1 WANNU 1
1
Sɔki ko wannu David
1Wannu David sɔka kaɗi, pɛ-a dɔka so nyɛmna. Kà‘i kpe laa nɛ̀ tɛ-a, ɓɛɛ tɛ-a ba wee na. 2O wi-de-tom kɔ̧-a̧ tɔ̧ɔ̧ ha̧ a̧: «Wi tɛ kii ŋma be-zɔŋa nɛ tɛ iŋ tɛ na ha̧ nyaa wannu k’ɛɛ, wen dee tom ha̧ a̧ hee kóò kɔ̧-a̧ ga. A̧ tɛ kpe gɛ̧ɛ̧ ha̧ wannu, ɓɛɛ tɛ nyaa wannu baa wee.» 3Nɛ́ mɔ'ɔ nɛ̀ wa kia ŋma de be-zɔŋa nú Israɛl lɛŋ; wa kpaa Abisak, ŋma boko-be Sunɛm, ɓɛɛ wa mgbɔ a̧ tɛnɛ ha̧ wannu. 4Boko-bem’ɛi yora so zɔŋa nyɛmna; a̧ duka hee kóò ko wannu ga, de nɛ tom ha̧ a̧. Mɔ kpɔk, wannu duk in a̧ na.
Adonias kpɛra wan
5Adonias, bem ko David in Hagit, taa so kɔ‘i nɛ́ wi a̧ tɛ ba wan, ɓɛɛ tɔ̧: «Nɛ́ mi a̧ tɛ ɔ wan.» A̧ baa keekee-biro kpɔk, o nyaŋa in bíí ɓu-mɔɔrɔ mɛ nɛ in a̧.#2 Sam 3.4 6Ku̧u̧naŋ-a n'aa duka nɛ̀ bem gasi nɛnɛ, dáà kɔ̧-a̧ gai a̧ ndé, «Mɛ de mɔ hegɔ wen ge nde?» na. In mbɛt a̧ yora so ŋgaiwi nyɛmna, ɓɛɛ nɛ́ a̧ a̧ gboo ɗoŋ Absalɔm. 7A̧ ee nú in Jɔab bem ko Sɛruya in wi-ɗafi-sɔ̧ Abiatar, ɓɛɛ wa ye ɗoŋ-aa; 8ɓɛɛ nɛ̀ ko wi-ɗafi-sɔ̧ Sadɔk, in Bɛnaya bem ko Yehoyada, in wi-tɔ̧-wen oi nú Sɔ̧ Nataŋ, in Simɛi, in Rɛi, ká bá nɛ̀ o ŋgaŋa wi-biro ko David, wa yor so kɔ-wa ɗoŋ Adonias na.
9Adonias ɗafa sɔ̧ nɛ̀ o sami, o ndai in o ŋmaŋa be ndai sɛn ká̧ gasa ta ko Zohɛlɛt zu-zer Ɛn-Rogɛl, ɓɛɛ a̧ sa o bem ko wannu, o nya-a̧ lɛŋ, in o be Juda lɛŋ nɛ de tom ha̧ wannu. 10Ɓɛɛ o wi n'aa sa na, nɛ́ Nataŋ wi-tɔ̧-wen oi nú Sɔ̧, Bɛnaya, o ŋgaŋa wi-biro in nya a̧ Salomɔŋ.
Wa dee wan ha̧ Salomɔŋ
11Nɛ́ mɔ'ɔ nɛ̀ Nataŋ tɔ̧ɔ̧ ha̧ Bɛtsabee, nàà ko Salomɔŋ ndé: «Mɛ zii kɔ-mɛ‘e Adonias, bem ko Hagit baa wan, ɓɛɛ wannu David iŋ na, na nde?#2 Sam 12.24 12Kinii, mɛ̀ zíí mbɔrɔ n'am tɛ tɔ̧ ha̧ mɛ. Mɛ̀ kpásí kiitɛ-mɛ in bem kɔ-mɛ Salomɔŋ. 13Mɛ̀ nɛ́ mɛ̀ yé tɛ ko wannu David, a̧ mɛ̀ tɔ̧́ ha̧ a̧‘e: ‹Bo nɛ nyaa wannu kànà so mɔ ha̧ kó-de-tom kɔ‘i'e, bem kɔ̧-a̧ Salomɔŋ tɛ ɔ wan oi-wi, ɓɛɛ a̧ duka nù zu damti kɔ‘i na nde? Wen ge sa Adonias baa wan ge?› 14Ŋgimbi nɛ mɛ tɛ ɓɔn tɛ tɔ̧ɔ̧ wen in wannu, mi tɛ ye tua, ɓɛɛ mi yora ɗoŋ wen nɛ mɛ tɛ tɔ̧‘i.»
