Wlɔ 8
8
'Wugoa yaan geyliin ‑sa
1Na ‑pɔtɔnʋ, maa ‑ɔ ‑kʋ 'lɛ Zozi Klisi nɩkplaan na, gbaylɩsalɩɛ 'tanɩ mala da ‑glɩ. 2Sa, 'Wugoa 'la ‑jlɩmaa, ‑a nyɩ 'lɛ jabhʋa ‑ʋ ‑kʋ 'lɛ Zozi Klisi nɩkplaan na, a yaan nyinyi 'la ‑jlɩmaa ‑a lamʋ 'lɛ 'kwɩ na 'la geylia nɩkplaan ‑sa. 3Ɩmɩa ‑jlɩmaa mino 'taa 'lɛ nʋlɩɛ, sa 'nyɛkɛa 'nyɩ 'taa 'maa 'tɛtɩ na, Laagɔ yɩɩ nʋ. Daa nyinyi 'la gbʋ, ɔ ‑la 'lɛ ɔmɔ 'titi ɔla 'Cʋa ‑ala nyinyinʋnyɛkɛa 'la kʋkʋkʋlɩɛa nɩkplaan na, ɔ ya nyinyi 'nyɛkɛa nɩkplaan gʋalɩ, 4ɩya 'kʋnylugolulɩɛa ‑jlɩmaa 'clalɩ 'lɛ na, ɩ ka ‑anyɩ nɩkplaan 'kʋglalɩlɩ, ‑anyɩa, ‑ɔ namʋnʋ 'tanɩ 'lɛ 'nyɛkɛa 'la ‑kwleliea ‑zɔn, ‑ma ‑ɔ namʋnʋnɩ 'lɛ 'Wugoa 'la ‑kwleliea ‑zɔn na. 5‑Masa, maa ‑ɔ ‑kʋ 'lɛ 'nyɛkɛa 'la ‑kwleliea ‑zɔn na, 'nyɛkɛa 'la nʋnʋgbɩa 'la wɔlɩ ma gugu 'lɛ, ‑ma maa ‑ɔ ‑kʋ 'lɛ 'Wugoa 'la ‑kwleliea ‑zɔn na, 'Wugoa 'la nʋnʋgbɩa 'la wɔlɩ ma gugu 'lɛ. 6'Nyɩ 'nyɛkɛa, kwɩɩ ɛ lamʋ 'lɛ, ‑ma 'Wugoa, jabhʋ ɩya pupue ‑ʋ lamʋ 'lɛ. 7Sa 'nyɛkɛa mʋnʋ Laagɔ gbatlɩ, ɛla 'nyi yi 'ta ɔla ‑jlɩmaa, 'nyɩ ɛ mino 'ta ‑ylɛylɛ ɩya ɛla 'nyi 'kaa yi. 8'Nyɩ maa ‑ɔ ‑kʋ 'lɛ 'nyɛkɛa 'la ‑kwleliea ‑zɔn na, maa cɩ 'ta mino ɩya ma 'ka Laagɔ 'tʋ ‑pla.
9‑Ma anyɩ, a 'ta 'nyɛkɛa 'la ‑kwleliea ‑zɔn ‑kʋ, ‑ma 'Wugoa 'la ‑kwleliea ‑zɔn a ‑kʋ 'lɛ. ‑Masa, Laagɔ 'la 'Wugoa ‑kʋ anyɩ nɩkplaan na. Gbazɩ nclɔɔ 'ta Klisi 'la 'Wugoa ‑ka na, ɔ 'ta Klisi 'nɔ ‑glɩ. 10'Nyɩ Klisi ‑ka anyɩ nɩkplaan ‑kʋ na, ala 'nyɛkɛa cɩ 'ka 'ku 'bhlɩ, nyinyia 'la gbʋ. ‑Ma 'Wugoa cɩ anyɩ jabhʋ 'nyɩ, 'kʋnylugolulɩɛa 'la gbʋ. 11'Nyɩ ɔmɔa ‑ɔ ‑bho 'lɛ Zozi Klisi 'kwɩɩn 'kʋ na, ɔla 'Wugoa ‑ka anyɩ nɩkplaan ‑kʋ na, ɔ cɩ 'ka ɔla 'Wugoa ‑ʋ ‑kʋ 'lɛ anyɩ nɩkplaan na ‑masɛ 'kʋ 'plɩlɩ, ɩya ɔ 'ka ala 'nyɛkɛa ‑ɛ ‑cɩ ka 'lɛ 'ku na, jabhʋa 'nyɩ.
