ƐSDRAS 8
8
O bíí nɛ̀ pia ɗoŋ pii Jerusalɛm
1Nin o gasawi tɛ nutua kpɔk kpɔk nɛ̀ daŋa in am nɛ̀ Babilɔŋ tɛ ŋgimbi wan ko Artazɛrzɛs nɛ́ mɔɔ nɔ'ɔ:
2Mgbara o bezaŋ Pinas nɛ́ Gɛrsɔm; mgbara o bezaŋ Itamar nɛ́ Daniɛl; mgbara o bezaŋ David nɛ́ Hatus, 3bem ko Sɛkania. Mgbara o bezaŋ Parɔs nɛ́ Zakarii; o wiwii nɛ a̧a̧ in a̧ wa nɛ‘i tɔra nɛ́ gɔmŋmaa-nɛ-ɓu-mɔɔrɔ. 4Mgbara o bezaŋ Pahat-Mɔab nɛ́ Ɛlyɔnai bem ko Zɛraya; o wiwii nɛ a̧a̧ in a̧ nɛ́ gɔmŋmaa-yiitoo. 5Mgbara o bezaŋ Zatu nɛ́ Sɛkania bem ko Yahaziɛl; o wiwii nɛ a̧a̧ in a̧ nɛ́ gɔmŋmaa-taar. 6Mgbara o bezaŋ Adin nɛ́ Ebɛd bem ko Yɔnataŋ; o wiwii nɛ a̧a̧ in a̧ nɛ́ ɓu-mɔɔrɔ. 7Mgbara o bezaŋ Elam nɛ́ Yɛsaya bem ko Atalia; o wiwii nɛ a̧a̧ in a̧ nɛ́ ɓu-mɔɔrɔ-ɗoŋ-yiitoo. 8Mgbara o bezaŋ Sɛfatia nɛ́ Zɛbadia bem ko Mikaɛl; o wiwii nɛ a̧a̧ in a̧ nɛ́ ɓu-mɔɔrɔ-ɗoŋ-taar. 9Mgbara o bezaŋ Yɔab nɛ́ Obadia bem ko Yehiɛl; o wiwii nɛ a̧a̧ in nɛ́ gɔmŋmaa-yiitoo-nɛ-ɓu-zua-mɔɔrɔ-ɗoŋ-taar. 10Mgbara o bezaŋ Bani nɛ́ Sɛlɔmit bem ko Yosifia; o wiwii nɛ a̧a̧ in a̧ nɛ́ gɔmŋmaa-nɛ-ɓu. 11Mgbara o bezaŋ Bebai nɛ́ Zakarii bem ko Bebai; o wiwii nɛ a̧a̧ in a̧ nɛ́ ɓu-yiitoo-zua-mɔɔrɔ-ɗoŋ-taar. 12Mgbara o bezaŋ Asgad nɛ́ Yohanaŋ bem ko Hakataŋ; o wiwii nɛ a̧a̧ in a̧ nɛ́ gɔmŋmaa-nɛ-ɓu-mɔɔrɔ-ɗoŋ-kpɔk. 13Mgbara o bezaŋ Adɔnikam nɛ́ o be hɔ-ɗoŋ-aa a̧ kura; mɛ̀ nɛ́ Ɛlifɛlɛt in Yeiɛl ká bá nɛ̀ Sɛmaya, ɓɛɛ kɔ-wa, o bíí nɛ nɛ̀ɛ́ in wa, o wiwii nɛ́ ɓu-mɔɔrɔ-ɗoŋ-kpɔk. 14Mgbara o bezaŋ Bigvai nɛ́ Utai bem ko Zabud; ɓɛɛ o wiwii nɛ a̧a̧ in a̧ nɛ́ ɓu-mɔɔrɔ-ɗoŋ-yiitoo.
Ɛsdras kpaa o be Levii
15Mi mɔi̧a wa lɛŋ si ká̧ nana-yì nɛ fok si Ahava, ɓɛɛ ɛɛ ɔ hi̧i̧ zɛ taar. Mi zɔka o wi-ɗafi-sɔ̧ a̧a̧ sɛnɛ, o géé bíí a̧a̧ sɛnɛ mbɛt, ɓɛɛ ŋma be Levii bo na kóó kpɔk. 16Mi hoka o ŋma gasawi: Eliɛzɛr, Ariɛl, Sɛmaya, Ɛlnataŋ, Yarib, Ɛlnataŋ, Nataŋ, Zakarii ká bá nɛ̀ Mɛsulam, in o wi-usi-mɔ Yoyarib in Ɛlnataŋ. 17Mi toma wa nɛnɛ tɛ wannu Ido tɛ zika-nù Kasifia. Mi ee wen nú wa, wa a̧ nɛ́ɛ̀ ak a̧ in o nya-a̧ ndé, wa a̧ tom wi-de-tom kɔ̧ Tua ko Sɔ̧ k’ɛɛ tɛnɛ h’ɛ́ɛ́. 18Sɔ̧ k’ɛɛ guu er zu yɛ nɛ mbetɛ, ɓɛɛ Ido in o nya-a̧ tom Sɛrɛbia ŋma wi-iŋ-mgbara-mɔ mgbara o bezaŋ Mali, be-koo Levii bem ko Jakob tɛnɛ h’ɛ́ɛ́. A̧ tɛa in o bem kɔ̧-a̧ in o nya-a̧ mbɛt; wa lɛŋ nɛ́ wiwii ɓu-zua-mɔɔrɔ-ɗoŋ-taar. 19Hasabia tɛɛ mbɛt in Yɛsaya bezaŋ Mɛrari, in o nya-a̧ gú nɛ̀ o bem kɔ-wa mbɛt; o wiwii nɛ́ ɓu-yiitoo. 20O wi-de-tom kɔ̧ Tua ko Sɔ̧ nɛ̀ wannu David in o gasawi kɔ‘i aa so mɛ gbak o be Levii tɛɛ mbɛt; o wiwii nɛ́ bíí gɔmŋmaa-yiitoo-nɛ-ɓu-yiitoo, ɓɛɛ ɛɛ yɔr nin-wa lɛŋ.
Ɛsdras tɔ̧ɔ̧ ha̧ o bíí mɛ kɔfi Sɔ̧
21Mi tɔ̧ɔ̧ ha̧ o bíí ndé, ɛ̀ɛ̀ zím yì ka nana-yì Ahava hɛ̧ɛ̧ sɛ. Ɛ̀ɛ̀ mɔ́k see yɛ ti Sɔ̧ k’ɛɛ, ɛ̀ɛ̀ kɔ́fí a̧ mɛ pɛm yɛ in o bem k’ɛɛ gú nɛ̀ o mɔ k’ɛɛ lɛŋ tɛ nɔ̀ k’ɛɛ. 22Foe dee so'm mɛ ak wannu wen ha̧a̧ o wi-biro in nyaŋa mɛ bi biro zu yɛ nɛ yuwar in o wisɛn k’ɛɛ, wen mi baa tɔ̧ so ha̧ wannu ndé, Sɔ̧ k’ɛɛ a̧a̧ sɛnɛ nɛ̀ gú nɛ́ er zu bíí lɛŋ nɛ kii a̧, ɓɛɛ ŋga nyimsea kɔ̧-a̧ tik tik zu bíí lɛŋ nɛ e a̧ duk. 23Mɛ̀ nɛ́ hegɔ ɛ́ɛ́ zima yì, kɔfi nɛ̀ Sɔ̧ k’ɛɛ zu mɔ‘i, ɓɛɛ a̧ kpɛk kɔfa-sɔ̧ k’ɛɛ.
O ha̧a̧mɔ wen Tua ko Sɔ̧
24Nɛ mɔ'ɔ n'am hoka gasawi ɓu-zua-yiitoo mgbara o wi-ɗafi-sɔ̧, ɓɛɛ mi hok Sɛrɛbia in Hasabia ká bá nɛ̀ o ŋma nya-wa ɓu. 25Bu-mbɔi in lɔr gú nɛ̀ o nyɛk nɛ wannu in o gasawi kɔ‘i in o wi-de-tom kɔ‘i ká bá nɛ̀ o be Israɛl lɛŋ nɛ a̧a̧ sɛn Babilɔŋ ndɛma so wen Tua ko Sɔ̧, mi wea ha̧ wa. 26Mi wee kilo bu-mbɔi booro-ɓu-yiitoo in nyɛk nɛ‘i dee nɛ bu-mbɔi, kilo-a booro taar, lɔr tɛ kilo booro-taar; 27o nyɛk ɓu-yiitoo nɛ‘i dee nɛ lɔr tɛ kilo booro-taar-nɛ-gɔmŋmaa-naar in o mɔɔ-nɔ-mɔ nɛ‘i dee nɛ de toka ndɛrɛ nɛ gɛnɛ-a ɔ ŋgaya hee lɔr ga.
28Mi tɔ̧ɔ̧ ha̧ wa hee mɔ'ɔ ga: «Ɛ́nɛ́ nɛ́ bíí nɛ̀ duk nɛtɛ wen GASA WAN; o mɔɔ nɔ'ɔ nɛ́ mɔ ko Sɔ̧: ɓɛɛ bu-mbɔi in lɔr nɛ́ ha̧a̧mɔ nɛ ta-tɛ ha̧ GASA WAN Sɔ̧ ko o dáà k’ɛ́nɛ́. 29Ɛ̀nɛ̀ káí wa á nɛ̀ de-a hɔ ŋgimbi n’ɛnɛ tɛ we dita-wa ti o gasawi ko wi-ɗafi-sɔ̧, ti o be Levii, in ti o gasawi ko o be Israɛl sɛn Jerusalɛm kɔ̧ o gɔna-bɛr-tua ko GASA WAN.»
30O wi-ɗafi-sɔ̧ in o be Levii kaia bu-mbɔi in lɔr in o mɔɔ nɔ‘i nɛ wa wee lɛŋ‘i ha̧ wa mɛ kai si Jerusalɛm si kɔ̧ Tua ko Sɔ̧ k’ɛɛ.
Hɔa-a Jerusalɛm
31Tɛ ɓu-zua-yiitoo ɔɔ-zɛ tɛ kuti fio-zɛ, ɛɛ kura ká̧ nana-yì Ahava mɛ nɛ si Jerusalɛm. Sɔ̧ k’ɛɛ guu er zu yɛ batɛ wen o wisɛn k’ɛɛ in o wi-zuzu bí yɛ́ nɛ yuwar na. 32-33Ɛɛ hɔɔ Jerusalɛm ɓɛɛ ɛɛ ɔm tɛ yɛ hi̧i̧ zɛ taar. Tɛ naar ɔɔ-zɛ, ɛɛ wee bu-mbɔi, lɔr in o mɔɔ nɔ‘i sɛn kɔ̧ Tua ko Sɔ̧ k’ɛɛ, ɓɛɛ ɛɛ kai a er wi-ɗafi-sɔ̧ Mɛrɛmɔt bem ko Uria in Eleazar bem ko Pinas, ká o be Levii, Yozabad bem ko Josue in Nɔadia bem ko Binui a̧a̧ oi-aa mbɛt. 34Ɛɛ tɔra o mɔɔ nɔ‘i lɛŋ, ɛɛ wee lɛŋ, ɓɛɛ mɔ lɛŋ ya nɛ̀ dama-a. Nɛ mɔ'ɔ n’ɛɛ yɔra dɔka-a lɛŋ.
35Tɛ ŋgimbi'i o wi nɛ pia nɛ tɛ bara dɔɔ kpoo-sɔ̧ ha̧ Sɔ̧ ko Israɛl. Wa dɔɔ wiwii ndai ɓu-zua-yiitoo gɔn nɛ zu o be Israɛl lɛŋ; wa dɔɔ vala sami ɓu-mɔɔrɔ-ɗoŋ-naar-zua-mɔɔrɔ-ɗoŋ-kpɔk in be-sami ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-yiitoo ká bá nɛ̀ vala gbadua ɓu-zua-yiitoo wen gɔna zu ɗaŋmɔ. Wa dɔɔ mɔɔ nɔ‘i lɛŋ nɛ̀ kpoo-sɔ̧ ha̧ GASA WAN. 36Wa wee ɗoŋ wen ko wannu ha̧ o be-wan in ha̧ o gasawi zu nù nɛ war kur Efrat, ɓɛɛ o wi nɔ‘i yor ɗoŋ o be Israɛl tɛ tom Tua ko Sɔ̧.
Currently Selected:
ƐSDRAS 8: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.