Daniɛl (Grɛk) 1

A Kɔfasɔ̧ ko Azaria

24O wi nɔ‘i taar'i yara nɛ mgbara leɓe-wee gasi nɛ Sɔ̧, zɔn nɛ Gasa Wan. 25Azaria yora poo wee, ɓɛɛ kɔfi Sɔ̧, hee mɔ'ɔ ga: 26«De zɔnamɔ h’Ɛ́nɛ́, Gasa Wan, Sɔ̧ ko o zɔmdáà k’ɛ́ɛ́. Nin-‘Nɛ́ a hu̧r nɛ dea kpoo nɛ kpoo! 27Wen Ɛ́nɛ́ dea mɔ lɛŋ nɛ yuwar-a. O tom k’Ɛ́nɛ́ lɛŋ nɛ́ kpasa tom, o yuwar k’Ɛ́nɛ́ lɛŋ ɔ tana, o gɔnakita k’Ɛ́nɛ́ lɛŋ nɛ́ kpasaá. 28Ɛ́nɛ́ gɔna kita nɛ yuwar-a nɛ mbetɛ, tɛ usa bɔnɛ h’ɛ́ɛ́ in ha̧ Jerusalɛm sa̧-a̧ ye ko o zɔmdáà k’ɛ́ɛ́. Wen, tɛ usa o bɔnɛ nɔ‘i h’ɛ́ɛ́ wen zu o ɗaŋmɔ k’ɛ́ɛ́, Ɛ́nɛ́ dea mɔ nɛ wara in nɛ kpasaa. 29Wen ɛ́ɛ́ dea ɗaŋmɔ, ɛ́ɛ́ dea yɔɔmɔ, hɔ tɛ kɛ̧a tɛ-ɛ́ɛ́ nɛ Ɛ́nɛ́; ii, ɛ́ɛ́ dea ɗaŋmɔ batɛ tɛ mɔ lɛŋ. 30Ɛ́ɛ́ mbo zu-yɛ ha̧ o heembea k’Ɛ́nɛ́ na; ɛ́ɛ́ kasi wa na; mɔ n’Ɛ́nɛ́ tɔ̧a̧ h’ɛ́ɛ́ mɛ de wen h’ɛ́ɛ́ mɛ kpa demɔ, ɛ́ɛ́ de na. 31Nɛ mbetɛ, o bɔnɛ n’Ɛ́nɛ́ usa h’ɛ́ɛ́ lɛŋ, o mɔ n’Ɛ́nɛ́ dea in yɛ lɛŋ, Ɛ́nɛ́ dea nɛ yuwar-a. 32Ɛ́nɛ́ ee yɛ er o wisɛn nɛ iŋ‘Nɛ́ na, er o ɗaŋ wi-ŋgazu, er wannu nɛ demɔ nɛ yuwar-a na, ɓɛɛ nɛ dúk nɛ sɔŋkur ɗaŋwi zu nu’ɛ̧. 33Ɓɛ́ kinii, ɛ́ɛ́ o widetom k’Ɛ́nɛ́ in o wi-gasi-‘Nɛ́, ɛ́ɛ́ kpa nú-yɛ ɓɔ na: foe in búú baa yɛ. 34Ɓɛɛ, wen zu hu̧ra nin-‘Nɛ́, k’ɛ́nɛ́ e yɛ duk wen ɓɔnsɛnɛ na, k’Ɛ́nɛ́ gbin nɔɔtɔk k’Ɛ́nɛ́ in yɛɛ na. 35K’Ɛ́nɛ́ kaɗi dee ko h’ɛ́ɛ́, wen zu Abraham sɛm k’Ɛ́nɛ́, Izaak widetom k’Ɛ́nɛ́ in Israɛl sa̧a̧wi k’Ɛ́nɛ́ na; 36Ɛ́nɛ́ ha̧so nú ha̧ wa nde o bezaŋ-wa tɛ nyɛɓi hee o sɔra yiwese, kóó hee nyɛmɛ ka̧ zaŋ gbatɔp ga. 37Gasa Wan, Ɛnɛ zɔ́k, ɛ́ɛ́ kifa nɛ́ sɔŋkur geɗɛk dukbii zaŋnu lɛŋ, ɓɛɛ sɔsɔɔ‘i mbɛt, wa ee bùk ndáà-yɛ nɛ yi bi lɛŋ wen zu o ɗaŋmɔ k’ɛ́ɛ́. 38Kinii, ɛ́ɛ́ bo nɛ ŋma be-wan, kóó witɔ̧wen oi nú ‘Nɛ́, kóó wannu ɓɔ na; dɔɔ kpoo h’Ɛ́nɛ́, ɗafa'Nɛ́, ha̧a̧ mɔ h’Ɛ́nɛ́, in dɔɔ fuu-nyama h’Ɛ́nɛ́ bó na; fara-ɗafi-‘Nɛ́ in fara-kpa-deako k’Ɛ́nɛ́ bó ɓɔna mbɛt. 39Ɛnɛ zɔ́k ŋmana-see k’ɛ́ɛ́ in dukaa k’ɛ́ɛ́ si ɗɔɔ, ɓɛɛ Ɛnɛ kpɛ́k yɛ, hee mɔ'ɔ n’Ɛ́nɛ́ kpɛk nɛ o vala-sami, o wiwii-ndai in o gba gii maŋa be-sami, nɛ wa dɔ h’Ɛ́nɛ́ ga. 40Hegɔ, Ɛnɛ kpɛ́k ɗafa'Nɛ́ n’ɛɛ́ ɗafi sɔsɔɔ‘i; ɓɛɛ Ɛnɛ dé h’ɛ́ɛ́ mɛ ndak pata'Nɛ́ nɛ kpasaá, wen foe beka ba wi nɛ e ta nɛ Ɛ́nɛ́ na. 41Ɓɛɛ kinii ɛ́ɛ́ nɛ ɗoŋ‘Nɛ́ nɛ see-yɛ lɛŋ, ɛɛ yu kii tɛ-‘Nɛ́, ɛ́ɛ́ kii nɛ saŋayi'Nɛ́. 42K’Ɛ́nɛ́ pi̧ foe tɛ yɛ na, ɓɛɛ Ɛnɛ dé mɔ in yɛ, nɛ kɔ̧ɔ̧mɔ in gasa deako k’Ɛ́nɛ́. 43Gasa Wan, Ɛnɛ kpási yɛ nɛ zɔm ŋgai k’Ɛ́nɛ́, ɓɛɛ Ɛnɛ dáà ha̧ nin-‘Nɛ́ mɛ hu̧r, Gasa Wan! 44Foe a bá o wideɗaŋmɔ sitɛ o widetom k’Ɛ́nɛ́, ɓɛɛ búú a bá wa; K’Ɛnɛ é ha̧ wa mɛ kpa ŋgai in mɛ ɔ wan zu o bii na, ɓɛɛ Ɛnɛ gbin ŋgai-tɛ-wa. 45Wa'a iŋ nde Ɛ́nɛ́ nɛ́ kpɔk Gasa Wan Sɔ̧, nɛ gasamɔ k’Ɛ́nɛ́ dama zu nu lɛŋ. 46O widetom ko wannu nɛ pi̧i̧ so o wi nɔ‘i yi-wee'i kaɗi tusa wee siti nɛ yi-lamba, sɔ̧ɔ̧-te, nɔ̧ in gua na. 47Leɓe-wee ɓoɓa daŋ nɛ kɔ gbamgba-wee'i, kusa-a ko leɓe-wee'i wi nyɛm mɛ tɔ̧ na; 48a pɛsa yak zu gbamgba'i, ɓɛɛ dɔ o ŋma be-Kaldee n'aa kpaa ka̧ tɛ-a mbɛt. 49Ɓɛɛ betom ko Sɔ̧ zir so kpɔk in Azaria in o gbamayari kɔ̧-a̧ si kɔ gbamgba wee'i, ɓɛɛ a̧ fo leɓe-wee yinɛ si zan. 50A̧ ufa de ga̧-a̧ búk-dɔmbɔrɔ a zaŋ gara-gbamgba'i; hegɔ, wee ndɔ gee ndɔɔ wa na. Wee usi bɔnɛ ha̧ wa ká dea nɛ ŋma ɗaŋmɔ in wa na mbɛt.

