YAKUBA 1
1
YAKUBA Ɗɛɛrwol yɔ Yakuba bi̧i̧s Yeesufɔkya Yahuduya wɔ hl hɛks a waal du YAKUBA 1
1Mii Yakuba, Bɛto hi Waar Yeesu Kristu woosyaya̧. Mii gi bi̧i̧sig Israhila dɔ̧ɔ̧t koobl daa eer wɔ hi hɛks a waal du sɛw ɗɛɛrwol yɛrɛ. Seko! 2Yɛ̧ɛ̧dɛ mi wɛ, gid ya̧a̧rhant zaadɛ sɔmsɔm hi zɛnɛ, mɔkin an nɛ dag hat gbɔɔltɔnɔ. 3Nɛ mɛɛ a ya̧a̧rhant wɔ hi gook ɗɔbsig nɛ hi gɔk an nɛ dag tɛŋk nɛ mɔmhinɛ. 4Ɔɔn hinmɔŋk bɔ gi woowoosɔ rɔbtɔnɔ gi da̧a̧ an nɛ wɛɛ dood rɔbɛ tib, bɔnɛ lɔɔ hinza rɔb gbun mɔɔti.
5Yɛrɛ doo za gi taan hinmɛɛk gɛ, gi ɛr a Bɛt ge gi gaage, anyɔ gi doo gaasya rɔb gi gaak dood hin sɛw, wɛɛ nɔɔg gɛ be. 6Za̧a̧nɔ zɔ̧g hi ɗɔbsigi a kpoos du, bɔgi faa. Ya̧a̧nɛ, za̧a̧nyɔ faa riitin hi mɛmɗukil wɔ mɛmbal gbɔɔl du hiya, zɛk ɗunsilihi, yaakihi hɛ hi hɛ. 7Doo anbɔ bɔgi mɔk hinza gi zul du a gi dag hinza a Waar Bɛt ge. 8Doo yɔ gin kpoos eerɛ taa an gi er hi tɛŋk a woosɔ yɔ gi duge sɛw.
9Yɛ̧ɛ̧ za ya̧a̧rya yɔ gi dag hat a pɛɛkɔ bɔ Bɛt pɛɛg wɛɛha gi dɔŋgo, 10wɛɛ yɛ̧ɛ̧ rɔɔsya be, gi dag hat a tiisigɔ yɔ Bɛt tiisig gi dɔŋg be. Dood rɔɔsya wɔ hí wag an tɛ̧ɛ̧kɔ̧ɔ̧rɛ. 11Kudɔɔl gɔ midɔ, tɛ̧ɛ̧ wɔ hi yɔ̧ɔ̧, kɔ̧ɔ̧rya̧ wɔ hi kpɔmɔ, bɛtigya̧ wɔ hi wag be. Doo rɔɔsya bɔ gi wag anbɔ be a ɔ̧tyɔ gɔ gi wookwoosɔ gedu.
12Hat gi a za̧a̧nyɔ gi mɔŋk ya̧a̧rhant ge. Za̧a̧nyɔ gɔ gi er hi tɛŋk gi zuun maatil wɔ hi gig goonik mɔŋkɔ bɔ gi da̧a̧, gi dag za̧a̧tig yɔ gi ɗɛɛt dɔɔrɔɔs yɔ Bɛt raa a bé gaa dood wɔ ha̧a̧hi a beege. 13Za̧a̧nyɔ ya̧a̧rhant zɛŋge gi gig maatig an gi gɔ ha̧a̧lɛ, bɔgi raa: a Bɛt gii maatibe. Ya̧a̧nɛ, taa an hi maatin Bɛt hi ha̧a̧lgɔki, wɛɛ gii hi zulɔ gɔ maat doo hinɔ gɛ zaŋ. 14Za̧a̧nyɔ hinza maatige: ɗɔkum ɔ̧ɔ̧n maatige gi wa̧a̧ge hi mɔkilɔ. 15Wɛɛ ɗɔkum ha̧a̧l gɔ budɔ mɔɔ waaɔ gɛ: hinha̧a̧lɛ; hinha̧a̧l gɔ tɔɔ be, mɔɔ waaɔ gɛ wɔrko.
16Yɛ̧ɛ̧ mi rɔbɛ wɛ, bɔnɛ maat zul nɛ! 17Gaas rɔbɛ sɛw hi dɔɔrɔɔs gaatɛ wɔ sɛw hi fu̧u̧zig wɛɛha a Baa Bɛt ge, za̧a̧nyɔ kim lɛlgaal wɔ bɛtha, wɛɛ hɛ̄ml ɔɔwɛ lɛlwil du an ɔ̧tyɔ gɔ leg gɛ be. 18Dɔgsɛ rɔb dɔgl bɔ gii gi gaawɛ za̧a̧tigi anyɔ ha̧a̧ge hi zulɔ, an wɛɛ wɛ wɛɛsig hin rɔb yɔ daar hinwɔ kim sɛw. 19Nɛɛ yɛ̧ɛ̧ mi rɔbɛ wɛ, mɛɛnɛ: An bɔ sɛw lagig dɔgl nɔɔko, mɔŋg ya̧a̧booki, mɔŋg nɔɔtigi. 20Ya̧a̧nɛ, doo nɔɔtigɔ taa wook hinyɔ rii a Bɛt muut du.
21Yɔ anbɔ bisin hinyɔ gi gaak ɗibto hi hinbɔbtin yɔ gɔ hi̧i̧s kpoosɛ. Zen dɔgl yɔ hi rɛɛ a nɛ kpoos du saŋtumtɔnɔ, dɔglɔ ɗɛɛ kol nɛ za̧a̧sig ɗɛɛ. 22Yɛrɛ bɔnɛ mɔk Bɛt dɔgl bɔ gii lakɔ kpɔd, bɔ lab rii gɛ; woon hi woosɔ du be. À lab gɛ, yɔ nɛ maat zul nɛɛnɛ. 23Yɔ anbɔ, za̧a̧nyɔ gbor Bɛt dɔgl laki gi woo du gɛ, riitin hi za̧a̧nyɔ loo daarugal gi seen muutɔ bɔ gikɔ bɔ. 24Yɔ see muutɔ gi da̧a̧ anbɔ rekɔ, wɛɛ ɓɔrbɔ zɛn muutɔ bɔ gikɔ zɛnɔ.
25Yɛrɛ za̧a̧nyɔ gi seek hinyɔ Bɛtmaakdɔgl gaat yɔ tuus zul wɛ a hinha̧a̧l du gi gok bɛttɔnɔ, wɛɛ gi waa dɔglɔ wa̧a̧ki, gi taa an dood wɔ gɔ hi lag dɔgl bɔ hi gbor zɛnik gɛ ɔnɛ gi woosɔwoonik du, Bɛt gi rɔbs za̧a̧nɔ a woosɔ bɔ gedu. 26Za̧a̧nyɔ mɔk a be gi Bɛtɗɔbsigya rɔbo gi wɛɛ gi wā̧ā̧ mɛlɔ bɛttɔnɔ gɛ, gi maatig zul ɔ̧ɔ̧nɛ. Bɛtɗɔbsigɔ bɔ gi hintɔsyɔ. 27Hinyɔ Baa Bɛt see an ɗɔbsig gaat rɔb gi muut du: gɛ an hi see wɔraawaat wɔ hi kuurɛ nɛɛd wɔ a hi ya̧a̧rhant du, hi oo zulya̧ an kpoosya̧ gi gaa, bɔ hinha̧a̧l yɔ gi waal du gi gul duge.
Currently Selected:
YAKUBA 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.