JEAN 19
19
1Ɓɛɛ Pilat tɔ̧ ha̧ o wi-biro mɛ ba Jesu nɛ́ɛ̀ gusi. 2Nɛ́ mɔ'ɔ nɛ̀ o wi-biro kara tɛnmɔ gu zu-a; ɓɛɛ wa pi̧ gasa gbɛ̧ laa tɛ-a. 3Wa ɗɔŋa sitɛ a̧, ɓɛɛ tɔ̧: «Ɛ̀nɛ̀ wór mɔ, wannu ko o Juif!» Ɓɛɛ wa ye tɛ mbɛra a̧.
4Pilat gboo woyo tɔ̧ ha̧ o Juif: «A̧i̧yoo! Mi tɛ mgbɔ a̧ gbonɛ h’ɛ́nɛ́ mɛ iŋ‘e, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.» 5Nɛ́ mɔ'ɔ nɛ̀ Jesu gboo pii tɛ wa nɛ̀ oi tɛnmɔ zu in gbɛ̧ laa. Ɓɛɛ Pilat tɔ̧ ha̧ wa: «Zɔ́k, wi’ɛ nɛ́ mɔ'ɔ!» 6Zɔka Jesu nɛ o gasa wan-ɗafi-sɔ̧ in o bíí kɔ-wa zɔka hegɔ, ɓɛɛ wa gai mɔ: «Ɛ̀nɛ̀ mgbóí a̧ zu te-diŋa! Ɛ̀nɛ̀ mgbóí a̧ zu te-diŋa!» Pilat tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́, ɛ̀nɛ̀ bá a̧, ɓɛɛ ɛ̀nɛ̀ mgbóí a̧ zu te-diŋa. Kɔ‘m, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.» 7O Juif kifa nú ha̧ a̧: «Ɛ́ɛ́ a̧a̧ nɛ̀ ŋma heembea k’ɛɛ, ɓɛɛ heembea'i usa'e a̧ tɛ fe kànà wen n'aa tɔ̧a̧‘e a̧ nɛ́ Bem ko Sɔ̧.»
8Ŋgimbi nɛ̀ Pilat zia wen'i, kíì dee a̧ gan kuti-a. 9A̧ yee tua woyo, ɓɛɛ a̧ ak Jesu: «Mɛ́ tɛ́ nɛ̀ de?» Jesu kifi ŋma nú ha̧ a̧ na. 10Ɓɛɛ Pilat tɔ̧ ha̧ a̧: «Nɛ́ mi a̧ mɛ bɛ̧ kifa nú ha̧ a̧'ɛ? Mɛ́ iŋ‘e mi a̧a̧ nɛ̀ ŋgai mɛ gbo mɛ yinɛ, kóó mɛ mgboi mɛ zu te-diŋa mbɛt na nde?» 11Jesu kifa nú ha̧ a̧: «Kà Sɔ̧ ha̧ so ŋgai ha̧ mɛ nɛ̀ ŋgɔn mɛ na, ɓɛɛ bó nɛ́ mɛ́ tɛ̀ɛ́ kpa ŋma ŋgai zu'm na; mɛ̀ nɛ́ hegɔ, nɛ́ wi nɛ̀ ea'm er-mɛ‘i a̧ dee gasa ɗaŋmɔ ɛ̧.» 12Tɛ́ ŋgimbi'i, Pilat ku̧u̧ naŋ kia war mɛ gbo Jesu pi̧ nù, ɓɛɛ o Juif ye tɛ gaiamɔ tɔ̧ nɛnɛ‘e: «Kà mɛ̀ gbo a̧ pi̧ nù, ɓɛɛ mɛ bó nɛ́ sɛm ko Sezar na, wen kóó o ndé nɛ̀ tɔ̧‘e wi nɛ́ wannu bá nɛ́ zù wé nɛ̀ Sezar.»
13Zia wen'i nɛ̀ Pilat zia hegɔ, a̧ mgbɔɔ Jesu si zan, ɓɛɛ duk nù fara-gɔn-kita kɔ̧-a̧ nɛ̀ wa mboo nɛ̀ ta (nɛ̀‘i sa nɛ̀ nú hébreu'e «Gabata»). 14Wese'i duka nɛ́ wese-ɗafi-mɔ wen gbaŋa Paska, ká wese hɛɗa see-zu kaɗi. Pilat tɔ̧ɔ̧ ha̧ o Juif: «Zɔ́k, wannu k’ɛ́nɛ́ nɛ́ mɔ'ɔ.» 15Ɓɛɛ wa tɔ̧: «A̧ a̧ fé fee! A̧ a̧ fé fee ɛ̧! Ɛ̀nɛ̀ mgbóí a̧ zu te-diŋa!» Pilat aka wa: «A̧‘m mgboi wannu k’ɛ́nɛ́ zu te-diŋa nde?» O gasa wan-ɗafi-sɔ̧ kifa nú: «Ɛ́ɛ́ bó nɛ̀ ŋma wannu gan zu Sezar na!» 16Ɓɛɛ Pilat e Jesu er-wa ha̧ wa mɛ mgboi a̧ zu te-diŋa. Ɓɛɛ wa ba Jesu.
