1 Peˍtruˆ li‸ 1
1
Awˬ chawˇ hui hta‸ dawˇ nawˇ ve hkawˇ
1Ngaˬ lehˬ, Yeˍsuˆ Hkri‸ ve tcuh yaˇ Peˍtruˆ yoˬ. Hpaˆ da‸ leh, Poˍtuˆ, Gaˍlaˍtiˆ, Kaˍpaˍdawˇkiˆ, Aˍsiˆ leh Beˍtuˇniˆ mvuhˇmiˬ teˇ hpaˍ awˬ hkʼaw lo ca chehˇ kʼai peuˬ ve chaw teˇ hpaˍ hta‸ ngaˬ li‸ bvuh‸ laˇ ve yoˬ. 2Yeˍsuˆ Hkri‸ hta‸ na yuˬ leh, yawˇ ve awˬ suhˍ nawˬ hui hta‸ pfuhˍ piˇ tuˬ, aˬ sho-eˬ htaˇ ka‸ Awˬ pa Gʼuiˬsha nawˬ hui hta‸ leuˆ yuˬ taˍ leh, Awˬ ha hpu nawˬ hui hta‸ da‸ piˇ kehˬ piˇ peuˬ.
Awˬ bon awˬ shinˉ leh dawˇ sha gaˇ sha tuˬ nawˬ hui awˬ hkʼaw lo maˇ la piˇ-oˆ.
Dawˇ law kuiˬ cawˬ ve awˬ lawn
3Ngaˬ hui ve Jawˇmawˇ Yeˍsuˆ Hkri‸ ve Awˬ pa Gʼuiˬsha hta‸ chiˇ mvuh-o. Yawˇ ha kʼaˉ puiˉ jaˇ ve hta‸ pa taw, ngaˬ hui chaw awˬ suhˉ hpeh‸ la leh, te‸ chehˇ ve dawˇ law kuiˬ cawˬ la ve yoˬ. Dawˇ law kuiˬ oˇ ve lehˬ, Yeˍsuˆ Hkri‸ suh kuiˬ lo kʼaw‸ te‸ tu la ve hta‸ pa taw cawˬ la ve yoˬ. 4Hkʼe te leh, ngaˬ hui Gʼuiˬsha ve awˬ shinˉ caˇ shehˍ hpaˇ teˇ hpaˍ hpeh‸ la ve yoˬ. Maˇ luˬ puiˉ, maˇ cha‸ chiˆ puiˉ, maˇ pehˆ puiˉ ve awˬ shinˉ oˇ ve hta‸ mvuhˇ naw ma hkʼoˆ lo nawˬ hui awˬ pon yawˇ ha‸ shaˉ taˍ ve yoˬ. 5Awˬ leh meuˇ teˇ nyi htaiˍ hkʼaw‸ ve hta‸ hkʼa tawˍ lehˆ hpeu‸ maˍ laˇ htaˇ hkʼa gaˬ, nawˬ hui hkʼa yonˍ ve chaw hui hta‸ Gʼuiˬsha yawˇ ve kanˇ paˆ hta‸ cuˇ leh ha‸ shaˉ chehˇ ve yoˬ.
6Hkʼe te leh, chi beu‸ teˇ hkui teˇ yanˇ awˬ hkʼaw lo, tu‸ ve hkanˍ ve leh lawˇ nyi ve laiˉ ceuˬ hta‸ nawˬ hui gʼa hpuˇ da‸ ve htawˇ, ha lehˬ chehˇ-oˆ. 7Aˬ miˍ awˬ hkʼaw lo shi hta‸ lawˇ nyi ve hkʼe, tu‸ hkanˍ ve chi teˇ hpaˍ lehˬ nawˬ hui yonˍ ve nyi ma hta‸ lawˇ nyi tuˬ yoˬ. Nawˬ hui yonˍ ve nyi ma lehˬ, luˬ puiˉ sheˆ puiˉ ve shi a‸ kehˉ awˬ hpfuhˇ hkʼaˆ jaˇ ve yoˬ. Nawˬ hui yonˍ yeˬ ve kʼo, Yeˍsuˆ Hkri‸ kʼaw‸ ya‸ la ve teˇ yanˇ, chiˇ mvuh ve, awˬ me‸ awˬ hponˇ leh, taˍ uiˍ taˍ mvuh ve hta‸ nawˬ hui gʼa tuˬ yoˬ. 8Yawˇ hta‸ nawˬ hui maˇ mawˬ jaw htawˇ, nawˬ hui yawˇ hta‸ ha‸ chehˇ ve yoˬ. Chi beu‸ yawˇ hta‸ maˇ mawˬ htawˇ, nawˬ hui yawˇ hta‸ yonˍ ve awˬ hkʼaw lo awˬ me‸ awˬ hponˇ uiˍ jaˇ leh, ca kʼoˆ maˇ peuˬ ve ha lehˬ tuˬ nawˬ hui geh cawˬ ve yoˬ. 9Nawˬ hui yonˍ ve pa taw, nawˬ hui ve co ha htaiˍ hkʼaw‸ ve hta‸ gʼa ve yoˬ.