12Na, bholiecɩnyɩ, ‑a ‑ka dlu, ‑ma ‑n 'ta 'nyɛkɛa 'la dlu ‑a 'ta 'lɛ ‑ka, ɩya ‑a ka sɛ saa 'nyɛkɛa ‑wa 'lɛ na namʋ. 13Sa a ‑ka saa 'nyɛkɛa ‑wa 'lɛ na namʋ na, a cɩ 'ku. ‑Ma gbazɩ a ‑ka 'Wugoa 'kʋ 'plɩlɩ 'nyɩ a ‑ka gba ala 'nyɛkɛa 'la nʋnʋgbɩa ‑ka 'ku na, a cɩ jabha. 14‑Masa, maa ‑anʋa ‑ɔ namʋnʋ 'lɛ Laagɔ 'la 'Wugoa nɩkplaan na, maa ‑ɔ ‑glɩ 'lɛ Laagɔ 'la 'cuo. 15'Nyɩ ‑n 'ta geyli 'la 'wugo a 'ta 'lɛ 'lɩ ɩya ŋanɔ 'ka ‑awlɛ anyɩ 'bhla, ‑ma Laagɔ 'la 'cuoa 'la 'Wugoa a 'lɩ 'lɛ. Ʋmʋ ‑ʋ gba 'lɛ 'nyɩ ‑a cla 'lɛ lebhe: «Aba», ‑a «To». 16'Wugo ‑naa, ʋmʋ 'titi li ‑ala 'wugwia 'la ‑danʋfʋɛ lebhe ‑a ‑glɩ Laagɔ 'la 'cuo. 17Na, ‑a ‑glɩ 'lɛ Laagɔ 'la 'cuo na, ‑a ‑glɩmʋ ɔla ‑ajaalinya, ‑a ‑glɩ Laagɔ 'la ‑ajaalinya 'nyɩ ‑aya Klisi 'wlalɩ 'lɛ ‑aja 'kʋ. ‑Masa ‑a ‑yɔɔsɔ 'wlalɩ 'lɛ ɔla 'kwlɩbhɩɛa 'kʋ na, ‑a ‑yɔɔsɔ cɩ ɔla 'klʋagbaa ‑ma 'kʋwlalɩ.
'Klʋagbaa ‑a -cɩ ka 'lɛ 'lɩ na
18N gugu lebhe bhlɛsʋʋ ‑naa nɩkplaan 'la 'kwlɩbhɩɛa 'ta lʋʋ ‑ylɛylɛ ‑glɩ, 'klʋagbaa ‑a -cɩ ka 'lɛ 'lɩ na 'la 'klʋʋn. 19Sa ‑laagɔzɔn bhuoa ‑bɛ lebhe Laagɔ wlaa ɔla 'cuoa 'la 'klʋagbaa ‑zɔn 'faanfan, 20‑ofi lebhe ɩ ‑kʋ 'nifinifi 'la ‑kwlelie ‑zɔn. ‑N 'ta ɩmɩ 'titii ‑ɩ 'ta 'lɛ sɛɛ wabha, ‑ma ɔmɔ ‑ɔ nʋɩ 'lɛ sɛɛ na, ɔmɔ ‑ɔ wabhɩɩa 'lɛ. 'Bhlɩmɔɔn ‑laagɔzɔn bhuoa 'tɛlɩ pɔlɛ 'kʋ lebhe 21ɩmɩ ‑ma ɩ cɩ 'ka 'tɛtɩa ‑ɩ gba 'lɛ 'nyɩ lɩɩa ‑tɛtɛa plɩ 'lɛ na, ɩla geylia nɩkplaan 'wlʋ ɩya ɩ 'ka Laagɔ 'la 'cuoa 'la ‑ncɩkalɩɛa ɩya mala 'klʋagbaa nɩkplaan kʋmʋ. 22‑Masa, ‑a ‑ci lebhe ‑laagɔzɔn bhuoa bhalɩ ka ‑azla le saa valʋ bhla 'lɛ 'ŋlɔ na. 23'Nyɩ ‑n 'ta ɩmɩ bhlo, ‑ma ‑anyɩa Laagɔ pʋ 'lɛ 'kʋklʋʋn 'nyɩ ɔ 'nyɩ 'lɛ 'Wugoa na, ‑anyɩ ‑masɛɛ ‑a bhalɩmʋ pɔlɛ 'ciin, 'nyɩ ‑a ‑bɛ le ɔ 'ka ‑anyɩ ɔla 'cuo plelɩɛ bhɩalɩ ɩya ɔ 'ka ‑ala 'nyɛkɛa geylia nɩkplaan ‑sa 'kplookʋ. 24Sa ‑a ya gbʋʋnsalɩɛ 'lɩ 'bhlɩɩ, ‑ma pɔlɛkʋtɛlɔ nɩkplaan ‑a 'lɩlɩɩ 'lɛ. ‑Ma gbazɩ nclɔɔ ‑kanɩ ɩmɩa ɔ 'tɛlɩa 'lɛ pɔlɛ 'kʋ na 'lɩ na, ɩ 'tanɩ pɔlɛkʋtɛlɔ ‑glɩ. Ɩmɩa nclɔɔ ‑jlɛ 'lɛ na, 'nsasa ɔ cɩ 'kanɩ ‑awlɩɩ 'lɛ pɔlɛkʋtɛbhalɩtɛbhalɩlɩ bha? 25‑Ma gbazɩ ɩmɩa ‑a 'ta 'lɛ ‑jlɛ na, ‑a ‑ka ɩla pɔlɛkʋtɛlɔ ‑ka na, pɔɔklalɩɛ nɩkplaan, ‑a ‑bɛlɩɩ 'lɛ. 26'Sɛtɛɛ bhlogbɩɩ, 'Wugoa ‑masɛ ci ‑anyɩ 'kʋ, ‑cɩcɩa ‑a 'ta 'lɛ ‑ka na ɩla gbʋ, sa ‑a 'ta saa ‑a ‑cɩ ka 'lɛ bhibhiebhibhieli na ‑ci. ‑Ma 'Wugoa 'titi bhibhie ‑ala da, bhalɩlɩɛa nclɔɔ cɩ 'ta 'lɛ dɩbalɩlɩɛ mino na nɩkplaan, 27'nyɩ ɔmɔa ‑ɔ ‑jlɛ 'lɩ pɔlɩa nɩkplaan, ɔ ‑ci ɩmɩa 'Wugoa gugu 'lɛ na, ‑masa ɩmɩa Laagɔ ‑wa 'lɛ na, ɩla 'sasʋʋn ʋ bhibhieli ‑kplɔkplɔnyaa 'la da.
28'Nyɩ ‑a ‑ci ‑awlɛ lebhe ‑tɛtɛa 'fɩan lalɩ maa ɔ ‑wa 'lɛ Laagɔ na 'nanɩ, maa ɩ ‑plɔ 'lɛ 'tʋ le ɔ la na. 29Maa ɔ pʋ 'lɛ 'kʋklʋʋn, 'nyɩ ɔ sla 'lɛ de na, ɔ ya ‑awlɛ maa ‑sa le ma 'ka ɔla 'Cʋa 'bhisa 'kʋ 'plɩ, ɩya ɔ 'ka bholiecɩ ‑bhutukpa 'la ‑lɩɩkpasa 'plɩ. 30Na, maa ɔ pʋ 'lɛ 'kʋklʋʋn, 'nyɩ ɔ ‑sa 'lɛ na, ɔ ya ‑awlɛ maa la, 'nyɩ maa ɔ la 'lɛ na, ɔ ya ‑awlɛ maa 'kʋnylugolunya ple, 'nyɩ maa ɔ ple 'lɛ 'kʋnylugolunya na, ɔ ya ‑awlɛ 'lɛ maa 'klʋgba.
