O WI-GƆN-KITA 1
1
O zuduk ko Juda in ko Simɛɔŋ baa Adonibezɛk
1Ɗoŋ fio ko Josue, o be Israɛl aka mɔ in GASA WAN hee mɔ'ɔ ga: «Nɛ́ ge zuduk ge mgbara yɛ a̧ tɛ yak ti wen bíí biro in o be Kanaŋ ge?»
2GASA WAN kifa nú: «Nɛ́ zuduk ko Juda a̧ tɛ yak ti, mi ee nú kɔ̧ er-wa kaɗi.»
3Zuduk ko Juda tɔ̧ɔ̧ ha̧ o nya-wi o bezaŋ Simɛɔŋ: «Ɛ̀nɛ̀ dáŋ in yɛɛ pii tɛ nù k’ɛɛ, ɛ̀ɛ̀ bí o be Kanaŋ; ɓɛɛ ɛ́ɛ́ mbɛt, ɛɛ tɛ nɛ in'nɛ̀ɛ́ sitɛ nù k’ɛ́nɛ́.» Ɓɛɛ o bezaŋ Simɛɔŋ nɛ in wa. 4Zuduk ko Juda daŋa in zuduk ko Simɛɔŋ, ɓɛɛ GASA WAN e o be Kanaŋ in o be Periz kɔ̧ er-wa; wa gbɛɛ o bíí booro-ɓu sɛn Bezɛk. 5Wa kpaa Adonibezɛk sɛn saaye Bezɛk, ɓɛɛ wa bi a̧; wa bìì o be Kanaŋ in o be Periz. 6Adonibezɛk yuu mɔ yak, ɓɛɛ wa ndak a̧ ba a̧, ɓir gbokoto er-a in o gbokoto naŋ-a yinɛ. 7Nɛ mɔ'ɔ nɛ Adonibezɛk tɔ̧a̧: «O wannu ɓu-mɔɔrɔ-ɗoŋ-yiitoo nɛ‘i ɓira so o gbokoto er-wa in o gbokoto naŋ-wa yinɛ dɔr só nɛ́ oi nyɔŋmɔ nɛ̀ tik nù er-am; nɛ́ mɔ n'am dea, á̧ Sɔ̧ kifi er-a ha̧‘m.» Wa mgbɔɔ a̧ si Jerusalɛm ɓɛɛ a̧ fe hi̧i̧.
Zuduk ko Juda bíí Jerusalɛm in Hebrɔŋ
8Zuduk ko Juda tika zu Jerusalɛm, ɓɛɛ wa ba; wa gbɛɛ o bíí saaye nɛ̀ gba-paa, ɓɛɛ wa pi̧ wee tɛ ye. 9Ɗoŋ mɔ‘i, wa zira mɛ bi o be Kanaŋ nɛ̀ ɔ zu kaya, ŋga-gbárà Nɛgɛb, in hira-nù. 10Wa nɛɛ bi o be Kanaŋ nɛ̀ dee so ye sɛn nú Hebrɔŋ nɛ‘i sa so nɛti'e Kiriat-Arba. Wa bìí Sesai, Aiman in Talmai mbɛt.