10Htaiˍ hkʼaw‸ ve chi hta‸ Gʼuiˬsha ve tcuh kaˍ paˍ hui hkʼa deh‸ na nyi leh ca nyi peuˬ. Gʼuiˬsha nawˬ hui hta‸ awˬ bon pe‸ laˇ tuˬ ve awˬ lawn, aˬ sho-eˬ htaˇ ka‸ yawˇ hui bon maˍ peuˬ. 11Tcuh kaˍ paˍ oˇ ve teˇ hpaˍ awˬ hkʼaw lo, Hkri‸ ve Awˬ ha hpu kanˉ te chehˇ ve yoˬ. Miˬguiˬ yaˇ hta‸ htaiˍ hkʼaw‸ tuˬ, hkʼaˬ ve teˇ gʼaˇ, hkʼaˬ ve teˇ yanˇ te tuˬ leh naˍ, yawˇ hui ca nyi peuˬ ve yoˬ. Aˬ sho-eˬ htaˇ yawˇ hui kʼoˆ ve, Hkri‸ gʼa tu‸ gʼa hkanˍ leh, awˬ hkʼaw‸ nawˉ awˬ me‸ awˬ hponˇ gʼa tuˬ yoˬ teh‸ kʼoˆ taˍ ve yoˬ. 12Tcuh kaˍ paˍ oˇ ve teˇ hpaˍ te ve kanˉ lehˬ, yawˇ hui awˬ pon maˇ heˆ, nawˬ hui awˬ pon yoˬ teh‸, Gʼuiˬsha yawˇ hui hta‸ hpeu‸ maˍ piˇ taˍ ve yoˬ. Chi beu‸ ha lehˬ ve bon hkawˇ chi shu nawˬ hui hta‸ maˍ laˇ chehˇ ve yoˬ. Mvuhˇ naw ma lo peu laˇ ve da‸ ve kehˬ ve Awˬ ha hpu yawˇ hui hta‸ hpeu‸ maˍ piˇ leh, yawˇ hui shiˍ ve yoˬ. Awˬ ceuˬ oˇ ve teˇ hpaˍ hta‸ mvuhˇ naw ma tcuh yaˇ hui ka‸ mawˬ gaˇ jaˇ ve yoˬ.
Da‸ ve kehˬ ve hta‸ te tuˬ awˬ lawn
13Hkʼe te leh, nawˬ hui nyi ma gu taˍ leh shaˍ ti‸ taˍ chehˇ-oˆ. Yeˍsuˆ Hkri‸ kʼaw‸ ya‸ la ve teˇ yanˇ, nawˬ hui hta‸ piˇ tuˬ ve awˬ bon hta‸ hkʼa deh‸ dawˇ law taˍ-o‸. 14Aˉ suhˆ nawˬ hui maˇ shiˍ sheˍ htaˇ, a shu yawˇ ve a loˍ awˬ hkʼaˇ suh te ve hkʼe, chi beu‸ taˇ kʼaw‸ te. Na yuˬ puiˉ ve yaˇ ehˉ hkʼe te-o. 15Nawˬ hui hta‸ kuˬ yuˬ ve teˇ gʼaˇ da‸ kehˬ ve hkʼe, nawˬ hui hkʼa te ve awˬ liˇ awˬ hkʼaˇ hkʼa peu-eˬ awˬ hkʼaw lo da‸ kehˬ piˇ-oˆ. 16Ngaˬ da‸ kehˬ ve pa taw, nawˬ hui htawˇ da‸ kehˬ piˇ-oˆ teh‸, Li‸ hpu hkʼaw bvuh‸ taˍ ve yoˬ.#Okʼo 11:44, 19:2
17Gʼuiˬsha hta‸ nawˬ hui bon lawˬ htaˇ, A pa-oˬ teh‸ nawˬ hui kʼoˆ ve yoˬ. Yawˇ lehˬ chaw mehˆ hpfuhˇ hta‸ maˇ nyi leh, teˇ gʼaˇ peuˬ teˇ gʼaˇ te ve kanˉ hta‸ nyi leh suhˉ jehˬ ve yoˬ. Chi hta‸ pa taw, nawˬ hui miˬguiˬ hkʼoˆ hkehˉ chaw te chehˇ ve teˇ yanˇ, yawˇ hta‸ yawˆ yan ve awˬ hkʼaw lo te-o. 18Awˬ puˍ awˬ pi teˇ hpaˍ geh gʼa ve awˬ bon maˇ cawˬ ve awˬ liˇ awˬ hkʼaˇ teˇ hpaˍ hta‸ ponˬ tuˬ, yawˇ nawˬ hui hta‸ htaiˍ hkʼaw‸ laˇ ve yoˬ. Luˬ puiˉ sheˆ puiˉ ve hpu shi hta‸ yehˇ leh htaiˍ hkʼaw‸ laˇ ve maˇ heˆ. 19Ya‸ hkʼaˇ, awˬ hpfuhˇ hkʼaˆ jaˇ ve Hkri‸ ve awˬ suhˍ nawˬ hui hta‸ htaiˍ hkʼaw‸ laˇ ve nawˬ hui shiˍ ve yoˬ. Awˬ suhˍ oˇ ve lehˬ, awˬ kuiˉ awˬ haiˇ maˇ cawˬ leh awˬ meˇ maˇ cawˬ ve yawˬ ehˉ awˬ suhˍ hkʼe hpeh‸ ve yoˬ. 20Miˬguiˬ hta‸ maˇ te hpanˍ sheˍ htaˇ ka‸, chi hkʼe gʼa te hkanˍ tuˬ, Gʼuiˬsha yawˇ hta‸ leuˆ yuˬ taˍ peuˬ. Hkʼe te leh, awˬ leh meuˇ ve awˬ yanˇ chi awˬ hkʼaw lo, nawˬ hui awˬ pon Gʼuiˬsha yawˇ hta‸ peu laˇ ve yoˬ. 21Hkri‸ hta‸ pa taw nawˬ hui Gʼuiˬsha hta‸ yonˍ ve yoˬ. Gʼuiˬsha yawˇ hta‸ suh kuiˬ lo kʼaw‸ te‸ tu la piˇ leh, awˬ me‸ awˬ hponˇ piˇ ve yoˬ. Chi hta‸ pa taw, nawˬ hui yonˍ ve awˬ ceuˬ leh dawˇ law ve awˬ ceuˬ Gʼuiˬsha awˬ hkʼaw lo cawˬ ve yoˬ.
22Nawˬ hui hteˇ ve cawˇ ve hta‸ na yuˬ ve pa taw, awˬ viˉ awˬ nyi hui hta‸ awˬ tehˬ awˬ na ha‸ hpeh‸ tuˬ, nawˬ hui ve nyi ma da‸ la kehˬ la peuˬ. Hkʼe te leh, nawˬ hui nyi ma awˬ tawˬ hkʼa gaˬ teˇ gʼaˇ leh teˇ gʼaˇ ha‸ da‸-o‸. 23Nawˬ hui awˬ suhˉ teˇ pawˆ kʼaw‸ paw la peuˬ. Paw la ve chi lehˬ, luˬ puiˉ sheˆ puiˉ ve awˬ yawˇ hta‸ pa taw maˇ heˆ. Maˇ luˬ maˇ sheˆ puiˉ ve awˬ yawˇ, Gʼuiˬsha ve te‸ chehˇ yeˬ chehˇ ve tawˇ hkawˇ hta‸ pa taw paw la ve yoˬ. 24Awˬ lawn kʼo,
Chaw ceuˬ hkʼa peu-eˬ mvuh‸ hkʼa shuˍ shuˍ hpeh‸ leh,
yawˇ hui ve awˬ me‸ awˬ hponˇ htawˇ mvuh‸ veˆ hkʼa shuˍ shuˍ hpeh‸ ve yoˬ.
Mvuh‸ lehˬ nawˍ kʼai goˇ kʼai leh, awˬ veˆ htawˇ piˬ kʼai ce kʼai ve yoˬ.
25Ya‸ hkʼaˇ, Jawˇmawˇ Gʼuiˬsha ve tawˇ hkawˇ lehˬ, co co taiˍ taiˍ yeˬ chehˇ ve yoˬ.#Isy 40:6-8
Tawˇ hkawˇ oˇ ve lehˬ, nawˬ hui hta‸ kʼaoˍ maˍ laˇ ve ha lehˬ ve bon hkawˇ hpeh‸ ve yoˬ.
Currently Selected:
1 Peˍtruˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.