Filip-ma 1
1
Dep pa ged’a hi Paul-la
1Ni an Paul ki Timote, azungeîna hi Jesus Christ-sâ. Ami nga b’irimi mbaktum mba wanda mi agi suma hAlona pet suma a he gagazid’a yam Jesus Christ suma avo Filip-ma, zlapa ki suma gol Toka ki suma a le sunda mi Tokina mi. 2Ar Alona Abui ki Salad’a Jesus Christ a vagi sumad’a ki b’leng nga halasa.
Paul mi tchen yam kretiyê suma Filip-ma
3An nga ni le mersi mAlo mana teteu ata yima an nga ni djib’er kagina. 4Kur tchen manda pet, an nga ni tchen Alona kagi ki furîd’a, 5kayamba agi ndjunun kur sunda hi Zla d’a Djivid’a avok dei gak ki tchetchembid’a. 6Kayam an wala Alo ma tin ad’u le sun nda djivid’a kurugina, mba mi lat gak bur ma mbad’a hi Jesus Christ-sâ. 7Ni djivid’a an djib’er kagi pet hina, kayam an hurun vagi heî. Kayam agi nga zlapa ki sed’en yam sun nda djivi d’a Alona mi handji ki tchetchemba ata yima an nga kur dangeinina, ata yima an nga hawana, ata yima an nga ni tchi wal Zla d’a Djivid’ina mi. 8Alona mi wala an de ni zla d’a gagazid’a, an nga ni le kagi ki o d’a Jesus Christ mi lat kagid’a.
9Vama an tchen Alona kagina ba wana: Ar o magid’a ti zul avogovok zlapa ki wed’a ki wad’ud’a pet mi, 10kayam agi walagi ir ahle suma djivina. Hina, agi mba kagagi yed’et bei zlad’a kagi ba kur bur ma mbad’a hi Christ-sâ. 11Agi oyôgi ki sun nda d’ingêra kurugi kayam agi suburugi Alona, agi gilem mi.
Christ nari manda
12B’oziyona, an min ala agi wagi ahle suma a lana ná zul Zla d’a Djivid’a avogovogo, 13gak azigar suma avo hAmul ma ngolîna pet ki suma dingâ pet a wala a van dangeina ni yam sunda hi Christ-sa. 14Ni yam dangei mana ba, b’oziyoina ablaud’a a deng tazi ata Salad’a, a fad’enga á tchi wal Zlad’a hAlonid’a avogovok bei mandarâ ba mi.
15Gagazi, suma dingâ adigazi a nga tchi wal zlad’a hi Christ-sa ki yungôra kanu, ki tuguyod’a mi, wani suma dingâ a nga tchi wal zlad’a hi Christ-sa ki djib’er ra djivid’a. 16Sum ndazina a nga tchat ni ki od’a, kayam azi wala Alona mi han Zla d’a Djivid’a abon á ngomba. 17Wani suma dingâ a nga tchi wal zlad’a hi Christ-sa bei gagazid’a ki tuguyod’a. Azi djib’er ala azi mban ndaka kan kua kur dangei mana.
18Wani le azi nga tchi wal zlad’a hi Christ-sa ata yat tuo d’oze ata yad’u ni, ndolon nga d’i. A tchi wala yam Christ ngola da’. Kayam ndata, an nga ni le furîd’a kam kua kam kua, 19kayam an wala yam tchen magid’a ki ndjunda hi Muzu’â hi Jesus Christ-sîd’a, a mba gan akulo woi kur dangeina. 20Kayam an nga ni djuba, an tin hurun ala an mba ni mbut zulona yam va tu d’i. Wani bei mandarâ ba, ki tchetchemba, d’igi an nga ni le teteu na, le an nga ki iran ndoze le an mit pî, ar suma a subur Christ kanu. 21Kayam Christ nari manda, matna ni mbiyo man ma fed’a. 22Wani le an kak ki iran kur hliuna ni djivid’a yam sun manda ni, an we nga vama an mba ni manama d’i. 23Wani an nga hepa aduk ahle suma mbà ndazina. An djib’er ala le an i kak ki Christ-zu ni, ni vama kal teglesâ. 24Wani á kak ki iran kur hliuna ni djivid’a kagiya. 25An we woi tetet ala an mba ni kak ki sed’egi pet á ndjunugiya, kayam agi igi avogovogo, agi lagi furîd’a yam he gagazi magid’a mi. 26Hina wani, fata an hulong sä hatagid’a, agi mba suburugi tagi ngola kan yam kak magi d’a zlapa tu ki Jesus Christ-sa.
27Wani vama kal teglesâ, agi tid’igi ni tit ta ndak yam Zla d’a Djivid’a hi Christ-sa. Hina wani, le an i á d’ugiya, d’oze le an i á d’ugi d’uo pî, an mba hum ala agi nga kagagi ngingring kur djib’er ra tud’a, agi nga durugi ayîna ki hur ma tuna yam he gagazi d’a yam Zla d’a Djivid’id’a. 28Ar agi lagi mandar suma djangû magina d’i. Wana ni vama simata kazi ala azi ni suma ba woina. Wani ni vama simata yam sut magid’a ala ti tcholï nata Alona. 29Kayam Alona mi vagi sumad’a zlapa ki Christ ná he gagazid’a kam hol li, wani ná fagi ndaka kam mi. 30Ar agi durugi ayîna d’igi agi wan an dur adjeu na, d’igi agi humugi an nga kur ki tchetchemba na mi.
Currently Selected:
Filip-ma 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.