1 KALATA NYƐRƐ 29
29
O ha̧a̧mɔ wen mboo Tua ko Sɔ̧
1Wannu David tɔ̧ɔ̧ ha̧ giiwi lɛŋ nɛ̀ mɔi̧a hee mɔ'ɔ ga: «Bem kɔ‘m Salomɔŋ nɛ̀ Sɔ̧ hoka, nɛ́ be-ŋgaiwi nɛ̀ kpa ŋgai na, ɓɛɛ tom-dee ɔ gasa, wen tua-wan’ɛ bo nɛ́ ko bíí na, ɓɛɛ nɛ́ ko GASA WAN Sɔ̧.#1 Kal Ny 22.5 2Mi ha̧a̧ ŋgai tɛ‘m lɛŋ ɗafi nɛ̀ mɔ e wen Tua ko Sɔ̧ kɔ‘m: lɔr wen o mɔ nɛ̀‘i tɛ de nɛ̀ lɔr, bu-mbɔi wen o mɔ nɛ̀‘i tɛ de nɛ̀ bu-mbɔi, ndɛrɛ wen o mɔ nɛ̀‘i tɛ de nɛ̀ ndɛrɛ, boi wen o mɔ nɛ̀‘i tɛ de nɛ̀ boi, te wen o mɔ nɛ̀‘i tɛ de nɛ̀ te, o de toka gbɛ̧ ta, in o tu̧ ta nɛ̀ dap-aa nɛtɛ nɛtɛ, ta nɛtɛ nɛtɛ nɛ̀ gɛnɛ-a ɔ ŋgaya in de ŋga ta mbɛt. 3Hee mi kpaa desee sɛn tɛ Tua ko Sɔ̧ kɔ‘m ga, lɔr in o bu-mbɔi nɛ̀ duk nɛ́ kɔ‘m, mi ha̧a̧ wen Tua ko Sɔ̧ kɔ‘m e zu mɔ n'am ɗafa wen sa̧a̧ tua'i. 4Mɛ̀ nɛ́ kilo lɔr mɛ Ofir booro-gɔmŋmaa, in kilo sa̧a̧ bu-mbɔi booro-gɔmŋmaa-yiitoo-nɛ-ɓu-naar wen sɔ̧a̧-a̧ ɗoŋ o ŋgeŋ tua, 5in mɔ lɛŋ nɛ̀‘i tɛ de nɛ̀ lɔr, mɔ lɛŋ nɛ̀‘i tɛ de nɛ̀ bu-mbɔi, in wen yoɓa o wi-de-tom mbɛt. Ɓɛɛ kinii mgbara'nɛ́ hɛ̧ɛ̧, nɛ́ o a̧ kɔ̧ɔ̧ mɛ ha̧ mɔ sɔsɔɔ nɛ̀ ta-tɛ ha̧ GASA WAN o?»
6Ɓɛɛ o gasawi nutua, o gasawi ko o zuduk be Israɛl, o wi-duk-zu o wi-biro booro in gɔmŋmaa, in o wi-duk-zu mɔ ko wannu ha̧ mɔ nɛ̀ ta-tɛ 7wen tom ko Sɔ̧. Mɛ̀ nɛ́ kilo lɔr booro-gɔmŋmaa-nɛ-booro-ɓu-mɔɔrɔ-ɗoŋ-yiitoo, kɔya lɔr booro-ɓu, kilo bu-mbɔi booro-gɔmŋmaa-taar, kilo ndɛrɛ hee booro-gɔmŋmaa-mɔɔrɔ-ɗoŋ-kpɔk ga, bá nɛ̀ kilo boi miliɔŋ taar. 8O wi nɛ̀ a̧a̧ nɛ̀ ta nɛ̀ gɛnɛ-a ɔ ŋgaya ha̧a̧ ha̧ Yehiɛl bezaŋ Gɛrsɔŋ. 9Ɓɛɛ dukbíí kpa desee wen de ha̧a̧mɔ kɔ-wa nɛ̀ ta-tɛ, wen mɛ̀ nɛ́ sɛn tɛ gasa desee kɔ-wa a̧ wa ha̧a̧ nɛ̀ mɔ‘i ha̧ GASA WAN. Hegɔ, wannu David kpaa desee nyɛmna mbɛt.
Kɔfa-sɔ̧ ko David
10David zɔna GASA WAN nɛ̀ yí giiwi lɛŋ tɔ̧ nɛnɛ: «Ɓɔnsɛnɛ kpoo nɛ kpoo, zɔnamɔ a̧ dúk nɛ́ k’ɛ́nɛ́ GASA WAN, Sɔ̧ ko zɔmdáa k’ɛɛ Israɛl. 11Gasamɔ, ŋgai, gasa demɔ, mɔɔ-wan in hura-nin a̧ dúk nɛ́ k’ɛ́nɛ́ GASA WAN, wen o mɔ lɛŋ nɛ̀ a̧a̧ yiwese in mbɔɗɔnu’ɛ nɛ́ k’ɛ́nɛ́. Nɛ́ ɛ́nɛ́ a̧ ɔɔ wan zu o mɔ lɛŋ nɛ̀ duk kpasa.#Mt 6.13 12Dɔka kpaamɔ in gasamɔ tɛ̀ɛ́ nɛ̀ tɛ‘nɛ́ ɓɛɛ nɛ́ ɛ́nɛ́ a̧ duk zu o mɔ lɛŋ. Ŋgai in ŋgayamɔ a̧a̧ kɔ̧ er'nɛ́; ŋgai-baa-mɔ e ŋgɔn in dea-a ha̧ mɛ yor nɛ̀ nɔa-a a̧a̧ er'nɛ́. 13Ɓɛɛ kinii, Sɔ̧ k’ɛɛ, ɛ́ɛ́ zɔ́n nɛ ɛnɛ, ɛ́ɛ́ gásí nɛ nin'nɛ́ nɛ̀ ɔ hura.
14«Mi in dukbíí kɔ‘m, ɛ́ɛ́ nɛ́ ò h’ɛ́ɛ́ mɛ kpa ŋgai mɛ ha̧ mɔ h’ɛ́nɛ́ hee mɔ'ɔ ga o? Mɔ lɛŋ tɛ nɛ̀ tɛ‘nɛ́, hegɔ o mɔ n’ɛɛ ha̧a̧ h’ɛ́nɛ́ tɛ nɛ̀ er'nɛ́. 15Ɛ́ɛ́ nɛ́ gɛnɛ sɛn yí‘nɛ́ hee o dáà k’ɛɛ ga. Zɛ-ɛɛ zu nù'ɛ duk hee gi̧ɔ̧ ga, ŋma mɔɔ-e-nɛ-ta k’ɛɛ bo na. 16GASA WAN Sɔ̧ k’ɛɛ, o dɔka mɔ nɛtɛ nɛtɛ n’ɛɛ ɗafa wen mboa-a nɛ̀ Tua wen sa̧a̧ nin'nɛ́, o mɔɔ nɔ‘i lɛŋ tɛ̀ɛ́ nɛ̀ er'nɛ́, ɓɛɛ nɛ́ k’ɛ́nɛ́. 17Mi iŋa, GASA WAN Sɔ̧ kɔ‘m, nɛ́ ɛ́nɛ́ a̧ we see bíí, ɓɛɛ ɛnɛ kpɛka deemɔ nɛ̀ duk nɛ̀ yuwar-a. Nɛ̀ ta-tɛ, mi ha̧a̧ mɔɔ nɔ'ɔ lɛŋ nɛ̀ sa̧a̧-see, ɓɛɛ kinii, o bíí k’ɛ́nɛ́ nɛ̀ ya hɛ̧ɛ̧, mi zɔka wa ha̧ nɛ́ mɔ nɛ̀ ta-tɛ, nɛ̀ desee mbɛt. 18GASA WAN Sɔ̧ ko o dáà k’ɛɛ Abraham, Izak in Israɛl, ɛ̀nɛ̀ kásí see dukbíí k’ɛ́nɛ́, ɓɛɛ ɛ̀nɛ̀ zík taamɔ kɔ-wa sitɛ‘nɛ́ ɓɔnsɛnɛ. 19War ko bem kɔ‘m Salomɔŋ, ɛ̀nɛ̀ há̧ nɔɔ ŋgiɗi ha̧ a̧, ha̧ a̧ mɛ kasi o heembea, o geŋa in o ha̧a̧nú k’ɛ́nɛ́, wen ha̧ a̧ mɛ de mɔ lɛŋ, in ha̧ a̧ mɛ mbo Tua n'am ɗafa mɔ wen-aa.»
