2 Kawˇrenˍhtuˆ li‸ 1
1
Awˬ chawˇ hui hta‸ dawˇ nawˇ ve hkawˇ
1Gʼuiˬsha ve a loˍ cawˇ ve hta‸ pa taw Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ,
Kawˇrenˍhtuˆ venˇ hkʼaw lo chehˇ ve Gʼuiˬsha ve Hkri‸ yaˇ awˬ moˍ leh, Aˍhkaˍyaˆ mvuhˇmiˬ hkʼa peu-eˬ awˬ hkʼaw lo chehˇ ve Hkri‸ yaˇ hkʼa peu-eˬ hta‸, awˬ viˉ awˬ nyi Tiˆmoˉseˍ ngaˬ huiˉ maˬ teˇ geh li‸ chi teˇ kʼoˆ bvuh‸ laˇ ve yoˬ.
2Ngaˬ hui ve Awˬ pa Gʼuiˬsha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Pawˇlu‸ gʼa tu‸ gʼa hkanˍ ve awˬ lawn
3Ngaˬ hui ve Jawˇmawˇ Yeˍsuˆ Hkri‸ ve Awˬ pa Gʼuiˬsha hta‸ chiˇ mvuh-o. Yawˇ lehˬ ha kʼaˉ puiˉ ve Awˬ pa hpeh‸ leh, dawˇ sha gaˇ sha tuˬ hkʼa peu-eˬ piˇ shehˍ hpaˇ Gʼuiˬsha hpeh‸ ve yoˬ. 4Ngaˬ hui gʼa tu‸ gʼa hkanˍ ve hkʼa peu-eˬ awˬ hkʼaw lo yawˇ ngaˬ hui hta‸ dawˇ sha la piˇ ve yoˬ. Hkʼe te leh, Gʼuiˬsha ngaˬ hui hta‸ dawˇ sha la piˇ ve hkʼa shuˍ shuˍ, tu‸ ve hkanˍ ve teˇ ceuˬ le le gʼa hkanˍ ve chaw hui hta‸ ngaˬ hui htawˇ dawˇ sha la piˇ hpeh‸ ve yoˬ. 5Awˬ lawn kʼo, Hkri‸ gʼa tu‸ gʼa hkanˍ ve teˇ hpaˍ ngaˬ hui awˬ hkʼaw lo maˇ la ve hkʼe, Hkri‸ hta‸ pa taw dawˇ sha gaˇ sha ve teˇ ceuˬ htawˇ ngaˬ hui awˬ hkʼaw lo maˇ la ve yoˬ. 6Hkʼe te leh, ngaˬ hui tu‸ ve hkanˍ ve hta‸ gʼa hkanˍ ve kʼo, nawˬ hui awˬ pon dawˇ sha gaˇ sha ve awˬ ceuˬ leh htaiˍ hkʼaw‸ ve awˬ ceuˬ hpeh‸ ve yoˬ. Ngaˬ hui dawˇ sha gaˇ sha ve kʼo, nawˬ hui awˬ pon dawˇ sha gaˇ sha ve awˬ ceuˬ hpeh‸ ve yoˬ. Ngaˬ hui gʼa tu‸ gʼa hkanˍ ve teˇ hpaˍ hta‸ nawˬ hui htawˇ gʼa hkanˍ ve teˇ yanˇ, nawˬ hui yeunˇ hkanˍ ve kʼo, dawˇ sha gaˇ sha ve chi hta‸ nawˬ hui gʼa tuˬ yoˬ. 7Nawˬ hui awˬ pon ngaˬ hui dawˇ law ve teˇ ceuˬ lehˬ yeˬ chehˇ ve yoˬ. Awˬ lawn kʼo, ngaˬ hui ve tu‸ ve hkanˍ ve teˇ hpaˍ hta‸ nawˬ hui gʼa hkanˍ ve hkʼe, ngaˬ hui ve dawˇ sha gaˇ sha ve hta‸ htawˇ nawˬ hui gʼa tuˬ yoˬ teh‸ ngaˬ hui shiˍ ve yoˬ.
