O AIA-NÚ 1
1
Bɔnɛ ko Jerusalɛm
1Ho, Jerusalɛm!
Ye nɛ o bíí ya so sɛnɛ hegɔ tululu’ɛ,
nɛ́ mɔ'ɔ nɛ duk ɛ̀nɛ̀ ɓoree’ɛ!
A̧ duk ɛ̧ɛ̧ hee ko-gera ga ɓɛɛ gɔ!
Wi nɛ nin hu̧r so mgbara o gasa nù'ɛ,
nɛ duk so nɛ́ bem ko wannu mgbara o dɔka-a’ɛ,
nɛ́ mɔ'ɔ nɛ̀ yee tɛ tom-bara’ɛ!
2Ɛ̧ɛ̧ kinii kànà nɛ́ kɔ̧a̧
a̧ a̧ hi̧i̧ mɔ sa̧ nɛnɛ gbɛ̧ŋkɛ̧nyɛ̧ŋ,
ɓɛɛ o ɗɔɔ yí-a lɛŋ fok nɛ miikɔ̧a rɔtɛ-rɔtɛ;
o gbama-yari kɔ̧-a̧ nɛ kɔ̧ɔ̧ so a̧,
kóó ŋma kpɔk mɛ ha̧ nɔɔ-ŋgiɗi ha̧ a̧ bo na.
Wa lɛŋ kifa nɛ o wi-sɛn-a,
in o wan-e-ɗɔra tɛ-a.
3Ɗoŋ tika-a ko Juda
in ɗoŋ tom nɛ wa pi̧i̧ zu a,
wa baa a̧ yaknɛ nɛ bara-biro;
a̧ duk mgbara o gɔni-duk mɛ,
mgbák fara duk kɔ̧-a̧ bo na.
O wi-usi-bɔnɛ ha̧ a̧ kɛra a̧,
ɓɛɛ fara-yu-mɔ si sɛnɛ bo na.
4O yuwar Siɔŋ ya kpúŋ-kpúŋ
hee o be-oi-fio ga;
o bíí gar yɔyɛ ɓɔna,
o nú garo ya wékéké,
o wi-ɗafi-sɔ̧ lɛŋ gɔfi nɛ mɔ,
ɓɛɛ o be-zɔŋa ya kúrúm-kúrúm.
Oee tu̧u̧-see ko Siɔŋ wa!
5O wisɛn gana a̧, ɓɛɛ ya nɛ desee;
wen GASA WAN usi nɛ bɔnɛ ha̧ a̧,
wen dee ŋgazu kɔ̧-a̧ nyɛmna.
O wisɛn gbina o bem kɔ̧-a̧ gbut yaknɛ nɛ bara-biro.
6Tu̧u̧-tɛ-mɔ ko Siɔŋ
nɛ duka so hee gba de be-zɔŋa ga, bo ɓɔna;
o be-wan ya hee o kɔɗɛ#1.6 kɔɗɛ: texte tɔ̧ɔ̧ nɛ́ cerf.
nɛ kpa fara-nyɔŋ-mɔ na ga;
wa yuu mɔ nɛ oi gbina gba̧a̧-tɛ
ti o wan-ndak-wa.
7Ŋgimbi bɔnɛ yambala-a'i,
tɛ́ Jerusalɛm mbaŋa ɗoŋ wese bɔtɛ mɛ ti;
ŋgimbi nɛ o wisɛn kɔ̧-a̧ gana nɛ a̧,
ŋma bíí-gbak-a̧ bo na;
o wi-sɛn-a zɔka tika-a kɔ̧-a̧,
ɓɛɛ zɛkɛɗi a̧ mam nɛnɛ.
8Jerusalɛm dee ɗaŋmɔ nyɛm see na,
ɓɛɛ a̧ kifi duk nɛ zuku-paa.
O bíí nɛ duka so mɛ zɔn a̧ nɛti fɛŋ nɛ a̧ kinii,
wen wa zɔk a̧ duk nɛ mgbii.
War kɔ̧-a̧, a̧ gɔfi nɛ mɔ,
zik nɛ ɗoŋ-aa e ha̧ wa.
9Mɔɔ-búù kɔ̧-a̧‘i zakata tɛ laa kɔ̧-a̧;
a̧ ta so mɔ zu mɔ nɛ tɛ̀ɛ́ kpa a̧ nɛ ɗoŋ na.
Tika-a kɔ̧-a̧‘i gɔna ɗɛɗɛ bíí batɛ,
ɓɛɛ wi-ha̧-nɔɔ-ŋgiɗi ha̧ a̧ bo na.
A̧ tɔ̧a̧: «GASA WAN,
ɛ̀nɛ̀ zɔ́k mɔɔ-búù nɛ tika zu'm;
wisɛn kɔ‘m gana'm.»
10O wisɛn kɔ̧-a̧ kaia o demɔ kɔ̧-a̧ lɛŋ;
a̧ zɔka o gɔni-duk fara yee kɔ̧ Tua ko Sɔ̧ kɔ̧-a̧:
mɛ nɛ o tugun bíí nɛ GASA WAN gɔna so geŋa'e,
ká wa ye zaŋ mɔi̧a-a ko o bíí kɔ‘i na.
11Dukbíí kɔ̧-a̧ nɛ oi-aa lɛŋ gɔfi nɛ mɔ, kii nɛ mɔɔ-nyɔŋ;
wa ha̧ nɛ o demɔ kɔ-wa mɛ kpa nɛ nyɔŋmɔ
sɛka de ká wa kpasa.
