YouVersion Logo
Search Icon

1 Kolt 1

1
‑Ayopalɩɛ
1‑Amʋ Pɔlʋ, Laagɔ yaan la 'nyɩ ɔ ya wabha lebhe n 'plɩ Zozi Klisi 'la lobhulobhunyɔ*. N ‑ya ‑a bholi Sɔsʋtɛnɩ, 2‑anyɩ ‑ɔ zie 'lɛ ‑laagɔnɩkplaa 'la ncɛlɩa ‑ɔ ‑kʋ 'lɛ Kolɛntɩdua 'kʋ na. Laagɔ ya maa ‑kplɔ Zozi Klisi nɩkplaan 'nyɩ ɔ ya 'lɛ maa la le maya maa 'fɩan, daa ‑tɛtɛa ‑ɔ sla 'lɛ ‑ala ‑Kwlenyɔ Zozi Klisi 'ŋlɩ, ɔmɔa ‑ɔ ‑glɩ 'lɛ mala ‑Kwlenyɔ ɩya ‑anyɩ ‑ma ‑a 'nɔ na, ma 'ka ‑kplɔkplɔnya 'plɩ. 3'Naa 'nyupalɩɛ ɩya pupuea ‑ɩ 'wlʋlʋ 'lɛ ‑a To Laagɔ ɩya ‑ala ‑Kwlenyɔ Zozi Klisi wlɩɩn na, kʋ anyɩ 'kʋ.
Pɔlʋ bhɔlʋ Laagɔ
4N bhɔlʋ Laagɔ#1.4 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «'Na Laagɔ». clɩɩa 'fɩan anyɩ 'wluku, 'nanɩa ɔ nʋ 'lɛ anyɩ Zozi Klisi nɩkplaan na ɩla gbʋ. 5Sa, ɔmɔ nɩkplaan, a ya 'bhɛlɩa ‑tɛtɛa 'lɩ, wɔɔnyɩtʋa 'nɩa ‑tɛtɛa ɩya wɔɔcibhlilie 'nɩa ‑tɛtɛa. 6Ɩ pala lebhe Klisi 'la wɔlɩa ma ‑salɩ 'lɛ anyɩ 'dɩ 'kʋ na, ya anyɩ sidiin sakʋda 'lɩ. 7Ɩ gba na, a 'ta Laagɔ 'la 'nanɩa bhlogbɩɩ ‑mie, anyɩa ‑ɔ ‑bɛ 'lɛ clɩɩa 'kʋa ‑ala ‑Kwlenyɔ Zozi Klisi 'ka 'lɛ ɔcɩ pala na. 8Ɔmɔ ‑ɔ ‑cɩ ka 'lɛ anyɩ 'tɛtɩɩn zʋ ‑aan bhɩalɩdaa, ɩya ‑ala ‑Kwlenyɔ Zozi Klisi 'la clɩɩa 'kʋ, ma 'la ka anyɩ 'gesalɩda 'lɩ. 9Laagɔ ‑ɔ la 'lɛ anyɩ le aya ‑ala ‑Kwlenyɔ Zozi Klisi, ɔla 'Cʋa 'ka bhlo 'plɩ, 'nyɩ ma cɩɔ ‑delikʋtɛbhalɩ.
A 'la doa nɩkplaan
10Bholiecɩnyɩ, ‑ala ‑Kwlenyɔ Zozi Klisi 'la 'ŋlɩa nɩkplaan, n 'clalɩ anyɩ le anyɩa 'fɩan, a 'plɩ bhlo ɩya nɩkplaandolɩɛ 'la kʋa anyɩ sidiin. 'Naa a 'plɩ bhlo ɩya a kalɩ 'wugo bhlo ɩya wɔɔgugwie bhlo. 11N bholiecɩnyɩ, Klowee 'la 'slinyaa yaan jlopla lebhe 'slagbʋ ‑kʋ anyɩ sidiin. 