Yeˍsaˍkeˍlaˆ li‸ 1
1
Gʼuiˬsha ve kʼaw jaw
1Shehˆ chi hkʼaw‸ teˇ hkʼaw‸, ha pa awˇ maˬ teˇ maˬ, ngaˇ nyi htaˇ Buˇziˆ ve yaˇ paw hkuˇ te chehˇ ve ngaˬ Yeˍsaˍkeˍlaˆ lehˬ, awˬ nu ve Yuˇda‸ chaw hui geh teˇ geh Baˍbuˍlonˍ mvuhˇmiˬ hkʼaw cawˬ ve Hkeˍbaˆ iˉ kaˆ lawˬ paˇ lo chehˇ taˍ ve yoˬ. Oˇ htaˇ, mvuhˇ naw ma hpaw leh awˬ ha hkʼaw ngaˬ Gʼuiˬsha hta‸ gʼa mawˬ ve yoˬ. 2(Oˇ ve lehˬ, jawˇmawˇ Yeˍhkawˇniˆ hta‸ shu hpeh kʼai peuˬ hkʼaw‸ nawˇ, ngaˇ hkʼaw‸ teˇ hkʼaw‸ htaˇ yoˬ.) 3Baˍbuˍlonˍ mvuhˇmiˬ hkʼaw cawˬ ve Hkeˍbaˆ iˉ kaˆ lawˬ paˇ lo, Gʼuiˬsha ngaˬ hta‸ tawˇ yaw laˇ leh, yawˇ ve kanˇ paˆ ngaˬ awˬ hkʼoˆ gaˬ la ve yoˬ.
4Ngaˬ chiˇ nyi leh, awˬ na hpawˇ lo mvuhˇ haw lonˉ laˬ chehˇ ve hta‸ gʼa mawˬ ve yoˬ. Uiˍ jaˇ ve moˬ diˬ lonˉ hkʼaw mvuhˇ tiˉ po-e‸ ba chehˇ ve yoˬ. Mvuhˇ tiˉ po-e‸ ba chehˇ htaˇ, kuiˇ hkʼa shuˍ awˬ gʼeuˆ ba chehˇ ve awˬ ceuˬ hta‸ ngaˬ gʼa mawˬ ve yoˬ. 5Mvuhˇ haw lonˉ awˬ kʼaw ji lo chaw yaˇ hta‸ shuˍ ve a sha‸ te‸ chehˇ ve awˬ ceuˬ awˇ hkeh hta‸ ngaˬ gʼa mawˬ ve yoˬ. 6Teˇ hkeh le le mehˆ hpfuhˇ awˇ maˬ cawˬ leh, toˍ la‸ kʼuˉ awˇ maˬ cawˬ ve yoˬ. 7Yawˇ hui ve hkui sheh hteˇ lehˍ cawˬ leh, hkui kiˆ teˇ hpaˍ lehˬ nuˇ paˍ lonˉ ve hkui kiˆ hta‸ shuˍ ve yoˬ. Hkui kiˆ oˇ ve teˇ hpaˍ lehˬ, hkʼa deh‸ shiˆ taˍ ve kuiˇ hkʼe hpeh‸ ve yoˬ. 8Chi hkʼoˆ ka‸ yawˇ hui ve toˍ la‸ kʼuˉ teˇ maˬ le le awˬ hawˉ lo chaw yaˇ ve la‸ sheh teˇ maˬ cawˬ ve yoˬ. 9Yawˇ hui ve toˍ la‸ kʼuˉ nyiˇ maˬ lehˬ hpe taˍ leh awˬ meuˇ nyiˇ hpawˇ daw‸ da‸ chehˇ ve yoˬ. Yawˇ hui kʼai kʼai laˬ laˬ te ve teˇ yanˇ, teˇ moˍ hkʼe tiˉ te kʼai leh, choˬ hpfuhˆ oˇ hpfuhˆ maˇ te.
10Yawˇ hui teˇ hkeh le le mehˆ hpfuhˇ awˇ maˬ cawˬ ve yoˬ. Awˬ gʼuˇ suhˍ hpawˇ lehˬ chaw yaˇ ve mehˆ hpfuhˇ, la‸ sha paˉ lehˬ laˇ caˬ shiˉ ve mehˆ hpfuhˇ, la‸ mehˍ paˉ lehˬ nuˇ paˍ lonˉ ve mehˆ hpfuhˇ, leh awˬ hkʼaw‸ nawˉ paˉ lehˬ aˉ ceˬ ve mehˆ hpfuhˇ cawˬ ve yoˬ. 11Toˍ la‸ kʼuˉ nyiˇ maˬ lehˬ mvuhˇ hpe lo chiˇ taˍ leh, awˬ meuˇ nyiˇ hpawˇ lehˬ awˬ nu ve teˇ hkeh ve toˍ la‸ kʼuˉ hta‸ daw‸ da‸ chehˇ leh, toˍ la‸ kʼuˉ nyiˇ maˬ lehˬ awˬ to hta‸ beh taˍ ve yoˬ. 12Yawˇ hui lehˬ, awˇ ceˍ awˇ hpawˇ lo hpfuhˆ taˍ leh, yawˇ hui kʼai gaˇ kuiˬ lo teˇ moˍ hkʼe tiˉ te kʼai ve yoˬ. Choˬ hpfuhˆ oˇ hpfuhˆ te tuˬ maˇ loˍ.
13To nuˇ to shaˆ oˇ ve teˇ hpaˍ awˬ kʼaw ji lo, aˬ miˍ ha hkʼe ve teˇ maˬ te toˇ chehˇ leh, aˬ miˍ ha oˇ ve hkʼaw mvuhˇ tiˉ po-e‸ ba tawˆ la chehˇ ve yoˬ. 14To nuˇ to shaˆ oˇ ve teˇ hpaˍ lehˬ, mvuhˇ tiˉ po-e‸ ba ve hkʼa shuˍ choˬ kʼai oˇ kʼai ve gehˬ jaˇ ve yoˬ.
15To nuˇ to shaˆ oˇ ve awˇ hkeh hta‸ ngaˬ nyi chehˇ ve teˇ yanˇ, gaˉ yaw awˇ maˬ yawˇ hui awˬ paˇ lo cawˬ taˍ ve hta‸ ngaˬ gʼa mawˬ ve yoˬ. 16Gaˉ yaw oˇ ve awˇ maˬ lehˬ hkʼa shuˍ hpeh‸ ve yoˬ. Teˇ maˬ le le shehnˉ shiˍ hkʼa shuˍ awˬ gʼeuˆ ba leh, gaˉ yaw teˇ maˬ hkʼaw gaˉ yaw ehˉ teˇ maˬ kʼaw‸ tcuhˉ naw‸ piˇ taˍ ve yoˬ. 17Hkʼe te leh, gaˉ yaw oˇ ve teˇ hpaˍ hkʼaˬ hpawˇ lo htawˇ kʼai hpeh‸ ve yoˬ. 18Gaˉ yaw oˇ ve teˇ hpaˍ awˬ hkʼoˆ lo, mehˆ shiˍ hkʼa biˇ cawˬ ve yoˬ. 19To nuˇ to shaˆ oˇ ve teˇ hpaˍ kʼai ve teˇ yanˇ, gaˉ yaw oˇ ve teˇ hpaˍ htawˇ yawˇ hui geh kʼai leh, to nuˇ to shaˆ oˇ ve teˇ hpaˍ mvuhˇ hpe lo taˆ-e ve teˇ yanˇ, yawˇ hui htawˇ gʼa‸ taˆ-e ve yoˬ. 20To nuˇ to shaˆ oˇ ve teˇ hpaˍ lehˬ, yawˇ hui kʼai gaˇ kuiˬ lo kʼai ve yoˬ. Gaˉ yaw oˇ ve teˇ hpaˍ htawˇ, to nuˇ to shaˆ oˇ ve teˇ hpaˍ hkʼaˇ suh gʼa‸ kʼai ve yoˬ. Awˬ lawn kʼo, gaˉ yaw oˇ ve teˇ hpaˍ hta‸ to nuˇ to shaˆ teˇ hpaˍ uˉ peunˍ taˍ ve pa taw yoˬ. 21Chi hta‸ pa taw, to nuˇ to shaˆ oˇ ve teˇ hpaˍ kʼai htaˇ, jehˇ htaˇ, taˆ-e htaˇ yawˇ hui htawˇ awˬ hkʼaˇ suh gʼa‸ kʼai ve yoˬ.
22To nuˇ to shaˆ oˇ ve teˇ hpaˍ oˉ kʼoˍ hkʼoˆ lo hpuˉ-ehˍ ve haˉ pui shiˍ yuˬ te taˍ ve hta‸ shuˍ ve awˬ ceuˬ teˇ maˬ cawˬ ve yoˬ. 23To nuˇ to shaˆ oˇ ve teˇ hpaˍ lehˬ toˍ la‸ kʼuˉ nyiˇ paˉ chiˇ taˍ leh, toˍ la‸ kʼuˉ nyiˇ paˉ a shu yawˇ awˬ to hta‸ beh taˍ ve yoˬ. 24Toˍ la‸ kʼuˉ oˇ ve teˇ hpaˍ bvuhˬ tawˆ la ve aw hkawˇ hta‸ ngaˬ gʼa kaˇ ve yoˬ. Awˬ hkawˇ oˇ ve lehˬ laˇ tsuhˇ gʼuiˬ ve gʼuiˬ baˇ awˬ hkawˇ, ma‸ moˍ lonˉ kʼai chehˇ ve awˬ hkawˇ leh Gʼuiˬsha ve awˬ hkawˇ hkʼe hpeh‸ ve yoˬ. Yawˇ hui maˇ kʼaw‸ poˬ ve teˇ yanˇ, toˍ la‸ kʼuˉ hta‸ kʼaw‸ hoˆ taˍ ve yoˬ. 25Ya‸ hkʼaˇ, yawˇ hui ve oˉkʼoˍ hkʼoˆ lo awˬ hkawˇ bvuhˬ tawˆ la chehˇ sheˍ ve yoˬ.
26Yawˇ hui huˉ taˍ ve awˬ hkʼoˆ lo, shehnˉ shiˍ yuˬ te taˍ ve kʼaw jaw hta‸ shuˍ ve teˇ maˬ cawˬ leh, kʼaw jaw oˇ ve awˬ hkʼoˆ lo chaw yaˇ hta‸ shuˍ ve teˇ gʼaˇ mui chehˇ taˍ ve yoˬ. 27Chaw oˇ ve lehˬ, aˬ miˍ hkʼaw lo awˬ gʼeuˆ ba chehˇ ve kuiˇ hkʼe hpeh‸ leh, 28Aˉlaˇmiˬshiˉjaw hkʼaw cawˬ ve awˬ gʼeuˆ hta‸ shuˍ ve yoˬ. Awˬ gʼeuˆ oˇ ve lehˬ oˇ kaˬ lo Gʼuiˬsha chehˇ taˍ ve hta‸ hpeu‸ maˍ laˇ chehˇ ve yoˬ.
Currently Selected:
Yeˍsaˍkeˍlaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.