ESAII 1
1
KUTI MƆ ZAŊ KALATA KO ESAII
(Zɔk 1—39)
1Mɔ nɛ Esaii bem ko Amɔs zɔka tɛ hɔɔ-zu nɛ Sɔ̧ hɔɔ ha̧ a̧ zu Juda in Jerusalɛm ŋgimbi ko o wannu Ozias, Yotam, Ahaz in Ezɛkias nɛ ɔɔ so wan zu Juda nɛ mɔ'ɔ.#2 Wan 15.1-7; 15.32—16.20; 18.1—20.21; 2 Kal Ny 26.1—32.33
Sɔ̧ tɔ̧ɔ̧ ŋga wen zu dukbíí kɔ‘i
2Yiwese a̧ zii, ɓɛɛ nu a̧ yeŋ zer
tɛ wen nɛ GASA WAN tɛ tɔ̧‘i.
Gba̧a̧ wen-aa nɛ mɔ'ɔ:
«Mi daia o bem gasi kaɗi,
ɓɛɛ nɛ mɔ'ɔ nɛ wa zika tɛ tɛ́ɛ̀ de ŋgazu in am.
3Ndai iŋa wan kɔ‘i,
tuifuu mbɛt iŋa fara nɛ wan-dai-a
a nyɔŋmɔ sɛnɛ ha̧ a̧,
ɓɛɛ Israɛl iŋ wan kɔ‘i na;
dukbíí kɔ‘m zii mɔ na.»
4Bɔnɛ a̧a̧ zu'nɛ́, ɛnɛ o tugun bíí de ɗaŋmɔ;
yí-tom k’ɛ́nɛ́ nɛ gbɛɛ zu,
ɔr nɛ o bíí nyɔŋ nɛ mɔ er-wa sɔɔ gee!
GASA WAN nɛ duk nɛ Sa̧a̧ Wi ko Israɛl,
nɛ mɔ'ɔ nɛ wa ea a̧ duk,
e a̧ tɛ geemɔ, ɓɛɛ zik ɗoŋ e ha̧ a̧.
5Ɛnɛ o yaa-ŋgazu nɔ'ɔ,
gè tɛ‘nɛ́ ge a'i tɛ gusi ɓɔ ge?
Wen zu'nɛ́ kpee nɛ da̧i̧,
ŋgai bo yí-see'nɛ́ ɓɔna.
6Nɛ̀ naŋ‘nɛ́ hɔ nɛnɛ bɛɗɛ zu'nɛ́ mɛ,
ŋma oi tɛ‘nɛ́ duk na,
kana nɛ da̧i̧ in o mɔ nɛ sui tɛ‘nɛ́
fok nɛnɛ nɛ mam in o gba-da̧i̧.
Wi fɔr yi da̧i̧‘i na;
wi hɛr na, kà bó nɛ̀ aa nɔ̧́ sɛnɛ na mbɛt.
7Nu k’ɛ́nɛ́ kifa bɛɛ-oi, o ye k’ɛ́nɛ́ bia wee.
O gɛnɛ ɗaŋa nu k’ɛ́nɛ́ ɓɔn gbaayí‘nɛ́,
gɔni bíí ɗaŋa nu k’ɛ́nɛ́ kifi geemɔ;
8ɓɛɛ ye Jerusalɛm tɛ duk
hee ŋma be tua-pɛm-mɔ sɛn kpɛɛfɔ-nyak-dɔ̧ɔ̧ ga,
kóó hee ŋma gbáksák sɛn kpɛɛfɔ-gala ga;
a̧ tɛ duk hee ŋma ye nɛ biro kɛra ga.
9Kà GASA WAN nɛ̀ a̧a̧ nɛ ŋgayamɔ lɛŋ
nɛ́ kpasa so o ŋma bíí na,
ɛɛ tɛ̀ɛ́ hɔ ŋmaa in o bíí Sɔdɔm in Gɔmɔr.#Ku̧u̧ 19.24; Rɔm 9.29
10Ɛ̀nɛ̀ zíí wen ko GASA WAN,
ɛnɛ o gasawi Sɔdɔm;
ɛ̀nɛ̀ yeŋ zer'nɛ́ tɛ usamɔ ko Sɔ̧ k’ɛɛ,
ɛnɛ o bíí Gɔmɔr.
