Jean 7
7
Jesus b’oziyoma a he nga gagazid’a kam mbi
1Bugol ahle ndazina, Jesus nga mi tit kur ambas sa Galile-d’a kayam mi min tit kur ambas sa Jude-d’a d’i, kayam Juif-fâ a nga halam á tchid’a. 2Ata yi máma, vun til ma zlub’ud’a hi Juif-fîna mi ar go. 3Kayam ndata, Jesus b’oziyoma a dum ala: Ang tchola, ang i yam ambas sa Jude-d’a, kayam mang suma hata a gol sun nda ang nga lata mi. 4Kayam le sana mi min ala suma a wumu ni, mi nga le va kur ngeid’a d’i. Le ang nga lahle ndazina ni, ang tak tang ngei mi suma pet. 5B’oziyoma a dum na kayam a he nga gagazid’a kam mbi.
6Kayam ndata, Jesus mi dazi ala: Yi mana mba nga biya d’i, wani yi magina nga teteu. 7Suma duniyad’a a ndak á noyôgi d’i, wani a noyônu, kayam an nga ni le glangâsâ kazi ala sun mazi d’a led’a ni tchod’a. 8Agi igi vun til máma. An nga ni i vun til máma d’i, kayam yi mana ndak nga biya d’i. 9Bugol la mam dazi zla ndata dad’a, mi ar kaka yam andaga d’a Galile-d’a tua.
Jesus mi i ata yima vun til ma zlub’ud’a
10Wani bugol la b’oziyoma a i yima vun til máma dad’a, mam tamba pî mi i mi, wani mi i nga pid’ak ki, ni d’igi ngeid’a na. 11Juif-fâ a nga halam ata yima vun til máma, a dala: Mi nga ni lara ge?
12Ablau suma a kud’us tazi ngola yam zla mamba. Suma dingâ a dala: Ni sama djivina. Suma dingâ ala: Hawa! Ni ma vit suma woina. 13Wani sama de zla ndata woi pid’ak ir sumina nga d’i, kayam a nga le mandara Juif-fâ.
14Mba aduk vun til máma d’ad’ar, Jesus mi kal kur gong nga kud’ora hAlonid’a, mi nga hat suma. 15Juif-fâ a le atchap, a dala: Sa máma mi le nga hata yam tu d’uo ko mi na. Ni nana ba, mi we mbaktumba na ge?
16Kayam ndata, Jesus mi hulong dazi ala: Hat ndata ni manda d’i, wani ti tcholï nata Alo ma sununïna. 17Le sana mi min á le minda hAlonid’a ni, mba mi wala hat man ndata ti tcholï nata Alona, d’oze, an de ni zla manda ki yanda. 18Sama de zla mamba ki yama mi halî subur mamba ki yamu, wani sama hal subura hi Ma sunumïna, mam mi ma d’engzeng ma bei mbut ira kurum ba na. 19Moise mi hagi gata d’uo zu? Hina pî, adigagi ma ngomotna nga d’i. Ni kayam me ba, agi halan á tchid’a ge?
20Ablau suma a hulong dum ala: Ang wana nga ki muzuk ma tchona kurungû. Sama halang á tchid’a ni nge ge?
21Jesus mi hulong dazi ala: An le sunda tu ta agi pet lagi atchap kata. 22Moise mi hagi bayâ d’a ngata, wani ti tin ad’ud’a nata Moise si, nata abuyogi ngolo. Kayam ndata, agi nga ngad’agi sana bayâd’a ni kur bur ma sabatna. 23Le agi nga ngad’agi sana bayâd’a kur bur ma sabatna kayam agi tchilagi ni yam gata hi Moise-sa d’uo ni, ni kayam me ba, hurugi zal kan kayamba an sut sana woi kur bur ma sabatna ge? 24Ar agi kagi sariyad’a yam vama agi wagizi ki iragi hawa go na d’i, wani ar agi kagi ni sariya d’a d’ingêra.
Jesus ni Mesi zu?
25Kayam ndata, suma hiuna aduk suma Jerusalem-ma, a dala: Wana ni mam ma a nga halam á tchid’ina d’uo zu? 26Gola! Nga mi de zlad’a woi mbambak, wani azi nga dum va tu d’i. Na ni mei suma te yamba a we gagazi ala mam mi Mesi-yu zu? 27Fata Mesi mi mbad’a, sa nga mi we yima mi tcholï kuana d’i, wani ei wei yima sama wana mi tcholï kuana.
