2 YOHANA 1
1
2 YOHANA Yohana ɗɛɛrwolɔ eesumyɔ
1Mii ɗɛnt bɔ, mi gi bi̧i̧sig naad bɔ yɔ Bɛt herige hi waatɔ wɔ hii ɗɛɛrwol yɛrɛ. Ha̧a̧m a nɛ muul hi rɔbo, hā̧ā̧ mii kpɔd gɛ, ha̧a̧ wɔ hi mɛɛ rɔ́b dɔgl sɛw hɛw. 2Ha̧a̧m a nɛɛge a rɔ́b dɔgl bɔ gi waak ɔksig gbun hi wɛɛ dɔŋgo. Gi waawa hi wɛɛ faa be. 3An Baa Bɛt hi Yeesu Kristu, yɔ gi waawalɔ gi gaawɛ rɔbsɛ, ya̧a̧rmɛɛki hi boolumi, a rɔb gbɔnɔ du hi hato.
4Mi dag hat gbɔɔltɔnɔ anyɔ mi zɛm waat mɔ zaadɛ hi waak a rɔb gbɔnɔ du anyɔ Baa wɛ Bɛt raawɛ. 5Yɛrɛ nàa, hinyɔ mi gim ɛrko, hinɔ taa an mi gisin dɔgl seg bi̧i̧ko, gi dɔglyɔ wɛ gin nɛ amntɔnɔ gi yɛɛl a biitirnaandu gii an gi ha̧a̧tinwɛ. 6Hinyɔ raakɔ a ha̧a̧wɛ Bɛto, gɛ: a wɛ wa̧a̧ dɔglɔ wɔ raawɛ. Dɔglyɔ raawɛ gɛ: a wɛ fɔ Bɛt ha̧a̧tigɔ gii anyɔ hi goksin da biitirnaandu. 7Yɔ anbɔ, dood ya̧a̧gɔ̧ɔ̧nyaadɛ hi tuuz a waal du kittɔnɔ, hā̧ā̧hi an hi ta̧a̧ a Yeesu Kristu zaa an dooyɔ hi rɔb gɛ. Za̧a̧n bɔ anbɔ gii gi doo ya̧a̧gɔ̧ɔ̧nya, wɛɛ gi Kristu lɔlhɛ̧ɛ̧nikyayɔ.
8Oon zul nɛ an bɔnɛ wags woos nɛ bɔ humlɔ, an nɛ dag dɔɔrɔɔs nɛ hi̧i̧sili. 9Za̧a̧nyɔ rek doos hɛmltɔnɔ gi wāā a Kristu hingok du gɛ, ɔks hi Bɛt gɛ; za̧a̧nyɔ waa a hinyɔ hi gogsig gedu be, ɔks hi Baa wɛ Bɛt hi waawal bɔ du. 10Za̧a̧nza gi zaa a nɛɛge gi gōgsin hin yɛrɛ gɛ, bɔnɛ zeg nɛ raa du, bɔnɛ wɛɛ nɛ booge a seko. 11Yɔ anbɔ za̧a̧nɔ gi boog a seko hi zaaki sa̧a̧ɔ, ɔɔks hi gii a gi woos ha̧a̧l bɔ gedu.
12Anyɔ mi gin hin kittɔnɔ an mi bi̧i̧sin si̧, hā̧ā̧m an mi gɔn ɗɛɛrwoli hi hinbi̧i̧nik mɛkya gɛ. Mi dɔgrik an mi rek mi sɔ̧ɔ̧nɛ, mi boosin hin ya̧a̧ du hi ya̧a̧ du an hat wɛ gi tɔɔ gi daarlɛlɛ. 13Siŋg mɔ bɔ Bɛt herige waatɔ wɔ hi boom du. Anbɔ.
Currently Selected:
2 YOHANA 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.