Hor ma tchina 1
1
Jerusalem ti mbut ni d’igi atcha d’a modonod’a na
1Alë! Jerusalem mba suma a nga oîd’a kurut adjeud’a,
ti mbut wa d’a sa nga kurut tuo d’a.
Ndat tala ti nazì ma ngolâ aduk andjaf suma d’a,
ti mbut wa d’igi atcha d’a modonod’a na.
Amul la yam andaga d’a dingid’a,
ti mbut wa d’a le sun magomba mi suma.
2Nga d’i tchi andjege,
simina nga mi djang kä irad’u.
Aduk suma a le katna pet,
sama mi b’lengêt hurutna nga d’i.
Buniyôtna pet a mbut ni suma a mbud’ut iratna,
a mbut ni suma djangû matna mi.
3Suma Juda-na a iziya wa magomba,
a hulongôzi wa yazi kä,
a nga le sun nda magom mba kal teglesa.
A nga kaka aduk andjaf suma dingâ,
a nga fe lovota á tuk tazi d’i!
Suma a djobozi vunazina pet
a mba, a nga lazi ndak ka kal kazid’a.
4Lovot ta i Siyon-nda nga d’i yor tat d’igi sana na,
kayam suma a nga mba á le vun tilâ kua d’uo d’a.
Vun agrek matna pet mi b’lak keyo,
mat suma ngat buzuna a nga zam taziya,
yugunei matna a mbut wa hohoud’a,
ndat tata ti nga kur hat hur ma ngolâ mi.
5Suma a lat murud’umbina a kal kad’u,
mat suma djangûna a nga kaka tchugot,
kayam Ma didina mi mbud’ut hohoud’a
yam tcho mat ta zul heîd’a.
Grotna a nga i magomba
avok mat suma djangûna.
6Gor weid’a Siyon,
subur mata dap pei da’.
Mat suma nglona a mbut ni d’igi gayang
ma nga mi fe yima te hatna d’uo
ma ad’engêm mba djangâ
nga avok sama nduwanda d’uo na na.
7Ata yima Jerusalem ti nga kur hohoud’a
nga d’i tcha tata na,
ti djib’er yam ahle suma djivi
suma ndat nga ki sed’ezi adjeuna pet.
Ata yima sum matna a ndabo mazi suma a lazi murud’umbina
bei ti fe sa á ndjunut ba na,
mat suma djangûna a wad’u,
a nga san ad’u puk mat ta kä d’a.
8Jerusalem tcho mata ti zul ngola.
Ni kayam ndata ba, ti mbut vama ndjendjed’a.
Suma a suburut adjeuna a golot is,
kayam a we gandila mata.
Ndat tata nga d’i zam tad’u,
ti hulong bugol mi.
9Ndjendje mata nga d’i djang ata baru mata,
ti djib’er nga yam vama nga mi mba katna d’i.
Puk mata ni puk ka atchapa,
sama b’lengêt hurutna nga d’i.
Ti dala: Ma didina, ang we hohou manda.
Ni nana ba, ma djangûna nga mi kus kan nge?
10Ma kus katna mi mat abom mi yo ahle suma djivi
suma kal tegles suma ndat nga ki na pet.
Ti we andjaf suma ang d’elezi á kal aduk tok mangina,
a kal kur gong mat ta a tinit irat vata mi.
11Sum matna a nga zam taziya,
a nga hal tena,
a hahle mazi suma djivi
suma azi nga ki na woi yam tena
á ndjun ari mazid’a.
Ma didina, ang gola! An mbut wa hohoud’a.
*
12Agi suma pet suma nga kalagi ka hina,
Agi mbeyegiya, agi gologiya!
Agi wagi andjaf ndak ka an nga ki sed’et
ta Ma didina mi tumun ki sed’et
kur bur ma hurum zal kana,
ta hle tat d’igi ndat hina d’a nga d’i.
13Mi sunï akud’a akulo,
nga d’i ngalan aduk asogonu.
Mi gun dauna kä avoronu, mi gan kaziganu,
mi mbud’un hohoud’a.
An nga ni fe ndaka burâ ki burâ.
14Mi djinin tcho manda kelen d’igi dju’â na,
ti mol yam tat gak ti mba kelen mbeî,
mi daban ad’engên ndeyo.
Salad’a mi han abo suma an ndak
á tchol avorozi d’uo na.
15Salad’a mi noî suma gangrang suma dur ayî
suma a nga ki sed’ena woyo,
mi yi tok ka ngola hi azigarîd’a kan
á b’lak azungeî mana woyo.
Salad’a mi mired’en an gor wei d’a Juda-d’a kä kasem
d’igi a miret vud’a guguzlud’a ata yat ma mireta na.
16Ni kayam ndata ba, an nga ni tchiya,
simina nga mi djang iran kä
kayam mi wal ma b’leng hur ma mi ndjunun ari mandina
woi dei ki sed’enu.
Grona a mbut hohoud’a,
kayam ma djangûna mi fad’eng nga kala.
*
17Siyon ti mat abod’u,
wani sama mi b’lengêt hurutna nga d’i.
Ma didina mi he vuna mi suma a ngui suma hi Jakob-mina,
a kak djangûna ki sed’eziya.
Jerusalem ti mbut ni vama ndjendjed’a adigaziya.
*
18Ma didina ni ma d’ingêrâ,
kayam an ni som vunamu.
Agi suma pet, agi humugiya,
agi wagi pupuluk manda.
Yugunei mana kazungeî mana,
a izi wa magomba.
19An yi suma a le kana,
wani a mbud’un iranu.
Man suma ngat buzuna ki man suma nglona
a bo woi kur azì ma ngolâ
kid’a a nga hal tena
á ndjun ari mazid’id’a.
20Ma didina, gola, an nga kur ndaka!
Aruwad’an nga mi mbuzuk kurun dudu,
hurun mi b’lak kurun krovo,
kayam an ni sama so vuna gagazi.
Mbigeu d’a fiyaka nga d’i tchi suma woi abua,
matna nga mi tchi suma krovo mi.
21A hum zam ta manda,
wani sama b’lengên huruna nga d’i.
Man suma djangûna pet a hum zla hohou manda,
a le furîd’a yam vama ang luma.
Ar ang hulongî ki bur ma ang dum zlam adjeuna,
ar azi mbut d’igi an na mi.
22Ar asa’at mazid’a ti nde woi avorong pet,
ar ang lazi d’igi ang lan an
yam tcho manda pet na.
Gola! An nga ni zam tan ngola,
an nga ni fe ndaka kurun krovo.
Currently Selected:
Hor ma tchina 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.