˬ hui gʼa mawˬ ve yoˬ. Awˬ me‸ awˬ hponˇ oˇ ve lehˬ, Awˬ pa lo laˬ ve Yaˇ hpu tiˍ ve awˬ me‸ awˬ hponˇ hkʼa shuˍ shuˍ hpeh‸ ve yoˬ. Yawˇ awˬ hkʼaw lo awˬ bon awˬ shinˉ leh hteˇ ve cawˇ ve awˬ ceuˬ hkʼa biˇ cawˬ ve yoˬ.
15(Yoˇhanˬ lehˬ yawˇ awˬ lawn shaˉ hkiˆ hkanˍ ve awˬ hkʼaw lo kuˬ leh kʼoˆ ve, Ngaˬ awˬ hkʼaw‸ nawˉ laˬ tuˬ ve chaw teˇ gʼaˇ lehˬ, ngaˬ a‸ kehˉ uiˍ ve yoˬ. Awˬ lawn kʼo, ngaˬ maˇ cawˬ sheˍ awˬ gʼuˇ suhˍ htaˇ ka‸ yawˇ cawˬ chehˇ taˍ ve yoˬ teh‸ ngaˬ kʼoˆ taˍ ve lehˬ, chaw chi teˇ gʼaˇ yoˬ teh‸ kʼoˆ ve yoˬ.)
16Ngaˬ hui hkʼa peu-eˬ lehˬ, yawˇ biˇ ve teˇ ceuˬ awˬ hkʼaw lo, awˬ bon teˇ ceuˬ peuˬ teˇ ceuˬ gʼa taˍ ve yoˬ. 17Awˬ lawn kʼo, awˬliˇtawˇhkawˇ lehˬ, Moˉseˍ ve la‸ hkʼaw lo pe‸ laˇ taˍ ve yoˬ. Awˬ bon awˬ shinˉ leh hteˇ ve cawˇ ve teˇ ceuˬ lehˬ, Yeˍsuˆ Hkri‸ awˬ hkʼaw lo hpeh‸ la ve yoˬ. 18Chaw teˇ gʼaˇ ka‸ Gʼuiˬsha hta‸ maˇ mawˬ jaw. Awˬ pa ve nyi ma pui lo chehˇ ve Yaˇ hpu tiˍ lehˬ, Awˬ pa awˬ lawn hkʼa tawˍ lehˆ hpeu‸ maˍ laˇ peuˬ.
Baˆtiˆsaˬ piˇ paˍYoˇhanˬ shaˉ hkiˆ hkanˍ ve
19Yuˇda‸ chaw teˇ hpaˍ lehˬ, paw hkuˇ teˇ hpaˍ leh Leˍviˆ chaw teˇ hpaˍ hta‸ Yeˍruˆsaˍlehnˍ venˇ lo tu leh Yoˇhanˬ geh kʼai tcuh ve yoˬ. Yawˇ hui lehˬ, Nawˬ a shu le teh‸ na nyi htaˇ, Yoˇhanˬ chi hkʼe shaˉ hkiˆ hkanˍ ve yoˬ.
20Ngaˬ lehˬ Hkri‸ maˇ heˆ teh‸, hteˇ lehˍ hto piˇ ve yoˬ. Yawˇ maˇ heˍ maˇ faˉ.
21Oˇ htaˇ yawˇ hui lehˬ, Hkʼe te kʼo, nawˬ Eˇliˇya‸ leh laˇ teh‸ na nyi ve teˇ yanˇ,
Ngaˬ Eˇliˇya‸ maˇ heˆ teh‸ yawˇ kʼaw‸ kʼoˆ piˇ ve yoˬ.
Gʼuiˬsha ve tcuh kaˍ paˍ oˇ ve teˇ gʼaˇ leh laˇ teh‸ kʼaw‸ na nyi ve teˇ yanˇ,
Maˇ heˆ teh‸ yawˇ kʼaw‸ kʼoˆ piˇ ve yoˬ.
