2 KALATA NYƐRƐ 24
24
Jɔas wannu Juda
(Zɔk 2 Wan 12.1-17)
1Jɔas a̧a̧ so nɛ̀ pɛ mɔɔrɔ-ɗoŋ-yiitoo, ŋgimbi n'aa ɔɔ nɛ̀ wan; ɓɛɛ a̧ ɔ wan sɛn Jerusalɛm pɛ ɓu-naar. Nin nàà kɔ̧-a̧ so nɛ́ Sibia zɔŋa Bɛrseba. 2Jɔas dee mɔ nɛ̀ yuwar-a ti GASA WAN ŋgimbi nɛ̀ wi-ɗafi-sɔ̧ Yoyada ɓɔna nɛ̀ yí. 3Yoyada baa kóò yiitoo ha̧ Jɔas, ɓɛɛ wa ko o be-wiwii in o be-okoo ha̧ a̧.
4Ɗoŋ mɔ‘i, Jɔas taa mɔ mɛ ɗafi Tua ko GASA WAN. 5A̧ mɔi̧a o wi-ɗafi-sɔ̧ in o be Levii, ɓɛɛ a̧ tɔ̧ ha̧ wa: «Ɛ̀nɛ̀ nɛ́ dam ye nù Juda, ɛ̀nɛ̀ káí mbɔi sɛn er o be Israɛl wen ɗafa Tua ko Sɔ̧ k’ɛɛ ti pɛ lɛŋ; ɛ̀nɛ̀ dé mɔ‘i nɛ haya-a!» O be Levii de mɔ‘i nɛ̀ haya-a na; 6hegɔ, wannu saa gasa wan-ɗafi-sɔ̧ Yoyada, ɓɛɛ tɔ̧ ha̧ a̧: «Wen ge mɛ yor ɗoŋ o be Levii nɛ̀ ŋgaya-a ha̧ wa mɛ kai garama nɛ̀ Moisɛ wi-de-tom ko Sɔ̧ in o be Israɛl baa ha̧ so nú zu-a tɛnɛ nɛ̀ Juda in Jerusalɛm, wen Tua ko GASA WAN na ge?»#Gboa-a 30.11-16
7Wi-ɗaŋ-mɔ Atalii in o bíí kɔ‘i ee so Tua ko Sɔ̧ ɗaŋ lɛŋ. Wa kaia so o sa̧a̧ nyɛk lɛŋ kɔ̧ Tua ko GASA WAN ɗafi nɛ̀ sɔ̧ Bal mbɛt.
8Wannu tɔ̧ɔ̧ ha̧ wa mɛ de ŋma kuɓa-a-mɔ e sɛn ká̧ nú Tua ko GASA WAN nɛ zan, 9in ha̧ wa mɛ he mbéá dam nù Juda in Jerusalɛm wen ha̧ o bíí mɛ kai garama nɛ̀ Moisɛ, wi-de-tom ko Sɔ̧ baa tɔ̧ so nɛnɛ zu Israɛl sɛn ŋga-gbárà tɛnɛ ha̧ GASA WAN. 10O be-wan in o bíí lɛŋ kpaa desee, ɓɛɛ wa kai mbɔi tɛnɛ dun kɔ̧ kuɓa-a-mɔ. 11Ŋgimbi nɛ̀ o be Levii tɛ̀ɛ́ ba nɛ̀ kuɓa-a-mbɔ‘i nɛnɛ ha̧ wannu mɛ hu̧i̧, wa kpaa mbɔi kɔ̧ a̧ nɛ̀ dɔka-a; wi-duk katɛ wannu in wi-tɔr-sede ko gasa wan-ɗafi-sɔ̧ tɛ̀ɛ̀ gbai mbɔi'i, ɓɛɛ ba kuɓa-a-mbɔi'i piinɛ ɗoŋ e oi-aa. Wa dee hegɔ wese lɛŋ, ɓɛɛ wa kpa mbɔi nɛ̀ dɔka-a.
12Wannu in Yoyada ha̧a̧ mbɔi'i ha̧ wi-duk-zu tom Tua ko GASA WAN, ɓɛɛ wa yoɓi nɛ̀ o wi-gbɛr-te, o wi-sɛk-ta in o wi-de-tom ɗafa Tua ko GASA WAN gú nɛ̀ o wi-iŋ-tom-boi in tom-ndɛrɛ wen ɗafa ɗoŋ Tua'i mbɛt. 13O wi-de-tom nɔ‘i ku̧u̧ naŋ dee tom kɔ‘i, ɓɛɛ tom'i nɛ́ nɛ̀ haya-a kɔ̧ er-wa. Wa ɗafa Tua ko Sɔ̧, ɓɛɛ tɛ́ɛ̀ duk nɛ ŋgaya-a woyo. 14Ŋgimbi nɛ̀ wa kaɗa tom'i kaɗi, wa kaia oi sede piinɛ a ti wannu in wi-ɗafi-sɔ̧ Yoyada, ɓɛɛ wa de nɛ̀ o nyɛk wen Tua ko GASA WAN: o nyɛk wen aa mɔ in wen dɔɔ kpoo-sɔ̧; o nyɛk nɛtɛ nɛtɛ in o wan nɛ‘i dee nɛ̀ lɔr in bu-mbɔi mbɛt. Hegɔ wa dɔɔ kpoo-sɔ̧ wese ɓɔnsɛnɛ ŋgimbi ko Yoyada hɔ wese fio kɔ̧-a̧.
