TƆ̧Ɔ̧ HU̧SA̧MƆ 1
1
Zu-wen
1Kalata’ɛ we nɛ́ ɗoŋ hu̧sa̧mɔ nɛ̀ Jesu Krist usa so. Nɛ́ Sɔ̧ a̧ hɔɔ zu sɛnɛ wen usa mɔ nɛ̀ tɛ́ hɔ ɗoŋ ŋgimbi tikiɗi ha̧ o wi-de-tom kɔ̧-a̧. Nɛ́ hegɔ sa Jesu tom betom kɔ‘i mɛ yiwese, mɛ́ usi mɔ‘i ha̧ Jean, wi-de-tom kɔ‘i. 2Jean wee ɗoŋ mɔ lɛŋ n'aa zɔka, ɓɛɛ tɔ̧‘e wen'i nɛ́ wen ko Sɔ̧, ɓɛɛ nɛ́ Jesu a̧ dee sedaako wen'i ha'i. 3Wi nɛ̀ tɔr kalata’ɛ ká bá nɛ̀ wi nɛ̀ zii tɔ̧ɔ̧-wen oi nú Sɔ̧'ɛ, ɓɛɛ kasa mɔ nɛ̀ a̧a̧ zaŋ-aa mbɛt ya nɛ̀ desee, wen ŋgimbi-a hɛɗa kaɗi!
Kalata ha̧ o zuduk bíí ko Krist sɛn Azii
4Nɛ́ mi Jean a̧ tom kalata ha̧ zuduk bíí ko Krist mɔɔrɔ-ɗoŋ-yiitoo sɛn Azii.
Deemɔ nɛ̀ ta-tɛ ko Sɔ̧ in ga̧a̧mɔ a̧ dúk in'nɛ̀ɛ́ nɛ̀ war ko wi nɛ a̧a̧ sɛnɛ, nɛ̀ duka so, in nɛ̀ tɛ‘i mbɛt, nɛ̀ war ko ɔmi mɔɔrɔ-ɗoŋ-yiitoo nɛ̀ ya sɛn ti damti kɔ̧-a̧,#Gboa-a 3.14; Tɔ̧ɔ̧ Hu̧ 4.5 5in nɛ̀ war ko Jesu Krist kpasa wi-sedaako. A̧ nɛ́ kuti kaya-wi nɛ̀ kura ŋgɔn tɛ fio; nɛ́ a̧ a̧ ɔ wan zu o wannu zaŋnu’ɛ.
A̧ kɔ̧ɔ̧ yɛ, ɓɛɛ a̧ gbo yɛ yinɛ tɛ̀ ɗaŋmɔ k’ɛ́ɛ́ nɛ̀ tɔk tɛ-a.#Es 55.4; Gima 89.27 6A̧ dee h’ɛ́ɛ́ mɛ́ ya nɛ́ zuduk wi-ɗafi-sɔ̧ wen dee tom ha̧ Sɔ̧ Dáà kɔ̧-a̧; gasamɔ in ŋgayamɔ a̧ dúk nɛ́ kɔ̧-a̧ kpoo nɛ kpoo! Aamɛn.#Gboa-a 19.6; Tɔ̧ɔ̧ Hu̧ 5.10
7A̧i̧yoo, zɔ́k a̧ n'aa tɛ́ nɛ̀ mgbara o tura-zan mɛ‘i, ɓɛɛ yí bíí lɛŋ tɛ́ zɔk a̧, in o wi nɛ̀ toka so a̧ mbɛt. O zuduk bíí zaŋnu lɛŋ tɛ́ zim fio wen a̧; mɔ tɛ́ de hegɔ nɛ̀ mbetɛ! Aamɛn.#Dan 7.13; Mt 24.30; Mk 13.26; Lk 21.27; 1 Tes 4.7; Zak 12.10; Jn 19.34,37
8«Mi nɛ́ Alfa in Omega;»#1.8 Alfa in Omega: Alfa nɛ́ kuti alphabet. Omega nɛ́ sɔŋkur alphabet tɛ̀ nú grɛk. Taamɔ nɛ̀ a̧a̧ sɛnɛ úsí nɛ́ kuti-a in sɔŋkur-aa, ká bá nɛ̀ kú̧ú̧náŋmɔ̀ ín káɗámɔ̀.#Dan 7.13; 10.5 nɛ́ Gasa Wan Sɔ̧ nɛ̀ a̧a̧ nɛ̀ ŋgayamɔ lɛŋ, nɛ̀ a̧a̧ sɛnɛ, nɛ̀ duka so, in nɛ̀ tɛ‘i a̧ tɔ̧ wen’ɛ.
Hɔɔ-zu ko Jean zɔk nɛ̀ Krist
9Mi nɛ́ Jean nya'nɛ́; sɛn tɛ́ Jesu mi nɛ́ gbama wi-zɔk-bɔnɛ nɛ̀ a̧a̧ tɛ́ mɔɔ-wan in pɛma-mɔ nɛ̀ nɔɔ-ŋgiɗi in'nɛ̀ɛ́ mbɛt. Wa baa so'm pi̧ see-kisi Patmos wen zu wen ko Sɔ̧ in sedaako ko Jesu. 10Tɛ́ wese ko Gasa Wan, Sa̧a̧ Ɔmi baa'm, ɓɛɛ mi zíí ŋma ŋga tiger sɛn ɗoŋ am hee giti mbia ga, 11nɛ̀ tɔ̧a̧‘e: «Mɛ̀ yɔ́r mɔ nɛ̀ mɛ̀ zɔk’ɛ sɛn zaŋ ŋma kalata, ɓɛɛ mɛ̀ tóm ha̧ o zuduk bíí ko Krist tɛ̀ o ye nɔ'ɔ: Efɛz, Smirn, Pɛrgam, Tiatir, Sardɛs, Filadɛlfii in Laodisee mbɛt.»
12Nɛ́ mɔ'ɔ n'am zika tɛ‘m wen zɔka bíí nɛ̀ tɔ̧ wen ha̧‘m'i, ɓɛɛ ŋgimbi n'am zika tɛ‘m, mi zɔka nɛ́ dek-e-wee mɔɔrɔ-ɗoŋ-yiitoo nɛ̀‘i dee nɛ̀ lɔr. 13Ŋma mɔ nɛ̀ hɔɔ ŋmaa in bíí yora mgbara o dek nɔ‘i; mɔ‘i pi̧i̧ nɛ́ ŋma zi̧a̧ laa, ɓɛɛ a̧ hɛr pɛsa kanda-lɔr sɛn ɔm-a.#Dan 7.13; 10.5 14Mui̧-zu-a dúk nɛ̀ bu-a kpúŋ-kpúŋ hee buma-tɛ sami, kóó hee talum ga;#1.14 tálum: texte tɔ̧̀ɔ̧́ nɛ́ neige.#Dan 7.9; 10.6 gbaayí-a nyɛk hee leɓe-wee ga. 15Naŋ-a dúk hee gba de ndɛrɛ nɛ̀‘i nɔi̧a tɛ wee-dɔra ha̧ mɛ sa̧ ga, ɓɛɛ tiger-a dik hee zɔm o som nana-yì ga.#Ez 1.24; 43.2 16A̧ kasa sɔra mɔɔrɔ-ɗoŋ-yiitoo kɔ̧ er-a mɛ wiiko; gba-paa nɛ̀ nú-a yiitoo pɛ́ɗɛ́ŋ-pɛ́ɗɛ́ŋ gbòó nɛ̀ kɔ̧ nú-a, ɓɛɛ saŋa-yí-a tok hee kpɔra-wese ga. 17Zɔka a̧ n'am zɔka hegɔ, ɓɛɛ bele zar am pi̧ ká̧ naŋ-a hee fio ga. Nɛ́ mɔ'ɔ n'aa ee er-a mɛ wiiko zu'm ɓɛɛ tɔ̧: «Ká mɛ́ de kíì na, mi nɛ́ kuti-mɔ in sɔŋkur-mɔ!#Es 44.6; 48.12; Tɔ̧ɔ̧ Hu̧ 2.8; 22.13 18Mi nɛ́ wan nɛ̀ duk kpasa! Mi fee so, ɓɛɛ kinii mi tɛ duk kpasa kpoo nɛ kpoo; mi a̧a̧ nɛ̀ ŋgai zu fio in see zu fara ko o fio mbɛt. 19Mɛ̀ yɔ́r mɔ nɛ̀ mɛ́ zɔka’ɛ, mɔ nɛ̀ a̧a̧ sɛnɛ kinii in mɔ nɛ̀ tɛ́ hɔ nɛ̀ ɗoŋ mbɛt. 20Gba̧a̧ ɗukamɔ nɛ̀ sɔra mɔɔrɔ-ɗoŋ-yiitoo nɛ̀ mɛ zɔka kɔ̧ er-am mɛ wiiko in dek-e-wee mɔɔrɔ-ɗoŋ-yiitoo nɛ‘i dee nɛ̀ lɔr usi'i nɛ́ mɔ'ɔ: o sɔra mɔɔrɔ-ɗoŋ-yiitoo nɛ́ o betom ko Sɔ̧ zu zuduk bíí ko Krist mɔɔrɔ-ɗoŋ-yiitoo, ɓɛɛ dek-e-wee mɔɔrɔ-ɗoŋ-yiitoo nɛ́ zuduk bíí ko Krist mɔɔrɔ-ɗoŋ-yiitoo mbɛt.»
Currently Selected:
TƆ̧Ɔ̧ HU̧SA̧MƆ 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.