B Gima ko Daniɛl in o gbamayari kɔ‘i

51Ɓɛɛ wa taar lɛŋ a nú-wa kpɔk, de nɛ osoko ha̧ Sɔ̧, gasi nɛ A̧, zɔn nɛ A̧ kɔ gbamgba-wee mɛ, tɔ̧ nɛnɛ‘e:

52«Ɛɛ zɔ́n'Nɛ́, Gasa Wan Sɔ̧ ko o zɔmdáà k’ɛ́ɛ!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

Ɛɛ zɔ́n sa̧a̧ nin-‘Nɛ́ tɛ gasamɔ k’Ɛ́nɛ́!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

53Ɛɛ zɔ́n'Nɛ́ sɛn kɔ̧ sa̧-a̧ Tua Gasamɔ k’Ɛ́nɛ́!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

54Ɛɛ zɔ́n'Nɛ́ zu kiti-wan k’Ɛ́nɛ́!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

55Ɛɛ zɔ́n'Nɛ́, n’Ɛnɛ duk zu o keribim zɔk nɛ́ mɔ hɔ tɛ o ɗuka ndaa kɔ̧!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

56Ɛɛ zɔ́n'Nɛ́ yizan ŋgɔn mɛ!

Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

57O mɔ nɛ Gasa Wan dea lɛŋ, ɛnɛ zɔ́n Gasa Wan!

Ɛnɛ bii gima ha̧ A̧, gasi nɛ A̧ ɓɔnsɛnɛ!

58O betom ko Gasa Wan, ɛnɛ zɔ́n Gasa Wan!

Ɛnɛ bii gima ha̧ A̧, gasi nɛ A̧ ɓɔnsɛnɛ!

59Yiwese, ɛnɛ zɔ́n Gasa Wan!

Ɛnɛ bii gima ha̧ A̧, gasi nɛ A̧ ɓɔnsɛnɛ!

60O yì mɛ ɗoŋ yizan lɛŋ, ɛnɛ zɔ́n Gasa Wan!

Enɛ bii gima ha̧ A̧, gasi nɛ A̧ ɓɔnsɛnɛ!

61O ŋgai ko Gasa Wan mɛ ŋgɔn lɛŋ, ɛnɛ zɔ́n Gasa Wan!