2 KALATA NYƐRƐ 28
28
Ahaz wannu Juda
(Zɔk 2 Wan 16.1-6)
1Ahaz a̧a̧ so nɛ̀ pɛ ɓu-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-zua-mɔɔrɔ-ɗoŋ-kpɔk sɛn Jerusalɛm. A̧ de mɔ nɛ̀ yuwar-a ti GASA WAN hee mɔ'ɔ nɛ̀ dáà kɔ̧-a̧ David dee so ga na. 2A̧ zɔka nɛ́ ɗoŋ deemɔ ko o wannu Israɛl, ɓɛɛ a̧ mbo bu-mbɔi dui nɛ̀ o sɔ̧ Bal. 3A̧ nɛ̀ tɛ-a dɔɔ fuu-nyama kɔ̧ ɗɔŋgɔ Hinɔm, dɔ nɛ̀ o bem kɔ̧-a̧ nyɛm nɛ̀ ɗoŋ o ɗaŋmɔ ko o tugun bíí nɛ̀ GASA WAN ndaka so yinɛ ti o be Israɛl. 4A̧ dɔɔ o kpoo-sɔ̧, ha̧ nɛ̀ fuu-nyama zu o fara-ɗafi géé-sɔ̧, zu o kusa-fara in sɛn ti ɗɔɔ o da̧a̧ wa̧a̧-te mbɛt. 5GASA WAN Sɔ̧ kɔ̧-a̧ ee a̧ er wannu Aram; wa bìí a̧, ɓɛɛ wa kai o wi-biro kɔ̧-a̧ nɛ̀ bara-biro nɛ̀ dɔka-a yaknɛ si Damas. Wannu Israɛl baa kiitɛ Ahaz nɛ̀ see zu mbɛt, ɓɛɛ ɗaŋ mɔ tɛ nù kɔ̧-a̧ nɛ̀ dɔka-a.#Es 7.1
Biro in o be Aram ká bá nɛ̀ o be Israɛl
6Pɛka bem ko Rɛmalia nduka o bíí booro-gɔmŋmaa-nɛ-booro-ɓu-yiitoo kpɔk kale wese. O wi nɔ‘i nɛ́ o be Juda; wa lɛŋ nɛ́ o gasa wi-biro. Mɔ‘i dee hegɔ wen nɛ̀ wa ee so GASA WAN Sɔ̧ ko o dáà kɔ-wa duk. 7Ɓɛɛ nɛ̀ ko Zikri ŋga wi-biro Efraim, kɔ̧-a̧, a̧ gbɛɛ Masɛya bem ko wannu Azrikam, gasa wi-duk-zu tua ko wannu in Ɛlkana mgbák wi nɛ̀ ndaɗi in wannu. 8O be Israɛl kaia o okoo booro-gɔmŋmaa-yiitoo gú nɛ̀ o obem sɛn nù Juda yaknɛ. Wa kaia o mɔɔ-oi-biro nɛ̀ dɔka-a nyɛmna sinɛ ɗoŋ si Samarii.
Odɛd, wi-tɔ̧-wen oi nú Sɔ̧
9Ŋma wi-tɔ̧-wen oi nú Sɔ̧ a̧a̧ so sɛn Samarii, nin-a nɛ́ Odɛd. A̧ wee ti o wi-biro Israɛl nɛ̀ pii nɛ̀ Samarii, ɓɛɛ a̧ tɔ̧: «Ɛ̀nɛ̀ zɔ̀k, tɛ tu̧u̧-see ko GASA WAN Sɔ̧ ko o dáà k’ɛ́nɛ́ zu Juda, a̧ aa wa er'nɛ́, ɓɛɛ ɛ́nɛ́ kum wa hegɔ nyɛrɛ-a hur hɔ yiwese mɛ. 10Nɛ́ mɔ'ɔ nɛ̀ kinii, ɛnɛ kɔ̧ɔ̧ mɛ e o wiwii in o okoo Juda in Jerusalɛm nɛ bara! K’ɛ̀nɛ̀ de hegɔ, bo nɛ́ ɛ́nɛ́ dak nɛ ɗaŋmɔ pi̧ zu'nɛ́ sɛn ti GASA WAN Sɔ̧ k’ɛ́nɛ́ na nde? 11Ɛ̀nɛ̀ zíí wen nú‘m, ɓɛɛ ɛ̀nɛ̀ tóm o bara-biro n’ɛnɛ kaia sinɛ ɗoŋ, wen ká gasa nyimsea ko GASA WAN tɛ́ɛ̀ tik zu'nɛ́.»
12O ŋma gasawi zu o bezaŋ Efraim kɔ̧ɔ̧ ɗɔɔ wen'i; duka nɛ́ Azaria bem ko Yohanaŋ, Berekia bem ko Mɛsilɛmɔt, Yɛhiskia bem ko Salum in Amasa bem ko Hadlai; wa tɔ̧ɔ̧ ha̧ o wi nɛ̀ pia nɛ̀ fara-biro hee mɔ'ɔ ga: 13«K’ɛ́nɛ́ kai o bara-biro piinɛ hɛ̧ɛ̧ na, wen k’ɛɛ tɛɛ ya nɛ́ o wi de gasa ɗaŋmɔ ti GASA WAN. K’ɛ́nɛ́ pi̧ ŋma mbe ɗaŋmɔ zu o wan mɛ ti na, wen ɗaŋmɔ k’ɛɛ ɔ dita, ɓɛɛ nyimsea ko GASA WAN a̧a̧ see zu Israɛl.» 14O wi-biro ee o bara-biro in o mɔɔ-oi-biro nɛ̀ wa kaia so duk ɓɔn yí o gasawi in gíí o be Israɛl nɛ̀ mɔi̧a lɛŋ. 15Hegɔ, o bíí nɛ̀ wa hoka wen mɔ‘i, ha̧a̧ nɔɔ-ŋgiɗi ha̧ o bara-biro. Wa kaia o laa nɛ̀ wa kpaa mgbara mɔɔ-oi-biro in o ndárà a tɛ o bara-biro nɛ̀ ya so nɛ̀ géé tɛ in géé naŋ; wa nyɔŋa mɔ, nɔ nɛ̀ mɔ, wa dee nyina ha̧ o bíí nɛ̀ baa so da̧i̧, wa kaia o wi-kum a zu o tuifuu, ɓɛɛ wa mgbɔ wa sinɛ e Jeriko, ye-ndɛŋgɛ katɛ o nya-wa, ɓɛɛ o wi nɔ‘i si ɗoŋ Samarii.
Ahaz aka gbakamɔ er o be Asirii
(Zɔk 2 Wan 16.7-20)
16Ŋgimbi'i, wannu Ahaz pi̧i̧ tom ha̧ o be Asirii mɛ tɛ̀ɛ́ gbak wi 17wen nɛ̀ o be Edɔm pia so ɗoŋ, tɛ́ɛ̀ bi Juda woyo, ɓɛɛ kai o bara-biro yaknɛ. 18O be Filistii mbɛt tɛɛ hur o ye mɛ Hira-nù in o ye mɛ si ká̧-zan-mɛ́-ɗɔɔ tɛ nù Juda. Wa baa so Bɛt-Sɛmɛs, Ayalɔŋ, Gederot, Soko, Timna, Gimzo gú nɛ̀ o be ye nɛ̀ zíí nɛ̀ wa lɛŋ, ɓɛɛ wa ɔ sɛnɛ. 19GASA WAN pi̧i̧ búù zu nù Juda wen zu Ahaz wannu Israɛl nɛ ira o bíí kɔ‘i mɛ e GASA WAN duk de nɛnɛ ha̧ wa mɛ de ɗaŋmɔ ti a̧. 20Wannu Asirii Tilgat-Pilnɛzɛr, wi nɛ̀ tɛɛ so pii tɛ a̧ mɛ gbak a̧, tɛ̀ɛ̀ kpé nɛ́ a̧ e nù. 21Ahaz kaia so ŋma o mbɔi Tua ko GASA WAN in ko wannu bá nɛ̀ ko o gasawi sí nɛ̀ mɔɔ-ha̧ wannu Asirii, ɓɛɛ ha̧a̧mɔ‘i gbak a̧ na.
O ɗaŋmɔ ko Ahaz
22Zu-a nɛ̀ wa kpee nɛ̀ Ahaz e nù‘i, a̧ e dee ɗaŋmɔ ti GASA WAN duk na. 23A̧ duka tɛ ɗafa o géé-sɔ̧ Damas nɛ̀ dea ha̧ wa mɛ gan so a̧ tɛ biro, ɓɛɛ a̧ tɔ̧: «O sɔ̧ ko o wannu Aram gbaka wa ɓɛɛ wa gbin biro; hegɔ mi tɛ ɗafi sɔ̧ ha̧ wa, wen ha̧ wa mɛ tɛ̀ɛ́ gbak am.» 24Ahaz mɔi̧a o sa̧a̧ nyɛk kɔ̧ Tua ko Sɔ̧, ɓɛɛ a̧ to ɗaŋ lɛŋ; a̧ mana o nutua sa̧a̧-fara kɔ̧ Tua ko GASA WAN, ɓɛɛ a̧ mbo o fara-ɗafi-sɔ̧ sɛn o sasa-war Jerusalɛm lɛŋ. 25A̧ mboo o fara-ɗafi-sɔ̧ dam saaye nù Juda lɛŋ, wen dɔɔ fuu-nyama ha̧ o gɔni sɔ̧. Tɛ mɔ‘i, a̧ tu̧u̧ see GASA WAN Sɔ̧ ko o dáà kɔ̧-a̧.
26Oi o nyɛrɛ tom in o oi deemɔ ko Ahaz lɛŋ, tɛ ku̧u̧naŋ-a hɔ sɔŋkur-aa yɔra zaŋ Kalata ko o wannu Juda in Israɛl. 27Ahaz fea si ɗoŋ o dáà kɔ‘i, ɓɛɛ wa gun a̧ sɛn saaye Jerusalɛm; mɔ kpɔk, wa gun a̧ kɔ̧ fio ko o wannu Israɛl na. Bem kɔ̧-a̧ Ezɛkias ɔɔ wan oi-aa.#Es 14.28
Currently Selected:
2 KALATA NYƐRƐ 28: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.