Filemon 1
1
Dep pa ged’a hi Paul-la
1Ni an Paul ma dangeina yam Jesus Christ-sâ ki wiyeina Timote, ami nga b’irimi mbaktum mba wanda mi ang Filemon, ndrami ma sun ma hurumi vang heîna ki Toka avo hatanga 2ki wiyeid’a Apiya azi ki Arsip ndrami ma dur ayîna. 3Alona Abui ki Salad’a Jesus Christ a vagi sumad’a ki b’leng nga halasa.
Od’a hi Filemon-nda ki he gagazi mamba
4An nga ni le mersi mAlo mana teteu, an nga ni dugud’ong simiyêng kur tchen manda, 5kayam an hum zla o mang nga ang nga lat yam suma hAlonina peta ki he gagazi mang nga yam Salad’a Jesus-d’a. 6An nga ni tchen Alona yam darigï d’a zlabang ki sed’emi yam he gagazid’id’a ti zul avogovok kayam suma pet a we djivi d’a pet ta ei nga ki sed’et yam Jesus Christ-sa. 7Wiyena, kayam o manga, tan ndi lan djivid’a heî; ti ndjunun mi, kayam ang b’leng hur suma hAlonina ngola.
Paul mi tchen Filemon yam Onesim
8Kayam ndata, yam Christ an nga ki lovota á hang vuna yam vama ang ndak á luma. 9Wani kal pet, an nga ni tcheneng ki od’a. An Paul ma mamarâ ki tchetchemba ni ma dangeina yam Jesus Christ-sâ, 10an nga ni tcheneng yam Onesim, goron ma an vud’um kur dangeinina. 11Adjeu mam mi va atang ngi, wani ki tchetchemba mam mi va atang ki anu.
12An nga ni sunungzi sä, mam ma d’igi vunadigan nda gugota na na. 13An min ala mi kak ki sed’en ka hî kayam mi ndjunun blangâng kayam an nga kur dangeina yam Zla d’a Djivid’a. 14Wani bei djib’er manga an min le va tu d’i, kayam an min djivi manga mbut ni vama an lang kad’enga kat ti, wani ni kur min manga.
15Dam mi wal ki sed’eng ndjö ná mbut mangâ fafat kla. 16Wani ni d’igi magoma na d’i, wani mi kal magoma, ni wiyei ma ei lei kam heî yam Christ-sâ. An le kam heî, wani ang mba le kam kala, ni magoma mi na, wani ni wiyengâ yam Salad’a.
17Le ang wan d’igi ndrangâ na ni, ang vum d’igi ang van an na. 18Le mi lang tchod’a adjewe d’oze bal mangâ le nga kam pî ni, ang ndumundji kanu. 19Ni an Paul ni b’irit kabonu: An mba ni wuragangû. Wani ang djib’er yam bal man ma kangâ, nala, ni ang tang Filemon. 20Hina wiyena, ang ndjunun yam od’a hi Salad’id’a, ang b’lengên hurun yam Christ mi.
21Kayam ndata, an nga ni b’iring mbaktum mba wanda, an we ang mba humunu, ang mba le kal yam vama an dang kama. 22Kayam ndata, ang minin yima burâ, kayam an djib’er ala yam tchen magid’a Alona mba mi malan lovota á iza hatagiya.
Dep pa dabid’a
23Epafras, ndran ma nga ki sed’en kur dangeina yam Jesus Christ-sâ, mi gang depa. 24Marik azi ki Aristarik ki Demas ki Luc, ndron suma sunda, a gang depa mi.
25Ar Saleina Jesus Christ mi vagi sumad’a.
Currently Selected:
Filemon 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.