2 JEAN 1
1
Fanamɔ
1Nɛ́ mí, Kuti-wi, a̧ tom kalata’ɛ ha̧ Okoo nɛ̀ Sɔ̧ hoka, in o bem kɔ̧-a̧ n'am kɔ̧ɔ̧ nyɛmna wen zu kpasawen.
Bó nɛ́ mi ɛ̀n'am a̧ kɔ̧ɔ̧‘nɛ́ ɓɛɛ na, ɓɛɛ o bíí lɛŋ nɛ̀ iŋa kpasawen mbɛt. 2Ɛ́ɛ́ kɔ̧ɔ̧‘nɛ́ wen zu kpasawen nɛ̀ a̧a̧ tɛ̀ yɛ, nɛ̀ tɛ́ duk in yɛ̀ɛ́ kpoo nɛ kpoo.
3Sɔ̧ Dáà in Bem kɔ‘i Jesu Krist a̧ há̧ mɔ nɛ̀ ta-tɛ in ga̧a̧mɔ h’ɛ́ɛ́, ɓɛɛ a̧ a̧ dé kó h’ɛ́ɛ́ mbɛt sɛn tɛ́ kpasawen in kɔ̧ɔ̧mɔ.
Kpasawen in kɔ̧ɔ̧mɔ
4Mi kpaa gasa desee wen mi zɔka o ŋma bem kɔ-mɛ ndak nɛ́ ɗoŋ kpasawen nyɛm nɛ̀ ɗoŋ heembea n’ɛ̀ɛ́ kpaa tɛ̀ Dáà. 5Kinii, Kóò'ɛ, bó nɛ́ mbe heembea a̧‘m yɔr ha̧ mɛ na; ɓɛɛ mɛ̀ nɛ́ heembea n’ɛ̀ɛ́ kpaa só nɛ̀ ku̧u̧naŋ-a mɛ̀ tɛnɛ: ɛ̀ɛ̀ kɔ̧́ ŋmaa in o ŋmaa.#Jn 13.34; 15.12,17 6Ɓɛɛ kɔ̧ɔ̧mɔ nɛ́ mɔ'ɔ: mɛ̀ nɛ́ wen h’ɛ́ɛ́ mɛ de mɔ nyɛm nɛ̀ ɗoŋ heembea ko Sɔ̧, ɓɛɛ heembea'i nɛ́ wan n’ɛ̀nɛ̀ zia nɛ̀ ku̧u̧naŋ-a mɛ̀ tɛnɛ, wen h’ɛ́nɛ́ mɛ́ ba nɛ́ yuwar'i.
7O wi-ɔr-wi pɛsa dam zaŋnu nɛ̀ dɔka-a, ɓɛɛ wa gbar kɔ̧ɔ̧ɗɔɔwen'e Jesu Krist tɛ̀ɛ́ tɛ́ mur-tɛ na. Wi-ɔr-wi a̧‘i, wi-we-zu nɛ̀ Krist nɛ́ mɔ‘i. 8Ɛ̀nɛ̀ zɔ́k tɛ‘nɛ́ wen ká mɔɔ-oi-tom k’ɛ́nɛ́#1.8 k’ɛ́nɛ́: ó ŋma wi-kpai-kalata tɔ̧a: k’ɛ́ɛ́. tɛ́ɛ̀ nyaŋ‘nɛ́, ɓɛɛ h’ɛ́nɛ́ mɛ́ kpa nɛ́ mɔɔ-oi-aa nɛ̀ dama-a.
9Kóó o ndé nɛ̀ yak zu usamɔ ko Krist, Sɔ̧ bó tɛ̀ wi’ɛi na, ɓɛɛ wi nɛ̀ duk ɓɔn tɛ̀ usamɔ‘i, wi’ɛi a̧a̧ nɛ̀ Dáà in Bem. 10Kà ŋma bíí tɛ́ tɛ‘nɛ́, n'aa bó nɛ̀ usamɔ'ɔ na, k’ɛ́nɛ́ zir a̧ tɛ̀ k’ɛ́nɛ́ na, k’ɛ́nɛ́ kpɛk a̧ na mbɛt. 11Wi nɛ̀ kpɛka a̧, pi̧i̧ tɛ̀ tɛ̀ ɗaŋ tom kɔ̧-a̧‘i.
12Mi a̧a̧ nɛ̀ dɔka mɔ mɛ́ yɔr h’ɛ́nɛ́, ɓɛɛ mi kɔ̧́ mɛ́ yɔr zaŋ kalata nɛ̀ yí-mɔɔ-yɔr-mɔ na, wen mi kɔ̧ɔ̧ mɛ́ nɛ̀ɛ́ tɔ̧ wen in'nɛ̀ɛ́ nɛ̀ tɛ‘m, h’ɛ́ɛ́ mɛ kpa kpasa desee.
13O bem ko Boko-nya-mɛ nɛ̀ Sɔ̧ hoka'i fana mɛ́.
Currently Selected:
2 JEAN 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.