2 KALATA NYƐRƐ 14
14
Asa gbina biro ti o be Sudaŋ
Sɛn tɛ ŋgimbi-wan ko Asa, ga̧a̧mɔ duka tɛ nù tɛ pɛ ɓu.
1Asa dee mɔ nɛ̀ de-a in nɛ̀ yuwar-a ti GASA WAN Sɔ̧ kɔ‘i. 2A̧ dee ha̧ gasa gɔni sɔ̧ mɛ kaɗi; a̧ gbina o kusa fara-ɗafi-sɔ̧ yinɛ. A̧ ɗaŋa o ta-zu-nù, ɓɛɛ a̧ gɔm o te nɛ̀‘i gasi gasi a nù. 3A̧ tɔ̧ɔ̧ ha̧ o be Juda mɛ kii GASA WAN Sɔ̧ ko zɔmdáa kɔ-wa, ɓɛɛ wa a̧ bá o heembea in o geŋa de nɛ̀ tom. 4Asa ɗaŋa o fara gasi géé-sɔ̧ in o fara-dɔ-fuu-nyama yinɛ tɛ o ye Juda lɛŋ; hegɔ nù duka tɛ ga̧a̧mɔ ŋgimbi-wan kɔ̧-a̧. 5Tɛ ŋgimbi-wan kɔ̧-a̧‘i, ŋma bíí ba biro dúk nɛ̀ a̧ na, wen GASA WAN nɛ̀ ta-tɛ a̧ ha̧a̧ so ga̧a̧mɔ ha̧ a̧. 6A̧ tɔ̧ɔ̧ ha̧ o be Juda: «Ɛ̀ɛ̀ ɗáfí ye-ŋgárá nɔ'ɔ, ɛ̀ɛ̀ mbó o garo zik nɛ̀ wa kpa in o gasa tua-pɛm-mɔ, ɛ̀ɛ̀ dé o nú-a in o mɔɔ-mana-a wen nù a̧a̧ tɛ ga̧a̧mɔ sɛn ti yɛ, wen ɛɛ mboo zu ha̧ GASA WAN Sɔ̧ k’ɛɛ; tɛ mboozu k’ɛɛ‘i, ɛɛ kpaa ga̧a̧mɔ tɛ fara lɛŋ.» Hegɔ wa dee tom'i hɔ gba̧a̧.
7Asa a̧a̧ so nɛ̀ o wi-biro kɔ̧-a̧ o be Juda tɛ booro-gɔmŋmaa-taar nɛ̀ kai nɛ́ o gasa ŋgee in o sɛ́ɛ̀, in o wi-biro be Bɛnjamin booro-gɔmŋmaa-yiitoo-nɛ-ɓu-mɔɔrɔ-ɗoŋ-taar; wa yaa nɛ́ o ŋga wi-biro nɛ̀ boi-biro kɔ-wa nɛ́ geɗek ŋgee in o góò. Wa lɛŋ so nɛ́ o ŋga wi-biro.
8Zɛra be Etiopii baa biro dúk nɛ̀ wa; a̧ a̧a̧ so nɛ̀ bíí miliɔŋ kpɔk in o keekee-biro gɔmŋmaa-taar, ɓɛɛ wa nɛ́ hegɔ hɔ sɛn Marɛsa. 9Asa gboo yor ti a̧, ɓɛɛ wa ba biro dúk nɛ̀ ŋmaa sɛn kɔ̧ ɗɔŋgɔ Sefata sɛn ká̧ Marɛsa. 10Asa aia nú ha̧ GASA WAN Sɔ̧ kɔ‘i, ɓɛɛ tɔ̧: «GASA WAN, ŋma bíí nɛ̀ tɛ kɛ̧ mgbara ɓɔsa bíí in ŋga bíí yak zu'nɛ́, bo na. Ɛ̀nɛ̀ gbák yɛ, GASA WAN Sɔ̧ k’ɛɛ; wen ɛɛ ɛk tɛ yɛ nɛ̀ ɛnɛ. Mɛ̀ nɛ́ nɛ̀ nin'nɛ́ ɛ̀ɛ̀ tɛ nɛnɛ mɛ bi gíí wi-biro nɔ'ɔ. Ɛ́nɛ́ nɛ́ GASA WAN Sɔ̧ k’ɛɛ, k’ɛ́nɛ́ e ha̧ ŋma bíí mɛ gan'nɛ na.»
11GASA WAN dee ha̧ biro mɛ ba o be Etiopii ti Asa in ti o be Juda, ɓɛɛ wa yu mɔ. 12Asa in o bíí kɔ‘i ndaka wa hɔ Gerar; wa kuma lɛŋ, ŋma kpɔk mgbara wa kpasi na, wen ŋgai biro kɔ-wa gbina so ti GASA WAN in ti o wi-biro kɔ̧-a̧. O bíí ko Asa pia nɛ̀ mɔɔ-oi-biro nɛ̀ dɔka-a. 13Wa bìì o ye lɛŋ nɛ̀ ya zik Gerar wen GASA WAN pi̧i̧ so gasa kíì tɛ o bíí ye nɔ‘i; wa kaia o mɔ saaye nɔ‘i lɛŋ wen mbɔi a̧a̧ so sɛnɛ ɔ dɔka. 14Wa gbina o ɓoramɔ mbɛt, kai nɛ̀ o ndai, o sami in o ŋgeloba nɛ̀ dɔka-a, ɓɛɛ wa si ɗoŋ si sɛn Jerusalɛm.
Currently Selected:
2 KALATA NYƐRƐ 14: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.