Mise 1
1
ALONA MBA MI KA SARIYAD’A YAM ISRAEL-LÂ,
YAM SUMA JUDA-NA MI
(1—3)
1Wana ni zla d’a Ma didina mi dat mi Mise ma Moreset-na kur atchogoid’a hi Jotam ki Ahas ki Ezekiyas amulei suma Juda-nid’a, mi ndum ad’u zla d’a yam azì ma ngol ma Samari-nid’a, ki d’a yam azì ma ngol ma Jerusalem-mid’a woyo.
Salad’a mi ve sum mama ki zlad’a
2Agi suma pet, agi humugiya!
Ndak andagad’a kahle suma kuru’â pet,
agi tinigi humagiya!
Salad’a Ma didina nga mi deï zlad’a
ata yam ma kak ma mi tinim iram vama
á vagi ki zlad’a.
3Gola! Ma didina mi nde wa woi
ata yam ma kaka,
mi tchuk asem kä, nga mi tit akulo yam ahuniyôna.
4Ahuniyôna a nga lau woi kä ad’umu,
hora mba d’i wak kei
d’igi dubangâ mi lau woi abo akud’a na,
d’igi mbiyo ma akulo yam yima ndingîna
mi djangî kä ata yima ligitima na mi.
5Ahle ndazina a mba hina pet
ni yam so vuna handjafâ hi Jakob-mina,
ni yam tchod’a hi Israel-lîd’a.
Ni me ba, mi zut andjafâ hi Jakob-ma á so vuna ge?
Ni suma Samari-na d’uo zu?
Ni me ba, mi zut suma hi Juda-na á tuwal fileina ge?
Ni suma Jerusalem-ma d’uo zu?
6Ma didina mi dala: Kayam ndata,
an mba ni mbut azì ma ngol ma Samari-na
d’igi mola hahina d’a kur asinenid’a na,
an mba ni mbud’umî yima pe guguzlud’a,
an mba ni durum ahina mamba woi kur hora,
an mba ni aram ad’um mba ged’a woi abu mi.
7Filei mam ma tcheta mba mi kus seyo,
he d’a hawa d’a mi fata,
a mba tchugut aduk akud’a.
An mba ni to alo mam ma tcheta woi kikizek,
kayam mi gus ahle mam ndazina pet
ni ki bege d’a gaulangâ,
bege ndata a mba hulong wurak
gaulang ma dingâ ki sed’et mi.
Ndaka nga d’i mba yam Jerusalem
8Kayam ndata, an Mise mba ni tchiya,
an mba ni ge horâ,
an mba ni tit asen hawa bei atuguruna,
an mba ni er ad’un akulo d’igi hâna na,
an mba ni oî d’igi arigeta na mi.
9Ka d’a a ka azì ma ngol ma Samari-na mbilîd’a,
mbil mama mi mbut ni mbil ma bei tchila
gak mi i yam ambas sa Juda-d’a,
gak mi i avun agrek ma Jerusalem-ma
ata yima sum mana a nga kaka kuana.
10Ar agi dagi zla ndata woi avo Gat ti,
ar agi tchigi kur Ako d’uo mi.
An mba ni bulul kä
aduk andagad’a avo Bet-Leyafra.
11Agi suma Safir-râ, agi igi magomba
ki gandilad’a ki zulona,
suma Sänan-na a nga so tazi á buzuk kei abu d’i.
Tchi ma hohou ma nga avo Bet-Esel-lâ,
mba mi aragi lovota á ngei tagi kua d’i!
12Suma Marot-na a nga djib’er yam djivi mazid’a,
kayam ndaka ti tcholï ata Ma didina
gak ti i avun agrek ma Jerusalem-ma.
13Agi suma Lakis-sâ,
agi djinigi pus ma dur ayîna ad’u akulumei magina,
kayam agi lagi tchod’a d’igi Israel-lâ na,
agi zud’ugi suma Jerusalem-ma á so vuna mi.
14Kayam ndata, agi mba walagi tagi woi
ki suma Moreset-Gat-na.
Suma Aksip-ma a mba mbut
ni vama mbut ir amulei suma Israel-lâ.
15Agi suma Maresa-na,
Ma didina mi dala mi mba mi hagi abo sama ding
ma mba mi kus kagina.
Amulei suma subura hi Israel-lîna
a mba i ngei tazi angra ahina d’a Adulam-mba.
16Agi suma Jerusalem-ma,
agi welegi yagi woyo.
Agi arat d’igi ta hi togozeid’id’a na,
agi tchigi hor ra grogi
suma agi hurugi vazi heîna,
kayam a mba yozi magomba
izi woi dei ki sed’egiya.
Currently Selected:
Mise 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.