Otniɛl bìì ye Debir
(Zɔk Jos 15.13-19)
11Zuduk ko Juda duka hi̧i̧ nɛ́ɛ̀ bi nɛ o be Debir nɛ‘i sa so nɛti'e Kiriat-Sefɛr. 12Kalɛb tɔ̧a̧: «Wi nɛ tɛ bi Kiriat-Sefɛr in nɛ tɛ ba a̧, mi tɛ ha̧ bem kɔ‘m Aksa nɛ kóò ha̧ a̧.» 13Otniɛl bem ko Kɛnaz, be-ɗoŋ Kalɛb baa ye'i, ɓɛɛ Kalɛb ha̧ bem kɔ‘i Aksa nɛ kóò ha̧ a̧. 14Nɛ̀ Aksa hɔɔ er wíì kɔ‘i kaɗi, wíì kɔ̧-a̧#1.14 wíì kɔ̧-a̧: nú hébreu tɔ̧ɔ̧ nɛ́ Aksa a̧ aa wen ha̧ wíì. aa wen ha̧ a̧ mɛ nɛ̀ɛ́ ak fɔ er dáà kɔ̧-a̧. Aksa zira nɛ̀ zu tuifuu, ɓɛɛ Kalɛb ak a̧: «Mɛ kɔ̧ɔ̧ nɛ́ ge?» 15Ɓɛɛ a̧ kifi nú ha̧ a̧: «Ɛ̀nɛ̀ dé ko ha̧‘m; hee mɔ'ɔ n’ɛnɛ ha̧a̧ nú Nɛgɛb ha̧‘m ga, ɔ dee ɛ̀nɛ̀ há̧ o be-zer ha̧‘m mbɛt.» Ɓɛɛ Kalɛb ha̧ o be-zer mɛ ŋgɔn in mɛ ɗɔɔ ha̧ a̧.
16O bezaŋ Kɛn, for Moisɛ daŋa nɛ̀ saaye nɛ‘i sa'e ye-ndɛŋgɛ in bezaŋ Juda nɛ̀ a̧a̧ si Arad nɛ war ká̧-zan-mɛ́-ɗɔɔ, ɓɛɛ wa nɛ́ɛ̀ de ye in o be Amalɛk. 17O bezaŋ Juda in o nya kɔ-wa, o bezaŋ Simɛɔŋ kura ba biro duk nɛ̀ o be Kanaŋ nɛ ɔ sɛn Sɛfat. Wa kuma o bíí saaye'i a nù lɛŋ, ɓɛɛ wa ɗaŋ ye'i in o mɔ nɛ a̧a̧ sɛnɛ lɛŋ mbɛt. Wa aa mbe nin ha̧ ye'i'e: Ɔrma, mɛ nɛ wen nɛ tɔ̧: «Ye nɛ tika». 18O bezaŋ Juda baa ye Gaza in nù nɛ oi-aa, ku̧u̧naŋ-a nɛ Askelɔŋ hɔ Ekrɔŋ, gu nɛ o nù nɛ ya zik a̧. 19GASA WAN nɛ̀ see zu yora ɗoŋ wa, ɓɛɛ wa ba nù nɛ a̧a̧ si zu kaya. Mɔ kpɔk, wa nyɛm so mɛ ndak o bíí nɛ a̧a̧ kɔ̧ ɗɔŋgɔ na, wen o wi nɔ‘i a̧a̧ so nɛ̀ o keekee-boi. 20Wa ha̧a̧ ye Hebrɔŋ ha̧ Kalɛb nyɛm nɛ ɗoŋ wen ko Moisɛ. Kalɛb baa ye'i, ɓɛɛ ndak o bem ko Anak taar, o be-wan tɛ nù‘i yinɛ. 21Ɓɛɛ nɛ war ko o be Jebus nɛ ɔ so sɛn Jerusalɛm, o bezaŋ Bɛnjamin nyɛm so mɛ ndak wa na. Nɛ́ mɔ‘i a̧ dee ha̧ o be Jebus mɛ ɓɔn mgbara o bezaŋ Bɛnjamin, ɔ nɛ̀ ye Jerusalɛm in wa hɔ sɔsɔɔ.#Jos 15.63; 2 Sam 5.6; 1 Kal Ny 11.4
Gbina biro ko o zuduk ko Juda in Bɛnjamin
22O bíí nutua ko Jozɛf nɛɛ mɛ bi Bɛtɛl mbɛt, ɓɛɛ GASA WAN duk in wa. 23Wa toma bíí mɛ nɛ̀ɛ́ kpe naŋ Bɛtɛl, nɛ wa sa so nɛti'e Luz. 24O wi-kpe-naŋ-mɔ zɔka ŋma bíí fara gboa-a nɛ saaye, ɓɛɛ wa tɔ̧ ha̧ a̧: «Mɛ̀ úsí fara n’ɛɛ tɛ ye nɛnɛ si saaye h’ɛ́ɛ́, ɓɛɛ ɛɛ tɛ de demɔ in mɛɛ.» 25Wi’ɛi usa fara yea-a si saaye ha̧ wa, ɓɛɛ wa gbɛ o bíí saaye lɛŋ nɛ gba-paa. Wa ee wi’ɛi duk in o bíí nú-gara kɔ̧-a̧. 26Wi’ɛi yaka si nù ko o be Hit, ɓɛɛ a̧ de ŋma ye hi̧i̧ n'aa saa nin-a Luz. Nin ye'i nɛ́ mɔ‘i hɔ sɔsɔɔ.