22Hkʼe te leh yawˇ hui kʼaw‸ kʼoˆ ve, Nawˬ a shu le. Ngaˬ hui hta‸ peu laˇ ve chaw teˇ hpaˍ hta‸ ngaˬ hui kʼaw‸ hto piˇ hpeh‸ tuˬ, nawˬ awˬ to awˬ lawn nawˬ hkʼaˬ hkʼe kʼoˆ ve le teh‸ na nyi ve yoˬ.
23Yoˇhanˬ kʼaw‸ kʼoˆ ve, Gʼuiˬsha ve tcuh kaˍ paˍ Iˉsaˍyaˆ kʼoˆ taˍ ve hkʼe,
Jawˇmawˇ Gʼuiˬsha ve ya‸ kʼaw hta‸ hteˇ lehˍ te-o teh‸,
heh puiˉ hkʼaw lo kuˬ chehˇ ve teˇ gʼaˇ lehˬ ngaˬ yoˬ teh‸ kʼoˆ piˇ ve yoˬ. #Isy 40:3
24Chaw oˇ ve teˇ hpaˍ lehˬ, Hpaˍriˍsehˇ hui kʼai tcuh ve chaw teˇ hpaˍ hpeh‸ ve yoˬ. 25Yawˇ hui kʼaw‸ kʼoˆ ve, Nawˬ lehˬ Hkri‸ maˇ heˆ, Eˇliˇya‸ ka‸ maˇ heˆ. Gʼuiˬsha ve tcuh kaˍ paˍ oˇ ve teˇ gʼaˇ ka‸ maˇ heˆ ve kʼo, aˬ hto‸ ma te nawˬ shu hta‸ baˆtiˆsaˬ piˇ ve le teh‸ na nyi ve yoˬ.
26Yoˇhanˬ kʼaw‸ kʼoˆ ve, Ngaˬ lehˬ shu hta‸ iˉ kaˆ awˬ hkʼaw lo baˆtiˆsaˬ piˇ ve yoˬ. Nawˬ hui maˇ shiˍ ve chaw teˇ gʼaˇ nawˬ hui awˬ hkʼaw lo chehˇ taˍ ve yoˬ. 27Yawˇ lehˬ, ngaˬ awˬ hkʼaw‸ nawˉ laˬ ve chaw teˇ gʼaˇ hpeh‸ ve yoˬ. Yawˇ ve hkuiˉ nuˆ caˆ hta‸ hpui tuˬ ve ceh ka‸ ngaˬ maˇ keunˍ teh‸ yawˇ hui hta‸ kʼoˆ piˇ ve yoˬ.
28Yawˇ hui Yoˇhanˬ hta‸ chi hkʼe na nyi kuiˬ lehˬ, Yawˇdanˍ gʼuiˬ ma coˇ paˉ lo cawˬ ve Beˍtaˍniˆ hkʼaˆ hkʼaw, Yoˇhanˬ baˆtiˆsaˬ piˇ chehˇ ve teˇ kaˬ yoˬ.
Gʼuiˬsha ve Yawˬ ehˉ hta‸ nyi-o
29Awˬ hkʼaw‸ nawˉ teˇ nyi, Yoˇhanˬ lehˬ Yeˍsuˆ yawˇ geh lo laˬ chehˇ ve hta‸ gʼa mawˬ ve teˇ yanˇ yawˇ kʼoˆ ve, Miˬguiˬ yaˇ ve venˇbaˆ hta‸ yuˬ baˬ shehˍ hpaˇ, Gʼuiˬsha ve Yawˬ ehˉ hta‸ nyi-o. 30Ngaˬ awˬ hkʼaw‸ nawˉ laˬ tuˬ ve chaw teˇ gʼaˇ lehˬ, ngaˬ a‸ kehˉ uiˍ ve yoˬ. Awˬ lawn kʼo, ngaˬ maˇ cawˬ sheˍ awˬ gʼuˇ suhˍ htaˇ ka‸ yawˇ cawˬ chehˇ taˍ ve yoˬ teh‸ ngaˬ kʼoˆ taˍ ve lehˬ, chaw chi teˇ gʼaˇ hta‸ kʼoˆ ve yoˬ. 31Awˉ lawˉ htaˇ ngaˬ yawˇ hta‸ maˇ shiˍ. Ya‸ hkʼaˇ, Iˉsaˍreˍlaˆ chaw hui yawˇ hta‸ hkʼa tawˍ lehˆ gʼa mawˬ gʼa shiˍ tuˬ, ngaˬ laˬ leh shu hta‸ iˉ kaˆ awˬ hkʼaw lo baˆtiˆsaˬ piˇ ve yoˬ.
32Chi hkʼoˆ ka‸, Yoˇhanˬ shaˉ hkiˆ hkanˍ leh kʼoˆ ve, Awˬ ha hpu lehˬ, aˉ pui kʼaˍ hkʼe mvuhˇ naw ma lo ya‸ la leh yawˇ awˬ hkʼoˆ lo chehˇ taˍ ve hta‸ ngaˬ gʼa mawˬ ve yoˬ. 33Awˉ lawˉ htaˇ ngaˬ yawˇ hta‸ maˇ shi. Ya‸ hkʼaˇ, iˉ kaˆ awˬ hkʼaw lo shu hta‸ baˆtiˆsaˬ piˇ tuˬ ngaˬ hta‸ tcuh laˇ shehˍ hpaˇ teˇ gʼaˇ ngaˬ hta‸ kʼoˆ laˇ ve, Yawˇ awˬ hkʼoˆ Awˬ ha hpu ya‸ la leh chehˇ taˍ ve teˇ gʼaˇ hta‸ nawˬ gʼa mawˬ ve kʼo, yawˇ lehˬ da‸ ve kehˬ ve Awˬ ha hpu awˬ hkʼaw lo shu hta‸ baˆtiˆsaˬ piˇ shehˍ hpaˇ hpeh‸ ve yoˬ teh‸ kʼoˆ laˇ ve yoˬ. 34Ngaˬ gʼa mawˬ peuˬ leh, chaw chi teˇ gʼaˇ lehˬ Gʼuiˬsha ve Yaˇ hpu hpeh‸ ve yoˬ teh‸ ngaˬ shaˉ hkiˆ hkanˍ ve yoˬ teh‸ Yoˇhanˬ kʼoˆ ve yoˬ.
Awˬ la‸ gʼawˇ awˉ lawˉ hpeh‸ la ve chaw teˇ hpaˍ
35Awˬ hkʼaw‸ nawˉ teˇ nyi Yoˇhanˬ lehˬ, yawˇ ve awˬ la‸ gʼawˇ nyiˇ gʼaˇ geh kʼaw‸ huˉ chehˇ htaˇ, 36Yeˍsuˆ laˬ chehˇ ve hta‸ yawˇ nyi leh, Gʼuiˬsha ve Yawˬ ehˉ hta‸ nyi-o teh‸ kʼoˆ piˇ ve yoˬ.
37Awˬ la‸ gʼawˇ oˇ ve nyiˇ gʼaˇ lehˬ, yawˇ kʼoˆ ve tawˇ hkawˇ hta‸ gʼa kaˇ leh, Yeˍsuˆ awˬ hkʼaˇ suh kʼai ve yoˬ. 38Yeˍsuˆ hpfuhˆ nyi leh, yawˇ huiˉ maˬ yawˇ awˬ hkʼaˇ suh laˬ chehˇ ve hta‸ gʼa mawˬ ve teˇ yanˇ, Nawˬ huiˉ maˬ aˬ hto‸ ma ca ve le teh‸ na nyi ve yoˬ.