11Wen nɛ GASA WAN tɔ̧ nɛ mɔ'ɔ:
«Ŋma demɔ n'am kpa tɛ zɔm ɗafa-sɔ̧ k’ɛ́nɛ́ bo na.
O kpoo vala gbadua in nɔ be ndai k’ɛ́nɛ́ ŋgia'm kaɗi;
tɔk wiwii-ndai k’ɛ́nɛ́, ká bá nɛ̀ tɔk o sami
in o gbadua k’ɛ́nɛ́ de tɛ‘m ɓɔna.#Amɔs 5.21-22
12Ɛnɛ o wi nɛ de ɓɛɛ tɛɛ tɛ‘m’ɛ,
nɛ o'o saa'nɛ́ mɛ tɛɛ i̧si̧ nú-zala Tua kɔ‘m nɛ naŋ‘nɛ́ o?
13Ɛ̀nɛ̀ káɗí baa kokoɗo ha̧a̧mɔ k’ɛ́nɛ́ tɛnɛ ha̧‘m;
zi-wee ha̧a̧mɔ k’ɛ́nɛ́‘i de tɛ‘m na.
Gbaŋa mbe yí-zɛ, o wese-ɔm-tɛ
in o gasa wese-mɔi̧a-a,
ká bá nɛ̀ o wese-ɓɔɔ-mɔ k’ɛ́nɛ́, mi kɔ̧ ɓɔna mbɛt.
14Mi sɛna o gbaŋa mbe yí-zɛ in o wora-sɔ̧ k’ɛ́nɛ́,
tɛ‘m mbɔia tɛ mɔ‘i kaɗi!
15Ŋgimbi n’ɛnɛ nyɛi̧ er'nɛ́ si ŋgɔn
wor nɛ‘m, ɓɛɛ mi wɛra yí‘m si mgbɔɔr;
ɛ́nɛ́ kɔfa Sɔ̧ bó nɛ́ mɔɔ-tɔ̧-na, ɓɛɛ mi zii na,
wen er'nɛ́ duna nɛ tɔk.
16Ɛ̀nɛ̀ zúi tɛ‘nɛ́ ɓɛɛ ɛ̀nɛ̀ ɗáfí war-tɛ‘nɛ́.
Ɛ̀nɛ̀ bá ɗaŋ deemɔ k’ɛ́nɛ́ yinɛ yí‘m;
ɓɛɛ ɛ̀nɛ̀ káɗí dee ɗaŋmɔ!
17Ɛ̀nɛ̀ yámbí dee demɔ,
ɛ̀nɛ̀ kíí mɛ de mɔ nɛ yuwar-a;
ɛ̀nɛ̀ gbák o wi nɛ bíí de ŋgamɔ nɛ saka-yí in wa,
ɓɛɛ ɛ̀nɛ̀ dé mɔ nɛ yuwar-a in o be-oi;
ɛ̀nɛ̀ yé ɗoŋ o ko-gera.
18Ɛ̀nɛ̀ tɛ́ ɛ̀ɛ̀ bá keta ɛɛ zɔk,
GASA WAN a̧ tɔ̧.
Kà o ɗaŋmɔ k’ɛ́nɛ́ gbɛ̧ kerere,
wa tɛ fɛŋ hee ɓɔrɔ ga;
kà wa nɛ gbɛ̧ɛ̧ hee tɔk ga,
wa tɛ fɛŋ ndáká-ndáká hee talum ga.
19K’ɛ̀nɛ̀ kɔ̧ mɛ mbo zu ha̧‘m,
ɓɛɛ ɛnɛ tɛ nyɔŋ o gba de nyɔnɔ tɛ nu k’ɛ́nɛ́;
20ɓɛɛ k’ɛ̀nɛ̀ ɓɔn tɛ dee ŋgazu,
gba-paa tɛ gɔm'nɛ́ a nu.»
Nɛ́ GASA WAN a̧ tɔ̧ wen’ɛ.
Bura war-tɛ ye Jerusalɛm
21 Siɔŋ nɛ̀ duka so nɛ́ ŋma ko-mbo-zu,
nɛ mɔ'ɔ nɛ kifa nɛ ɗaŋ-a hee kó-de-mɔ nɛ mbɔɗɔnu ga.
Kasa heembea in deemɔ nɛ yuwar-a duka so tɛ ye'i,
ɓɛɛ kinii nɛ o wi-gbɛ-zu a̧ ɔɔ wan sɛnɛ.
22Bu-mbɔi kɔ-mɛ kifa nɛ duia-yì;
gba de dɔ̧ɔ̧ kɔ-mɛ gɔna yì.
23O gasawi kɔ-mɛ nɛ o wi-ŋgazu,
wa nɛ o gbama-yari ko o wi-zuzu.
Wa kɔ̧ɔ̧ mɛ kpa nɛ mɔ er o bíí;
wa de demɔ nɛ yuwar-a in o be-oi na,
ɓɛɛ wa ye ɗoŋ o ko-gera na mbɛt.
24Nɛ mɔ‘i a̧ dee ha̧ GASA WAN Sɔ̧ nɛ a̧a̧ nɛ ŋgayamɔ lɛŋ,
ŋga-wi ko Israɛl mɛ tɔ̧‘e:
«Bɔnɛ tɛ tik zu o wi-kur-zu'm,
mi tɛ kifi er-am ha̧ wa ɓɛɛ sɛka see-am ga̧a̧.
25Mɛ tɛ zɔk bɔnɛ er-am;
mi tɛ dɔ mɛ tɛ wee dɔra
hee mɔ'ɔ nɛ‘i dɔ nɛ kpáná-wii
wen ha̧ ndiŋmɔ mɛ kɔ̧ a̧ mɛ bìì wee nɛ sa̧a̧-a̧'ɛ ga.
26Mi tɛ de ha̧ o wi-gɔn-kita kɔ-mɛ,
mɛ duk nɛ de-a hee kuti-a ga;
mi tɛ de kalemɔ‘i in o wi-tɔ̧-mbɔrɔ kɔ-mɛ mbɛt,
ɓɛɛ nɛ́ tɛ ŋgimbi'i a̧ wa tɛ sa nɛ mɛ‘e:
‹Ye-mbo-zu› in ‹Ye-de-mɔ nɛ yuwar-a.› »
27 Siɔŋ tɛ kpasi tɛ deemɔ nɛ yuwar-a,
ɓɛɛ o wi-gbar-ɗaŋmɔ tɛ kpasi wen deemɔ nɛ yuwar-a mbɛt.
28O wi-ŋgazu in o wi-de-ɗaŋmɔ tɛ kum gbuɗuk lɛŋ,
ɓɛɛ o wi bɛ̧ GASA WAN tɛ yambali.
29Nɛ mbetɛ, ɛnɛ o bíí-gasi o gasa te,
búù tɛ ba'nɛ́ zu o te nɛ see'nɛ́ duk sɛnɛ‘i;
ɓɛɛ foe tɛ ba'nɛ́ zu o fɔ n’ɛnɛ hoka nɛ ɔr'nɛ́‘i mbɛt.
30Ɛnɛ tɛ duk hee ŋma gasa te nɛ wa̧a̧-a̧ aia a nu ga,
ɛnɛ tɛ hɔ ŋmaa in ŋma fɔ nɛ yi bo sɛnɛ ɓɔna mbɛt.
31Ŋga bíí tɛ kifi de geemɔ;
o tom kɔ̧-a̧ tɛ duk hee fu̧u̧-wee ga,
ɓɛɛ wa yiitoo lɛŋ tɛ bìì wee,
ɓɛɛ bíí nɛ tɛ bi wee'i bo na.
Currently Selected:
ESAII 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.