15Bɛtsabee yee tɛ ko wannu si fara-ɔ kɔ̧-a̧. Wannu sɔka so nyɛmna, ɓɛɛ Abisak boko-be Sunɛm de so nɛ tom ha̧ a̧. 16Bɛtsabee guu nù, gbɛ zugur nù ti wannu, ɓɛɛ wannu ak mɔ: «Nɛ́ ge a̧ mɛ kɔ̧ɔ̧ ge?»
17Bɛtsabee kifa nú ha̧ a̧: «Nyaa, bo nɛ ɛnɛ kànà so mɔ ha̧ kó-de-tom k’ɛ́nɛ́ nɛ nin GASA WAN Sɔ̧ k’ɛ́nɛ́‘e: bem kɔ‘m Salomɔŋ tɛ ɔ wan oi'nɛ́, ɓɛɛ a̧ tɛ daŋ zu damti oi'nɛ́ na nde? 18Ɓɛɛ kinii nɛ́ Adonias a̧ ɔɔ wan oi'nɛ́, ɓɛɛ nyaa wannu iŋ kɔ‘i na! 19A̧ ɗafa sɔ̧ nɛ̀ o wiwii ndai, o ŋmaŋa be ndai in o sami nɛ̀ dɔka-a; a̧ saa o bem ko wannu lɛŋ, wi-ɗafi-sɔ̧ Abiatar in gasa wi-biro Jɔab; ɓɛɛ a̧ sa wi-de-tom k’ɛ́nɛ́ Salomɔŋ na. 20War k’ɛ́nɛ́ nyaa wannu, gbaayí o be Israɛl lɛŋ zɔk nɛ mɔ sitɛ‘nɛ́; wa pɛm nɛ mɔ h’ɛ́nɛ́ mɛ usi mgbák bíí nɛ tɛ ba fara oi'nɛ́, mɛ duk zu damti oi nyaa wannu. 21Kà bo hegɔ na, ŋgimbi nɛ wannu tɛ si ɗoŋ kpa o dáà kɔ‘i, wa tɛ usi bɔnɛ ha̧‘m in bem kɔ‘m Salomɔŋ hee ŋma wen a̧a̧ so zu yɛ ga.»
22A̧ biti tɔ̧ɔ̧ wen'i ha̧ wannu, ɓɛɛ Nataŋ wi-tɔ̧-wen oi nú Sɔ̧ ye tua. 23Wa tɔ̧ɔ̧ ha̧ wannu'e: «Nataŋ wi-tɔ̧-wen oi nú Sɔ̧ hɔa.» A̧ tɛɛ pii tɛ wannu, ɓɛɛ a̧ gbɛ zugur nù ba yí-a gu nù, 24ɓɛɛ a̧ tɔ̧: «Nyaa wannu, nɛ́ ɛ́nɛ́ a̧ ha̧a̧ nú‘e, Adonias a̧ ɔ wan oi'nɛ́, ɓɛɛ a̧ duka zu damti oi'nɛ́ nde? 25Wen a̧ zira sɔsɔɔ si zu-zer Ɛn-Rogɛl; a̧ ɗafa sɔ̧ nɛ̀ o wiwii ndai in o ŋmaŋa be ndai gú nɛ̀ o sami nɛ dɔka-a. A̧ saa o bem ko wannu lɛŋ, o gasa wi-biro in wi-ɗafi-sɔ̧ Abiatar. Kinii wa nyɔŋ nɛ mɔ, nɔ nɛ mɔ hiɗi nɛ mɔ‘e: ‹Nyaa Adonias, wannu kànà nɛ́ ɛ́nɛ́ ɓɛɛ!› 26Ɓɛɛ kɔ‘m wi-de-tom k’ɛ́nɛ́ in wi-ɗafi-sɔ̧ Sadɔk, in Bɛnaya bem ko Yehoyada, ká bá nɛ̀ wi-de-tom k’ɛ́nɛ́ Salomɔŋ, a̧ sa yɛ na. 27Nɛ́ nyaa wannu a̧ ha̧a̧ nú ha̧ wa mɛ de mɔ‘i hegɔ nde? Hɔ kinii, ɛnɛ tɛ usi mgbák wi nɛ tɛ duk oi'nɛ́ ha̧ wi-de-tom k’ɛ́nɛ́ hɔ̧ɔ̧ na.»
28Wannu David kifa nú: «Ɛ̀nɛ̀ sá Bɛtsabee ha̧‘m.» Bɛtsabee yee tua pii tɛ wannu; 29ɓɛɛ wannu kan mɔ hee mɔ'ɔ ga: «Hee mɔ'ɔ nɛ GASA WAN duk kpasa in n'aa kpasa'm tɛ bɔnɛ lɛŋ ga, 30ɓɛɛ hee mɔ'ɔ n'am kànà so mɔ nɛ̀ nin GASA WAN Sɔ̧ ko Israɛl ndé: ‹Bem kɔ-mɛ Salomɔŋ tɛ ɔ wan oi-am, a̧ tɛ duk nù zu damti oi-am› ga, mi tɛ de mɔ‘i sɔsɔɔ.»
31Bɛtsabee baa yí gu nù ti wannu, ɓɛɛ tɔ̧: «Nyaa wannu David a̧ dúk ɓɔnsɛnɛ!»
32Wannu David tɔ̧a̧: «Ɛ̀nɛ̀ sá wi-ɗafi-sɔ̧ Sadɔk in Nataŋ wi-tɔ̧-wen oi nú Sɔ̧ ká bá nɛ̀ Bɛnaya bem ko Yehoyada ha̧‘m.» Wa hɔa ti wannu, 33ɓɛɛ wannu David tɔ̧ ha̧ wa: «Ɛ̀nɛ̀ káí o wi-de-tom ko wan k’ɛ́nɛ́, ɛ̀nɛ̀ bá bem kɔ‘m Salomɔŋ e zu sunda kɔ‘m, ɓɛɛ ɛ̀nɛ̀ mgbɔ́ a̧ si nú yí Gihɔŋ. 34Nɛ́ hi̧i̧ a̧ wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ tɛ tɛn nɔ̧́ a zu a̧ de nɛ̀ wan Israɛl ha̧ a̧; ɛnɛ tɛ dɔm zak hiɗi nɛ mɔ‘e: ‹Nyaa Salomɔŋ, wannu kànà nɛ́ ɛ́nɛ́ kpɔk ɓɛɛ!› 35Ɛnɛ tɛ pii ɗoŋ in a̧ ha̧ a̧ mɛ daŋ zu damti kɔ‘m, wen ɔɔ wan oi-am, wen mɛ̀ nɛ́ a̧ a̧‘m hoka wen ɔɔ wan zu Israɛl in Juda.»
36Bɛnaya bem ko Yehoyada kifa nú ha̧ wannu hee mɔ'ɔ ga: «Mɔ'ɔ dé hegɔ! Nɛ́ GASA WAN Sɔ̧ ko nyaa wannu a̧ tɔ̧a̧ wen'i. 37GASA WAN tɛ duk in Salomɔŋ hee mɔ'ɔ n'aa duka nɛnɛ in nyaa wannu ga, ɓɛɛ a̧ a̧ bá damti ko Salomɔŋ nɛ tɛ de'i e ŋgɔn gan ko nyaa wannu David!»
38Wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ, Bɛnaya bem ko Yehoyada in o be Kɛrɛt ká bá nɛ̀ o be Pɛlɛt zira nɛnɛ, wa baa Salomɔŋ e zu sunda ko wannu David, ɓɛɛ wa mgbɔ a̧ nɛnɛ si nú yí Gihɔŋ. 39Wi-ɗafi-sɔ̧ Sadɔk yee si fara-duk ko GASA WAN, ba dak nɔ̧́ tɛn a zu Salomɔŋ, de nɛ̀ wan ha̧ a̧. Wa dɔma zak, ɓɛɛ o bíí lɛŋ gai mɔ: «Nyaa Salomɔŋ, wannu kànà nɛ́ ɛ́nɛ́ kpɔk ɓɛɛ!» 40Dukbíí nɛ̀ oi-aa lɛŋ daŋa si ɗoŋ, dɔm nɛ̀ mɔ, yɔ nɛ̀ yɔyɛ, de nɛ̀ nyɛŋɛ, ɓɛɛ nù nak tɛ o giti mɔ nɛ wa de'i.
41Adonias in o wi n'aa saa zia gasa gitimɔ ŋgimbi nɛ wa kaɗa nɛ̀ nyɔŋa mɔ. Jɔab zia giti zak, ɓɛɛ ak mɔ: «Ɛ̧ɛ̧ nɛ́ giti ge mɔ ge saaye’ɛ ge?» 42Jɔab ɓɔna tɛ tɔ̧ɔ̧ wen'i, ɓɛɛ Yɔnataŋ bem ko wi-ɗafi-sɔ̧ Abiatar hɔ; Adonias tɔ̧ɔ̧ ha̧ a̧: «Mɛ tɛ pii ti; mɛ́ nɛ́ kpasa bíí. Mɛ̀ nɛ́ de nyɛrɛ a̧ mɛ ba tɛnɛ gɔ!»
43Jonataŋ kifa nú ha̧ Adonias: «Bo nɛ de nyɛrɛ na; nyaa wannu David ee wan ha̧ Salomɔŋ kaɗi. 44O bíí nɛ wannu toma nɛnɛ in a̧ nɛ wi-ɗafi-sɔ̧ Sadɔk, wi-tɔ̧-wen oi nú Sɔ̧ Nataŋ, Bɛnaya bem ko Yehoyada in o be Kɛrɛt ká bá nɛ̀ o be Pɛlɛt. Wa baa a̧ e zu sunda ko wannu. 45Wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ tɛna nɔ̧́-wan a zu-a sɛn Gihɔŋ. Wa pia ɗoŋ nɛ̀ hi̧i̧ nɛ̀ desee, ɓɛɛ o bíí saaye de nyɛŋɛ. Nɛ́ giti mɔ‘i ɛnɛ zia'i. 46Salomɔŋ duka nù zu damti kaɗi. 47O gasawi saaye nɛ̀ɛ́ zɔn nyaa wannu David tɔ̧ nɛnɛ‘e ndé: ‹Sɔ̧ k’ɛ́nɛ́ a̧ dé ha̧ nin Salomɔŋ mɛ hur gan k’ɛ́nɛ́! Wan kɔ̧-a̧ a̧ gasi gan k’ɛ́nɛ́!› Nɛ́ mɔ'ɔ nɛ̀ wannu nyafa tɛ gɔn gado kɔ‘i, 48ɓɛɛ tɔ̧: ‹Zɔnamɔ a̧ dúk nɛ ko GASA WAN Sɔ̧ ko Israɛl nɛ dee ha̧‘m mɛ zɔk wi nɛ̀ kpaia'm zu damti sɔsɔɔ.› »
49O bíí nɛ Adonias saa so lɛŋ pɛsa sót-sót nɛ gasa kíì, kóó o ndé ba nɛ yuwar kɔ‘i. 50Adonias dee kíí Salomɔŋ, ɓɛɛ nɛ́ɛ̀ kasi zak nɛ̀ duk zu fara-ɗafi-sɔ̧. 51Wa nɛ̀ɛ̀ tɔ̧ nyɛrɛ mɔ‘i ha̧ Salomɔŋ‘e: «Kíí wannu Salomɔŋ dee Adonias, ɓɛɛ a̧ nɛ́ɛ̀ kasi zak fara-ɗafi-sɔ̧ tɔ̧ nɛnɛ‘e wannu Salomɔŋ a̧ kan mɔ ha'i sɔsɔɔ‘e ndé, wi beka gbɛ wi-de-tom kɔ‘i nɛ̀ gba-paa na.»
52Salomɔŋ kifa nú: «Kà a̧ nɛ́ dee mɔ nɛ̀ yuwar-a, kóó mui̧-zu-a kpɔk beka tik nù na. Ɓɛɛ kà a̧ nɛ́ dee ŋma be ɗaŋmɔ tikiɗi, a̧ tɛ fe.» 53Wannu Salomɔŋ toma o bíí mɛ mgbɔ a̧ yinɛ fara-ɗafi-sɔ̧. Nɛ́ mɔ'ɔ n'aa tɛɛ gu nù ti wannu, ɓɛɛ wannu tɔ̧ ha̧ a̧: «Mɛ̀ sí ɗoŋ tɛ kɔ-mɛ.»
Currently Selected:
1 WANNU 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.