Wlɔ 14
14
A 'la ‑pla a 'ye 'tɩtɩ
1A kla ɔmɔa ‑ɔla pɔɔtɛtɛa 'taan 'lɛ 'tɛ na 'nanɩ, ɩya a 'la kopea ɩmɩa ɔ gugu 'lɛ na 'ciin, ɩya a 'la ‑plɔɔ 'tɩtɩ. 2‑Masa, ‑anɔ bhlo 'la pɔɔtɛtɛa nyɩɔ ‑jioli le ɔ li lɩɩa ‑tɛtɛa, ‑ma ‑da -naanɔ bhlo li 'ta lɩɩa ‑tɛtɛa, ɔla pɔɔtɛtɛa ‑ɛ 'taan 'lɛ 'tɛ na 'la gbʋ. 3Na, ɔmɔa ‑ɔ li 'lɛ na, ɔ 'la gugua lebhe ka ɔ zi 'lɛ ɔmɔa ‑ɔ li 'ta 'lɛ na 'kʋ, ɩya ɔmɔa ‑ɔ li 'ta 'lɛ na, ɔ 'la ‑plaa ɔmɔa ‑ɔ li 'lɛ na 'tɩtɩ, sa Laagɔ yɔɔ 'ma na. 4Na, ‑mɔ, ncaasaa ‑n ‑glɩa 'lɛ ɩya n kaa 'lɛ lobhocoa ‑ɔ 'ta 'lɛ 'naanɔ ‑glɩ na 'la 'tɩtɩpla bha? Ka ɔ ‑ka kpaan 'nylugo ‑aana ka ɔ ‑ka bhlio, ɔ toa 'la wɔlɩ ɩ ‑glɩ 'lɛ. 'Nyɩ ɔ cɩ ka kpaan 'nylugo, sa ‑Kwlenyɔ ‑ka 'tɛtɩ ɩya ɔ 'kɩɩ nʋ, ɔ 'kɔɔ 'nyɩ.
5‑Anɔ bhlo la da, clɩɩa ‑tɛtɛa 'ta 'wlʋlʋ, 'nyɩ ‑anɔ bhlo 'la da, 'ɩ ‑tɛtɛa 'wlʋlʋ 'lɛ. ‑Ma 'naa nclɔɔ nclɔɔ kalɩ ɩmɩa ɔ gugu 'lɛ na ɩla pɔɔtɛtɛ. 6Ɔmɔa ‑ɔ gugu 'lɛ lebhe clɩɩa ‑tɛtɛa 'ta 'wlʋlʋ na, ‑Kwlenyɔa 'la gbʋ ɔ nʋ 'lɛ sɛɛ. 'Nyɩ ɔmɔa ‑ɔ li 'lɛ lɩɩa ‑tɛtɛa na, ‑Kwlenyɔa 'la gbʋ ɔ nʋ 'lɛ sɛɛ, sa ɔ bhɔlʋ Laagɔ na. Ɔmɔa ‑ɔ li 'ta 'lɛ lɩɩa ‑tɛtɛa na, ‑Kwlenyɔa 'la gbʋ ɔ nʋ 'lɛ sɛɛ, sa ɔmɔ ‑ma ɔ bhɔlʋ Laagɔ na. 7‑Anyɩ sidiin, nclɔɔ bhlogbɩɩ 'ta ɔmɔ 'titi ɔla gbʋ ‑kʋ. 'Sɛtɛɛ bhlogbɩɩ nclɔɔ 'ku 'ta ɔmɔ 'titi ɔla gbʋ. 8Sa, ka ‑a ‑ka ‑kʋ na, ‑Kwlenyɔa 'la gbʋ ‑a ‑kʋ 'lɛ. 'Nyɩ ka ‑a ‑ka 'ku na, ‑Kwlenyɔa 'la gbʋʋ, ‑a ku 'lɛ. Na, ka ‑a ‑ka ‑kʋ, ‑aana ka ‑a ‑ka 'kuo na, ‑a ‑glɩ ‑Kwlenyɔa 'la ncɛlɩ. 9Sa, ka Klisi 'ku 'lɛ 'nyɩ ɔ ya 'lɛ 'kwɩɩnkʋbho le ɔ 'ka 'ku ɩya ‑jajanya 'la ‑Kwlenyɔ 'plɩ.
10‑Anyɩa 'fɩan, ‑a cɩ ka Laagɔ ‑deliin 'nylugo ɩya ɔ 'ka ‑anyɩ 'tɩtɩpla. Na, ‑mɔɔ, 'lɩsaa 'la gbʋ ‑n plaa 'lɛ ‑n bholi 'tɩtɩ bha? 'Nyɩ ‑mɔ, 'lɩsaa 'la gbʋ ‑n gugua 'lɛ lebhe ‑n zia ‑n bholi 'kʋ bha? 11Sa, ɩ ‑zieo lebhe:
‑Kwlenyɔ nabhe: N ‑ja 'lɛ 'nyɩ ‑n ‑kʋ 'lɛ na,
'kukowlia ‑tɛtɛa cɩ 'kaan deliin ‑kukoonkplii sa sla
ɩya nia ‑tɛtɛa 'kaan 'klʋgba.
