YouVersion Logo
Search Icon

Filmɔŋ 1

1
Ɗɛɛrwol yɔ Pol bi̧i̧s Filmɔŋ
1Mii Pol , mi gis Yeesu Kristu luknɔya ɔ̧ɔ̧nɛ hi yɛ̧ɛ̧ wɛ Timɔte. Wi bi̧i̧sig saam mi rɔb Filmɔŋ yɔ gi Waar Yeesu woosɔya hi wii lɛlgbunu gii ɗɛɛrwol yɛrɛ. 2Wi book siŋg wɛ Apiya hi Arkibus gɔ gi Yeesu Kristu laaya ɔ̧ɔ̧ an wiya, hi Waar Yeesu fɔkɔya wɔ gɔ hi mɔksig a mɔ raa du hɛw: 3an Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi! 4A ɔ̧tyɔ gɔ mi zɔ̧k Bɛt gedu sɛw saammi Filmɔŋ, mi mɔkig a mɔɔge mi gig waak baaniki 5anyɔ mi kɛm hi book hat mɔ dɔgl yɔ mɔ gɔk a Bɛt doodɔ zulha sɛw hi ɗɔbsigyɔ mɔ ɗɔbs Waar Yeesu.
6Mi ɛrk Bɛto an ɗɔbsig mɔ yɔ mɔ ɗɔbsig Waar Yeesu Kristu hi wi lɛlgbunu, gi woo an mɔ mɛɛ hinrɔbyɔ wɛ ɗɛɛ an wɛ woosig bɛttɔnɔ. 7Yɛ̧ɛ̧ mi rɔbo, hat mɔ has kpoos mi gbɔɔltɔnɔ, wɛɛ gaam tɛŋk gbɔɔltɔnɔ anyɔ Bɛt doodɔ kpoosya̧ hi ɗɔɔt rɔbtɔnɔ a mɔ dɔŋgo. 8Ya̧a̧nɛ an mi gin tɛŋk a Kristu nuŋg du an mi nugum mɔ kɛm tɔn du si̧, 9hā̧ā̧m an mi raam hin hi tɛŋk gɛ, ha̧a̧m an mi zɔ̧mɔzɔ̧ki a hat du. Anyɔ mi giyɔ, mii Pol , doo ɗɛnti, àgiyɔ mi gi Yeesu Kristu luknɔya ɔ̧ɔ̧ hɛw,
10mi gim zɔ̧k a Onɛsimus yɔ gi waa minɛ a Kristu hat yɔ gi wɛ zul gedu, mi wɛɛ ma baatɔ giya anyɔ mi goksig ɗɔbsig gbɔnɔ hɛdi a luknɔ du. 11Da amntɔnɔ ɗāāsum hinɔ gɛ, yɛrɛ ɓɔryɔ ɗɛɛ an gi ɗaasumɔ, wɛɛ ɗɛɛ an gi ɗaas mii be. 12Ɓɔryɔ mi gig yaak a mɔɔge, kpoos mi hi hat mi sɛw gi a ge. 13Ha̧a̧m nɛ an mi gbaag a mi dɔŋdi yɔ mi gik a luknɔ du te a Dɔgl Rɔb bɔ gi dɔŋgo an gi ɗaasim woos a mɔ kalɛ.
14Yɛrɛ hā̧ā̧m an mi woo hinza yɔ mɔ mɛɛ dɔglɔ gɛ gɛ. Wɛɛ hā̧ā̧mi an mi fɛ̧ɛ̧mɔ mɔ ta̧a̧ mɔ woosim rɔb gɛ. Ha̧a̧mi an mɔ woo hi ha̧a̧tig mɔɔnɛ. 15Kinsa Onɛsimus hɛɛtin hi mɔɔ ɔ̧t kaasi labɔ an kuudu gi wɛɛ gi waatin hi mɔɔ faa. 16Ɓɔryɔ taa gbaar ɗagtili, yɛrɛ daar gbaar daarɔ, gi an yɛ̧ɛ̧ rɔb yɔ ha̧a̧wɛ a ge a Kristu hat du. Wɛɛ mii be, ha̧a̧sim a ge gbɔɔltɔnɔ. Yɛrɛ mi mɔk a ha̧a̧mɔ a ge daarlɛlɛ. Hā̧a̧wɛ a ge an doo hɛbti kpɔd gɛ, ha̧a̧wɛ a ge an Waar Yeesu fɔkɔyayɔ.
17Gid mɔ seemi hi rɔbo an mi gitin Waar Yeesu woosɔya hi mɔɔ lɛlgbunu, yɛrɛ zemɔge anyɔ gɔ mɔ zek mii be. 18Gi woosum nɛ hinza bɔbtini, zaabe, mɔ gig fɔk belko, warum miya, bɔmɔ war giya. 19Mi bi̧i̧ hin yɛrɛ gɛrɛ hi naan miinɛ, mii Pol , mi toomɔ. (Bɔmɔ zɛn a mii gi kol mɔ za̧a̧sigya ya?! ) 20Mi zɔ̧mɔ, yɛ̧ɛ̧mi, ta̧a̧simi hin yɛrɛ a Waar Yeesu dɔŋgo. Hasum kpoos mi anyɔ bɛr a ɔksig wɛ bɔ gedu hi Kristu! 21Mi mɛɛ bɛttɔnɔ a mɔ́ woo hinyɔ mi ɛrumɔ. Yɔ mi bi̧i̧sum anbɔ mi mɛɛ a mɔ́ woo hinyɔ mi raa gi daarlɛl hɛw.
22Yɛrɛ hinyɔ gɔ mi ɛrum ɓɛ gɛ: a gɛmntsimi rɔ̀bɛ luk buu gbunu anyɔ mi mɔk a Bɛt gi ta̧a̧ zɔ̧k nɛ an gi wɛɛnim a nɛ lɛlɛ. 23Epafaras yɔ gi a luknɔ du hi mii a Yeesu Kristu zulɛ boom du. 24Markus hɛw, hi Aristarkus, hi Deemas, hi Luka, kaŋkmiya wɔ a woos du hi boom du sɛw. 25An Waar Yeesu Kristu gɛmsilɔ gigi hi nɛya. Aanbɔ!

Currently Selected:

Filmɔŋ 1: NTD

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy