HABAKUK 1
1
1Wen nɛ GASA WAN tɔ̧ɔ̧ ha̧ Habakuk wi-tɔ̧-wen oi nú Sɔ̧, tɛ hɔɔ-zu nɛ́ mɔ'ɔ.
Kuti aia-nú ko Habakuk ha̧ GASA WAN
2GASA WAN, nɛ́ ge ŋgimbi ge,
ɛ̀nɛ̀ tɛ́ zii nɛ̀ aia-nú kɔ‘m,
mɛ gbak am ge?
Mi saa'nɛ́ mɛ́ tɛ̀ɛ́ gbo yɛ yinɛ tɛ ŋgamɔ,
ɓɛɛ ɛnɛ tɛ na wen ge?
3Wen ge ɛnɛ de ha̧‘m mɛ zɔk ɗaŋmɔ hegɔ ge?
Ɛnɛ tɛ zɔk o bíí tɛ dee ŋgamɔ nɛ gbaayí wen ge?
Mɔ n'am zɔk katɛ‘m nɛ́ ɗaŋamɔ in dee ŋgamɔ;
yí-tom ko bíí nɛ kpɛra-a in o ŋmaa,
wa zii ger ŋmaa ɓɔna!
4Wa kasi heembea ɓɔna,
wa de mɔ nɛ yuwar-a ɓɔna mbɛt.
Sɛn ti kita nɛ́ wen ko wi-ɗaŋ
a̧ tik wi nɛ̀ wen kɔ̧-a̧ ɔ dee,
ɓɛɛ gɔna kita nɛ̀ yuwar-a bo ɓɔna.
Kifa-nú ko GASA WAN
5Ɓɛɛ GASA WAN tɔ̧:
«Ɛ̀nɛ̀ zɔ́k mɔ nɛ de mgbara o tugun bíí,
ɓɛɛ kíì a̧ dé‘nɛ́.
Ɛnɛ tɛ zɔk ŋma gasamɔ nɛ tɛ de mgbara'nɛ́,
ɓɛɛ kà bó ha̧ bíí mɛ tɔ̧ so nɛ nyɛrɛ mɔ‘i h’ɛ́nɛ́,
ɛnɛ beka kpɛk so na.#Tom 13.41
6Kinii, mi tɛ ha̧ ŋgai ha̧ o be Babilɔŋ,#1.6 o be Babilɔŋ: mɛ̀ nɛ́ wen nɛ̀ tɔ̧́ o be-nu Kaldee.
ŋgazu dukbíí nɛ de ko na
in nɛ kìì-wèn kɔ̧-a̧ nyɛmna'i, mɛ tɛ.
Wa nɛ o bíí nɛ yar dam fara lɛŋ,
bá nɛ̀ o nù nɛ̀ bó nɛ́ kɔ-wa na.#2 Wan 24.2
7Wa nɛ o wi-gɔn-hiɗi-wi,
in o wi-pi̧-kíì tɛ-wi.
Mɛ̀ nɛ́ wa nɛ zu-wa a̧ gɔn heembea kɔ-wa,
nɛ́ wa a̧ de ha̧ nin-wa mɛ hu̧r.
8O nyaŋa kɔ-wa haya gan o gɔ̧,
in o gboo mɛ ga̧a̧mɔ;
o wi-daŋ-nyaŋa kɔ-wa tik nɛ biro;
wa tɛ nɛ nyɛi̧a-a,
ɓɛɛ wa ɔ haya hee zua nɛ ɗum mɛ ba saɗi ga.
9Wa tɛ́ nɛ wen ɗaŋamɔ;
yí-wa ɓɔn siti mɛ̀;
wa kai o bara hee nyɛmɛ ga.
10Dukbíí‘i mam kɔ‘i o wannu mam,
o be-wan nɛ mɔɔ-zɛkɛɗi kɔ-i.
O ŋga garo nɛ geemɔ ti a̧;
a̧ mbo nɛ nù hɔ zu-a ba nɛnɛ.
11A̧ yak hee búk ga
kpan nɛ̀ nɔ̀ si ŋma fara,#1.11 ŋma fara: texte nú hébreu sa̧ na. O ŋma bíí tɔ̧á: nɛ́ mɔ'ɔ nɛ̀ taamɔ kɔ-wa kpaia.
ŋgai kɔ̧-a̧ nɛ sɔ̧ kɔ̧-a̧.»
Yiitoo aia-nú ko Habakuk ha̧ GASA WAN
12Nɛ̀ ku̧u̧naŋ-a mɛ, bo nɛ́ ɛ́nɛ́ nɛ́ GASA WAN na nde?
Ɛnɛ nɛ Sɔ̧ kɔ‘m;
ɛnɛ ɔ sa̧a̧, ɛnɛ duk ɓɔnsɛnɛ.#1.12 ɓɔnsɛnɛ: texte hébreu tɔ̧a: ɛ́nɛ́ beka fe na.
GASA WAN, ɛnɛ nɛ kam-ta n'am e nɛ tɛ‘m.
Ɛnɛ hoka o wisɛn nɔ‘i wen gɔna-kita;
ɛnɛ ha̧a̧ ŋgai ha̧ wa wen ɗafa mɔ.
13Ɛnɛ ɔ sa̧a̧ nyɛmna,
ɛnɛ nyɛm mɛ zɔk ɗaŋmɔ nɛ yí‘nɛ́ na;
ɛnɛ nyɛm mɛ zɔk bɔnɛ nɛ bíí usi ha̧ ŋmaa na.
Wen ge s’ɛnɛ zɔk wi-ndela nɛ gbaayí‘nɛ́ ge?
Wen ge s’ɛnɛ duk nɛ oi nú
ŋgimbi nɛ wi-ɗaŋ de ŋgamɔ in wi nɛ gana a̧ nɛ dee demɔ ge?
14Ɛnɛ e o bíí hee zoro in o kokoɗo-mɔ
nɛ wi-zɔk-wa bo na ga, wen ge?
15O be Babilɔŋ kai nɛ wa
hee mɔ'ɔ nɛ‘i dak nɛ zoro nɛ gɛ̧i̧'ɛ ga;
wa kai wa nɛ yɔk
hui nɛ wa nɛ mbaksala,
ɓɛɛ o be Babilɔŋ yaa nɛ tortɛ, de nɛ nyɛŋɛ!
16Wa ɗafi nɛ sɔ̧ zu yɔk kɔ-wa,
dɔ nɛ fuu-nyama zu mbaksala
wen nɛ́ o mɔɔ nɔ‘i a̧ dee
ha̧ wa mɛ kpa de nyɔŋmɔ nyɔ́ŋ
zaŋ-wa sur nɛnɛ.
17Ɓɛɛ wa tɛ pi̧ kana yɔk,
kum nɛ o tugun bíí nɛ saka-yí kpoo nɛ kpoo nde?
Currently Selected:
HABAKUK 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.