8Awˬ viˉ awˬ nyi teˇ hpaˍ-oˬ, Aˍsiˆ mvuhˇmiˬ awˬ hkʼaw lo ngaˬ hui gʼa hkanˍ peuˬ ve tu‸ ve hkanˍ ve teˇ hpaˍ awˬ lawn nawˬ hui hta‸ shiˍ piˇ gaˇ ve yoˬ. Ngaˬ hui a sha‸ gʼa ponˬ tuˬ ve hta‸ maˇ dawˇ htaˇ hkʼa gaˬ, ngaˬ hui hkanˍ maˇ gʼaˇ ve tu‸ jaˇ hkanˍ jaˇ ve teˇ hpaˍ ngaˬ hui hta‸ nyiˉ tiˍ taˍ ve yoˬ.
9Ngaˬ hui gʼa suh tuˬ yoˬ teh‸, suhˉ taˆ ve hta‸ ngaˬ hui gʼa hkanˍ ve hkʼe yoˬ. Ya‸ hkʼaˇ ngaˬ hui lehˬ, ngaˬ hui awˬ to hta‸ gʼaˇ maˇ va leh, suh taˍ ve chaw teˇ hpaˍ hta‸ kʼaw‸ te‸ tu la piˇ shehˍ hpaˇ Gʼuiˬsha hta‸ ceh tiˉ gʼaˇ va tuˬ, chi hkʼe hpeh‸ la ve yoˬ. 10Yawˇ lehˬ, chi taw taw uiˍ jaˇ ve suh ve teˇ ceuˬ awˬ hkʼaw lo ngaˬ hui hta‸ ponˬ laˇ peuˬ leh kʼaw‸ ponˬ laˇ tuˬ sheˍ ve yoˬ. Yawˇ ngaˬ hui hta‸ kʼaw‸ ponˬ laˇ tuˬ sheˍ ve hta‸ htawˇ, ngaˬ hui yawˇ hta‸ dawˇ law chehˇ ve yoˬ. 11Nawˬ hui htawˇ, bon ga lawˬ laˇ-oˆ. Oˇ hkʼe te ve kʼo, chaw laiˉ gʼaˇ bon lawˬ ve hta‸ pa taw ngaˬ hui gʼa ve awˬ bon teˇ hpaˍ awˬ pon, chaw laiˉ gʼaˇ Gʼuiˬsha hta‸ chiˇ mvuh tuˬ yoˬ.
Pawˇlu‸ aˬ hto‸ ma te maˇ laˬ ve awˬ lawn
12Ngaˬ hui nyi ma uiˍ kuiˬ lehˬ chi hkʼe yoˬ. Miˬguiˬ yaˇ mehˆ gʼuˇ suhˍ maˇ kʼoˆ, leuˉ leh nawˬ hui mehˆ gʼuˇ suhˍ maˇ kʼoˆ, Gʼuiˬsha pe‸ laˇ ve da‸ ve kehˬ ve leh hteˇ ve cawˇ ve awˬ hkʼaw lo ngaˬ hui te ve yoˬ teh‸, ngaˬ hui ve shiˍ puiˉ ve nyi ma shaˉ hkiˆ hkanˍ ve yoˬ. Ngaˬ hui chi hkʼe te ve lehˬ, miˬguiˬ ve cuˇ yiˍ hta‸ gʼaˇ va ve maˇ heˆ. Gʼuiˬsha ve awˬ bon hta‸ gʼaˇ va ve yoˬ. 13Nawˬ hui gʼaw gʼa leh shiˍ gʼa ve awˬ ceuˬ ceh tiˉ ngaˬ hui nawˬ hui hta‸ bvuh‸ laˇ ve yoˬ. 14Nawˬ hui hkʼa cawˇ cawˇ shiˍ taˍ peuˬ ve hkʼe, hkʼa biˇ shiˍ la tuˬ ngaˬ dawˇ law chehˇ ve yoˬ. Nawˬ hui oˇ hkʼe shiˍ la ve kʼo, ngaˬ hui ve Jawˇmawˇ Yeˍsuˆ ve awˬ nyi awˬ hkʼaw lo nawˬ hui hta‸ pa taw ngaˬ hui nyi ma uiˍ kuiˬ cawˬ ve hkʼe, nawˬ hui htawˇ ngaˬ hui hta‸ pa taw nyi ma uiˍ kuiˬ cawˬ tuˬ yoˬ.
15Ngaˬ chi hta‸ hkʼa deh‸ yonˍ ve pa taw, nawˬ hui nyiˇ pawˆ teˇ pawˆ gʼa kʼaw‸ ha lehˬ tuˬ ngaˬ nawˬ hui geh awˉ lawˉ laˬ tuˬ yoˬ teh‸, dawˇ taˍ ve yoˬ. 16Ngaˬ Maˍkeˍdawˇniˆ mvuhˇmiˬ lo kʼai ve teˇ yanˇ nawˬ hui geh ca guiˇ la taˉ leh, Maˍkeˍdawˇniˆ mvuhˇmiˬ lo kʼaw‸ la ve teˇ yanˇ nawˬ hui geh ca kʼaw‸ guiˇ la leh, nawˬ hui ngaˬ hta‸ Yuˇda‸ mvuhˇmiˬ hpawˇ lo shiˍ kʼoˬ laˇ tuˬ ve hta‸ htawˇ ngaˬ dawˇ taˍ ve yoˬ. 17Ngaˬ chi hkʼe dawˇ taˍ ve teˇ yanˇ, ngaˬ lehˬ htawˇdawˇnawˬdawˇ te ve laˇ. Maˇ heˆ kʼo, miˬguiˬ yaˇ teˇ hpaˍ te ve hkʼe, yoˬ ka‸ maˇ heˆ ka‸ teˇ pawˆ tiˉ ngaˬ kʼoˆ ve laˇ. 18Gʼuiˬsha ka ti‸ yeˬ ve hkʼe, ngaˬ hui nawˬ hui hta‸ kʼoˆ laˇ ve tawˇ hkawˇ lehˬ, yoˬ ka‸ maˇ heˆ ka‸ teˇ pawˆ tiˉ kʼoˆ ve maˇ heˆ. 19Awˬ lawn kʼo, Siˍlaˍnuˆ, Tiˆmoˉseˍ, ngaˬ hui teˇ hpaˍ nawˬ hui hta‸ kʼaoˍ maˍ laˇ ve Gʼuiˬsha ve Yaˇ hpu Yeˍsuˆ Hkri‸ lehˬ, yoˬ ka‸ maˇ heˆ ka‸ teˇ pawˆ tiˉ hpeh‸ ve maˇ heˆ. Yawˇ awˬ hkʼaw lo yoˬ ceh tiˉ hpeh‸ ve yoˬ. 20Gʼuiˬsha ve ka ti‸ tawˇ hkawˇ hkʼa peu-eˬ lehˬ, yawˇ awˬ hkʼaw lo yoˬ ceh tiˉ hpeh‸ ve yoˬ. Hkʼe te leh, ngaˬ hui Gʼuiˬsha hta‸ chiˇ uiˍ chiˇ mvuh ve teˇ yanˇ, Yeˍsuˆ hta‸ pa taw ngaˬ hui A menˬ teh‸ kʼoˆ ve yoˬ. 21Nawˬ hui geh teˇ geh ngaˬ hui hta‸ Hkri‸ awˬ hkʼaw lo chehˇ yeˬ piˇ shehˍ hpaˇ leh leuˆ yuˬ laˇ shehˍ hpaˇ lehˬ, Gʼuiˬsha yoˬ. 22Yawˇ lehˬ, ngaˬ hui hkʼa peu-eˬ hta‸ maiˉ taˍ leh, awˬ hkʼaw‸ nawˉ awˬ shinˉ gʼa tuˬ ve hta‸ shiˍ tuˬ, chi beu‸ ka‸ ngaˬ hui ve nyi ma awˬ hkʼaw lo yawˇ ve Awˬ ha hpu pe‸ laˇ taˍ peuˬ.
23Ngaˬ nawˬ hui hta‸ maˇ dawˇ haˍ piˇ lawˬ gaˇ ve pa taw, ngaˬ Kawˇrenˍhtuˆ venˇ lo maˇ laˬ ve teh‸, Gʼuiˬsha shaˉ hkiˆ hkanˍ tuˬ ngaˬ ve nyi ma awˬ hkʼaw lo ngaˬ yawˇ hta‸ lawˬ ve yoˬ. 24Ngaˬ hui chi hkʼe kʼoˆ ve lehˬ, nawˬ hui yonˍ ve teˇ ceuˬ hta‸ ngaˬ hui uˉ peunˍ ve maˇ heˆ. Nawˬ hui gʼa ha lehˬ tuˬ, ngaˬ hui nawˬ hui geh teˇ geh te ve yoˬ. Awˬ lawn kʼo, nawˬ hui yonˍ ve lehˬ yeˬ chehˇ ve yoˬ.
Currently Selected:
2 Kawˇrenˍhtuˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.