«GASA WAN,
ɛ̀nɛ̀ zɔ́k ea'm nɛ wa e tɛ geemɔ'ɛ.»
12«Ɛ́nɛ́ o wi-ɓir-war nɔ'ɔ,
ɛ̀nɛ̀ zɔ́k mɔ pii hɛ̧ɛ̧:
n’ɛ̀nɛ̀ duk nɛnɛ'ɛ,
nɛ́ o a̧ zɔka ɛ̧ɛ̧ pɛrti bɔnɛ n'am zɔk,
nɛ̀ GASA WAN pi̧i̧ zu'm,
wese ŋga nyimsea kɔ̧-a̧'ɛ o?
13A̧ pi̧i̧ wee nɛ ŋgɔn mɛ,
ye tɛ‘m, ba gba̧a̧-tɛ‘m; #1.13 texte nú hébreu tɔ̧a: a̧ nɛ́ wan-de-mɔ‘i.
a̧ tuia pɛr ha̧‘m, ɓɛɛ ba naŋ-am yo'm nɛ nu.
A̧ dee ha̧ gɛ̧ɛ̧mɔ mɛ ba'm,
ɓɛɛ wese lɛŋ tɛ‘m diti diti ɗɔ́ŋ-ɗɔ́ŋ.
14«A̧ hɛra kpáŋá ɗaŋmɔ kɔ‘m ger-am;
kpáŋá‘i nɛ́ a̧ a̧ dee nɛ̀ er-a,
ɓɛɛ ba ŋgai kɔ‘m lɛŋ yinɛ.
GASA WAN pi̧i̧ am er o bíí nɛ ŋgaia gan am.
15«GASA WAN ndaka o ŋga wi-gbin-biro kɔ‘m
katɛ‘m yinɛ lɛŋ;
a̧ baa keta in o wi-biro kɔ̧-a̧,
wen ɗaŋa o daŋa ŋgai wi-biro kɔ‘m yinɛ.
GASA WAN hɔna Juda nɛ hɔɔ so ŋmaa in gba de be-zɔŋa,
hee waya nyak-dɔ̧ɔ̧ nɛ‘i ɓar’ɛ ga.
16«Mɛ̀ nɛ́ wen mɔ‘i a̧‘m hi̧i̧ nɛ kɔ̧a̧ wen-aa;
yí‘m gar nɛ miikɔ̧a sususu gee,
wen ŋma wi-gai-am bo na,
ŋma wi-ha̧-nɔɔ-ŋgiɗi ha̧‘m bo na mbɛt.
O bem kɔ‘m sakala hegɔ kúsúk,
wen o wisɛn ŋgaia gan wa.»
17«Siɔŋ yɛk nɛ er,
ɓɛɛ wi-ha̧-nɔɔ-ŋgiɗi ha̧ a̧ bo na.
GASA WAN foo o wisɛn fara lɛŋ a zu Jakob;
kà wa zɔk Jerusalɛm, ɓɛɛ tɛ-wa gara u̧nunu.
18«GASA WAN nɛ wi-de-mɔ nɛ yuwar-a;
nɛ́ mi'i yɔɔ kaya ti a̧ ɛ̧.
O dukbíí nɔ'ɔ, ɛ́nɛ́ lɛŋ ɛ̀nɛ̀ zii,
ɛ̀nɛ̀ zɔ́k bɔnɛ‘i nɛ ba tɛ‘m'i;
wa kaia o be-zɔŋa in o be-ŋgaiwi kɔ‘m yaknɛ nɛ bara-biro.
19«Mi saa o wi nɛ kɔ̧ɔ̧ so'm,
ɓɛɛ wa tɛ́ɛ̀ gbak am na.
O wi-ɗafi-sɔ̧ in o wi-tɔ̧-mbɔrɔ kɔ‘m kuma saaye lɛŋ,
fara kii nyɔŋmɔ kpasi nɛ tɛ-wa.
20«Ɛ̀nɛ̀ zɔ́k ŋga bɔnɛ kɔ‘m, GASA WAN!
Tɛ‘m lɛŋ nɛ naka mɔ;
see-am ŋmana dun kɔ̧ nú‘m oi ŋgazu kɔ‘m!
Nɛ̀ zan wa gɔm nɛ o bem kɔ‘m nɛ gba-paa kum nɛ wa a nu,
nɛ̀ kɔ̧ tua nɛ gee fio hegɔ ŋgoɗoso mbɛt.
21«Kànà nɛ́ giti gɔfamɔ kɔ‘m a̧‘i zii;
gee ŋma bíí mɛ ha̧ nɔɔ-ŋgiɗi ha̧‘m bo na!
O wisɛn kɔ‘m lɛŋ ya nɛ desee,
zu bɔnɛ kɔ‘m'i.
Ɓɛɛ nɛ́ ɛnɛ'ɛ dee ha̧ mɔ‘i mɛ tik zu'm;
ɓɛɛ war kɔ‘m,
ɛ̀nɛ̀ dé ha̧ mɔ‘i nɛ kpaa'm'i mɛ kpa wa mbɛt!
22«Tɛ‘nɛ́ a̧ mbaŋ ɗoŋ ɗaŋ kɔ-wa,
ɓɛɛ ɛ̀nɛ̀ pí̧ bɔnɛ zu wa
hee mɔ'ɔ n’ɛnɛ dee in am wen o dɔka ɗaŋmɔ kɔ‘m ga,
wen mi gɔfi nɛ mɔ nyɛmna;
gba̧a̧-tɛ‘m lɛŋ gbina.»
Currently Selected:
O AIA-NÚ 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.