Zan 16
16
1«Ka n solu 'lɛ anyɩ ɩmɩ ‑naa ‑tɛtɛa, ɩya ala pɔɔtɛtɛa 'la 'ka bhli. 2Ma cɩ 'ka anyɩ bhibhiepalɩa* ‑zɔn 'tli. Ɩya clɩɩ bhlo 'ka ŋeni, ɩya maa ‑ɔ ‑cɩ ka 'lɛ anyɩ 'bhla na, ma 'ka gugu lebhe, Laagɔ ma gʋgwla 'lɛ ‑sa. 3Ka ma cɩ 'ka 'lɛ sɛɛ nʋ, sa ma 'ta Toa cibhlili naa, ma 'taan cibhlili. 4‑Ma ka n solu 'lɛ anyɩ ɩmɩ ‑naa ɩya daa mala clɩɩa cɩ 'ka 'lɛ ŋeni na, a 'ka sɛ luoli lebhe n yaa 'mɩɩ anyɩ solu.
‑Kplɔkplɔ ‑Wugoa 'la nʋnʋlobholia
N 'ta anyɩ sɛɛ bhɔdaa solu, sa n ‑kʋ kaa anyɩ sidiin na. 5‑Ma ‑pɔtɔnʋ, ka n mʋnɩ ɔmɔa ‑ɔ lobhuun 'lɛ na cɩ 'nyɩ anyɩa nɩkplaan bhlogbɩɩ 'cla 'taan gbazɩa n mʋ 'lɛ 'la wɔlɩ neen. 6‑Masa cɩɩnkalɔ ya ala pɔlɩa yeli, ɩmɩ ‑naa solu 'lɛ anyɩ na 'la gbʋ. 7‑Ma 'bhlɩmɔɔn ‑nʋawlɛ n solu 'lɛ anyɩ. Ɩ nanɩ ala da lebhe n mʋ, ‑masa n 'ta mʋ na, 'kʋcinyɔa cɩ 'ta anyɩ 'kʋ ci. ‑Ma gbazɩ n ‑ka mʋ na, dɛ n cɩ 'kɔɔ 'lɛ anyɩ ‑la. 8Na, ɔ ka ci na, ɔ cɩ 'ka ‑laagɔzɔan ɩla mlɔlɩɛa ɩ mlɔ 'lɛ nyinyi, 'kʋnylugolulɩɛ ɩya 'tɩtɩplalɩɛa 'la gbazɔ na, pala. 9Mala nyinyia ‑glɩ 'lɛ lebhe ma 'ta ‑wabha lebhe ma 'kaan mala pɔɔtɛtɛa 'kʋ zʋ. 10'Kʋnylugolulɩɛa 'la gbazɔ, ‑laagɔzɔan ya ‑awlɛ mlɔ, sa ka n mʋ 'lɛ Toa cɩ 'nyɩ a cɩ 'tanɩɩn 'lɩ. 11Tɩtɩplalɩa 'la gbazɔa, Laagɔ ya 'wugo ‑nyuynua ‑ʋ ‑kwle 'lɛ ‑laagɔzɔan na tooto 'gesalɩ.
12N ‑ka ‑awlɛ wɔɔbhutukpa ɩya n 'ka anyɩa solu, ‑ma a cɩ 'ta ka kɩɩ mino. 13‑Ma daa ‑nʋawlɛɛ ‑Wugoa cɩ 'ka 'lɛ ci na, ʋ cɩ ka gba ɩya a 'ka ‑nʋawlɛa ‑tɛtɛa cibhlili. Sa ‑n 'ta ʋla 'wluun ʋ cɩ 'ta 'lɛ nyɩtɛlɩ, ‑ma ɩmɩa ʋ 'nu 'lɛ na, ɩmɩ ʋ cɩ 'ka 'lɛ anyɩ solu ɩya ʋ 'ka anyɩ wɔlɩa ‑ɩ ‑cɩ ka 'lɛ ŋeni na ‑zɔnsa. 14Ʋ cɩ 'kaan 'klʋgba, sa 'na niwɔlɩa, ɩmɩ ʋ cɩ 'ka 'lɛ anyɩ ‑zɔnsa. 15Lɩɩa ‑tɛtɛa Toa ‑ka 'lɛ na, ɩ ‑glɩ 'naanɩ. Na, ɩla gbʋ dɛ n 'cla 'lɛ lebhe ʋ cɩ 'ka 'na niwɔlɩa 'ma ɩya ʋ 'ka anyɩ solu.
Ala cɩɩnkalɔa cɩ 'ka pɔlɛkʋmɛnɔ kaci
16Clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka ‑awlɛɛn 'lɩ.» 17Na, ɔla gɩlɩnyaa* ‑anʋa 'claclalɩa neen lebhe: «Ɔ claa 'lɛ lebhe: Clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka ‑awlɛɛn 'lɩ, 'nyɩ ɔ cla ‑awlɛ 'lɛ lebhe: N mʋ ka Toa cɩ na, wɔɔsaa ɔ na ɔ 'kaa 'lɛ nyɩtɛ bha?» 18'Nyɩ ma claa ‑awlɛ lebhe: «Clɩɩklipɛa, 'nsasa ɩ sasalɩa 'lɛ ‑zɔn bha? ‑A 'nu 'ta wɔlɩa 'titia ɔ na ɔ 'ka 'lɛ nyɩtɛ na.»
19Na, Zozii ‑ci 'lɛ sɛɛ lebhe ma 'matɩa lebhe ma 'kaa 'mɔɔ neencla na, ɔ ya maa 'cla lebhe: «N 'cla 'lɛ anyɩ lebhe clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka ‑awlɛɛn 'lɩ na, ɩla ‑zɔn a 'matɩ 'lɛ lebhe a 'ka cibhlili, dɛ anyɩ bhlobhlo 'claclalɩ 'lɛ neen bha? 20N solu anyɩ, ɩ ‑glɩ ‑nʋawlɛ, daa ‑laagɔzɔan cɩ 'ka 'lɛ ‑pɔpʋɛ nʋ na, anyɩ, a cɩ 'ka 'tu ɩya a 'ka cɩɩnkalɔɔn kʋ. A cɩ 'ka cɩɩnkalɔɔn kʋ, ‑ma ala cɩɩnkalɔa cɩ 'ka pɔlɛkʋmɛnɔ kaci. 21'Ŋlɔ ‑kanɩ 'matɩ lebhe ɔ 'ka valɩ na, ɔ kʋ cɩɩnkalɔɔn, ‑masa ɔla valɩda ya ŋeni na, ‑ma daa ɔ ya 'lɛ 'cileea valɩ na, ɔ bolu ɔla 'kwlɩbhɩɛa 'kʋ 'nyɩ ‑pɔpʋɛ bhlilio nɩkplaan, sa ɔ ya nclɔɔ 'pʋpʋa 'kʋ ‑la na. 22Na, 'sɛtɛɛ bhlogbɩɩ a ‑kʋ 'lɛ ‑pɔtɔnʋ cɩɩnkalɔɔn. ‑Ma n cɩ 'ka ‑awlɛ anyɩ 'lɩ ɩya pɔlɛ 'kʋ 'ka anyɩ mɛma, ɩya pɔlɛkʋmɛnɔ ‑naa, nclɔɔ bhlogbɩɩ 'la kʋʋ anyɩ ‑salɩ.
23Na, daa 'dɛ 'la clɩɩa cɩ 'ka 'lɛ ŋeni na, 'a cɩ 'tanɩɩn wɔlɩ ‑ylɛylɛ neencla. ‑Ghɛɛ, n solu anyɩ, ɩ ‑glɩ ‑nʋawlɛ, lʋʋa ‑tɛtɛa a cɩ 'ka 'lɛ Toa 'na 'ŋlɩa nɩkplaan 'clalɩ na, ɔ cɩ 'kʋʋ anyɩ 'nyɩ. 24‑Ma daa tootoa ‑aan ‑yaka, a 'ta ka ‑azla lʋʋ bhlogbɩɩ 'na 'ŋlɩa nɩkplaan 'clalɩ. A 'clalɩ ɩya a 'ka 'lɩ ɩya ala pɔlɛkʋmɛnɔa ka 'kʋglalɩ.
Zozii ya ‑laagɔzɔan ‑sɩa
25‑Nyandla nɩkplaan n solulu 'lɛ anyɩ ɩmɩ ‑naa ‑tɛtɛa, ‑ma clɩɩ bhlo cɩ 'ka ŋeni ɩya n 'la kanɩ anyɩ ‑sa solu. ‑Ma n cɩ 'kanɩ anyɩ Toa 'la wɔlɩa 'kpataa solu. 26Na, 'dɛ 'la clɩɩa 'kʋ, a cɩ 'kanɩ 'na 'ŋlɩa nɩkplaan 'clalɩ 'nyɩ n cla anyɩ lebhe 'a cɩ 'tanɩ 'matɩ lebhe n bhibhie Toa ala da, 27sa Toa 'titi ‑wa anyɩ, ‑ofi lebhe a yaan wabha 'nyɩ a li ‑danʋfʋɛ lebhe Laagɔ cɩ n 'wlʋlʋ 'lɛ. 28Toa cɩ n 'wlʋlʋ 'lɛ 'nyɩ n ya 'lɛ ‑laagɔzɔan ci. ‑Ma ‑pɔtɔnʋ, ka n wlʋnɩ 'lɛ ‑laagɔzɔan 'nyɩ n cɔlɔ 'lɛ Toa cɩ.»
29Na, ɔla gɩlɩnyaa* yɔɔ 'cla lebhe: «'Lɩka ‑pɔtɔnʋ 'ka 'kanɩkanɩ ‑n nyɩtɛnɩ 'lɛ 'kpataa, 'nyɩ ‑n nyɩtɛlɩ 'tanɩ 'lɛ ‑nyandla nɩkplaan. 30‑Pɔtɔnʋ, ‑a ‑cinɩ sɛɛ lebhe ‑n ‑ci wɔlɩa ‑tɛtɛa 'nyɩ ‑n 'matɩ 'tanɩ lebhe ma 'clɔɔ neen. Ɩla gbʋ, dɛ ‑a li 'lɛ ‑danʋfʋɛ lebhe ‑n 'wlʋlʋ Laagɔ cɩ.» 31‑Ma Zozii ya maa 'cla lebhe: «A kanɩ ‑pɔtɔnʋ 'na pɔɔtɛtɛ bha? 32'Lɩka clɩɩa ci 'yɛpɩ 'nyɩ ɩ ya ŋeni ɩya a 'ka 'gu, nclɔɔ nclɔɔ 'ka ɔla da 'manɩ, ɩya a 'ka 'dɛ ‑amʋ bhlo te. ‑Ma n 'ta bhlo ‑glɩ, sa Toa ‑kʋʋn cɩ na. 33Na, ka n solu 'lɛ anyɩ ɩmɩ ‑naa ‑tɛtɛa ɩya a 'kaan nɩkplaan pupue 'lɩlɩ. 'Kwlɩ cɩ 'ka anyɩ bhɩa ‑laagɔzɔan. ‑Ma a zʋ 'tɛtɩ, sa n ya ‑laagɔzɔan ‑sɩa na!»
Currently Selected:
Zan 16: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.