JƆƐL 1
1
1Wen nɛ GASA WAN tɔ̧ɔ̧ ha̧ Jɔɛl bem ko Pɛtuɛl nɛ mɔ'ɔ.
Ɗaŋamɔ ko gba-dɔya in ŋga bɛɛ
2Ɛnɛ o kuti-wi, ɛ̀nɛ̀ zíí wen’ɛ;
ɛnɛ o bíí nu Juda lɛŋ, ɛ̀nɛ̀ yéŋ zer'nɛ́.
Pɛrti mɔ hegɔ hɔɔ tɛ ŋgimbi k’ɛ́nɛ́,
kóó tɛ ŋgimbi ko o zɔmdáa k’ɛ́nɛ́ nɛti kaɗi?
3Ɛ̀nɛ̀ tɔ̧́ nyɛrɛ mɔ'ɔ ha̧ o bem k’ɛ́nɛ́,
ɓɛɛ o bem k’ɛ́nɛ́ tɔ̧ɔ̧ kɔ‘i ha̧ o bezaŋ-wa,
ɓɛɛ o bezaŋ tɔ̧ɔ̧ ha̧ o bezaŋ mɛ ɗoŋ.
4Mɔ nɛ nàá-dɔɔsɔ̧ɔ̧ ea,
nàá-wazala nyɔŋa.
Mɔ nɛ nàá-wazala ea,
nɛ́ gba-dɔya a̧ nyɔŋa;
mɔ nɛ gba-dɔya ea,
nɛ́ ndondo-gba-dɔya a̧ nyɔŋa yinɛ lɛŋ.
5Ɛ̀nɛ̀ tún, o wi-gbɛ-dɔ̧ɔ̧, ɛ̀nɛ̀ hí̧í̧ kɔ̧a̧;
ɛnɛ o wi-nɔ-dɔ̧ɔ̧ lɛŋ, ɛ̀nɛ̀ áí nú‘nɛ́
wen nɛ̀ mbe dɔ̧ɔ̧ bo h’ɛ́nɛ́ mɛ nɔ ɓɔna.
6O gii gba-dɔya bi nɛ nu kɔ‘m,
wa ɔ ŋgaya, wi nyɛm mɛ tɔr wa na;
gba̧a̧-nin-wa nɛ́ nin dila,
o goko-wa nɛ́ goko nana dila.#Tɔ̧ɔ̧ Hu̧ 9.8
7Wa dee ha̧ fɔ-nyak-dɔ̧ɔ̧ kɔ‘m mɛ kifi geemɔ,
wa ɓira o te-mbɔra kɔ‘m a nu sɛ́kɛ́ɗɛ́-sɛ́kɛ́ɗɛ́.
Wa ɗaŋa mɔ hús-hús,
ɓɛɛ gbaa-er-te fɛŋ buu.
8Ɛ̀nɛ̀ pɛ́ see'nɛ́ hee be-zɔŋa
nɛ pi̧i̧ laa-zim-fio hi̧i̧ nɛ fio wii-zɔŋa kɔ̧-a̧ ga.
9Aa-zɛzɛ nu in ha̧a̧mɔ kɔ̧ Tua ko GASA WAN bo ɓɔna,
ɓɛɛ o wi-ɗafi-sɔ̧ nɛ ya nɛ
o wi-de-tom ko GASA WAN hi̧i̧ nɛ fio.
10Wa ɗaŋa o fɔ lɛŋ,
nù hí̧í̧ nɛ́ fio.
Wa ɗaŋa alkamaari, mbe dɔ̧ɔ̧ bo ɓɔna,
mbe nɔ bo ɓɔna mbɛt.
11Ɛ̀nɛ̀ yá nɛ ɗaŋsee, ɛnɛ o wi-wa-fɔ,
ɛ̀nɛ̀ áí nú‘nɛ́ o wi-gun-waya-te
wen zu alkamaari in be-fon.
Nyɔnɔ sɛn kpɛɛfɔ ɗaŋa lɛŋ.
12Nyak-dɔ̧ɔ̧ kora lɛŋ,
do te-mbɔra ɗaŋa ai a nu,
kóɓò, ndɛŋgɛ, ndìà,
o te kpɛɛfɔ lɛŋ kora;
desee bo mgbara bíí ɓɔna.
Sara wen zima-yì
13O wi-ɗafi-sɔ̧, ɛ̀nɛ̀ pí̧ laa-zim-fio, ɛ̀nɛ̀ hí̧í̧ fio;
o wi-de-tom zu fara-dɔ-kpoo-sɔ̧, ɛ̀nɛ̀ áí nú‘nɛ́.
Ɛnɛ, o wi-de-tom ko Sɔ̧ kɔ‘m,
ɛ̀nɛ̀ gáɓí tɛ‘nɛ́ nɛ bufu duk nɛnɛ mɔ sa̧,
wen ha̧a̧mɔ in aa-zɛzɛ bo kɔ̧ Tua ko Sɔ̧ k’ɛ́nɛ́ ɓɔna.
14Ɛ̀nɛ̀ hé mbéá wen zima yi,
ɛ̀nɛ̀ sá sara mɔi̧a-a wen gasa Sɔ̧,
ɛ̀nɛ̀ mɔ́í̧ o kuti-wi in o bíí nu’ɛ lɛŋ
si kɔ̧ Tua ko Sɔ̧ k’ɛ́nɛ́,
ɓɛɛ ɛ̀nɛ̀ áí nú sitɛ GASA WAN Sɔ̧ k’ɛ́nɛ́.
Wese ko GASA WAN
15Wese ko GASA WAN hɛɗa kaɗi,
wese nɛ Wan nɛ a̧a̧ nɛ ŋgayamɔ lɛŋ tɛ ba ɗaŋamɔ tɛnɛ.
Oee ɗaŋ wese kíì wa!#Es 13.6
16Bo nɛ nyɔŋmɔ ɓana nɛ yí yɛ na nde?
Bo nɛ tortɛ in nyɛŋɛ kaɗa kɔ̧ Tua ko GASA WAN
nɛ yi yɛ mbɛt na nde?
17O nyɔnɔ lɛŋ fee ɗɔɔ ŋga kora nu;
o fara-a-nyɔnɔ ɗaŋa,
o dam gbina wen alkamaari bo ɓɔna.
18Ɛ̀nɛ̀ zíí gee dɔma-a nɛ o mɔ-dai dɔm;
ndai zɔk nɛ bɔnɛ
wen wa bó nɛ̀ nyɔŋmɔ ɓɔna;
bɔnɛ tika zu o sami mbɛt.
Aia-nú ko wi-tɔ̧-wen oi nú Sɔ̧
19Mi ai nɛ nú sitɛ‘nɛ́, GASA WAN,
wen wee dɔ nɛ zɔ̧ fara nɛ o ndai nyɔŋ mɔ sɛnɛ;
leɓe-wee dɔɔ o te zaŋbɛɛ lɛŋ a nu.
20O saɗi-zaŋbɛɛ zik nɛ tɛ pii tɛ‘nɛ́;
foka-yì ɔ̧sa̧ gɔn mgbót-mgbót.
Zɔ̧ fara nɛ o ndai nyɔŋ mɔ sɛnɛ bia wee lɛŋ.
Currently Selected:
JƆƐL 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.