O dukbíí nɛ o be Israɛl fo gbonɛ na
27Manase nyɛm so bíí Bɛt-Seaŋ in o ye nɛ zii nɛ̀ a̧, na, koo Tanak in o ye nɛ̀ zii nɛ̀ a̧, kóó o bíí nɛ ɔ sɛn Dɔr in o ye nɛ̀ zii nɛ̀ a̧, kóó o bíí Yiblɛam in o ye nɛ̀ zii nɛ̀ a̧, sɛka o bíí Mɛgido in o ye nɛ̀ zii nɛ̀ a̧, na mbɛt. Nɛ mɔ'ɔ nɛ o be Kanaŋ ɓɔna kana tɛ nù‘i siti.#Jos 17.11-13 28Ŋgimbi nɛ o be Israɛl kpaa ŋgai kaɗi, wa foo o be Kanaŋ a tɛ ŋga tom, ɓɛɛ wa ndak wa na.
29O bezaŋ Efraim ndak o be Kanaŋ nɛ ɔ so sɛn Gezɛr na, ɓɛɛ o be Kanaŋ ɓɔn mgbara o bezaŋ Efraim sɛn Gezɛr.#Jos 16.10
30O bezaŋ Zabulɔŋ ndak so o be Kitrɔŋ na, kóó o be Nahalɔl na mbɛt, ɓɛɛ o be Kanaŋ ɓɔn mgbara o bezaŋ Zabulɔŋ, ɓɛɛ wa ya de nɛ ŋga tom ha̧ wa.
31O bezaŋ Asɛr ndak so o be Ako, o be Sidɔŋ, o be Alab, o be Akzib, o be Hɛlba, o be Afik in o be Rehob na. 32O bezaŋ Aser ɔɔ kɔ‘i mgbara o be Kanaŋ nɛ ɔ so tɛ nù‘i, wen wa ndak so wa yinɛ na.
33O bezaŋ Nɛftalii ndak so o be Bɛt-Sɛmɛs in o bíí Bɛt-Anat na, ɓɛɛ wa ɔ mgbara o be Kanaŋ nɛ ɔ so tɛ nù‘i; mɔ kpɔk, o be Bɛt-Sɛmɛs in o be Bɛt-Anat yaa tɛ ŋga tom.
34O be Amɔr ndaka so o bezaŋ Dan si zu kaya, ɓɛɛ wa e ha̧ wa mɛ zir pii kɔ̧ ɗɔŋgɔ na. 35O be Amɔr ɓɔna kana tɛ ɔa-a sɛn Har-Hɛrɛs, sɛn Ayalɔŋ in sɛn Salbim; ɓɛɛ ŋgimbi nɛ er o bíí nutua ko Jozɛf ŋgaia kaɗi, wa foo wa a tɛ ŋga tom. 36Nù ko o be Amɔr ku̧u̧ naŋ nɛ tiger kaya Akrabim hɔ nɛnɛ tɛ gasa Ta ba nɛnɛ daŋnɛ.
Currently Selected:
O WI-GƆN-KITA 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.