Yawˇ huiˉ maˬ kʼaw‸ kʼoˆ ve, Raˍbiˆ-oˬ, nawˬ hkʼaˬ lo chehˇ ve le teh‸ yawˇ hta‸ na nyi ve yoˬ. (Raˍbiˆ teh‸ kʼoˆ ve lehˬ, saˍ la‸ teh‸ kʼoˆ ve yoˬ.)
39Yeˍsuˆ yawˇ huiˉ maˬ hta‸ kʼoˆ piˇ ve, Ca nyi la-o. Hkʼe te leh, yawˇ huiˉ maˬ kʼai leh, yawˇ ve chehˇ kuiˬ hta‸ gʼa mawˬ ve yoˬ. Oˇ htaˇ, mvuhˇ hpeu‸ hpawˇ awˇ naˍ riˍ hkʼe gaˬ peuˬ ve pa taw, oˇ ve teˇ nyi yawˇ huiˉ maˬ yawˇ geh chehˇ taˍ ve yoˬ.
40Yoˇhanˬ kʼoˆ ve tawˇ hkawˇ hta‸ gʼa kaˇ leh Yeˍsuˆ awˬ hkʼaˇ suh kʼai ve chaw oˇ ve nyiˇ gʼaˇ awˬ hkʼaw lo, teˇ gʼaˇ lehˬ Siˉmonˍ Peˍtruˆ ve awˬ nyi paˍ Anˍdrehˍ yoˬ. 41Yawˇ lehˬ, awˉ lawˉ htaˇ yawˇ ve awˬ viˉ paˍ Siˉmonˍ hta‸ ca ve yoˬ. Yawˇ hta‸ gʼa mawˬ htaˇ, Ngaˬ huiˉ maˬ Meˍsiˉya‸ hta‸ gʼa mawˬ peuˬ teh‸ kʼoˆ piˇ ve yoˬ. (Meˍsiˉya‸ teh‸ kʼoˆ ve lehˬ, Hkri‸ teh‸ kʼoˆ ve yoˬ.) 42Oˇ htaˇ yawˇ lehˬ, yawˇ awˬ viˉ paˍ hta‸ Yeˍsuˆ geh shiˍ kʼai ve yoˬ.
Yeˍsuˆ Siˉmonˍ hta‸ nyi leh, Nawˬ lehˬ Yoˇhanˬ ve yaˇ paˍ Siˉmonˍ yoˬ. Nawˬ hta‸ Keˍhpaˆ gʼa meh tuˬ yoˬ teh‸ kʼoˆ piˇ ve yoˬ. (Keˍhpaˆ teh‸ kʼoˆ ve lehˬ, haˉ pui teh‸ kʼoˆ ve yoˬ.)
Hpiˇliˇpuˆ leh Naˍtaˍneˍlaˆ hui hta‸ kuˬ yuˬ ve
43Awˬ hkʼaw‸ nawˉ teˇ nyi, Yeˍsuˆ Gaˍliˍlehˇ mvuhˇ miˬ lo kʼai tuˬ dawˇ cheˆ taˍ ve yoˬ. Yawˇ lehˬ Hpiˇliˇpuˆ hta‸ hpuˇ da‸ htaˇ, Ngaˬ hkʼaˇ suh laˬ-o‸ teh‸, yawˇ hta‸ kʼoˆ piˇ ve yoˬ. 44Hpiˇliˇpuˆ lehˬ, Anˍdrehˍ leh Peˍtruˆ ve chehˇ kuiˬ Behˇsehˇdaˆ venˇ yaˇ hpeh‸ ve yoˬ. 45Hpiˇliˇpuˆ lehˬ, Naˍtaˍneˍlaˆ hta‸ hpuˇ da‸ htaˇ yawˇ kʼoˆ ve, Moˉseˍ bvuh‸ taˍ ve awˬliˇtawˇhkawˇ li‸ awˬ hkʼaw lo maˇ kʼoˆ, Gʼuiˬsha ve tcuh kaˍ paˍ teˇ hpaˍ bvuh‸ taˍ ve li‸ awˬ hkʼaw lo maˇ kʼoˆ, chaw teˇ gʼaˇ awˬ lawn yawˇ hui bvuh‸ taˍ ve hkʼe, chaw oˇ ve hta‸ ngaˬ hui gʼa mawˬ peuˬ. Yawˇ lehˬ Yoˇseh‸ ve yaˇ, Naˍzaˍrehˆ chaw Yeˍsuˆ yoˬ teh‸, yawˇ hta‸ kʼoˆ piˇ ve yoˬ.