12Ka n ‑wa 'lɛ le n 'ka 'cla lebhe nclɔɔ nclɔɔ nyɩtɛ 'nyɩ ɔ cla lebhe: «‑Amʋ, n ‑ya Pɔlʋ ‑plɔ 'lɛ.» «‑Amʋ, n ‑ya Apolɔsʋ.» «‑Amʋ, n ‑ya Pɩɛlɩ.» «‑Amʋ n ‑ya Klisi.» 13Na, ka Klisi ‑polio 'lɛ bha? Pɔlʋ ma bho 'lɛ dabhlalɩsua 'ciin ala gbʋ bha? Pɔlʋ 'la 'ŋlɩa nɩkplaan ma zʋlʋ 'lɛ anyɩ 'nyu 'wlu bha? 14Laagɔ, ɔmɔ ‑awukʋa 'nyɩ n 'ta anyɩ sidiin 'la nclɔɔ bhlogbɩɩ 'nyuwluzʋ, ‑n 'ta le Klisipusu ɩya Gayusu ‑tɛɛ na. 15Na, nclɔɔ ‑ylɛylɛ cɩ 'ta 'cla lebhe 'na 'ŋlɩa nɩkplaan ma ‑zʋlʋ 'lɛ anyɩ 'nyu 'wlu. 16‑Ghɛɛ, n ya Sefanasɩ 'la 'slinyaa ‑ma 'nyuwluzʋmʋ. Mala leen, 'n gugu 'ta le n ya ‑awlɛ ‑buun nclɔɔ 'nyu 'wlu zʋ. 17Sa n 'ta ncɛlɩ 'nyuwluzʋkan Klisi 'taan 'lɛ lobhu, ‑ma ka ɔ lobhuun 'lɛ le n ‑sa Dɩnanɩa*, 'nyɩ n ‑salɩ 'tɩɩ neenzizieen, ɩya Klisi 'la dabhlalɩsua 'la ka 'kpɔkpɔ 'plɩ.
Klisi ‑glɩ 'lɛ Laagɔ 'la 'tɛtɩa ɩya ɔla dɩgalɩa
18‑Masa, dabhlalɩsua 'la pliciea ‑glɩ maa ‑ɔ ‑mlɔɔ 'lɛ 'la gbazɔ, pɔɔbhlagbɩ. ‑Ma maa ‑ɔ lɩ 'lɛ gbʋʋnsalɩɛ na 'la gbazɔ, ‑anyɩ ‑ala gbazɔ, ɩ ‑glɩ Laagɔ 'la 'tɛtɩ. 19Sa, ɩ ‑zieo lebhe: Dɩgalɩnyaa 'la dɩgalɩa, n cɩ 'kɩɩ 'kʋŋomu ɩya n 'ka wɔɔcibhlinyaa 'la wɔɔcibhliliea 'dʋʋnsa. 20'N 'laa kanɩ dɩgalɩnyɔa bha? 'N 'laa kanɩ ‑jlɩmaazienyɔa* bha? 'N 'laa kanɩ 'bhlɛsʋʋ ‑naa nɩkplaan 'la wɔɔtɩtɔnyɔa bha? ‑Laagɔzɔan 'la dɩgalɩa, Laagɔ 'tɩɩ pɔɔbhlalɩɛ ple bha? 21‑Masa, ‑laagɔzɔan 'ta 'lɛ ɩla dɩgalɩa 'ma ɩya ɩ 'ka 'lɛ Laagɔ ɔla dɩgalɩa nɩkplaan cibhlilili na, pɔɔbhagbɩ 'la pliciea ɩ ‑pla 'lɛ Laagɔ 'tʋ le ɔ 'plɩlɩ 'kʋ ɩya ɔ 'ka maa ‑ɔ ‑ka 'lɛ ɔla pɔɔtɛtɛ na gbʋʋnsa. 22Zifʋnyaa* 'clalɩ ghledɩ, 'nyɩ Glɛkɩnyaa 'matɩ 'lɛ dɩgalɩ. 23‑Ma ‑anyɩ, Laagɔ 'la ‑Sasanyɔa* ma bho 'lɛ dabhlalɩsua 'ciin na, ɔmɔ ‑a plici 'lɛ, 'nyɩ ɩ ‑glɩ 'lɛ Zifʋnyaa 'la ‑ngasi 'nyɩ maa ‑ɔ 'ta 'lɛ Zifʋnya ‑glɩ na 'la gbazɔ, ɩ ‑glɩ 'lɛ pɔɔbhlagbɩ. 24‑Ma maa Laagɔ la 'lɛ na, ka ma ‑ka Zifʋnya ‑aana Glɛkɩnya ‑glɩo na, mala gbazɔ, Klisi ‑glɩ 'lɛ Laagɔ 'la 'tɛtɩa ɩya Laagɔ 'la dɩgalɩa. 25Sa ɩmɩa ‑ɩ ‑glɩ 'lɛ Laagɔ 'la pɔɔbhlagbɩ na, ɩ ‑glɩ dɩgalɩ 'nyɩ ɩ zi ncɛlɩ 'la dɩgalɩa 'kʋ, 'nyɩ ɩmɩa ncɛlɩ lɩ 'lɛ Laagɔ 'la gbazɔ le ɩ 'ta 'tɛtɩ ‑ka na, ɩ ‑ka 'lɛ 'tɛtɩ 'nyɩ ɩ zi 'lɛ ncɛlɩ 'la 'tɛtɩa 'kʋ.
26Bholiecɩnyɩ, anyɩa Laagɔ la 'lɛ na, anyɩ 'titi a kope ka ncɛlɩa a glɩ 'lɛ na. Ncɛlɩ 'ci 'kʋ, dɩgalɩnya ‑bhutukpa 'ta anyɩ sidiin ‑kʋ, 'tɛtɩkalɩnya ‑bhutukpa 'ta anyɩ sidiin ‑kʋ, 'ŋlɩnkalɩlɔlʋ nɩkplaan 'la ncaabhutukpa 'ta anyɩ sidiin 'kʋ. 27‑Ma ɩmɩa ‑ɩ ‑glɩ 'lɛ ‑laagɔzɔan 'la da pɔɔbhlagbɩ na, ɩmɩ Laagɔ sla 'lɛ de le ɔ 'ka dɩgalɩnyaa ‑zoonbhlalɩ, 'nyɩ ɩmɩa ‑ɩ 'ta 'lɛ 'tɛtɩ ‑ka ‑laagɔzɔan na, ɔ yɩɩ 'lɛ desla le ɔ 'ka ɩmɩa ‑ɩ ‑ka 'lɛ 'tɛtɩ na 'dʋʋnsa. 28Ɩmɩa ‑ɩ 'ta 'lɛ lʋʋ ‑ylɛylɛ ‑glɩ ‑laagɔzɔan, 'nyɩ ncɛlɩ bu 'ta 'lɛ na, lɩɩa maa la 'ta 'lɛ lʋʋ na, ɩmɩ Laagɔ sla 'lɛ de le ɔ 'ka 'ŋlɩkalɩlɩɩa 'dʋʋnsa, 29ɩya nclɔɔ bhlogbɩɩ 'la kasɛ ɔmɔ Laagɔ 'ci 'kʋ gbɩɩnkpoli. 30Ɔmɔ ‑ɔ zʋ 'lɛ anyɩ Zozi Klisi nɩkplaan. Ɔmɔ ‑ɔ 'plɩ 'lɛ ‑ala gbʋ, dɩgalɩa ‑ɩ 'wlʋlʋ 'lɛ Laagɔ cɩ, 'nyɩ ‑ɩ ‑glɩ 'lɛ 'kʋnylugolulɩɛ, ‑kplɔlɩɛ ɩya ‑ncɩkalɩɛ na. 31Na, saa Zieziewɔlɩa* bhli 'lɛ 'kʋ na, ɔmɔ ‑ɔ ‑ka ‑wa le ɔ 'ka gbɩɩnkpoli na, 'naa ɔ kpolili ‑Kwlenyɔ nɩkplaan.

Currently Selected:

1 Kolt 1: NTLD13

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy