Nahum 1
1
1Wana ni zla d’a a djogot tei yam azì ma ngol ma Ninif-fîd’a, ni zla d’a kur mbaktum mba Alona mi ndat tei mi Nahum ma Elkos-sid’a.
Ma didina ni ma djivi ma suma a ringîm mandarama
2Ma didina nAlo ma yungôra,
ni ma hlatchugula,
nga mi hlatchugula,
ni ma ayîna heîna,
nga mi hlatchugula ki mam suma djangûna,
nga mi ve mam suma djangûna kurum mi.
3Ma didina nga mi mbut ayîna atogo d’i,
ni ma ad’engêm kal heîna,
nga mi ar sama zlad’a kama bei ngopa d’i.
Nga mi tit aduk mbirlimba, aduk babarâ,
d’ugula ni gugum ma ad’u asema mi.
4Nga mi ngop alum ma ngolâ, mi so woyo,
nga mi so alum ma gureina woi pet,
hat ma Basan-na ki ma yam ahina d’a Karmel-lina a nga lugod’a,
b’o d’a Liban-nda ti yak kei mi.
5Nga mi giget ahuniyôna,
yima ndingâ nga mi lau woyo.
Andagad’a ki suma a nga kaka kurutna pet
a nga hlakulo avorom hîhîb’iring.
6Ni nge ba, mba mi tchol avorom ata yima hurum zalâ ge?
Ni nge ba, mba mi tchol avok ayî mam ma bibiliuna ge?
Hur mam ma zala nga mi ngal d’igi akud’a na,
nga mi to ahuniyôna woyo.
7Ma didina ni ma djivina,
ni yima ngeid’a kur bur ma ndaka,
nga mi ngom suma a nga ngei tazi atama mi.
8Wani mba mi b’lak azí ma ngol máma woi
kabil ma nga mi sulul lei huhubupma,
mba mi dik mam suma djangûna
gak mi tchuguzi kur nduvunda.
A tchuk sunda ata Juda-na ki Ninif-fâ
9Agi djib’eregi nana yam Ma didina ge?
Mam nga mi b’lak magi suma djangûna woi kakazeî,
azi mba kid’eyêgi iragi bugol luo d’a.
10Azi le nga hitiud’a ata tazi d’igi aweid’a na,
le a nga gurut ni d’igi suma a gurut ki süma hina pî,
a mba ngal lei d’igi asu ma sod’a na papana.
11Ang azì ma ngol ma Ninif-fâ,
sama mi nga mi de zla d’a tchod’a yam Ma didinina
nga mi ndeï kurungû,
ni ma mi nga ki nga hur ma hawa ya’îna.
12Ni kayam ndata ba, Ma didina mi de mi suma Juda-na ala:
Le magi suma djangûna a nga kad’enga a ablaud’a pî,
an mba ni kazi woyo, an mba ni dabazi woi mi.
An lagiya wa ndaka,
an dok ni lagi kua d’uo d’a.
13Ki tchetchemba, an nga ni kus djuk
mazina woi kelegi á tchugugi akulo
ad’u ad’enga hi magi suma djangûnid’a,
an nga ni tchalagi erdje ma a djinigi ki na woi mi.
14Agi suma Ninif-fâ, Ma didina mi he vuna kagi ala:
agi mba fagi andjaf ma mi yagi simiyêgina bugol luo d’a.
An mba ni yo angus ahle suma tcheta
kangus ahle suma agi yorogizi ki kaweinina woi
kur gonga halo maginid’a,
an mba ni djugot zula kä kagiya,
kayam zlagi nga d’uo d’a.
Currently Selected:
Nahum 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.