46Naˍtaˍneˍlaˆ kʼaw‸ kʼoˆ ve, Naˍzaˍrehˆ venˇhkʼaw lo da‸ ve awˬ ceuˬ teˇ ceuˬ ceuˬ tawˆ la hpeh‸ tuˬ laˇ teh‸ na nyi htaˇ,
Ca nyi la-o teh‸, Hpiˇliˇpuˆ yawˇ hta‸ kʼaw‸ kʼoˆ piˇ ve yoˬ.
47Naˍtaˍneˍlaˆ yawˇ geh laˬ chehˇ ve hta‸ Yeˍsuˆ gʼa mawˬ ve teˇ yanˇ, yawˇ ve awˬ lawn yawˇ chi hkʼe kʼoˆ ve, Yawˇ awˬ hkʼaw lo heˍ ve a ciˉ ka‸ maˇ cawˬ ve, Iˉsaˍreˍlaˆ chaw awˬ teh‸ awˬ na ve teˇ gʼaˇ hta‸ nyi-o teh‸ kʼoˆ ve yoˬ.
48Naˍtaˍneˍlaˆ lehˬ, Nawˬ ngaˬ hta‸ hkʼaˬ hkʼe te shiˍ le teh‸ na nyi ve teˇ yanˇ, Yeˍsuˆ kʼaw‸ kʼoˆ ve, Hpiˇliˇpuˆ nawˬ hta‸ maˇ kuˬ sheˍ htaˇ, maˉ nawˆ cehˬ awˬ hawˉ lo nawˬ chehˇ taˍ ve hta‸ ngaˬ mawˬ ve yoˬ teh‸, yawˇ hta‸ kʼoˆ piˇ ve yoˬ.
49Naˍtaˍneˍlaˆ kʼaw‸ kʼoˆ ve, Raˍbiˆ-oˬ, nawˬ lehˬ Gʼuiˬsha ve Yaˇ hpu hpeh‸ ve yoˬ. Iˉsaˍreˍlaˆ chaw hui ve Hkunˉ hawˉ hkanˇ htawˇ nawˬ hpeh‸ ve yoˬ teh‸, yawˇ hta‸ kʼoˆ piˇ ve yoˬ.
50Yeˍsuˆ kʼaw‸ kʼoˆ ve, Ngaˬ nawˬ hta‸ maˉ nawˆ cehˬ awˬ hawˉ lo mawˬ ve yoˬ teh‸ kʼoˆ laˇ ve pa taw nawˬ yonˍ ve laˇ. Chi a‸ kehˉ uiˍ ve awˬ ceuˬ teˇ hpaˍ hta‸ ka‸ nawˬ gʼa mawˬ tuˬ sheˍ teh‸, yawˇ hta‸ kʼoˆ piˇ ve yoˬ. 51Yeˍsuˆ teˇ pawˆ kʼaw‸ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, mvuhˇ naw ma hpaw taˍ leh, Gʼuiˬsha ve mvuhˇ naw ma tcuh yaˇ teˇ hpaˍ chaw yaˇ ve Yaˇ hpu awˬ hkʼoˆ hta‸ taˆ taˆ ya‸ ya‸ te chehˇ ve hta‸ nawˬ hui gʼa mawˬ tuˬ yoˬ teh‸, yawˇ hta‸ kʼoˆ piˇ ve yoˬ.

Currently Selected:

Yoˇhanˬ li‸ 1: LHBE

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy