2 KALATA NYƐRƐ 30
30
Ɗafa mɔ wen Paska
1-5Wannu Ezɛkias baa keta in o gasawi kɔ‘i sɛn Jerusalɛm in nù Juda, ɓɛɛ pi̧ tom mbaŋ nɛ̀ tɛ o be Efraim in Manase wen ha̧ wa mɛ gar pii kɔ̧ Tua ko GASA WAN Sɔ̧ ko Israɛl sɛn Jerusalɛm, wen dee gbaŋa Paska zɔn nɛ̀ a̧. Wa kpɛka wen ha̧ gbaŋa'i mɛ de tɛ yiitoo fio-zɛ. Wa kpa so yuwar mɛ de gbaŋa'i tɛ ŋgimbi-a na wen o dɔka wi-ɗafi-sɔ̧ ɗafi so war-tɛ lɛŋ na, in dukbíí mɔi̧ so sɛn Jerusalɛm na mbɛt. Wannu in giiwi zɔka'e taamɔ‘i ɔ dee, ɓɛɛ wa kɔ̧ ɗɔaa mɛ sa o be Israɛl nɛ̀ oi gun lɛŋ, ku̧u̧naŋ nɛ̀ ká̧-zan-mɛ́-ɗɔɔ hɔ nɛnɛ tɛ mɛ ŋgɔn wen gara-a pii Jerusalɛm mɛ de gbaŋa Paska hi̧i̧, wen nɛ́ o bíí tikiɗi ɓɛɛ a̧ ɗafa so mɔ nyɛm nɛ̀ ɗoŋ mɔ nɛ̀ Heembea tɔ̧a̧.#Tɔra-bíí 9.9-11 6O betom kaia o kalata nɛ̀ wannu in o gasawi yɔra, ɓɛɛ pɛsi dam nú Israɛl in Juda lɛŋ, tɔ̧ nɛ̀ nú tom’ɛ ha̧ o bíí:
«Ɛnɛ o be Israɛl nɛ̀ mɔ hɔɔ yɔɔ zu'nɛ́ wen nɛ̀ o be Asirii hu̧r'nɛ́ na’ɛ, ɛ̀nɛ̀ píí ɗoŋ tɛ GASA WAN Sɔ̧ ko Abraham, Sɔ̧ ko Izak in Sɔ̧ ko Jakob; hegɔ a̧ tɛ pii ɗoŋ tɛ‘nɛ́. 7K’ɛ́nɛ́ de mɔ hee mɛ̀ nɛ́ ko o dáà k’ɛ́nɛ́ in o zɔmwi k’ɛ́nɛ́ nɛ̀ dee so ŋgazu in GASA WAN Sɔ̧ ko o dáà kɔ-wa, ɓɛɛ ká a̧ de ha̧ o wisɛn mɛ mbɔli wa hee mɔ'ɔ n’ɛnɛ iŋa’ɛ ga na. 8Kinii, k’ɛ́nɛ́ de ŋgazu hee o dáà k’ɛ́nɛ́ ga na; ɛ̀nɛ̀ mbó zu ha̧ GASA WAN, ɛ̀nɛ̀ tɛ́ pii tɛ sa̧a̧-fara kɔ̧-a̧ n'aa ɗafa war-a ha̧ mɛ duk nɛ̀ sa̧a̧-a̧ ɓɔnsɛnɛ, ɓɛɛ ɛ̀nɛ̀ dé tom ha̧ GASA WAN Sɔ̧ k’ɛ́nɛ́; hegɔ, ŋga nyimsea kɔ̧-a̧ nɛ̀ a̧a̧ zu'nɛ́‘i tɛ ga̧. 9K’ɛ̀nɛ̀ píí ɗoŋ tɛ GASA WAN, o wi nɛ kaia so o nya'nɛ́ in o bem k’ɛ́nɛ́ nɛ̀ bara-biro yaknɛ tɛ de ko ha̧ wa, ɓɛɛ ee wa mɛ pii ɗoŋ tɛ nù'ɛ, wen GASA WAN Sɔ̧ k’ɛ́nɛ́ nɛ́ wi-e-ɗaŋmɔ in wan-de-ko, ɓɛɛ a̧ beka e'nɛ́ duk na, k’ɛ̀nɛ̀ nɛ́ pia ɗoŋ pii tɛ a̧.»
10O betom nɛ̀ɛ̀ dam tɛ ye nú Efraim in nú Manase kpɔk kpɔk lɛŋ hegɔ hɔ nɛnɛ nú Zabulɔŋ mɛ, ɓɛɛ o bíí mam wa, zɛkɛɗi nɛ̀ wen kɔ-wa. 11Mɔ kpɔk, wen'i yee tɛ o ŋma bíí tɛ zuduk ko Asɛr in ko Manase bá nɛ̀ ko Zabulɔŋ, ɓɛɛ o wi nɔ‘i gar pii Jerusalɛm. 12Sɛn nù Juda mbɛt, GASA WAN dee ha̧ o bíí mɛ mbo zu tɛ tɔ̧ɔ̧-wen ko wannu nɛ̀ o gasawi tɔ̧ wen-aa.