Wa mgboia Jesu zu te-diŋa
(Zɔk Mt 27.32-44; Mk 15.21-32; Lk 23.26-43)
17Hegɔ ɓɛɛ wa ba Jesu. Nɛ́ mɔ'ɔ nɛ̀ Jesu tuia te-diŋa kɔ‘i nɛ̀ saaye yak si fara nɛ̀‘i sa'e: «Fara Koŋgoi-zu» (nɛ̀ nú hébreu nɛ́ «Gɔlgɔta»), 18ɓɛɛ wa mgboi a̧ zu te-diŋa in o ŋma bíí yiitoo, kpɔk nɛ̀ war wii-er-a, ɓii-aa nɛ̀ war gale, e Jesu see-a.
19Ɓɛɛ Pilat yɔr mɔ e zu te-diŋa nɛ̀ tɔ̧a̧‘e: «Jesu be Nazarɛt, wannu ko o Juif.» 20O Juif nɛ̀ dɔka-a tɔra yɔramɔ‘i, wen fara nɛ̀ wa mgboia Jesu zu te-diŋa sɛnɛ‘i nyɛi̧ nɛ̀ ye na. Wa yɔra mɔ‘i nɛ̀ nú hébreu, in nú latin ká bá nɛ̀ nú grɛk. 21O gasa wan-ɗafi-sɔ̧ ko o Juif tɔ̧ɔ̧ ha̧ Pilat: «Bó nɛ́ ɛ́nɛ́ tɛ̀ɛ́ yɔr'e: ‹Wannu ko o Juif na,› ɓɛɛ ɛ́nɛ́ tɛ̀ɛ́ yɔr so'e: ‹Wi’ɛ tɔ̧a̧‘e: wi nɛ́ wannu ko o Juif.› » 22Pilat kifa nú: «Mɔ n'am yɔra, mi yɔra kaɗi.»
Wa kɛ̧ɛ̧ laa ko Jesu
23Ɗoŋ nɛ̀ o wi-biro mgboia Jesu zu te-diŋa kaɗi, wa kaia o laa kɔ̧-a̧ kɛ̧ tɛ fara naar, ha̧ ha̧ o ŋmaa; ɓɛɛ nɛ̀ war ko be laa-pi̧-nɛ̀-ɗɔɔ, i̧i̧ ɓɔna wen bó nɛ́ wa fura fur na. Kɔ̧́ laa'i kpɔk, ɓɛɛ wa toka so tok nɛ̀ ger-a mɛ pii ɗɔɔ. 24Nɛ́ mɔ'ɔ nɛ̀ wa tɔ̧ɔ̧ sitɛ o ŋmaa: «K’ɛ́ɛ́ a̧k be laa’ɛ na, ɛ̀ɛ̀ bí nɛ̀ mbaɗi; wi nɛ̀ nyɔŋa, gbɛa.» Hegɔ mɔ nɛ̀ Yɔramɔ tɔ̧a̧ so'e:
«Wa kɛ̧ɛ̧ laa kɔ‘m nɛ̀ ŋmaa,
wa bìì be laa kɔ‘m nɛ̀ mbaɗi,» hɔɔ gba̧a̧.
Mɔ nɛ̀ o wi-biro dee nɛ́ mɔ‘i.#Gima 22.28
Jesu in nàà kɔ‘i
25Nàà ko Jesu yora ká̧ te-diŋa ko Jesu in nya-wi, seka Marii kóò ko Kleopas, ká bá nɛ̀ Marii Magdala. 26Jesu zɔka nàà kɔ‘i in ŋgaiwi n'aa kɔ̧ɔ̧ nyɛmna nɛ̀ yor katɛ a̧, ɓɛɛ a̧ tɔ̧ ha̧ nàà kɔ̧-a̧: «Kóò'ɛ, zɔ́k bem kɔ-mɛ hɛ̧ɛ̧.» 27Ɓɛɛ a̧ tɔ̧ ha̧ ŋgaiwi'i: «Mɛ̀ zɔ́k nàà kɔ-mɛ hɛ̧ɛ̧.» Nɛ́ tɛ ŋgimbi'i a̧ ŋgaiwi'i mgbɔɔ nɛ̀ nàà ko Jesu si tɛ̀ kɔ‘i.