Laagɔ 'la ‑walʋa 'ghli
31Na, wɔɔsaa a ‑cɩ kanɩ ‑awlɛ 'lɛ nyɩtɛ bha? Laagɔ ‑ya ‑anyɩ ‑ka ‑plɔ na, ncaasaa ‑ɔ ‑cɩ kaa 'lɛ ‑anyɩ gbatlɩcili bha? 32Ɔmɔa ‑ɔ 'ta 'lɛ ɔmɔ 'titi, ɔla 'Cʋa 'kʋkabha, 'nyɩ ɔ yɔɔ 'lɛ ‑sa, ‑anyɩa 'fɩan 'la gbʋ na, 'nsasa 'ɔ cɩ taa 'lɛ lɩɩa ‑tɛtɛa ɔla 'Cʋa 'kʋ ‑gbɛ, ɩya ɔ 'ka 'lɛ ‑anyɩ 'nyɩ bha? 33Na, ncaasaa ‑ɔ ‑cɩ kaa 'lɛ maa Laagɔ sla 'lɛ de na, wɔlɩ 'kʋ gɩ bha? Nclɔɔ bhlogbɩɩ 'ta ‑kʋ, ɩya ɔ 'ka maa wɔlɩ 'kʋ gɩ, sa Laagɔ ple maa 'kʋnylugolunya na. 34'Nyɩ ncaasaa ‑ɔ cɩ kaa 'lɛ maa gbaylɩsa bha? Nclɔɔ 'ta ‑kʋ, ɩya ɔ 'ka maa gbaylɩsa, sa Zozi Klisi ya 'ku, nyɩ ‑awlɛ, ɔ ya 'kwɩɩnkʋbho. Ɔ ‑kʋ Laagɔ 'lipasɔ 'kʋ, 'nyɩ ɔ bhibhie ‑ala da.
35Na, ncaasaa ‑ɔ cɩ ‑kaa 'lɛ ‑aya Klisi 'la ‑walʋa cɩ ‑sasalɩ bha? Kwlɩbhɩɛ bha? Pɔɔplelie bha? ‑Ala 'kwlaanpalɩɛ bha? Ŋɔmʋ bha? 'Yalɛ bha? 'Kwɩneenkʋlɩɛ ‑aana, 'kwɩ bha? 36Zieziewɔlɩa* cla lebhe:
‑Naa gbʋ ‑a ‑kʋ 'lɛ 'kwɩ neen zezezeli bhuoa 'fɩan,
'nyɩ ma nʋ 'lɛ ‑anyɩ le mlaa ma mʋ 'lɛ 'bhlakan na 'bhisa.
37‑Ma ɩmɩ ‑naa ‑tɛtɛa nɩkplaan, ‑ala ‑sɩalɩɛa 'ta 'mʋsʋ ‑ka, ɔmɔa ‑ɔ wabha 'lɛ ‑anyɩ na 'la klalɩɛa 'la gbʋ. 38‑Ghɛɛ, n 'tɛlɩ pɔlɛ 'kʋ lebhe lʋʋ bhlogbɩɩ cɩ 'ta ‑ayɔɔsɔ 'la ‑walʋa cɩ ‑sasalɩ. 'Kwɩa, jabhʋ, 'bhlaandleecɩa*, ‑buun ‑wugwia ‑ɩ wa 'lɛ lebhe ɩ ka ‑kwle na, 'bhlɛsʋʋ ‑naa, 'kʋklʋʋn ‑naanʋa, ‑kwletɛtɩ, 39‑laagɔɔn 'la 'tɛtɩa ɩya ‑gluu ‑naanɩa, ‑aana nʋnʋlɩɩa ‑tɛtɛa, lʋʋ bhlogbɩɩ cɩ 'ta mino, ɩya ʋ 'ka ‑aya Laagɔ 'la ‑walʋa ɔ 'plɩlɩ 'lɛ ‑ala ‑Kwlenyɔ Zozi Klisi 'kʋ 'nyɩ ɔ pala 'lɛ ‑anyɩ na cɩ ‑sasalɩ.
Currently Selected:
Wlɔ 8: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.