ISAIAS 42
42
I Winic Dios
1Wʌ'an c Winic mu' bʌ caj j coltan. Jiñʌch yajcʌbil bʌ c cha'an. Mi' wen aq'ueñon i tijicñʌyel c pusic'al. Tsa'ix cʌq'ue quEspíritu. Jini mi caj i sub chuqui toj ti' tojlel colem tejclum tac mach bʌ anic mi' cʌñoñob. 2Uts'at i pusic'al. Mach yujilic leto. Mach c'amic mi' cha'len t'an ti calle. 3Ma'anic mi' c'ʌs winic che' p'ump'unix bajche' jam tsa' bʌ t'uchtʌnti. Ma'anic mi' yʌp i nich c'ajc tsa'ix bʌ i tsuc'u ti lac pusic'al. Mi caj i ñuq'uesʌben i pusic'al jini c'un bʌ. Mi caj i yʌc' ti mejlel ti toj. 4Ma'anic mi' caj ti lujb'an. Anquese jal to mi' mel winicob pero mi caj i melob ti isujm. Toj mi caj i yujtel meloñel ti pañimil. Jini año' bʌ ti' t'ejl colem ñajb woli' pijtañob i mandar.
5Joñon a Yumon jini cojach bʌ Dios. Tsac mele panchan. Tsac lich'choco. Tsac mele jini pañimil yic'ot pejtel i bʌl. Mi cʌq'uen i c'uxtʌlel jini año' bʌ ti pañimil. 6A Yumon. Tsac pʌyʌyet cha'an ma' wajñel ti toj. Tsac yajcayet. Mi caj j cʌntañet. Mi caj cʌq'uet ti ajñel ti' tojlel winicob x'ixicob cha'an mi' ts'ʌctiyel jini xuc'ul bʌ t'an mu' bʌ cʌq'ueñob. I wentajet c'ajc cha'an ma' pʌsbeñob c bijlel. 7Mi caj a camben i wut jini xpots'ob. Mi caj a loc'san jini ñup'ulo' bʌ ti ñujp'ibʌl ba' chuculob ti ic'yoch'an bʌ pañimil. 8Yumʌlon. Jiñʌch j c'aba'. Ma'anic mi cʌq'uen c ñuclel yambʌ. Ma'anic mi caj cʌq'uen dioste' i pejcʌntel ti ñuc. 9Ña'tan, tsa'ix ts'ʌctiyi c t'an che' bajche' tsac wʌn subu. Wolix c wʌn sub jini mu' to bʌ caj i yujtel. Che' maxto anic tsiquil mi caj c sub, che'en lac Yum.
Mi' subentel i ñuclel lac Yum
10C'ʌyinla lac Yum ti tsiji' bʌ c'ay. La' ñuq'uesʌntic i c'aba' c'ʌlʌl ti ñajt bʌ pañimil. Ñuq'uesʌbenla i c'aba' lac Yum pejtel añet bʌ la ti colem ñajb, yic'ot ti' ti'il jini ñajb. 11Cha'lenla c'ay winicob chumulet bʌ la ti' tiquiñal pañimil, jini xchumtʌlob ti Cedar, yic'ot xchumtʌlob ti Sela, yic'ot añet bʌ la ti chan bʌ wits. 12Tsictesanla i ñuclel lac Yum añet bʌ la ba' mi' bʌjlel q'uin. 13Lac Yum mi' loq'uel ti guerra che' bajche' p'ʌtʌl bʌ soldado. Mi' bʌx'an ti' ye'tel. C'am mi' cha'len oñel cha'an mi' chajpañob i bʌ i pi'ʌlob. Mi' mʌjlel i cha'an ti' tojlel i contrajob.
14Lac Yum woli' yʌl: Anix ora ñʌch'ʌlon. Ma'anic chuqui tsa cʌlʌ. Tsac tiq'ui c bʌ. Pero wʌle mi caj c cha'len c'am bʌ oñel che' bajche' x'ixic woli bʌ ti bajq'uel. Jesuñayon, tip'tip'ña c pusic'al cha'an jisaya. 15Mi caj c jisan wits yic'ot bujtʌl tac. Mi caj c laj tiquesan pejtel pimel. Mi' caj ti sajp'el ja'. Mi caj c tiquesan colem ja' tac. 16Mi caj c pʌy majlel jini xpots'ob ya' ti bij ba' mach ñumeñobic, ba' mach cʌmbilic bij i cha'añob. Mi caj c sʌq'uesan jini ic'yoch'an bʌ pañimil ya' ba' mi' cha'leñob xʌmbal. Mi caj c melbeñob bij ba' bululbexel. Mi caj c sutq'uin jini bujtʌl tac ti joctʌl. Pejtelel iliyi mi caj c mel ti' tojlel. Ma'anic mi caj c wis cʌy c mel che' maxto joloñic. 17Pero mi caj i yubiñob quisin jini mu' bʌ i ch'ujutesañob dios tac, mu' bʌ i lon subeñob: “C dioset lojon”, lon che'ob.
Ma'anic mi' jac'ob i tic'ol jini israelob
18Ñich'tanla israelob mach bʌ anic mi la' wubin i t'an Dios. Q'uelela jatetla mach bʌ q'uelelic la' cha'an. 19¿Majqui xpots' che' bajche' jatetla tsa' bʌ c yajca? ¿Majqui xcojcob? ¿Mach ba jinic israelob, suboñelob chocbilo' bʌ majlel c cha'an? Xpots' jini x'etel i cha'an lac Yum tsa' bʌ i yʌc'ʌ i bʌ tic wenta. 20Come an cabʌl chuqui mi la' q'uel, pero ma'anic mi' c'otel la' wut. Tocol la' chiquin, pero mach la' womic la' wubin c t'an, che'en. 21-22Lac Yum tsi' ñuq'uesa i mandar cha'an mi' q'uejlel ti ñuc, come tojʌch ajñel. Tijicña mi' yubin lac Yum che' jini. Pero mach che'ic ti' tojlel israelob. Añob ti' p'ʌtʌlel yambʌ yumʌlob mu' bʌ i tic'lañob. Ti pejtelelob tsa' puts'iyob ti ch'en tac yic'ot ti mʌjquibil. Pero ma'anic majch tsi' ñopo i coltañob. Ma'anic majch tsi' yʌc'ʌyob ti colel. 23Ti pejteletla yom mi la' ñich'tan ili t'an cha'an mi la' taj la' cʌntesʌntel. Yom mi la' ña'tan jini bʌbʌq'uen bʌ mu' bʌ caj ti ujtel. 24¿Majqui tsi' yʌc'ʌ Jacob ti' c'ʌb xujch'ob? ¿Majqui tsi' yʌc'ʌ Israel ti tic'lʌntel? ¿Mach ba jinic lac Yum? Come tsi' cha'leyob mulil ti' contra lac Yum. Ma'anic tsi' ñopbeyob i t'an. Ma'anic tsi' ñich'tʌbeyob i mandar. 25Jini cha'an Dios tsi' wersa pʌsbeyob i mich'lel. Tsi' jisayob ti guerra. Anquese joyolob ti c'ajc, ma'anic tsi' ch'ʌmbeyob isujm. Ma'anic tsi' ñopoyob mi tilem ti Dios.
Currently Selected:
ISAIAS 42: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.