Fio ko Jesu
(Zɔk Mt 27.45-56; Mk 15.33-41; Lk 23.44-49)
28Nɛ̀ Jesu iŋa'e mɔ lɛŋ kaɗa kaɗi, a̧ tɔ̧a̧: «Wɔ-yì gbɛ‘m gbɛɛ,» wen ha̧ mɔ nɛ̀ yɔra so mɛ hɔ gba̧a̧ lɛŋ.#Gima 22.15; 69.21 29Ŋma kpánà duka so hi̧i̧ nɛ̀ duna nɛ̀ kpa̧i̧a̧-dɔ̧ɔ̧. Wa pi̧i̧ saala ɗɔɔ-aa sɔk nú bé tè#19.29 bé tè: tè'ɛ nɛ́ hysope., ɓɛɛ wa nyɛi̧ e nú Jesu. 30Nɛ̀ Jesu nɔɔ kpa̧i̧a̧ dɔ̧ɔ̧ kaɗi, a̧ tɔ̧a̧: «Mɔ lɛŋ kaɗa kaɗi.» A̧ zuma zu-a, ɓɛɛ a̧ fe. 31Wese'i duka nɛ́ ŋgimbi ɗafa mɔ wen gbaŋa Paska. Nɛ́ mɔ'ɔ nɛ̀ o Juif tɔ̧ɔ̧ ha̧ Pilat mɛ gbin ku o wi nɛ̀ wa hɛra zu te-diŋa mɛ kai wɔ̀r-wà yínɛ́,#19.31 wɔ̀r-wà yínɛ́: gbíná kú ó wí nɛ̀ wa hɛ̀rá zù té-diŋa mɛ̀ nɛ́ wen há̧ wà mɛ́ fè nɛ̀ haya-a wen káíá wɔ̀r-wà zù té-diŋa yínɛ́ nɛ̀tí há̧ wèsé-ɔ̀m-tɛ̀. wen ká tɛɛ ɓɔn zu te-diŋa wese-ɔm-tɛ, wen wese-ɔm-tɛ‘i tɛ̀ɛ́ duk nɛ́ gasa wese nyɛmna.
O wi-biro toka ká̧ ɔm Jesu
32Hegɔ, o wi-biro nɛ̀ɛ̀ gbin ku o wi nɔ‘i yiitoo nɛ̀ wa hɛra zu te-diŋa in Jesu'i. 33Kà wa tɛ hɔ tɛ Jesu, wa zɔka a̧ fee kaɗi, ɓɛɛ wa gbin ku-a na; 34ɓɛɛ ŋma wi-biro tok ɔm-a nɛ̀ labo, ɓɛɛ tɔk in yì gbo a nù. 35Mɛ̀ nɛ́ wi nɛ̀ zɔka mɔ‘i a̧ dee sedaako-a, ɓɛɛ sedaako kɔ̧-a̧‘i nɛ́ kpasa sedaako; wi’ɛi iŋa'e wen n'aa tɔ̧‘i nɛ́ kpasawen, wen h’ɛ́nɛ́ mbɛt mɛ́ kɔ̧ ɗɔaa. 36Mɔ‘i dee ha̧ Yɔramɔ nɛ̀ tɔ̧ɔ̧ so'e: «Wa gbin gba̧a̧-tɛ‘m na,» mɛ hɔ gba̧a̧.#Gboa-a 12.46; Tɔra-bíí 9.12; Gima 34.20 37Ŋma Yɔramɔ tɔ̧ɔ̧ mbɛt'e: «Wa tɛ zɔk wi nɛ̀ wa toka so nɛ̀ gbaayí-wa.»#Zak 12.10; Tɔ̧ɔ̧ Hu̧ 1.7
Guna Jesu
(Zɔk Mt 27.57-61; Mk 15.42-47; Lk 23.50-56)
38Ɗoŋ mɔ‘i, Jozɛf be Arimatee, nɛ̀ duka so nɛ́ ŋma ŋgaiwi ko Jesu nɛ̀ ti fui, wen a̧ dee so kíì o Juif, nɛ̀ɛ̀ ak Pilat mɛ ba wɔr Jesu. Pilat ha̧a̧ war ha̧ a̧, ɓɛɛ a̧ nɛ́ɛ̀ ba wɔr Jesu. 39Nikodɛm nɛ̀ nɛ̀ɛ̀ so tɛ Jesu mɛ zɛ nɛ̀ɛ̀ mbɛt. A̧ baa nɔ̧́-nyama zaŋ nɛ̀ ŋmaa in fuu-nyama, dita-a dee hee kilo ɓu-taar ga.#Jn 3.1-2; 20.23; Mt 16.19 40Wa baa wɔr Jesu, ɓɛɛ wa ye a̧ nɛ̀ laa, wa aa fuu-nyama tɛ-a mbɛt hee mɔ'ɔ nɛ̀ o Juif de ɓɔnsɛnɛ tɛ guna fio kɔ-wa ga. 41Ŋma fɔ duka so ká̧ fara nɛ̀ wa mgboia Jesu zu te-diŋa sɛnɛ‘i, ɓɛɛ ŋma kɔ̧́ fio nɛ̀‘i tɛ gun bíí sɛnɛ nɛti na duka so hi̧i̧ mbɛt. 42Hee mɔ'ɔ nɛ̀ o Juif a̧a̧ tɛ ɗafa mɔ wen gbaŋa kɔ‘i ga, wa guna Jesu ɓɔn hi̧i̧, wen kɔ̧́ fio nyɛi̧ nɛ̀ fara'i na.
Currently Selected:
JEAN 19: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.