Wani 13
13
Ketsutsi kemɨtiwaruhauxina teyɨ'ɨkitɨwamete waketatetsie
1Merikɨtsɨ Patsikwa 'ixɨarariyari pɨkatsutɨariewekai 'akuxi. Ketsutsi katinimaikaitɨni tukarieya maye'akaikɨri mɨyupatakɨ 'ena kwiepa mɨyemiekɨ yu'ukiyari hetsɨa. Yuhetsɨa miemete kwiepa memu'uwa kemɨtiwanaki'eriekai, 'aye'arɨkamekɨ kaniwanaki'eriekaitɨni.
2Hikɨtsɨari mekatenikwakaitɨni. Kauyumarie 'ari mɨpaɨ Kura 'Itsikariutitanaka Tsimuni nu'aya katiniu'iyaritɨakaitɨni Ketsutsi mɨyetuanikɨ. 3Merikɨtsɨ Ketsutsi mɨpaɨ katinimaikaitɨni 'ukiyarieya naime mɨtiyetuiri mamayatsie. Kakaɨyari hetsɨa meyetɨakɨ timaitɨ, meta Kakaɨyari hetsɨa mɨyemiekɨ timaitɨ, 4kananukukeni mexa 'aurie makatei. Herie mieme yu'ixuriki 'anutihɨnaka watsiɨxame 'anuhurieka kanayɨhɨani. 5Haa 'akatuaka pateyutsie, kanitsutɨani wahauxinatɨ teyɨ'ɨkitɨwamete waketatetsie, wakawatsiɨxatɨ watsiɨxamekɨ kɨmana mayɨhɨakaikɨ.
6Hikɨ Tsimuni Pekuru manukatei kepauka munua, mɨkɨ mɨpaɨ katinitahɨawe:
—¿Ti'aitame, 'ekɨ neketate petitihauxini?
7Ketsutsi mɨpaɨ katinita'eiya:
—Ne tita nemɨtiyuriene 'atsipepɨkatimate hikɨ, peru 'arikeke pekaneitimaimɨkɨ.
8Pekuru mɨpaɨ katinitahɨawe:
—Hatsuaku pepɨkanetsihauxinani neketatetsie.
Ketsutsi mɨpaɨ tita'ei:
—Xɨka nekametsihauxinani, nehetsɨa mieme pepɨka'ayani.
9Tsimuni Pekuru mɨpaɨ katinitahɨawe:
—Ti'aitame, neketatetsie xeikɨa pepɨkanetsihauxinani, matsi nemamatetsieta meta nemu'utsieta.
10Ketsutsi mɨpaɨ katinitahɨawe:
—Kemɨ'ane meku'ɨwaxɨ pɨkaheiyehɨwa hauxinarika, yuketatsie xeikɨa. Matsi naitɨ kaneu'itiyaka. Xemerita xekani'itiyatɨkani, peru yunaitɨ pɨkatixaɨ.
11Mɨkɨri kanimaikaitɨni kepaikɨ miyetuanikekai, 'ayumieme yunaitɨ xemɨka'itiyatɨka kaniutayɨni.
12Waketatetsie waruhauxika, yu'ixuriki herie mieme 'anakatɨka, mana 'ayerɨka, hutarieka mɨpaɨ katiniwarutahɨawe:
—¿Xetemate tita nemɨtiuyuri xehetsiemieme? 13Xeme Ti'ɨkitame Ti'aitame xepɨnete'uterɨwa. 'Aixɨa xepaitɨka ne mɨhɨkɨkɨ. 14Merikɨte, ne Ti'ɨkitame Ti'aitame nehɨkɨtɨtɨ xɨka xeketatetsie nexe'uhauxini, kaneuyeweka xemeta yunaitɨ xemɨyutihauxinani yuketatetsie. 15Xemɨnetsi'ɨkenikɨ 'inɨari nekanixe'upitɨani xemeta mɨpaɨ xemɨteyuriekakɨ nemɨxe'uyuri hepaɨ. 16Yurikɨ, mɨpaɨ nekanaineni, nixewitɨ waɨriyarika ti'uximayatame pɨkamariwe keyuri kutsiyarieya, meta nixewitɨ nɨ'ariekame pɨkamariwe keyuri meinɨ'a. 17Xɨka 'ipaɨ xetemaika, xekaniyutemamawiekakuni xɨka yaxetekahuni.
Ketsutsi kemutayɨ Kura kemɨtiyetuani
18»Yunaime xehepaɨtsita nepɨkatikuxata. Ne nepɨxemate kehate nemɨxe'anuyexei. Matsi mɨpaɨ nekatiniuyurieni 'utɨarika maye'anikɨ mɨpaɨ maine: “'Iya ne'ikwai mɨkwakai yukeputsakɨ pɨnetsi'uketsi”.
19»Hikɨri nekatinixetaxatɨamɨkɨ yakatiyɨwekaku 'akuxi, yuri xemɨteta'erienikɨ kename ne nehɨkɨ kepauka mɨpaɨ mɨtiyɨnitsie. 20Yurikɨ, yurikɨ mɨpaɨ nekanaineni, kemɨ'ane mitanaki'erieni kemɨ'ane nemanunɨ'ani, mɨkɨ ne kanenitanaki'erimɨkɨ, kemɨ'ane ne mɨnetsi'utanaki'eri, kemɨ'ane mɨnetsiheyenɨ'a kaniutanaki'erienita».
21Mɨpaɨ 'utayɨka Ketsutsi kaniuyukahiwerieni yu'iyaritsie, katiniutahekɨata, mɨpaɨ kaniutayɨni:
—Yurikɨ mɨpaɨ mekanaineni, xewitɨ xeme kaneniyetuamɨkɨ.
22Teyɨ'ɨkitɨwamete mekaniuyuxexeiyakaitɨni me'iyarixietɨ 'atsimekatemaitɨ kemɨ'ane mɨraxatakai. 23Xewitɨ tiyɨ'ɨkitɨwame Ketsutsi 'aurie kaniukateitɨni Ketsutsi minaki'eriekai. 24Tsimuni Pekuru 'ayumieme kanimawiya, mɨpaɨ katinitahɨawe:
—Kepai pepɨraxata ketineutahɨawi.
25Mɨkɨ Ketsutsi 'aurie 'ukaitɨ ta'aurie 'aweka mɨpaɨ katinitahɨawe:
—Ti'aitame, ¿kepaikɨ pɨhɨkɨ?
26Ketsutsi mɨpaɨ katinita'eiya:
—'Iya kanihɨkɨtɨni paa tarimeyari nemi'ɨitɨani ne'itihawiyame xakɨtsie.
Hikɨ paa 'utihawiyaka kanenuku'ɨni, Kura 'Itsikariutitanaka Tsimuni nu'aya kaniu'ɨitɨani. 27Mɨkɨ paa 'anu'ɨku, 'ana Kauyumarie kaniwiya.
Ketsutsi mɨpaɨ katinitahɨawe:
—Kepemɨtiyurieni, xeiya yaketineuyuri.
28Mɨkɨ mana mematekai nixewitɨ 'atsipɨkatimaikai titayari mɨrehɨawekai. 29Kura watumini maname mahanakaikɨ, hipatɨ mɨpaɨ mekateniku'eriwakaitɨni Ketsutsi mɨpaɨ rehɨaweme mekani'eriekaitɨni: Tita temɨteuyehɨwa 'ixɨararipa ketinenanaimie, yatɨni tumini mɨwa'ɨitɨanikɨ tixaɨtɨ memɨkatehexeiya meteku'eriwatɨ. 30Kura paa 'anu'ɨka kaneyani. Kaniɨyɨwikaitɨniri.
Hekwamekɨ kemɨtiu'aita
31Merikɨtsɨ kepauka metɨa, Ketsutsi mɨpaɨ kaniutayɨni:
—Hikɨrixɨa Yuri Tewi witsi'anetɨ kanayeitɨarieni, Kakaɨyarita witsi'anetɨ kanayeitɨarieni hetsiena tiwiyatɨ. 32Xɨka Kakaɨyari witsi'anetɨ 'ayeitɨarieni hetsiena tiwiyatɨ, Kakaɨyarita yɨkɨmana witsi'aneme kaneyeitɨamɨkɨ Yuri Tewi, kwitɨwa witsi'aneme kaneyeitɨamɨkɨ.
33»Neniwema, yapaɨmexɨa xeikɨa xehamatɨa nekaniuyeikamɨkɨ. Xekanenikuwautɨwekuni. Kenemɨtiwakɨhɨawekai huriyutsixi, hakewa nemeyemie xepɨkayɨwawe xemeta'axɨanikɨ ne'utaitɨ, yaxeikɨata nekatinixehahɨaweni xeme hikɨ.
34»Hekwamekɨ nekatinixe'aitɨaka, xekeneyunaki'erieka. Ne kenemɨtixenaki'eriekai hepaɨ, xekeneyunaki'erieka yunaitɨ. 35'Ikɨkɨ yunaitɨ mekatenimaikakuni nehetsɨa miemete teyɨ'ɨkitɨwamete xemɨhɨkɨkɨ, xɨka xeyunaki'erieka yunaitɨ».
36Tsimuni Pekuru mɨpaɨ katinitahɨawe:
—Ti'aitame, ¿hakewa pepeyemie?
Ketsutsi mɨpaɨ katinita'eiya:
—Hakewa nemeyemie pepɨkayɨwe pemɨnetsi'anuweiya hikɨ, 'arikeke pepɨnetsi'anuweiya.
37Pekuru mɨpaɨ katinitahɨawe:
—Ti'aitame, ¿titayari nekatiyɨwe nemɨmatsi'anuweiyakɨ hikɨ? Netukari nepɨyetuani 'ahetsiemieme.
38Ketsutsi mɨpaɨ katinita'eiya:
—¿'Atukari nehetsiemieme petiyetuani? Yurikɨ mɨpaɨ nekanaineni, wakana 'akuxi katahiwawekaku, 'ekɨ haikakɨa pepɨ'aku'imawani, kename pekanetsimate pe'utaitɨ.
Currently Selected:
Wani 13: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.