28Ata yi máma, Jesus nga mi hat suma kur gong nga kud’ora hAlonid’a, mi de ki delem akulo ala: Agi wan gagazi, agi wagi yima an tcholï kuana gagazi mi! Wani an mba ni yam tan ndi. Mam ma sununïna ni Ma gagazina, wani agi wum nga d’i. 29An wumu, kayam an tcholï ni gevemu, ni mam ba, mi sununïya.
30Kayam ndata, azi halam á ved’a, wani sa mi tin abom atam mbi, kayam yi máma ndak nga biya d’i. 31Wani suma ngola aduk ablau suma a he gagazid’a kamu, a dala: Fata Mesi mi mbad’a, mba mi lahle suma ndandalâ kal sama wana zu?
A sun azigarâ á ve Jesus
32Fariziyêna a hum ablau suma a nga kud’us tazi yam zla mamba. Kayam ndata, nglo suma ngat buzuna azi ki Fariziyêna a sun azigarâ ala a vumu. 33Kayam ndata, Jesus mi dala: An nga ki sed’egi tua ndjö, bugol an mba ni i gen mam Ma sununïna. 34Agi mba halanu, agi mba fan ndi, kayam yima an mba i kuana, agi ndak á igi kua d’i.
35Kayam ndata, Juif-fâ a de tazi ala: Sa máma, mi i ni lara ba, ei ndak á feizi d’uo ge? Mi i ni gen Juif suma a b’rau woi aduk suma Gre’â á hat suma Gre’â zu? 36Zla d’a mam dat ala: Agi mba halanu, agi mba fan ndi, kayam yima an mba ni i kuana, agi ndak á igi kua d’uo d’a, ad’ut nana ge?
Mbiyo ma arina halumina
37Kur bur ma dabid’a hi vun tilîna, ni bur ma ngolâ, Jesus mi tchol akulo avok ablau suma, mi de ki delem akulo ala: Le sa vunam mi so ni, mi mbeï gevenu, mi tche. 38Sama he gagazid’a kana, mbiyo ma arina halumina mba mi lau kurum d’igi mbaktumba hAlonid’a ti de na. 39Jesus mi de zla ndata ni yam Muzu’â hAlona ma suma a he gagazid’a kama a mba vuma, kayam Muzu’â nga bei humï tua, kayam Alona mi subur nga Jesus biya d’i.
Ablau suma a wal mbà yam Jesus
40Suma hiuna aduk ablau suma a hum zla ndata, a dala: Gagazi, sa máma ni Ma djok vun Alona máma.
41Suma hiuna a dala: Sa máma ni Mesi.
Wani suma hiuna a dala: Na ni Mesi mi ndeï ni yam ambas sa Galile-d’a zu? 42Mbaktumba hAlonid’a ti dala: Mesi mba mi ndeï nad’u andjafâ hi David-na kur azì ma Betelehem ma David mi kak kuana d’uo zu? 43Kayam ndata, ablau suma a wal mbà kamu. 44Suma hiuna adigazi a min ala a vumu, wani sama mi tin abom atama nga d’i.
Hur ma b’ala hi suma te yamba hi Juif-fîna
45Kayam ndata, azigarâ a hulong gen nglo suma ngat buzuna azi ki Fariziyêna. Azi djop azigarâ ala: Ni kayam me ba, agi mbagi ki sed’em mbuo ge?
46Azigarâ a hulong dazi ala: Dedei sa mi de nga zlad’a d’igi sa máma na d’i.
47Kayam ndata, Fariziyêna a hulong dazi ala: Agi vid’igi ni woi hina mi d’a? 48Sama ding aduk nglo suma ngat buzuna d’oze aduk Fariziyêna mi he gagazid’a kam zu? 49Wani ablau d’a wan nda ti we nga gata d’uo d’a ni d’a a gat vunid’a.
50Nikodem ma i gen Jesus andjege adjeuna, mi nga adigazi mi. Mi dazi ala: 51Gat meid’a ka sariyad’a yam sana adjeu bei humum zla mamba bei we vama mi luma mi zu?
52Azi hulong dum ala: Angî ma Galile-na mi zu? Ang fek kur mbaktumba hAlonid’a, ang mba wala ma djok vun Alo tu pî nga mi ndeï kur Galile d’i. [53Azi nge nge pî mi i avo hatamu.
Currently Selected:
Jean 7: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.