12'Lɩka ‑sa, nclɔɔ nclɔɔ cɩ 'ka 'lɛ Laagɔ ‑deliin, ɔmɔ 'titi ɔla da nyɩtɛ.
‑A la faa a 'ye nyinyiin
13Na, ‑a 'nylugolu 'tɩtɩa ‑a plaplalɩ 'lɛ na. ‑Ma, ka 'nyɩ a cibhlili wɔlɩ nɩkplaan gbazlɩlɩsa, ɩya a 'la 'ka cokwiea ‑ɛ ‑cɩ ka 'lɛ a bholi sapalɩ, ‑aana ‑gbosua ‑ʋ cɩ 'kɔɔ 'lɛ 'kʋbhli na 'plɩ. 14‑Amʋ, n ‑ci sɛɛ, 'nyɩ n ‑ka ‑Kwlenyɔ Zozii 'la pɔɔtɛtɛ lebhe ɩ ‑glɩ ‑nʋawlɛ lebhe lililʋʋ bhlogbɩɩ 'ta ‑kʋ ɩya ʋ 'la ka ‑kplɔ. ‑Ma ‑ɔmɔa ‑ɔ lɩ 'lɛ lebhe ʋ 'ta ‑kplɔ na, ɔla daa ʋ 'ta 'lɛ ‑kplɔ. 15‑Ma gbazɩ ‑n ‑ka lʋʋ lida ‑kʋ 'nyɩ ɩ ‑ka ‑n bholi cɩɩnkalɔ nɩkplaan zʋ na, ‑walʋ nɩkplaan ‑n namʋnʋnɩ ‑awlɛ 'lɛ bha? 'Dɛndlana, lilinyɩ 'wluku, ‑naa gbaa ɩya ‑n bholia 'la gbʋa Klisi ya 'lɛ 'ku na, ɔ 'la mlɔa. 16Na, lʋʋa ‑ʋ nanɩ 'lɛ ala da na, ʋ 'la gbaa ɩya ma 'la nyɩtɛa ala wɔɔnyinyi. 17Sa, Laagɔ 'la ‑Kwleliea, 'ta nyalilie ‑aana nʋmlalɩɛ 'la wɔlɩ ‑glɩ, ‑ma 'kʋnylugolulɩɛ, pupue ɩya pɔlɛkʋmɛnɔa ‑ɩ 'wlʋlʋ 'lɛ ‑Kplɔkplɔ ‑Wugoa* nɩkplaan na, 'la wɔlɩ ɩ ‑glɩ 'lɛ. 18Nclɔɔ ‑ka ‑sa Klisi lobho na, dɛ ‑ɔ ‑ka 'lɛ Laagɔ 'tʋ 'nyɩ ncɛlɩ wabhɔɔ 'lɛ.
19‑A 'matɩ ɩmɩa ‑ɩ lamʋ 'lɛ pupue 'nyɩ ‑ɩ 'tɛbhalɩ 'lɛ nclɔɔ nclɔɔ 'la pɔɔtɛtɛ nɩkplaan na. 20Na, lililɩɩ 'wluku, ‑naa nyumoa Laagɔ 'la lobholia. Lililɩɩa ‑tɛtɛa ‑kplɔ 'bhlɩɩ, ‑ma ɩmɩa ‑n ‑ci 'lɛ lebhe ‑n ka li, ɩ cɩ gba 'nyɩ ‑n 'yʋ cɩ nyinyiin bhlili na, ɩ 'ta ‑fata le ‑n lii. 21Ɩmɩa ‑ɩ nanɩ 'lɛ nʋda na, ɩmɩ ‑ɩ ‑glɩ le ‑naa lia mlɛ, ‑naa 'mlaa nʋ, 'naa nʋa lʋʋ bhlogbɩɩ ‑ʋ cɩ 'lɛ gba 'nyɩ ‑n bholi cɩ 'lɛ nyinyiin bhlili na. 22Na, ‑mɔ, wɔlɩa ‑n gugu 'lɛ lebhe ɩ nanɩ na, ‑n ‑ya Laagɔ ‑gbaaglɩɩn 'la wɔlɩ ɩ ‑glɩ 'lɛ. Ɔ kʋ 'nanɩ ɔmɔa ‑ɔ ‑pla 'ta 'lɛ ɔcɩ 'tɩtɩ, wɔlɩa ɔ gugu 'lɛ lebhe ɩ nanɩ na ɩla gbʋ na. 23‑Ma, ɔmɔa ‑ɔ kʋ 'lɛ lʋʋ lida 'nyɩ ɔla pɔlɛ 'tɔɔ 'lɛ 'cɩɩ ‑kʋ na, ɔ ya ɔla gbaylɩsalɩɛ tooto 'lɩ, sa ɩ 'ta pɔɔtɛtɛ 'la nʋnʋgbɩ ‑glɩ na. ‑Masa, nʋnʋgbɩa ‑tɛtɛa, ‑ɩ ‑nʋnʋɔ 'ta 'lɛ pɔɔtɛtɛ nɩkplaan na, ɩ ‑glɩ nyinyi.
Currently Selected:
Wlɔ 14: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.