20Ɓɛɛ David tɔ̧ ha̧ giiwi lɛŋ nɛ̀ mɔi̧a: «Ɛ̀nɛ̀ zɔ́n GASA WAN Sɔ̧ k’ɛ́nɛ́!» Ɓɛɛ giiwi lɛŋ zɔn GASA WAN Sɔ̧ ko o dáà kɔ-wa. Wa guu nù ti GASA WAN in ti wannu mbɛt.
Wa pi̧i̧ Salomɔŋ tɛ wan
(Zɔk 1 Kal Ny 23.1; 1 Wan 2.12)
21Ɔɔ mɔ-sa̧ ɗoŋ wese'i, ɓɛɛ wa ɗafi sɔ̧ ha̧ GASA WAN, dɔ nɛ̀ kpoo-sɔ̧ ha̧ a̧ nɛ̀ wiwii-ndai booro, o vala sami booro in o be-sami booro, a nɛ̀ zɛzɛ ɗoŋ-aa, ɓɛɛ wa ɗafi sɔ̧ nɛ̀ dɔka-a wen o be Israɛl lɛŋ mbɛt. 22Wa nyɔŋa mɔ nɔ nɛ̀ mɔ sɛn ti GASA WAN wese'i nɛ̀ gasa desee.
War yiitoo woyo, wa dee wan ha̧ Salomɔŋ, bem ko David, ɓɛɛ wa tɛn nɔ̧́ a zu a̧ nɛ̀ nin GASA WAN; wa dee kpɔk mɔ‘i e nɛ̀ Sadɔk nɛ̀ wan-ɗafi-sɔ̧ mbɛt. 23Salomɔŋ duka zu damti ko GASA WAN hee wannu ga oi dáà kɔ̧-a̧ David, ɓɛɛ mɔ kɔ̧-a̧ nɛ́ siti. O be Israɛl lɛŋ mboo zu ha̧ a̧.#1 Wan 2.12 24O gasawi lɛŋ, o ŋgaŋa-wi in o bem ko wannu David lɛŋ mboo zu ha̧ wannu Salomɔŋ. 25GASA WAN dee ha̧ Salomɔŋ mɛ gasi ti gíí o be Israɛl lɛŋ, ɓɛɛ wa zɔn wannu hee bó nɛ́ ŋma wannu duka so nɛti mgbara wa ga na.
Fio ko David
(Zɔk 1 Wan 2.10-11)
26David bem ko Jɛse ɔɔ wan zu gíí o be Israɛl lɛŋ. 27Pɛ-wan kɔ̧-a̧ zu o be Israɛl duka nɛ́ pɛ ɓu-naar. A̧ dee pɛ mɔɔrɔ-ɗoŋ-yiitoo sɛn Hebrɔŋ ɓɛɛ a̧ de pɛ ɓu-taar-zua-taar sɛn Jerusalɛm.#2 Sam 5.4-5; 1 Kal Ny 3.4 28Tɛ sɔki, a̧ fee nɛ́ dé fio zaŋ mbɔi in zɔnamɔ, ɓɛɛ bem kɔ̧-a̧ Salomɔŋ ɔ wan oi-aa.
29O tom ko wannu David, o kuti-a gú nɛ̀ o sɔŋkur-aa lɛŋ yɔra zaŋ Kalata Nyɛrɛ ko Samuɛl wi-zɔk-mɔ, in zaŋ Kalata Nyɛrɛ ko wi-tɔ̧-wen oi nú Sɔ̧ Nataŋ bá nɛ̀ Kalata Nyɛrɛ ko Gad wi-zɔk-mɔ mbɛt. 30Ɔɔ-wan kɔ̧-a̧, ŋgai kɔ̧-a̧ in o wee-mɔ nɛ kpaa a̧, o wan nɛ̀ kpaa Israɛl in o wan nɛ̀ kpaa dɔka o ŋma nù zu nù lɛŋ yɔra zaŋ o kalata nɔ‘i.
Currently Selected:
1 KALATA NYƐRƐ 29: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.