Ezɛkias dee gbaŋa Paska
13Bíí nɛ̀ dɔka-a mɔi̧a sɛn Jerusalɛm wen dee gbaŋa brɛt nɛ̀ hao bo sɛnɛ na tɛ yiitoo fio-zɛ. Dukbíí nɛ̀ dɔka-a mɔi̧a bó nɛ́ mɔɔ tɔ̧ na. 14Wa yee tɛ gbina o fara-ɗafi-sɔ̧ nɛ̀ a̧a̧ so sɛn Jerusalɛm, in o fara-dɔ-fuu-nyama, ɓɛɛ wa kai nɛ́ɛ̀ a kɔ̧ gboŋgo Sɛdrɔŋ. 15Wa dee gbaŋa Paska tɛ ɓu-zua-naar ɔɔ-zɛ tɛ yiitoo fio-zɛ. Wese'i, o wi-ɗafi-sɔ̧ in o be Levii nɛ̀ foe baa so, ɗafa war-tɛ, ɓɛɛ kai o kpoo-sɔ̧ tɛnɛ kɔ̧ Tua ko GASA WAN. 16Kóó o ndé duk nɛ́ fara-tom kɔ‘i nyɛm nɛ̀ ɗoŋ Heembea ko Moisɛ, bíí ko Sɔ̧. O wi-ɗafi-sɔ̧ gbai kɔ‘i nɛ́ tɔk saɗi nɛ̀ o be Levii ɗafi nɛ̀ sɔ̧ a zu fara-ɗafi-sɔ̧. 17Hee mɔ'ɔ nɛ̀ o bíí nɛ̀ dɔka-a mgbara giiwi ɗafi so war-tɛ-wa na ga, o be Levii gɔna o saɗi oi nú o wi nɔ‘i nɛ̀ nyɛm so mɛ de sa̧a̧ tom ko GASA WAN na'i. 18Dɔka o bíí mgbara o be Efraim, o be Manase, o bíí ko Isakar in o be Zabulɔŋ ɗafi so war-tɛ-wa na; mɔ kpɔk, wa nyɔŋa mɔ tɛ gbaŋa Paska, ɓɛɛ bó nɛ́ heembea usa hegɔ na. Zu mɔ‘i, Ezɛkias aia nú kɔfi nɛ̀ Sɔ̧ hee mɔ'ɔ ga: 19«GASA WAN Sɔ̧ ko o zɔmdáa k’ɛɛ; nyɛm nɛ̀ ɗoŋ dee demɔ k’ɛ́nɛ́, kóó nɛ̀ oi war-tɛ o wi nɔ'ɔ nɛ̀ sa̧ na’ɛ, ɛ̀nɛ̀ é ɗaŋmɔ kɔ-wa ha̧ wa, wen wa ha̧a̧ see-wa nɛ̀ oi-aa lɛŋ wen kia mɔ n’ɛnɛ kɔ̧a̧.» 20GASA WAN kpɛka akamɔ ko Ezɛkias, ɓɛɛ a̧ pi̧ bɔnɛ zu dukbíí na.
21O be Israɛl nɛ̀ a̧a̧ so Jerusalɛm dee gbaŋa brɛt nɛ̀ hao bo sɛnɛ na tɛ zɛ mɔɔrɔ-ɗoŋ-yiitoo nɛ̀ gasa desee, ɓɛɛ ko o be Levii in o wi-ɗafi-sɔ̧, wa zɔna GASA WAN dam ɗoŋ wese nɔ‘i lɛŋ nɛ̀ o mɔɔ-dɔm in o mɔɔ-mbɛr nɛ̀‘i dee so wen-aa.
Mbe gbaŋa
22O wen ko Ezɛkias baa see o be Levii lɛŋ nɛ̀ a̧a̧ so nɛ̀ desee zu GASA WAN, ɓɛɛ wa de gbaŋa siti tɛ zɛ mɔɔrɔ-ɗoŋ-yiitoo ha̧ nɛ̀ mɔ-gaŋmɔ, gasi nɛ̀ nin GASA WAN Sɔ̧ ko o dáà kɔ-wa. 23Giiwi nɛ̀ mɔi̧a kɔ̧ɔ̧ ɗɔaa mɛ de gbaŋa siti tɛ zɛ mɔɔrɔ-ɗoŋ-yiitoo woyo. Duka nɛ́ mɔɔ desee nyɛmna zaŋ zɛ nɔ‘i, 24wen wannu Ezɛkias ha̧a̧ so wiwii ndai booro in o sami booro-mɔɔrɔ-ɗoŋ-yiitoo ha̧ giiwi; ɓɛɛ o dita-bíí ha̧ kɔ‘i wiwii ndai booro mbɛt in o sami booro-ɓu. O dɔka o wi-ɗafi-sɔ̧ ɗafa war-tɛ mbɛt tɛ ŋgimbi'i. 25O bíí nù Juda lɛŋ kpaa desee gu nɛ̀ o wi-ɗafi-sɔ̧, o be Levii, in o bíí nɛ̀ tɛ̀ɛ́ nɛ̀ ká̧-zan-mɛ́-ŋgɔn wen gbaŋa'i, sɛka o ŋma bíí nɛ̀ pia nù Juda mbɛt. 26Gasa desee batɛ duka nɛ́ ko o bíí Jerusalɛm, wen sɛn ɗoŋ ŋgimbi ko Salomɔŋ, bem ko David, wannu Israɛl, pɛrti gbaŋa hegɔ de sɛn Jerusalɛm na. 27Ŋgimbi nɛ̀ mɔ kaɗa lɛŋ kaɗi, o wi-ɗafi-sɔ̧, o be Levii kura ŋgɔn, ɓɛɛ tok de yoŋgo zu dukbíí. Kɔfa-sɔ̧ kɔ-wa daŋa hɔ yiwese tɛ sa̧a̧-fara ko GASA WAN.
Currently Selected:
2 KALATA NYƐRƐ 30: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.