2 TESALONIK 1
1
Fanamɔ
1Nɛ́ mi Paul in Silas ká bá nɛ̀ Timotee a̧ tom kalata’ɛ ha̧ zuduk bíí ko Krist sɛn Tesalonik nɛ̀ ya nɛ́ o bíí ko Sɔ̧ Dáà k’ɛ́ɛ́ in Gasa Wan Jesu Krist.#Tom 17.1 2Deemɔ nɛ̀ ta-tɛ in ga̧a̧mɔ ko Sɔ̧ Dáà, in ko Gasa Wan Jesu Krist a̧ dúk in'nɛ̀ɛ́.
Nɔɔ-ŋgiɗi tɛ weamɔ
3Ɛ́ɛ́ tɛ́ de osoko ha̧ Sɔ̧ ɓɔnsɛnɛ wen zu'nɛ́, o nya-ɛɛ; ɔ dee h’ɛ́ɛ́ mɛ́ de hegɔ, wen kɔ̧ɔ̧ɗɔɔwen k’ɛ́nɛ́ nɛ́ nɛ̀ɛ́ siti nyɛmna, ɓɛɛ kɔ̧ɔ̧mɔ k’ɛ́nɛ́ in o ŋmaa gasi gasi siti sɛn mgbara'nɛ́ lɛŋ. 4Mɛ̀ nɛ́ wen hegɔ s’ɛ́ɛ́ dúk tɛ-ɛɛ nɛ̀ ɛ́nɛ́ mgbara o zuduk bíí ko Sɔ̧, wen zu nɔɔ-ŋgiɗi in kɔ̧ɔ̧ɗɔɔwen k’ɛ́nɛ́ zaŋ bɔnɛ in o weamɔ n’ɛnɛ nyɔŋ nin'nɛ́ zu-a'i lɛŋ.
5O bɔnɛ nɔ‘i usi nɛ́ gɔna-kita ko Sɔ̧ nɛ̀ yuwar-a; mɔɔ nɔ‘i hɔ zu'nɛ́ h’ɛ́nɛ́ mɛ́ nyɛm sɛnɛ wen Wan ko Sɔ̧, n’ɛnɛ zɔk bɔnɛ wen-aa'i. 6Nɛ̀ mbetɛ, nyɛma so kànà ha̧ Sɔ̧ mɛ́ nasi o wi-nasi'nɛ́, 7ɓɛɛ a̧ ha̧a̧ ɔma-tɛ h’ɛ́nɛ́, o wi nɛ̀ wa nasi'i, in yɛɛ kpɔk, ŋgimbi nɛ̀‘i tɛ́ zɔk Gasa Wan tɛ pia ɗoŋ nɛ̀ yiwese in o betom kɔ̧-a̧ zaŋ ŋgayamɔ kɔ̧-a̧. 8A̧ tɛ́ tɛ̀ zaŋ nyɛka leɓe-wee mɛ́ kifi er ha̧ o bíí nɛ̀ iŋ Sɔ̧ na, in nɛ̀ mbo zu tɛ De Mbe Wen ko Gasa Wan k’ɛ́ɛ́ Jesu na. 9Bɔnɛ kɔ-wa nɛ́ ɗaŋa wa nɛ̀ Gasa Wan tɛ́ ɗaŋ kpoo nɛ kpoo yinɛ yí-a nyɛi̧ nɛ̀ gasamɔ kɔ̧-a̧.#Es 2.10 10Ŋgimbi n'aa tɛ́ pii nɛ̀ ɗoŋ, wese'i, o sa̧a̧-bíí kɔ̧-a̧ tɛ́ gas'a, o bíí lɛŋ nɛ̀ kɔ̧ɔ̧ ɗɔaa ha̧ a̧ tɛ́ zɔn a̧; war k’ɛ́nɛ́, ɛ́nɛ́ kɔ̧ɔ̧ so ɗɔɔ sedaako k’ɛ́ɛ́ mbɛt.
11Mɛ̀ nɛ́ wen hegɔ s’ɛ́ɛ́ kɔfi Sɔ̧ ɓɔnsɛnɛ wen ha̧ Sɔ̧ k’ɛ́ɛ́ mɛ́ de h’ɛ́nɛ́ mɛ́ nyɛm yí sara n'aa saa nɛ̀ ɛ́nɛ́‘i, in tɛ́ ŋgayamɔ kɔ̧-a̧ a̧ a̧ dé h’ɛ́nɛ́ mɛ́ de demɔ lɛŋ n’ɛnɛ kɔ̧a̧, in a̧ a̧ dé ha̧ kɔ̧ɔ̧ɗɔɔwen k’ɛ́nɛ́ mɛ́ nɛ̀ siti mbɛt. 12Hegɔ, nin Gasa Wan k’ɛ́ɛ́ Jesu tɛ́ hur wen zu'nɛ́, ɓɛɛ nin'nɛ́ mbɛt tɛ hur wen zu a̧ nyɛm nɛ̀ ɗoŋ deemɔ nɛ̀ ta-tɛ ko Sɔ̧ k’ɛ́ɛ́ in Gasa Wan Jesu Krist.
Currently Selected:
2 TESALONIK 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.