YouVersion Logo
Search Icon

2 TIMOTEE 1

1
Fanamɔ
1Nɛ́ mi Paul, nɛ̀ duk nɛ́ betom ko Jesu Krist nyɛm nɛ̀ ɗoŋ mɔ nɛ̀ Sɔ̧ kɔ̧a̧ in nyɛm nɛ̀ ɗoŋ ha̧a̧nú zu duka-kpasa nɛ̀ a̧a̧ tɛ Jesu Krist, 2a̧ tom kalata’ɛ ha̧ bem kɔ‘m Timotee n'am kɔ̧ɔ̧ nyɛmna. Deemɔ nɛ̀ ta-tɛ, deako, in ga̧a̧mɔ ko Dáà k’ɛ́ɛ́ Sɔ̧ in Gasa Wan k’ɛ́ɛ́ Jesu Krist a̧ dúk in'nɛ̀ɛ́.#Tom 16.1
Dee osoko ha̧ Sɔ̧
3Mi de osoko ha̧ Sɔ̧, wan n'am de tom ha̧ a̧ nɛ̀ sa̧a̧-see, hee mɔ'ɔ nɛ̀ o zɔmdáa kɔ‘m dee so ga. Zɛ nɛ wese ɓɔnsɛnɛ, tɛ‘m bi ɗoŋ mɛ́ tɛ kɔfa Sɔ̧ kɔ‘m na. 4Kà tɛ‘m mbaŋ ɗoŋ miikɔ̧a̧ kɔ-mɛ, ɓɛɛ mi kɔ̧ɔ̧ nyɛmna mɛ́ zɔk mɛ́ woyo ha̧‘m mɛ́ kpa desee. 5Tɛ‘m mbaŋa ɗoŋ kpasa kɔ̧ɔ̧ɗɔɔwen nɛ̀ duk tɛ-mɛ, pɛrti kɔ̧ɔ̧ɗɔɔwen'i duka so tɛ́ zɔmnaa kɔ-mɛ Lois, in nàà kɔ-mɛ Eunis, ɓɛɛ mi iŋa nɛ̀ de-a'e, kale kpɔk kɔ̧ɔ̧ɗɔɔwen'i a̧a̧ tɛ-mɛ mbɛt.#Tom 16.1
Tɔ̧ɔ̧-mbɔrɔ wen De Mbe Wen
6Nɛ́ mɔ‘i s'am mbaŋ tɛ-mɛ nde, mɛ̀ de ha̧ ha̧a̧mɔ ko Sɔ̧ nɛ̀ a̧a̧ tɛ-mɛ ku̧u̧naŋ-a n'am ee nɛ̀ er zu-mɛ‘i mɛ́ duk kpasa siti. 7Bó nɛ́ Sɔ̧ ha̧a̧ nɛ́ taamɔ-kíì h’ɛ́ɛ́ na, ɓɛɛ a̧ ha̧a̧ nɛ́ Sa̧a̧ Ɔmi wan mɛ́ ha̧ ŋgai, kɔ̧ɔ̧mɔ, in kasa zu h’ɛ́ɛ́.
8Hegɔ ká foe de mɛ́ tɛ̀ dee sedaako wen Gasa Wen k’ɛ́ɛ́ na; ká foe de mɛ́ wen zu'm n'am duk nɛ́ wi-zɔɓɔ wen zu a̧ na mbɛt. Ɓɛɛ mɛ̀ zɔ́k nɛ́ bɔnɛ in am wen zu De Mbe Wen, e nɛ̀ ta nɛ̀ ŋgayamɔ ko Sɔ̧, 9nɛ̀ kpasa yɛ, ɓɛɛ sa yɛ nɛ̀ kpasa sa̧a̧ saa-sara, bó nɛ́ wen zu ŋma tom k’ɛ́ɛ́ na, ɓɛɛ nɛ́ wen zu ee-zu-mɔ in deemɔ nɛ̀ ta-tɛ kɔ̧-a̧. Deemɔ nɛ̀ ta-tɛ‘i, a̧ dee so h’ɛ́ɛ́ nɛ̀ ɗoŋ Jesu Krist nɛti ha̧ ŋgimbi lɛŋ, 10ɓɛɛ mɔ‘i hɔɔ gba̧a̧ kinii tɛ tɛa-a ko Wan-kpasi yɛ, Jesu Krist. Nɛ́ à̧ á̧ ɗaŋa fio yinɛ, ba nɛ̀ duka-kpasa in duka-a kpoo nɛ kpoo e tɛ̀ sa̧a̧mɔ nɛ̀ ɗoŋ De Mbe Wen.
11Sɔ̧ ea'm nɛ̀ mɔ-geŋa, betom, in wi-usi De Mbe Wen.#1 Tim 2.7 12Nɛ́ mɔ‘i s'am zɔk o bɔnɛ nɔ'ɔ, ɓɛɛ foe de'm na, wen mi iŋa wi n'am kɔ̧ɔ̧ ɗɔaa ha̧ a̧, ɓɛɛ mi e ta'e, a̧ a̧a̧ nɛ̀ ŋgai mɛ́ kasi mɔ n'aa ee er am hɔ tɛ wese'i. 13Mɛ̀ ndák nɛ́ ɗoŋ mgbák wen nɛ̀ mɛ́ zia nú‘m, duk nɛnɛ zaŋ kɔ̧ɔ̧ɗɔɔwen in kɔ̧ɔ̧mɔ nɛ̀ a̧a̧ tɛ Jesu Krist. 14Mɛ̀ kásí demɔ nɛ̀ a̧a̧ tɛ-mɛ‘i nɛ̀ ŋgai ko Sa̧a̧ Ɔmi nɛ̀ dúk tɛ yɛ.
Sedaako zu de gbama-yari
15Hee mɛ́ iŋa ga, o be Azii lɛŋ ea'm duk, ɓɛɛ Figɛl in Hɛrmɔgɛn a̧a̧ mgbara wa mbɛt. 16Sɔ̧'ɔ̧ dé ko ha̧ o bíí kɔ̧ tua ko Onesifɔr, wen foe de a̧ tɛ́ zɔɓɔ n'am duk sɛnɛ‘i na, ɓɛɛ ɓɔnsɛnɛ a̧ ha̧ nɛ́ nɔɔ-ŋgiɗi ha̧‘m. 17A̧ hɔɔ Rɔm hegɔ in kia'm nɛ̀ kpasa-a, ɓɛɛ a̧ kpa'm. 18Gasa Wan a̧ dé ha̧ a̧ mɛ́ kpa deako er Gasa Wan sɛn tɛ Wese'i. Ɓɛɛ ŋma bíí nɛ̀ iŋa o gbakamɔ lɛŋ n'aa gbaka nɛ̀‘m sɛn Efɛz hee mɛ́ ga bo na.

Currently Selected:

2 TIMOTEE 1: GB11DC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy