2 KALATA NYƐRƐ 25
25
Amasia wannu Juda
(Zɔk 2 Wan 14.1-7)
1Amasia yee wan ŋgimbi n'aa a̧a̧ so nɛ̀ pɛ ɓu-yiitoo ɓɛɛ a̧ ɔ wan sɛn Jerusalɛm pɛ ɓu-yiitoo-zua-mɔɔrɔ-ɗoŋ-naar. Nin nàà kɔ̧-a̧ so nɛ́ Yoadan zɔŋa Jerusalɛm. 2A̧ dee mɔ nɛ̀ yuwar-a ti GASA WAN, ɓɛɛ bo nɛ́ nɛ̀ see-aa lɛŋ na. 3Ŋgimbi nɛ̀ wan nɔɔ er-a nɛ̀ de-a kaɗi, a̧ gbɛɛ o wi-de-tom kɔ̧-a̧, o wan nɛ̀ gbɛɛ so dáà kɔ̧-a̧ wannu Jɔas. 4Mɔ kpɔk, a̧ gbɛ o bem kɔ-wa na, nyɛm nɛ̀ ɗoŋ mɔ nɛ̀ yɔra so zaŋ kalata Heembea ko Moisɛ, wen GASA WAN tɔ̧ɔ̧ so'e ndé: «Dáà beka fe oi nú bem na, in bem beka fe oi nú dáà na mbɛt, ɓɛɛ kóó o ndé tɛ fe nɛ́ fio ɗaŋmɔ kɔ‘i.»#Wee-ɗoŋ-he 24.16
Biro in Edɔm
(Zɔk 2 Wan 14.7)
5Amasia mɔi̧a bíí tɛ nù kɔ‘i, ɓɛɛ a̧ e o wan nyɛm nɛ̀ ɗoŋ pɛ́r-nam zu o bíí booro in bíí gɔmŋmaa, zaŋnu Juda in nú Bɛnjamin lɛŋ. A̧ tɔra o wi nɛ̀ a̧a̧ nɛ̀ pɛ ɓu-yiitoo in o wan nɛ̀ gana lɛŋ: wa kpaa o bíí booro-gɔmŋmaa-taar nɛ̀ iŋa bíí biro nɛ sɛɛ in ŋgee. 6Ɓɛɛ a̧ yoɓi kilo sede booro-taar, kai nɛ o ŋga wi-biro booro-gɔmŋmaa sɛn Israɛl mbɛt. 7Ŋma wi-tɔ̧-wen oi nú Sɔ̧ tɛ̀ɛ̀ tɔ̧ ha̧ a̧: «Wannu, k’ɛ́nɛ́ e ha̧ o wi-biro Israɛl mɛ nɛ̀ in'nɛ̀ɛ́ na, wen GASA WAN yor ɗoŋ o be si ká̧-zan-mɛ́-ŋgɔn na! 8Wen kà wa nɛ in'nɛ̀ɛ́, kóó ɛnɛ ŋgaia so tɛ biro hee ge, Sɔ̧ tɛ fo'nɛ́ pi̧ er o wisɛn k’ɛ́nɛ́, wen mɛ̀ nɛ́ Sɔ̧ kpɔk ɓɛɛ a̧ de ha'i mɛ gbin biro, kóó ha̧ biro mɛ ba wi.»
9Amasia aka wi-tɔ̧-wen oi nú Sɔ̧‘i hee mɔ'ɔ ga: «Ɓɛɛ mi tɛ de hee ge nɛ̀ zɔm kɔya sede n'am ha̧a̧ ha̧ gíí wi-biro nɔ'ɔ ge?»
Wi-tɔ̧-wen oi nú Sɔ̧ kifa nú: «GASA WAN a̧a̧ nɛ̀ yuwar mɛ ha̧ mbe-a ha̧ mɛ gan woyo.» 10Hegɔ Amasia foo o wi-biro nɛ̀ tɛ̀ɛ́ nɛ̀ ká̧-zan-mɛ́-ŋgɔn sinɛ ɗoŋ sɛn nù kɔ-wa. O wi nɔ‘i kura si ɗoŋ ye kɔ‘i nɛ̀ zɔm nyimsea kɔ̧ see-wa zu nù Juda.
11Ŋgimbi nɛ̀ Amasia kpaa ŋgai nɛ̀ de-a kaɗi, a̧ kaia o gíí wi-biro kɔ̧-a̧ si kɔ̧ ɗɔŋgɔ Tɔŋ, ɓɛɛ a̧ bi o wi Sɛir, gbɛ wa tɛ bíí booro-ɓu. 12O be Levii nù Juda kaia bíí booro-ɓu nɛ̀ kpasa, ɓɛɛ kai wi nɔ‘i si zu kaya; wa ira wa nɛ̀ zu kaya ŋgɔn mɛ a nù, ɓɛɛ o wi nɔ‘i gbin kɛsɛ-kɛsɛ.
13O wi-biro nɛ̀ Amasia dora so ká nɛ́ biro in wi'i na tika zu o ye Juda, ku̧u̧naŋ-a nɛ̀ Samarii hɔ nɛnɛ Bɛt-Hɔrɔŋ; wa gbɛɛ bíí booro-taar, ɓɛɛ wa kai mɔɔ-oi-biro nɛ̀ dɔka-a.
Jɔas, wannu Israɛl bìí Amasia
14Ŋgimbi nɛ̀ Amasia pia ɗoŋ nɛ̀ tɛ bíí o be Edɔm, a̧ kaia o géé-sɔ̧ ko o be Sɛir piinɛ, ɓɛɛ a̧ ɗafi nɛ̀ sɔ̧ kɔ̧-a̧; a̧ gasa wa, ɓɛɛ a̧ dɔ fuu-nyama ha̧ wa mbɛt. 15Tɛ mɔ‘i, see GASA WAN kura zu a̧, ɓɛɛ tom ŋma wi-tɔ̧-wen oi nú-wi mɛ tɔ̧ ha̧ a̧: «Mɛ gasi o sɔ̧ nɛ̀ nyɛm so mɛ gbo o bíí kɔ-wa er mɛ na wen ge?»
16A̧ tɛ kaɗi tɔ̧ɔ̧-wen'i hɔ̧ɔ̧ na, ɓɛɛ Amasia gɔn wen nú-a tɔ̧ nɛnɛ: «Nɛ́ o a̧ ee mɛ nɛ wi-tɔ̧-mbɔrɔ ha̧ wannu o? Kà mɛ nɛ́ kɔ̧ɔ̧ ha'i mɛ de ɗaŋmɔ in mɛɛ na, mɛ̀ kpé nú mɛ tɛ wen'i!»
Wi-tɔ̧-wen oi nú Sɔ̧ gɔna wen kɔ‘i, ɓɛɛ tɔ̧: «Mi iŋa'e, Sɔ̧ kɔ̧ɔ̧ mɛ gbɛ mɛ, wen nɛ̀ mɛ bɛ̧ɛ̧ zia wen kɔ‘m, ɓɛɛ mɛ de mɔ hegɔ!»
Biro in Israɛl
(Zɔk 2 Wan 14.8-20)
17Amasia zia nɛ́ o ŋma mbɔrɔ, ɓɛɛ tom mɔ si zu Jɔas wannu Israɛl, bem ko Jɔakas bezaŋ Jɛhu hee mɔ'ɔ ga: «Mɛ̀ tɛ́, ɛ̀ɛ̀ bí ŋmaa.» 18Jɔas wannu Israɛl kifa nú ɓɛɛ tom si zu Amasia, wannu Juda mbɛt hegɔ: «Tɛn-ga̧a̧ Libaŋ toma ha̧ gbatui Libaŋ‘e: ‹Mɛ̀ há̧ boko-bem kɔ-mɛ nɛ̀ kóò ha̧ bem kɔ‘m!› Ɓɛɛ ŋma saɗi zaŋbɛɛ nɛ̀ a̧a̧ Libaŋ ɓir yak hi̧i̧, i̧si̧ tɛn-ga̧a̧‘i e nù. 19Mɛ‘e ndé, wi gana o be Edɔm, ɓɛɛ mɛ ŋmaŋ nɛ tɛ-mɛ zɔn nɛ̀ tɛ-mɛ. Mɔ kpɔk, gana so mɛ̀ dúk tɛ kɔ-mɛ! Wen ge mɛ kɔ̧ɔ̧ mɛ ye gee tum biro ha̧ mɛ mɛ fe in o be Juda lɛŋ ge?»
20Amasia zii wen kɔ̧-a̧ na, wen mɔ‘i tɛ nɛ̀ tɛ Sɔ̧ nɛ̀ kɔ̧ɔ̧ so mɛ fo a̧ in o wi-biro kɔ̧-a̧ pi̧ er wi nɔ‘i, wen zu gasa o géé-sɔ̧ ko o be Edɔm nɛ̀ wa gasa. 21Jɔas wannu Israɛl daŋa, ɓɛɛ o wi-biro kɔ̧-a̧ in ko Amasia ba biro dúk nɛ̀ ŋmaa sɛn Bɛt-Sɛmɛs nù Juda. 22Wa bìí ŋmaa ɓɛɛ o wi-biro ko Jɔas wannu Israɛl gbin biro ti o wi-biro ko Juda. Hegɔ o wi-biro Juda pɛsa, kóó o ndé ma yi si tɛ kɔ‘i. 23Jɔas wannu Israɛl baa Amasia wannu Juda, bem ko Jɔas, be-koo Ahazia nɛ̀ bara-biro sɛn hi̧i̧, ɓɛɛ a̧ ba a̧ pii ɗoŋ sɛn Jerusalɛm. A̧ tɛɛ gbin garo ye Jerusalɛm a nù, nyɛi̧a ɗoŋ-aa nɛ́ mɛtrɛ gɔmŋmaa-yiitoo, ku̧u̧naŋ-a nɛ̀ nú garo ko Efraim hɔ nɛnɛ nú garo mɛ mgbii-aa. 24A̧ kaia lɔr in o bu-mbɔi ká bá nɛ̀ o mɔ nɛ̀ yaa so sɛn kɔ̧ Tua ko Sɔ̧ nɛ̀ Obɛd-Edɔm duka so pɛm, o mbɔi-tua ko wannu in o ŋma bíí, ɓɛɛ a̧ si sɛn Samarii.
25Amasia bem ko Jɔas wannu Juda duka zaŋnu pɛ ɓu-zua-mɔɔrɔ woyo ɗoŋ fio ko Jɔas bem ko Jɔakas, wannu Israɛl. 26Oi o tom ko Amasia tɛ ku̧u̧naŋ-a hɔ sɔŋkur-aa yɔra zaŋ Kalata ko o wannu Juda in Israɛl. 27Ku̧u̧naŋ-a nɛ̀ ŋgimbi nɛ̀ Amasia ee nɛ̀ nɛ́ɛ́ ɗoŋ GASA WAN duk, wa baa ɗaŋ keta zu a̧ sɛn Jerusalɛm, ɓɛɛ a̧ yu mɔ yak si Lakis. Wa toma o bíí ndak ɗoŋ-aa si Lakis, ɓɛɛ wa gbɛ a̧ hi̧i̧. 28Wa baa wɔr-aa nɛ̀ keekee-nyaŋa nɛ́ɛ̀ gun in o dáà kɔ̧-a̧ sɛn tɛ ŋma ye nù Juda.
Currently Selected:
2 KALATA NYƐRƐ 25: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.