Yuwar tom ko Jɔas kpaia
15Yoyada sɔka, ɓɛɛ wɔ duka-a zaŋnu gbɛ a̧ ɓɔna, hegɔ a̧ fea, ɓɛɛ ká a̧ a̧a̧ nɛ̀ pɛ gɔmŋmaa-nɛ-ɓu-taar. 16Wa guna a̧ sɛn ye ko David katɛ o wannu wen a̧ dee demɔ nyɛmna sɛn Israɛl in ha̧ Sɔ̧, ká bá nɛ̀ Tua ko Sɔ̧.
17Ɗoŋ fio ko Yoyada, o wanye sɛn nù Juda lɛŋ gara tɛ́ɛ̀ fan wannu Jɔas zɔn nɛ̀ a̧, ɓɛɛ a̧ kpɛk wen kɔ-wa.
18Duka, ɓɛɛ o be Israɛl e Tua ko GASA WAN Sɔ̧ ko dáà kɔ-wa duk, ɓɛɛ wa ku̧naŋ gasa o te in o géé-sɔ̧. Hegɔ, nyimsea ko Sɔ̧ tika zu nù Juda in Jerusalɛm, wen zu dee ɗaŋmɔ‘i. 19GASA WAN toma o wi-tɔ̧-wen oi nú-wi pii mgbara wa, wen ha̧ wa mɛ kii yuwar wen mgbɔɔ wa siɗoŋ tɛ a̧, ɓɛɛ wa kɔ̧ mɛ zii wen nú-wa na. 20Ɔmi ko Sɔ̧ yee tɛ wi-ɗafi-sɔ̧ Zakarii bem ko Yoyada; see-aa kura zu dukbíí, ɓɛɛ a̧ tɔ̧ ha̧ wa: «Sɔ̧‘e ndé, wen ge ɛnɛ ee heembea kɔ‘m duk ge? Ɛnɛ beka kpa mɔɔ-oi na. Hee mɔ'ɔ n’ɛnɛ ea'm duk ga, mi mbɛt, mi ee'nɛ́ duk!»#Mt 23.35; Lk 11.51
21Wa baa ɗaŋ keta zu Zakarii, ɓɛɛ wannu tɔ̧ ha̧ wa mɛ yo a̧ nɛ̀ ta gbɛ, ɓɛɛ wa gbɛ a̧ sɛn nú zala Tua ko GASA WAN. 22Tɛ wannu Jɔas bìí ɗoŋ dee demɔ nɛ̀ Yoyada dáà ko Zakarii dee so in a̧; hegɔ, a̧ gbɛɛ bem kɔ̧-a̧. Nɛti ha̧ Zakarii mɛ fe, a̧ tɔ̧a̧: «GASA WAN a̧ zɔ́k mɔ'ɔ, ɓɛɛ a̧ a̧ kífí er ha̧ mɛ.»
Kaɗa wan ko Jɔas
(Zɔk 2 Wan 12.18-22)
23Tɛ ku̧u̧ naŋ pɛ, gíí wi-biro Aram dee ŋgazu in Jɔas; wa tɛ̀ɛ̀ hur nù Juda in saaye Jerusalɛm. Wa gbɛɛ o wanye fara nɔ‘i lɛŋ, ɓɛɛ wa tom o mɔ nɛ̀ wa kaia lɛŋ nɛnɛ ha̧ wannu kɔ-wa sɛn Damas. 24Zu-a nɛ̀ o wi-biro Aram nɛ̀ tɛ̀ɛ̀ so dɔk na'i, GASA WAN foo o gíí wi-biro ko Juda a kɔ̧ er-wa, wen o be Juda ee war ko GASA WAN Sɔ̧ ko dáà kɔ-wa duk. War ko Jɔas, wa usa bɔnɛ ha̧ a̧, 25ɓɛɛ wa yak e a̧ nɛ̀ oi gasa nyimmɔ. O wi-de-tom kɔ̧-a̧ baa ɗaŋ keta zu a̧, wen kifa er oi tɔk tɛ bem ko wi-ɗafi-sɔ̧ Yoyada nɛ̀ aa nu, ɓɛɛ wa gbɛ a̧ sɛn gɔn gado kɔ̧-a̧. Wa guna a̧ sɛn ye ko David, ɓɛɛ bó nɛ́ sɛn fara nɛ̀ wa gun o wannu sɛnɛ na. 26O wi nɛ̀ baa ɗaŋ keta zu a̧ nɛ́ Zabad bem ko Simɛat zɔŋa Amɔŋ in Yozabad bem ko Simrit zɔŋa Mɔab. 27Nin o bem kɔ̧-a̧, yɔramɔ zu tom nɛ̀ yaa er-a, nyɛrɛ mɔ zu tɔ̧ɔ̧-wen ko o wi-tɔ̧-wen oi nú Sɔ̧ zu a̧ in nyɛrɛ zu ɗafa Tua ko Sɔ̧ n'aa ɗafa yɔra zaŋ kalata ko o Wannu. Bem ko Amasia ɔɔ wan oi-aa.
Currently Selected:
2 KALATA NYƐRƐ 24: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.