San Juan 13
13
Jesús va³ne¹jon³ ntso⁴co⁴ cho⁴ta⁴-le⁴
1Cje³ vi³tjo³-jin²sa³ sˀoi¹ pa²xco⁴. Tjin¹jin³-le⁴ Jesús nca³ je³nčhoa¹čhian³ hora-le⁴ nca³ coi⁴tjo³-ni³ son³ˀnte³, nca³ coai⁴con³-le⁴ Nˀai³-na¹. Jesús tjao²que³ coan³ nca³tsˀi³ xi³ tsˀe⁴ xi³ tjio¹ i⁴ son³ˀnte³-vi⁴, cˀoa⁴-sˀin² tjao²que³ coan³ sa³ˀnta³ xi³ je³tˀa³-ni³.
2Cˀia⁴ nca³ je³coan³ tsa³cjen² nca³ njion², je² nai⁴² je³cˀoa⁴-sˀin² qui³sca³ni¹jin³ ni⁴ma⁴-le⁴ Judas, xi³ ˀnti¹-le⁴ Simón Iscariote, nca³ je² xi³ cˀoe⁴²tˀain³ na⁴jmi¹ xi³ tˀa³tsˀe⁴ Jesús. 3Ve³ Jesús nca³ je² Nˀai³-na¹ cˀoa⁴-sˀin² qui³tsjoa³-le⁴ nca³yi³je³ cjoa⁴ ja⁴ya³ ntsja³, nca³ cˀoa⁴-sˀin² ja³ˀai³-ni³ tˀa³tsˀe⁴ Ni³na¹, cˀoa⁴-ti⁴ ya⁴ coai⁴con³-le⁴ Ni³na¹. 4Ji³so²tjen⁴tˀa³ ya¹mi²xa⁴ nca³ je³tsa³cjen², tsa³cja³ˀa¹xin² tso⁴nca⁴-le⁴, qui³scoe¹ jnco³ toalla, tsa³cˀe¹cja¹ntia³. 5Cˀia⁴ tsa³cˀe¹ya³ na³nta¹ jnco³ bandeja, tsa³ca³ne¹jon³ ntso⁴co⁴ cho⁴ta⁴-le⁴. Qui³si³tsje³jon³-ni³ toalla xi³ tji¹cja¹ntia³. 6Cˀia⁴ nca³ ja³ˀai³ ca³tˀa³-le⁴ Simón Pedro, Pedro cˀoi⁴qui³tso⁴-le⁴: Señor, a³ ji³ coa⁴ne²join³ ntso⁴coa³. 7Jesús cˀoi⁴qui³tso²-le⁴: Je² xi³ sˀian³ nca³ an³, li²coi³ ˀyai³ ntˀai⁴-vi⁴, to⁴nca³ coan⁴scan³-ni³ coan⁴cho⁴ya³-li². 8Pedro qui³tso²-le⁴: Li²coi³ cˀia³ coa⁴ne²join³ ntso⁴coa³. Jesús qui³tso²-le⁴: Tsa² tsi² coa³ne³jon³-le²³, li²coi³ sˀe⁴-li² ˀnte³ cao⁴ an³. 9Simón Pedro cˀoi⁴qui³tso²-le⁴: Señor, a³li² to⁴je²-jin² ntso⁴coa³, cˀoa⁴-ti⁴ ntsa⁴ cao⁴ jcoa³. 10Jesús cˀoi⁴qui³tso²-le⁴: Je² xi³ tsa³ca³nco¹ya³, to⁴je² ntso⁴co⁴ xi³ ma³chjen¹-le⁴ nca³ va³ne¹jon³, nca³ je³tsje³ nca³yi³je³. Jon² je³tsje³ cjoaon³, nta³ tsa² tsi² nca³tsˀio³. 11Jesús je³ve³-le⁴con³ ˀya³ xi³ cˀoa⁴-sˀin² cˀoe⁴²tˀain³ na⁴jmi¹ xi³ tˀa³tsˀe⁴. Coi³ cˀoa⁴qui³tso²-ni³: Li²coi³ tsje³ cjoaon³ nca³tsˀio³. 12Cˀia⁴ nca³ je³tsa³ca³ne¹jon³ ntso⁴co⁴, tsa³cˀa³cja¹ tso⁴nca⁴-le⁴, tsa³cˀe²jna³tˀa³-nca¹ni³ ya¹mi²xa⁴, cˀoi⁴qui³tso²-le⁴: A³ ma³cho⁴ya³-no³ xi³ ca²si³cao⁴-no³. 13Jon² Maestro cˀoa⁴ Señor ˀmi²-nao¹³. Cjai¹nca³ nta³ vi³xon¹³, nca³ coi³ nia¹³. 14Ne³-ni³ tsa² an³ xi³ Señor, xi³ Maestro, ca²va³ne³joan²³ ntso⁴co³, cˀoa⁴-ti⁴ jon² ma³chjen¹-no³ nca³ ta⁴ne²jon³-nca³ñao¹³ ntso⁴co⁴ xi²nquio⁴³. 15Cˀoa⁴-sˀin² ca²vˀe³jna²cho⁴ya³-no³ jo³-sˀin² nca³ an³ ca²si³cao⁴-no³. Cˀoa⁴-sˀin² ti⁴cao⁴³ xi²nquio⁴³. 16Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ cho⁴ˀnta³ ma³, a³li² je²-jin² ti¹tjon²-le⁴ nai³-le⁴. Ni⁴je²-jin² xi³ qui³ni²ca³sen¹ ti¹tjon²-le⁴ je² xi³ qui³si³ca³sen¹ nca³ je². 17Tsa² ˀya³-nio¹³ cjoa⁴ je²-vi⁴, jo¹ to⁴nta³-no³ tsa² cˀoa⁴sˀiaon⁴³. 18A³li² cˀoa⁴-sˀin² nchja²³ xi³ tˀa³tsaon⁴³ nca³tsˀio³. ˀve³nia¹³ jo³ cjoan³ xi³ tsa³cja³ˀa³jian³, to⁴nca³ jme¹-ni³ nca³ cˀoa⁴-sˀin² ca²ta³vi³tjo³son²-ni³ je² xon⁴ Escritura: Je² xi³ cjen²cao⁴-na³ nio⁴xti²la⁴, qui³tsjon²-na³. 19Cˀoa⁴ ti²xin³-no³ ntˀai⁴-vi⁴ to⁴nqui³-ni³ nca³ cˀoa⁴coan⁴, jme¹-ni³ nca³ coan⁴cjain¹-si¹ni³no³ nca³ an³ nia¹³ cˀia⁴ nca³ cˀoa⁴coan⁴. 20Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ cjoe¹tjao² xi³ an³ si³ca³sen¹³, an³ xi³ cjoe¹tjao²-na³. Cˀoa⁴ je² xi³ an³ cjoe¹tjao²-na³, cjoe¹tjao² xi³ qui³si³ca³sen¹-na³.
Jesús va¹ya³con³ ˀya³ xi³ cˀoe⁴²tˀain³ na⁴jmi¹ xi³ tˀa³tsˀe⁴
(Mt. 26:20-25; Mr. 14:17-21; Lc. 22:21-23)
21Cˀia⁴ nca³ je³cˀoa⁴qui³tso², Jesús aon³ coan³-le⁴, qui³si³qui²xi⁴ya³: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, jnco³ xi³ jon² cˀoe⁴²tˀain³ na⁴jmi¹ xi³ tˀa³tsˀan⁴. 22Cˀia⁴ nca³ˀi⁴ nca³jan¹ qui³sco²tsen³-le⁴ xi¹ncjin¹ cho⁴ta⁴-le⁴, nca³ tsi² tsa² ve³ ˀya³-ve⁴ xi³ cˀoa⁴tso²-le⁴. 23Jnco³ xi³ ti⁴je²-ni³ cho⁴ta⁴-le⁴, je² xi³ Jesús cjai¹nca³ tjao²que³, ti¹jna³tˀa³-le⁴ Jesús. 24Simón Pedro qui³si³cao⁴ seña, jme¹-ni³ nca³ sco¹na³nqui³-si¹ni³ ˀya³-ni³ xi³ cˀoa⁴tso²-le⁴. 25Cˀia⁴ je² xi³ ti¹jna³tˀa³-le⁴ Jesús cˀoi⁴qui³tso²-le⁴: Señor, ˀya¹-ni³. 26Qui³nchja⁴ Jesús: Je² ni¹ je² xi³ nio⁴xti²la⁴ ˀnchi⁴ tsjoa³-le⁴. Qui³si³ca³ˀnchi⁴ nio⁴xti²la⁴, qui³tsjoa³-le⁴ Judas Iscariote, ˀnti¹-le⁴ Simón. 27Cˀia⁴ nca³ je³qui³scoe¹ nio⁴xti²la⁴ ˀnchi⁴, cˀoa⁴-sˀin² je² nai⁴² Satanás ja³ˀa³sˀen³jin³-le⁴ Judas. Cˀia⁴ Jesús cˀoi⁴qui³tso²-le⁴: Je² xi³ nˀiain²³, xi¹ti¹ tˀiain⁴. 28Ni⁴ˀya³-jin² xi³ tjio¹tˀa³ ya¹mi²xa⁴ coan³cho⁴ya³-le⁴ a³-ni³ nca³ cˀoa⁴qui³tso²-ni³le⁴. 29Tjin¹ cˀa³ xi³ qui³si³cja³ˀai³tsjen³ nca³ coi³ nca³ je² Judas xi³ ti¹jna³-le⁴ ˀnti¹ ca²xa⁴taon⁴, coi³ nca³ Jesús cˀoi⁴qui³tso²-le⁴: Ti⁴ntai¹³ jme³-ni³ xi³ ma³chjen¹-na¹ i⁴ sˀoi¹-vi⁴, a³xo⁴ tˀai² jo³ tjin¹-lai⁴ cho⁴ta⁴yo⁴ma⁴. 30Cˀia⁴ nca³ Judas je³qui³scoe¹ nio⁴xti²la⁴, ji³tjo³ nti⁴ton⁴. Je³coan³ njion².
Je² cjoa⁴te¹xo³ma³ cho⁴tse⁴
31Cˀia⁴ nca³ je³ji³tjo³ Judas, cˀoi⁴qui³tso² Jesús: Ntˀai⁴ntai⁴ je³ji³tjo³je³ya³ ˀnti¹-le⁴ cho⁴ta⁴, cˀoa⁴ Ni³na¹ je³ji³tjo³je³ya³ xi³ tˀa³tsˀe⁴ nca³ je². 32Tsa² Ni³na¹ ji³tjo³je³ya³ xi³ tˀa³tsˀe⁴, cˀoa⁴-ti⁴ Ni³na¹ cˀoa⁴sje³je³ya³ Jesús cao⁴ cjoa⁴je³ya³-le⁴ xi³ ti⁴tsˀe⁴-ni³ Ni³na¹, nti⁴ton⁴ cˀoa⁴sje³je³ya³. 33ˀnti¹xti³, to⁴jo³ ti²jna⁴cao⁴-sa³no³ nqui²jnco³ tjo². Coi⁴jnchi¹sjai³-nao¹³, to⁴nca³ jo³ qui³xin³-le⁴ cho⁴ta⁴ judíos, cˀoa⁴xin³-no³ ntˀai⁴-vi⁴, jña³ nca³ cjoia¹³, jon² li²coi³ coan⁴ coa⁴nquion¹³. 34Jnco³ cjoa⁴te¹xo³ma³ cho⁴tse⁴ xi³ tsjoa³-no³: Ca²ta³ma³tsjoa³chao³ xi²nquio⁴³. Jo³-sˀin² nca³ an³ coan³tsjoa³que⁴-no³, cˀoa⁴-sˀin² ca²ta³ma³tsjoa³chao³ xi²nquio⁴³. 35Cˀoi⁴-sˀin² scoe⁴ nca³tsˀi³ nca³ jon² nio¹³ cho⁴ta⁴-na⁴, tsa² cˀoa⁴-sˀin² ma³tsjoa³chao³ xi²nquio⁴³.
Jesús va¹ya³con³ nca³ Pedro cˀoe¹jna³ˀma³cao⁴ nca³ je².
(Mt. 26:31-35; Mr. 14:27-31; Lc. 22:31-34)
36Simón Pedro cˀoi⁴qui³tso²-le⁴: Señor, jña¹ ti³ˀmi³. Jesús qui³tso²-le⁴: Jña³ nca³ cjoia¹³, li²coi³ coan⁴-li² cˀoin¹tjen⁴nqui³-nai¹³ ntˀai⁴-vi⁴, to⁴nca³ coan⁴scan³-ni³ cˀoin¹tjen⁴nqui³-nai¹³. 37Pedro qui³tso²-le⁴: Señor, a¹-ni³ nca³ tsi² coan⁴-na³ cjoi¹tjen⁴nqui³-si¹ni³le²³ ntˀai⁴-vi⁴. Je² ni⁴ma⁴-na⁴ cˀoe³jna²³ xi³ tˀa³tsi⁴. 38Jesús qui³tso²-le⁴: A³ ni⁴ma⁴-li⁴ cˀoe¹jnai³ xi³ tˀa³tsˀan⁴. Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³: Li²coi³ squi¹ˀntia¹ cha¹xi³cha¹ sa³ˀnta³ ji³ coi⁴jna³ˀma³cao⁴-nai¹³ jan² cˀa³.
Currently Selected:
San Juan 13: mauDBL
Highlight
Share
Copy
Want to have your highlights saved across all your devices? Sign up or sign in
© 1960, Wycliffe Bible Translators, Inc. All rights reserved.