YouVersion Logo
Search Icon

2 Pita 1

1
1Ndime Saimoni Pita, musebezhi u mutumwa wa Jeso Kilisito, ndalembela babo bakatambula lushomo ukoya lolu ndutukwete kwiita umbululami bwa Leza u Mufwutuli wesu Jeso Kilisito. 2Leza amufwile luse u kumupa luumuno lunji lunji cibaala kwiita muluzhibo lwa Leza u Jeso Kilisito Mwami wesu.
Koompolola u Kusala kwa Leza
3Kilisito munsana shabu Leza bwakwe, wakatupa shoonse shituyohwa kuba u bumi u bukombi bwini bwini. Wakacita bobo kwiita muluzhibo lwesu lwa Leza uwakatwita kwaamba twaabane bulemu u bubotu bwakwe. 4Muli sheshi shoonse wakatupa shishomezho shizandwa kwaamba mukatambule bumi bwa buleza, kwaamba mufwutulwe, mutazonaunwa ukaambo ka shisushi sha bumi bwa shibi. 5Kukaambo kaka nkukona amukwatishe kwaamba muzunjile lushomo kububotu, ulimwi kububotu muzunjile luzhibo, 6ulimwi kuluzhibo muzunjile kulikwata, ulimwi kukulikwata muzunjile bushicamba, ulimwi kubushicamba muzunjile buleza, 7ulimwi kubuleza muzunjile lufwuno lwa bunina, kulufwuno lwa bunina muzunjile lufwuno ku bantu boonse. 8Naa sheshi shoonse mulishikwete, ati tamukabi bakata bayina mulimo, shilakamupa kuba u busongo u luzhibo lwa Mwami Jeso Kilisito. 9Pele wezo wiina sheshi, ati moofwu takonzha kubona pe. Waluba kwaamba ati musanzhe ulimwi ulasalala kuhwa ku shibi shakwe shakale kale.
10Inzho nubakwesu, amuzhime cakushankamana mwa Leza wakamwita u kumusala kwaamba mutawi. Naa mwacita bobo, tamukonzha kuhwa mu lushomo lwenu pe, 11pele mulakayalulilwa mulyango wakunjila mu bwami butamana bwa Mwami Jeso Kilisito Mufwutuli wesu.
12Ubobo ume nshikonzha kuleka kumuzhibalusha makani aza nikuba ati mulyeezhi kale, ulimwi mulashoma cini cini calushinizho u myonzo yenu yoonse kunjiisho shiluleme nshimwakatambula. 13Ndatelaika ati ncintu cibotu kumuzhibalusha sheshi nincipona umubili wa buntu. 14Nkaambo ndizhi ati ciindi cilyaafwaafwi cakuhwa mu mubili wangu wa buntu umbona mbwaakaŋambila Mwami wesu Jeso Kilisito. 15Ulimwi ndasoleka cini cini kwaamba ati ndakaahwa ume mukaakwaazhibaluka makani aza lyoonse.
Bakamboni ba bulemu bwa Kilisito
16Nkaambo nitwakamuzhibya makani ansana sha Jeso Kilisito usha kwiza kwakwe katutacilila tushimpi twakapangwa u busongo bwa bantu pe. Pele twakalibonena u menso esu bukando bwakwe. 17#Mat 17:1-5; Mk 9:2-7; Lk 9:28-35Twakaakuliko ciindi Jeso naakatambula bulemu kuhwa kwa Leza Ushi, lelyo izwi nilyakashika kwakwe lyaamba ati, “Wezu ngu Mwanangu nakufwunwa, uumpa kubotelwa lyoonse.” 18Uswe mulwesu tubeni twakaliteelela leli izwi lyakahwa kwizeulu ciindi nitwakaakuli aze ku lupili lusalala.
19Ubobo twazhiba cakushinizha kwaamba mazwi a bashinshimi meni meni. Ati mwacita kabotu kuti na mwaateelela, nkaambo ali ukoya ilambe limunika mu mushinze mpaka kumancela, ukoya intanda imunika mu myonzo yenu. 20Pele cintu cikando ncakuti muzhibe ati kwiina mushinshimi ukonzha kupandulula mazwi ali mu Malembe kwiita munsana shakwe mwini. 21Kwiina bushinshimi bwakezhiza kuluzando lwa muntu, pele bantu kabasololelwa u Moza Usalala kwaamba mazwi a Leza.

Currently Selected:

2 Pita 1: ILL

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy